Read Tarifit Matta 20 Bible Online

Matta 20 - Tarifit bible

Matta 20

¹"Aqa ȓmulk ujenna amecnaw ijjen n bab n umarjeƹ uḍiȓ. Iffeɣ ɣar ṣbaḥ zic aḏ igg ixeddamen ḏeg umarjeƹ uḍiȓ nnes.

²Itafeq ak ixeddamen nni x yijjen n dinar i nhar, issekk-iṯen ɣar umarjeƹ nnes.

³Iffeɣ-d ɣar jwayeh nni n tesƹa yufa ixeddamen nneɣni qqimen ḏi ȓmewqef bȓa ȓxeḏmeṯ.

⁴Inna-asen: Ruḥem uȓa ḏ kenniw ɣar umarjeƹ inu, ataf aḏawem xeǧseɣ min ṯesḏaheǧem.

⁵Kkaren ruḥen. Iffeɣ-d ɣar jwayeh n ṯenƹac ƹaweḏ ɣar jwayeh n ṯȓaṯa uƹecci igga nnefs ȓxeḏmeṯ.

⁶Uca iffeɣ-d ƹaweḏ ɣar jwayeh nni n xemsa uƹecci, yufa ixeddamen nneɣni qqimen bȓa ȓxeḏmeṯ. Inna-asen: Min kenniw yuɣin ṯeqqimem ḏa nhar amen-ikmaȓ bȓa ȓxeḏmeṯ?

⁷Nnan-as: Walu, war ḏaneɣ isexḏem ḥadd. Inna-asen: Ruḥem uȓa ḏ kenniw ɣar umarjeƹ inu.

⁸Wami ṯeɣȓi ṯfuct, inna-as bab n umarjeƹ i uweqqaf nnes: Ȓaɣa-d i ixeddamen xeǧes-iṯen. Bḏa zeg yinni iy d yusin ḏ ineggura ƹaḏ i imezwura.

⁹Yinni ibḏan ȓxeḏmeṯ ɣar xemsa uƹecci, yuca-asen dinar dinar.

¹⁰Wami d usin imezwura tɣir-asen aḏasen yuc ktar walakin lla, uȓa n niṯni yuca-asen dinar dinar.

¹¹Wami ḏasen yuca dinar, mxeyyaqen ak bab n umarjeƹ.

¹²Nnan-as: Ixeddamen-a iy d yusin ḏ ineggura xeḏmen ijjen n ṯsaƹƹat waha, cek ṯuciḏ-asen amecnaw neccin ig yuwṯin tamara n nhar amen-ikmaȓ ḏi ṯfuct.

¹³Indeq-d bab n umarjeƹ inna-as i yijjen zzaysen: War c cmiṯeɣ ca ay ameddukeȓ. Yac cek ṯtafqeḏ akiḏi x yijjen n dinar niɣ lla?

¹⁴Ysi texȓiseṯ nnec uyur. Xseɣ aḏas uceɣ i wa iy d yusin ḏ aneggaru anect nnec.

¹⁵Ma war ɣari ȓḥaqq aḏ ggeɣ min xseɣ zi ṯmesȓayin inu? Niɣ ṯḥesḏeḏ-ayi wami ǧiɣ ṣaxiy?

¹⁶Amenni yinni iǧan ḏ ineggura aḏ ḏewȓen ḏ imezwura; yinni iǧan ḏ imezwura aḏ ḏewȓen ḏ ineggura."

¹⁷Wami igaƹƹeḏ Ƹisa ɣar ṯendint n Lquds, ḏeg ubriḏ iruḥ yuwi ṯenƹac nni n imeḥḍaren nnes waḥeḏsen inna-asen:

¹⁸"Aqa netgaƹƹaḏ ɣar Lquds mani ɣa itwaxḏeƹ Mmis n bnaḏem i arruyas n ȓfuqaha ḏ imseȓmaḏen n ccariƹa. Axas ḥekmen s ȓmewṯ,

¹⁹aṯ sellmen i yinni war iǧin ca zi Ayṯ-Israʼil. Axas ḍeḥcen, aṯ uwṯen s usɣun, aṯ ṣellben. Nhar wis ṯeȓtiyyam aḏ d itwasnekkar zi ȓmewṯ."

²⁰Ijjen n ṯemɣarṯ, nettaṯ ḏ yemmaṯsen n ṯarwa n Zabadi, ṯqarreb ɣar Ƹisa ak ṯnayen n ṯarwa nnes ṯsejjeḏ-as ḥima azzayes ṯettar can ȓḥajeṯ.

²¹Inna-as Ƹisa: "Min ṯrezzuḏ?" Ṯenna-as: "Ini-ayi aḏ qqimen yina ṯarwa inu s ṯnayen ḏi ȓmulk nnec ijjen x ufusi ijjen x uẓeȓmaḍ nnec."

²²Indeq-d Ƹisa inna-asen i Yaƹqub ḏ Yuḥanna: "Kenniw war ṯessinem ca min ṯettarem. Ma ṯzemmarem aḏ teswem zi ȓkas nni iy zi ɣa sweɣ nec ƹȓayen?" Nnan-as: "Wah, nzemmar-as!"

²³Inna-asen: "Wah, ataf aḏ teswem zi ȓkas inu. Walakin aɣimi x ufusi inu ḏ uẓeȓmaḍ inu war iǧi bu ḏ nec iy ṯ ɣa yucen, aḏ immuc i yinni umi ṯen isewjeḏ Baba."

²⁴Ƹecra nni n imeḥḍaren wami sȓin x min rezzun ṯnayen nni n wawmaṯen war ḏasen iƹjib ca ȓḥaȓ.

²⁵Iȓaɣa-yasen-d Ƹisa marra iḏsen inna-asen: "Qa ṯessnem arruyas n ṯmura ḥekkmen x ccuƹub nsen, yinni imeqqranen zzaysen tzeyyaren xasen.

²⁶Walakin manayenni itxeṣṣa war itiȓi ca jarawem. Lla, wenni irezzun aḏ iḏweȓ ḏ ameqqran jarawem itxeṣṣa-yas aḏ yiȓi ḏ axeddam nwem.

²⁷Wenni irezzun aḏ iḏweȓ ḏ amezwaru jarawem itxeṣṣa-yas aḏ yiȓi ḏ ismeɣ[49] nwem.

²⁸Mmis n bnaḏem uȓa ḏ netta war d yusi ca ḥima axas xeḏmen yiwḏan. Lla, netta yusa-d ḥima axasen ixḏem, axasen iṣeddeq ṯuḏarṯ nnes ḥima aḏ isenjem aṭṭas zzaysen."

²⁹Wami ffɣen zi ṯendint n Ariḥa, ḏfaren-d Ƹisa aṭṭas n ȓɣaci.

³⁰Ḏinni ṯnayen n iḍarɣaȓen qqimen x ṭṭarf n ubriḏ. Wami sȓin i Ƹisa iggur-d, snekkaren ṯɣuyyeṯ qqaren: "A Siḏi a Mmis n Ayṯ-Dawed, rḥem-aneɣ!"

³¹Zeyyaren xasen yiwḏan nnan-asen sqarem, walakin niṯni qqimen snekkaren ṯɣuyyeṯ ƹaḏ s jjheḏ qqaren: "A Siḏi a Mmis n Ayṯ-Dawed, rḥem-aneɣ!"

³²Ibedd Ƹisa, iȓaɣa-yasen-d inna-asen: "Min ṯexsem aḏawem ggeɣ?"

³³Nnan-as: "A Siḏi, qa nexs aḏ nurzment ṯiṭṭawin nneɣ!"

³⁴Qqsen-as i Ƹisa iḥaḏa-yasen ṯiṭṭawin nsen. Ḏeg umcan ḏewȓen twaȓan uca ḏfaren-ṯ.