Read Tarifit Matta 22 Bible Online

Matta 22 - Tarifit bible

Matta 22

¹Issawaȓ Ƹisa akiḏsen ƹaweḏ s ȓemƹani, indeq-d inna-asen:

²"Ȓmulk ujenna amecnaw ij uzeǧiḏ igga amensi ḏ ameqqran ḏi ȓfarḥ n mmis.

³Issekk ixeddamen nnes aḏ d ȓaɣan i yinni xef iƹareḍ ɣar umensi, walakin ugin aḏ d asen.

⁴Issekk ixeddamen nneɣni inna-asen: Inim-asen i yinni itwaƹarḍen: Aqa nec swejḏeɣ amensi inu, ɣarṣeɣ iƹejmiyen[52] ḏ iyenduzen inu iṣeḥḥan. Kuȓci iwjeḏ, araḥem-d ɣar ȓfarḥ!

⁵Walakin yinni itwaƹarḍen war ḏayes t uwin ca: ijjen iruḥ ɣar umarjeƹ nnes, ijjen ɣar ttijara nnes.

⁶Inneɣni ṭṭfen ixeddamen n uzeǧiḏ ƹedden xasen nɣin-ṯen.

⁷Iɣḍeb uzeǧiḏ issekk ȓƹaskar nnes aḏ nɣen lmujrimin nni aḏ sḥerqen ṯandint nsen.

⁸Inna-asen i ixeddamen nnes: Amensi n ȓfarḥ iwjeḏ, walakin yinni itwaƹarḍen war ṯ sḏihiǧen ca.

⁹Effɣeṯ ɣar mani temsagaren ibriḏen ƹarḍem-d ɣar umensi marra wi ɣa ṯafem ḏinni.

¹⁰Ruḥen ixeddamen nni ɣar ibriḏen uwin-d marra ug ufin ḏinni, iṣebḥanen ḏ iƹeffanen, ṯƹemmar ssaḥa s inewjiwen.

¹¹Yuḏef uzeǧiḏ ḥima aḏ iẓer inewjiwen, yufa ḏinni ijjen n uryaz war yareḍ bu warruḍ n ȓfarḥ.

¹²Iruḥ ɣares inna-as: Ay ameddukeȓ, mammec ṯeggiḏ ṯuḏfeḏ-d bȓa arruḍ n ȓfarḥ? Aryaz nni istuk.

¹³Uca inna-asen uzeǧiḏ i ixeddamen nnes: Carfem-ṯ zeg iḍaren ḏ ifassen nḍarem-ṯ barra ɣar ṯaǧest mani ɣa iȓin imeṭṭawen ḏ uɣeẓẓaẓ n ṯeɣmas."

¹⁴Inna-asen Ƹisa: "Aqa aṭṭas ig itwaƹarḍen, ḏrus iy ɣa itwaxḍaren."

¹⁵Kkaren ifarrisiyen mcawaren jarasen ggin ijjen n lxuṭa aḏ ṭṭfen Ƹisa x min iqqar.

¹⁶Ssekken ɣares can imeḥḍaren nsen ak can yiwḏan zi ȓḥizeb n uzeǧiḏ Hirudus aḏas inin: "A Lmuƹallim qa nessen belli cek nican iy ṯeǧiḏ. War teggwḏeḏ ca zeg yiwḏan ȓaḥeqqac war teggeḏ bu s wuḏemawen. Ṯseȓmaḏeḏ s ȓḥaqq mammec ixes Arebbi a nƹic.

¹⁷Ini-yaneɣ, min ḏac imeḍharen? Ṯsemmeḥ ccariƹa nneɣ a nxeǧes ḍḍariba i uzeǧiḏ Qayṣar niɣ lla?"

¹⁸Issen Ƹisa ixarwiḍen nni iy ḏaysen inna-asen: "A lmunafiqin, mayemmi ḏayi ṯsewjaḏem ṯaxcebṯ?

¹⁹Awim-ayi-d dinar nni n ḍḍariba ḥima aṯ ẓreɣ." Kkaren uwin-as-d ijjen n dinar.

²⁰Inna-asen: "Wi yiȓan teṣwirṯ-a ḏ yisem-a iy ḏayes?"

²¹Nnan-as: "N Qayṣar." Indeq-d Ƹisa inna-asen: "Min iǧan n Qayṣar ucem-as-ṯ i Qayṣar. Min iǧan n Arebbi ucem-as-ṯ i Arebbi."

²²Wami sȓin i ujawab nni qqimen tƹejjben ḏayes. Ssenni semḥen ḏayes uyuren.

²³Ḏi nhar nni, qarrben-d ɣar Ƹisa can yiwḏan zi ȓḥizeb n iṣadduqiyen (niṯni qqaren belli iwḏan war d tekkaren ca zi ȓmewṯ).

²⁴Kkaren nnan-as: "A Lmuƹallim, iqqar-aneɣ Musa aryaz meȓa immuṯ war d ijji bu ṯarwa, ṯajjaȓṯ nnes at yawi uȓwes nnes bac akiḏes d ijj ṯarwa i wumas nni immuṯen.

²⁵Neccin tuɣa akiḏneɣ sebƹa n wawmaṯen, imȓec umezwaru immuṯ war d ijji bu ṯarwa. Ṯamɣarṯ nni yuwi-t uȓwes nnes.

²⁶Amenni ig iweqƹen i wumas wis ṯnayen ḏ wis ṯȓaṯa aȓ wis sebƹa.

²⁷Aȓ uneggaru uȓa ḏ ṯamɣarṯ nni ṯemmuṯ.

²⁸Yum Lqiyama, umi ɣa ṯiȓi ṯemɣarṯ nni? Aqa uwin-t s sebƹa iḏsen."

²⁹Indeq-d Ƹisa inna-asen: "Kenniw ṯexḍam ȓaḥeqqac war ṯessinem ca Lkitab uȓa ḏ jjheḏ n Arebbi.

³⁰Xmi d ɣa kkaren yinni immuṯen iryazen ḏ ṯemɣarin war meǧcen ca war twasmeǧicen ca; Lla, aḏ iȓin amecnaw lmalaʼikaṯ ig iǧan ḏeg ujenna.

³¹Walakin cuf, yinni immuṯen aḏ d kkaren zi ȓmewṯ. Ma ƹemmarṣ war ṯeɣrim min ḏawem iqqar Arebbi?

³²Iqqar qa nec ḏ Arebbi n Brahim, ḏ Arebbi n Isḥaq, ḏ Arebbi n Yaƹqub."[53] Inna-asen Ƹisa: "Netta ḏ Arebbi n yinni iddaren maci n yinni immuṯen."

³³Sȓin yiwḏan i wawaȓ-a, ḏehcen ḏeg useȓmeḏ nnes.

³⁴Kkaren ȓḥizeb n ifarrisiyen wami d arrin ȓexbar belli Ƹisa ibelleƹ aqemmum n iṣadduqiyen, ȓexddenni munen jarasen.

³⁵Iruḥ yijjen zzaysen netta itcerraḥ ccariƹa, ixes aḏ ijarreb Ƹisa inna-as:

³⁶"A Lmuƹallim, min ṯeƹna ȓuṣiyeṯ iy iǧan ḏ ṯameqqrant qaƹ ḏi ccariƹa?"

³⁷Inna-as Ƹisa: "Aḏ texseḏ Siḏi Arebbi nnec s marra uȓ nnec, s marra arruḥ nnec, s marra ȓaƹqeȓ nnec.[54]

³⁸Ḏ ṯa ḏ ȓuṣiyeṯ iy iǧan ḏ ṯameqqrant ḏ ṯamezwarut.

³⁹Ȓuṣiyeṯ wis ṯnayen am ṯenni ṯamezwarut: Aḏ texseḏ ajjar nnec amecnaw ixef nnec.[55]

⁴⁰Ṯnayen-a n ȓuṣiyaṯ iy xef ṯebna Ccariƹa n Musa amen-ṯekmaȓ ḏ ttaƹalim n lʼanbiya."

⁴¹Ȓḥizeb n ifarrisiyen aqaṯen munen ḏinni, ikkar Ƹisa isseqsa-ṯen

⁴²inna-asen: "Min ḏawem imeḍharen ḏi Lmasiḥ? Uw ṯ yiȓan?" Nnan-as: "Ḏ mmis n Dawed."

⁴³Inna-asen Ƹisa: "Iwa mammec Dawed iqqar-as i mmis s Arruḥ n Arebbi: A Siḏi? Minzi Dawed inna:

⁴⁴Siḏi Arebbi inna-as i Siḏi: Qqim-d x ufusi inu, aȓ d ɣa ggeɣ ȓƹaḏyan nnec swadday i iḍaren nnec.[56]

⁴⁵Mammec ɣa yiȓi Lmasiḥ ḏ mmis n Dawed? Netta Dawed iqqar-as i Lmasiḥ: A Siḏi."

⁴⁶Uȓa ḏ ijjen war izemmar axas yarr ca n wawaȓ. U zi nhar nni war izƹim ḥadd aṯ isseqsa ƹaḏ ktar.