Read Tarifit Matta 25 Bible Online

Matta 25 - Tarifit bible

Matta 25

¹Ȓmulk ujenna amecnaw can ƹecra n ṯeƹzriyin ig iysin ȓeqnaḏeȓ, ffɣent aḏ ȓeqqant muȓay.

²Xemsa iḏsent ḏ ṯifɣaȓ, xemsa iḏsent ḏ ṯimiɣisin.

³Ṯifɣaȓ wami ysint ȓeqnaḏeȓ, war ysint bu zzect ḏ zziyada.

⁴Ṯimiɣisin niṯenti ysint akiḏsent zziyada n zzect ḏi ṯzeyyaṯin.

⁵Iƹḍeȓ muȓay war d yusi ca, niṯenti uḥȓent ṭṭṣent marra iḏsent.

⁶Ɣar ȓwesṭ n ǧiȓeṯ, sȓint i uȓaɣi iqqar aqa muȓay yusa-d, ffɣent aṯ ṯeȓqant!

⁷Kkarent ṯeƹzriyin nni serɣent ȓeqnaḏeȓ.

⁸Ṯifɣaȓ nnant i ṯimiɣisin: Ucent-aneɣ cwayt n zzect ȓaḥeqqac ȓeqnaḏeȓ nneɣ ƹȓayen aḏ xsin.

⁹Arrint xasent ṯimiɣisin nnant-asent: Lla, minzi war ḏaneɣ itqeddi ca i neccin ḏ kennint. Ruḥent ɣar ṯḥanet sɣent-id min ɣa ṯeḥḏajent.

¹⁰Wami ruḥent ṯefɣaȓ aḏ sɣent zzect, ixḍeȓ-d muȓay. Uḏfent akiḏes ṯinni iswejḏen ɣar ȓfarḥ, ṯbelleƹ ṯewwarṯ.

¹¹Menbaƹd usint-id ṯefɣar nnant-as s jjheḏ: A siḏi a siḏi, rzem-aneɣ ṯawwarṯ!

¹²Yarra xasent muȓay inna-asent: Aqa tesȓant ȓḥaqq: nec war kennint ssineɣ ca.

¹³Iḏen, iȓim ƹlabal ȓaḥeqqac war ṯessinem uȓa ḏ nhar nni uȓa ḏ ṯsaƹƹat nni.

¹⁴Nhar nni aḏ yiȓi am yijjen n ssiyyed irezzu aḏ isafer. Iȓaɣa-d i ixeddamen nnes ikellef-iṯen x wagȓa nnes.

¹⁵Yuca-asen ƹlaḥsab min umi zemmaren. Ijjen yuca-as xemsaȓaf n ȓuznaṯ n nnuqarṯ. Ijjen yuca-as aȓefayen. Ijjen yuca-as aȓaf. Ssenni iruḥ netta aḏ isafer.

¹⁶Ȓexddenni ikkar wenni umi yuca xemsaȓaf n ȓuznaṯ igga zzaysent ttijara irbeḥ xemsaȓaf nneɣni.

¹⁷Amenni igga uȓa ḏ wenni umi yuca aȓefayen, irbeḥ aȓefayen nneɣni.

¹⁸Walakin wenni umi yuca aȓaf n ȓuznaṯ, iruḥ netta iɣza ḏi ṯmurṯ isnuffar tmenyaṯ n siḏes.

¹⁹Wami ṯeƹḏu xarebbi n ȓweqṯ, iḏwer-d siḏiṯsen itegg akiḏsen ȓeḥsab.

²⁰Iqarreb-d wenni umi yuca xemsaȓaf n ȓuznaṯ, yarni-yas akiḏsent xemsaȓaf nneɣni. Inna-as i siḏes: A siḏi, ṯuciḏ-ayi cek xemsaȓaf n ȓuznaṯ, nec uwiɣ-d xemsaȓaf nneɣni.

²¹Inna-as siḏes: Ṯeggiḏ mliḥ ay axeddam aṣebḥan, cek ḏayek ȓaman. Ḏayek ȓaman x ḏrus, ȓexxu ac kellfeɣ x waṭṭas. Aḏef aḏ tfarḥeḏ ak siḏec.

²²Ƹaweḏ iqarreb-d uxeddam nni umi yuca aȓefayen n ȓuznaṯ inna-as i siḏes: A siḏi, ṯuciḏ-ayi cek aȓefayen n ȓuznaṯ, nec uwiɣ-d aȓefayen nneɣni.

²³Inna-as siḏes: Ṯeggiḏ mliḥ ay axeddam aṣebḥan, cek ḏayek ȓaman. Ḏayek ȓaman x ḏrus, ȓexxu ac kellfeɣ x waṭṭas. Aḏef aḏ tfarḥeḏ ak siḏec.

²⁴Iqarreb-d wenni umi yuca aȓaf n ȓuznaṯ inna-as i siḏes: A siḏi, nec ssneɣ cek ḏ ijjen n bnaḏem ṯeqsḥeḏ. Ṯmejjareḏ mani war ṯzerrƹeḏ ca, ṯkessiḏ min war teẓẓuḏ ca.

²⁵Ggwḏeɣ zzayek, ruḥeɣ snuffareɣ tmenyaṯ nnec ḏi ṯmurṯ, u aqac tmenyaṯ nnec.

²⁶Indeq-d siḏes inna-as: Ay axeddam amcum, ay afenyan! Iwa ṯessneḏ belli nec mejjareɣ mani war zerrƹeɣ, kessiɣ min war teẓẓuɣ.

²⁷Mayemmi war ṯejjiḏ tmenyaṯ inu ɣar iṣarrafen, ataf nec aḏ d aseɣ aḏ ysiɣ tmenyaṯ inu ḏ ȓefḍeȓ akiḏsent?

²⁸Uca inna-asen i ixeddamen nnes: Kksem-as aȓaf n ȓuznaṯ nni i wanita, arnim-ṯent i wenni ɣar iǧa ƹecraȓaf.

²⁹Wah, wenni iǧan ɣares itmarni-yas, aɣares yiȓi aṭṭas. Wenni war ɣar iǧi ca, itwaksi-yas uȓa ḏ min ɣares.

³⁰Axeddam-a iy ḏi war iǧi nnfaƹ, nḍarem-ṯ barra ɣar ṯaǧest. Ḏinni iy ɣa iȓin imeṭṭawen ḏ uɣeẓẓaẓ n ṯeɣmas.

³¹Xmi d ɣa yas Mmis n bnaḏem s lƹaḍama nnes, akiḏes marra lmalaʼikaṯ, aḏ iqqim x lƹarc nnes n lƹaḍama.

³²Aḏ njemƹen marra iwḏan zzaṯes, aḏ iƹzeȓ iwḏan ijjen zeg unneɣni amecnaw mammec wenni yarewwsen ȓebhayem iteƹzaȓ iḥuȓiyen zi ṯɣatin.

³³Iḥuȓiyen aṯen igg x ufusi, ṯiɣatin aṯent igg x uẓeȓmaḍ.

³⁴Ȓexddenni yinni iǧan x ufusi aḏasen yini uzeǧiḏ-a: A yinni iy ḏi igga Baba lbaraka araḥem-d kenniw warṯem ȓmulk iy ḏawem isewjeḏ zeg wami ṯeǧa ddunect.

³⁵Ȓaḥeqqac ṯufim-ayi ǧuzeɣ ṯseccem-ayi. Ṯufim-ayi ffuḏeɣ ṯsesswem-ayi. Ṯufim-ayi ḏ aɣrib ṯsezḏɣem-ayi.

³⁶Ṯufim-ayi ḏ aƹaryan ṯeggim-ayi arruḍ. Ṯufim-ayi heȓceɣ ṯbeddem akiḏi. Ṯufim-ayi twaḥebbseɣ ṯeggim-d ɣari zziyara.

³⁷Aṯ jawben iṣebḥanen nni aḏas inin: A Siḏi, neccin meȓmi c nufa ṯeǧuzeḏ, nsecc-ic? Niɣ ṯeffuḏeḏ, nsessew-ic?

³⁸Meȓmi c nufa ḏ aɣrib, nsezḏeɣ-icek? Niɣ ḏ aƹaryan, negga-ac arruḍ?

³⁹Meȓmi c nufa ṯheȓceḏ niɣ ḏ ameḥbus, nusa-d ɣarek?

⁴⁰Aḏ d yas uzeǧiḏ aḏasen yini: Aqa tesȓam ȓḥaqq: Min ṯeggim i yijjen n wuma ḏ amezyan zeg ayṯma, ṯeggim-ayi-t i nec.

⁴¹Ȓexddenni yinni iǧan x uẓeȓmaḍ aḏasen yini uzeǧiḏ: A yinni inƹeȓ Arebbi beƹƹḏem xafi! Ruḥem ɣar ṯmessi iy war ixessin ƹemmarṣ isewjḏen i Cciṭan ḏ ccayaṭin nnes!

⁴²Ȓaḥeqqac ṯufim-ayi ǧuzeɣ, war ḏayi ṯseccem ca. Ṯufim-ayi ffuḏeɣ, war ḏayi ṯsesswem ca.

⁴³Ṯufim-ayi ḏ aɣrib, war ḏayi ṯsezḏɣem ca. Ṯufim-ayi ḏ aƹaryan, war ḏayi ṯeggim bu warruḍ. Ṯufim-ayi heȓceɣ twaḥebbseɣ, war ɣari d ṯeggim bu zziyara!

⁴⁴Aṯ jawben uȓa ḏ yinni iǧan x uẓeȓmaḍ aḏas inin: A Siḏi, neccin meȓmi c nufa ṯeǧuzeḏ niɣ ṯeffuḏeḏ niɣ ḏ aɣrib niɣ ḏ aƹaryan niɣ ṯheȓceḏ niɣ ṯetwaḥebseḏ u neccin war c nƹiwen ca?

⁴⁵Aḏ d yas uzeǧiḏ aḏasen yini: Aqa tesȓam ȓḥaqq: Min war ṯeggim ca i yijjen n wuma ḏ amezyan zeg ayṯma, war ḏayi t ṯeggim ca i nec.

⁴⁶Aḏ raḥen yina ɣar ṯmessi iy war ixessin ƹemmarṣ. Walakin iṣebḥanen aḏ raḥen ɣar ṯuḏarṯ n ȓebda."