Read Tarifit Matta 26 Bible Online

Matta 26 - Tarifit bible

Matta 26

¹Wami ikemmeȓ Ƹisa awaȓ nni inna-asen i imeḥḍaren nnes:

²"Ṯessnem belli Ȓƹiḏ Ameqqran n Ayṯ-Israʼil iqqim-as yuwmayen. Ḏayes iy ɣa itwasellem Mmis n bnaḏem aḏ itwaṣelleb."

³Ssenni munen arruyas n ȓfuqaha ḏ imeqqranen n Ayṯ-Israʼil ḏi ṯeddarṯ n arrays n ȓfuqaha wenni umi qqaren Qiyafa.

⁴Mcawaren jarasen ḥima aḏ ṭṭfen Ƹisa s ṯeḥraymiṯ aṯ nɣen.

⁵Nnan jarasen: Itxeṣṣa war ṯ nteṭṭef ca ḏi Ȓƹiḏ ḥima ccaƹb war itegg ca lfawḍa.

⁶Ƹisa aqaṯ ḏeg ubilaj n Bayt Ƹanya ḏi ṯeddarṯ n yijjen qqaren-as Simƹan bu-jḏam.

⁷Ṯqarreb-d ɣares ijjen n ṯemɣarṯ ɣares ijjen n ṯzeyyat itwaṣenƹen s lmarmar,[64] ḏayes aman n lwarḏ iɣȓan s waṭṭas. Ṯferreɣ-as-ṯen x uzeǧif nnes wami iqqim ɣar missa.

⁸Wami t ẓrin imeḥḍaren min ṯexḏem, iqess-asen ȓḥaȓ nnan jarasen: "Mayemmi qaƹ aḍeyyeƹ-a?

⁹Ataf aman nni iȓi menzen s waṭṭas n tmenyaṯ aḏ mmucent i imesƹan!"

¹⁰Issen Ƹisa minxef ssiwȓen jarasen inna-asen: "Mayemmi ṯesxeyyaqem ṯamɣarṯ-a? Aqa min ḏayi ṯegga ḏ aṣebḥan aṭṭas.

¹¹Imesƹan aqaṯen akiḏwem i ȓebda, nec war kiḏwem tɣimiɣ ca i ȓebda.

¹²Ṯferreɣ-ayi aman-a n lwarḏ x ddat inu ḥima aḏayi ṯsewjeḏ i ṯenḍeȓṯ inu.

¹³Aqa tesȓam ȓḥaqq: Mani ma yuweḍ Lʼinjil ḏi ddunect-a amen-ṯekmaȓ, ataf aḏ ƹawḏen x ṯemɣarṯ-a ḏ min ḏayi ṯegga am yijjen n ḏikra xas."

¹⁴Uca ikkar Yahuḏa Isxaryuṭi wenni zi ṯenƹac n arrusul iruḥ netta ɣar arruyas n ȓfuqaha

¹⁵inna-asen: "Min ḏayi ɣa ṯucem meȓa uwiɣ-awem-d Ƹisa?" Ḥesben-as ṯȓaṯin n ṯpeyyasin n nnuqarṯ ucin-as-ṯent.

¹⁶Ssenni irezzu Yahuḏa lfurṣa mammec iy ɣa igg aḏ izzenz Ƹisa.

¹⁷Nhar amezwaru n Ȓƹiḏ n Ṯefḍirṯ qarrben-d imeḥḍaren ɣar Ƹisa nnan-as: "Mani ṯexseḏ aḏac nsewjeḏ amensi n Ȓƹiḏ Ameqqran?"

¹⁸Inna-asen Ƹisa: "Ruḥem ɣar ṯendint inim-as i fȓan qa inna-yac Siḏiṯneɣ ṯsaƹƹat inu ṯuweḍ-d akic iy ɣa ƹeyyḏeɣ nec ḏ imeḥḍaren inu."

¹⁹Imeḥḍaren ggin minxef ṯen iweṣṣa Ƹisa ssenni swejḏen amensi n Ȓƹiḏ.

²⁰Ṯuweḍ-d ṯmeddiṯ, iqqim Ƹisa ak ṯenƹac n arrusul nnes ɣar missa.

²¹Qqimen tetten inna-asen Ƹisa: "Aqa tesȓam ȓḥaqq: Ijjen zzaywem aḏayi izzenz."

²²Uca xeyyqen aṭṭas bḏan tseqsan-ṯ ij-ij nnan-as: "War iǧi bu ḏ nec, yac a Siḏi?"

²³Indeq-d Ƹisa inna-asen: Wenni iy kiḏi issisnen ḏi ṭṭebṣi ḏ wenni iy ḏayi ɣa izzenzen.

²⁴Mmis n bnaḏem aḏas iwqeƹ ƹlaḥsab mamc xas iqqar Lkitab, walakin ya ȓefḍiḥeṯ n bnaḏem nni iy ṯ ɣa izzenzen! Ḥsen i netta mȓi war d ixȓiq ca."

²⁵Uca inna-as Yahuḏa iƹni wenni iy ṯ ɣa izzenzen: "War iǧi bu ḏ nec, yac a Siḏi?" Inna-as Ƹisa: "Ḏ cek iy ṯ innan."

²⁶Wami ƹaḏ tetten, iysi-d aɣrum icekkar Arebbi irza aɣrum nni yuca-asen-ṯ i imeḥḍaren nnes inna-asen: "Ysim-ṯ ccem-ṯ, wa ig iǧan ḏ ddat inu."

²⁷Iysi-d ȓkas icekkar Arebbi yuca-asen-ṯ. Inna-asen: "Swem zzayes marra iḏwem.

²⁸Ȓkas-a ḏayes iḏammen[65] n ȓƹaheḏ, iƹni ḏ iḏammen inu iy ɣa yazzȓen ƹlaḥsab aṭṭas n yiwḏan ḥima aḏasen iɣfar Arebbi ȓmuƹṣiyaṯ nsen.

²⁹Aqa qqareɣ-awem: Zi ssa aȓ ṯsawent war sesseɣ ca zeg waman-a n uḍiȓ ḥetta aȓ Nhar nni iy ṯen ɣa sweɣ akiḏwem zi jḏiḏ ḏi ȓmulk n Baba."

³⁰Ɣennjen ijjen n yizȓi n Ȓƹiḏ, ssenni ffɣen ruḥen ɣar Uḏrar n Zzitun.

³¹Inna-asen Ƹisa i imeḥḍaren nnes: "Ǧiȓeṯ-a ṯanita aḏayi ṯsemḥem marra iḏwem minzi iqqar Lkitab: Aḏ uwṯeɣ wenni irassen iḥuȓiyen, kuȓ ijjen zi ṯḥimerṯ mani ɣa yarweȓ.

³²Walakin xmi d ɣa kkareɣ zi ȓmewṯ, aḏawem izwareɣ ɣar ṯmurṯ n Ljalil."

³³Indeq-d Buṭrus inna-as: "Waxxa aḏayec ɣa semḥen marra, nec war ḏayec semḥeɣ ca ƹemmarṣ."

³⁴Inna-as Ƹisa: "Aqa tesȓiḏ ȓḥaqq: Ṯa, ǧiȓeṯ-a qbeȓ ma aḏ idden uyaziḍ ataf aḏayi ṯenkareḏ ṯȓaṯa n ṯwaȓaṯin."

³⁵Inna-as Buṭrus: "Nec war c nekkareɣ ca waxxa akiḏec iy ɣa mmṯeɣ." Amenni iy nnan marra imeḥḍaren.

³⁶Yusa-d Ƹisa ak imeḥḍaren nnes ɣar yijjen n umcan qqaren-as <Gatsimani.> Inna-asen: "Qqimem ḏa, nec aḏ raḥeɣ ḏiha aḏ ẓẓaǧeɣ."

³⁷Yuwi akiḏes Buṭrus ḏ ṯnayen n ṯarwa n Zabadi, ibḏa itnexȓaƹ itxeyyaq.

³⁸Inna-asen: "Ȓaƹmar inu ƹȓayen aḏ idduqqez s lḥuzen. Qqimem ḏa ṯfaqem akiḏi."

³⁹Ibeƹƹeḏ xasen cwayt, isejjeḏ ɣar ṯmurṯ ibḏa itettar i Arebbi inna: "A Baba, meȓa mumkin sbeƹƹeḏ-iṯ xafi ȓkas-a n ȓaƹḏab. Maci mamc xseɣ nec; Lla, mamc ixes ȓxaḍar nnec cek."

⁴⁰Iḏweȓ ɣar imeḥḍaren-a yufi-ṯen ṭṭṣen, inna-as i Buṭrus: "Ma war ṯzemmarem ca akiḏi ṯfaqem waxxa ḏ ijjen n ṯsaƹƹat waha?

⁴¹Iȓim ƹlabal ẓẓaǧem ḥima war tiḏfem ca ḏi ȓemḥayen. Uȓ n bnaḏem iwjeḏ walakin ddat nnes ṯeḍƹef."

⁴²Ibeƹƹeḏ xasen ṯwaȓa wis ṯnayen, ittar i Arebbi inna: "A Baba, meȓa ȓkas-a n ȓaƹḏab war xafi ṯesbeƹƹḏeḏ ca swiɣ-ṯ, ataf aḏ yiȓi min ixes ȓxaḍar nnec."

⁴³Iḏweȓ-d ƹaweḏ ɣarsen yufi-ṯen ṭṭṣen ȓaḥeqqac iɣelleb xasen yiḍeṣ.

⁴⁴Ibeƹƹeḏ xasen ƹaweḏ, iẓẓuǧ ṯwaȓa wis ṯȓaṯa inna mamc inna qbeȓ.

⁴⁵Iḏweȓ-d ɣar imeḥḍaren-a inna-asen: "Ƹaḏ ṯeṭṭṣem, ƹaḏ ṯreyyḥem? Ṣafi, baraka! Aqa ṯuweḍ-d ȓweqṯ nni iy ḏi ɣa itwasellem Mmis n bnaḏem ɣar ifassen n yinni iƹeṣṣan.

⁴⁶Kkarem a nuyurem, qa wenni iy ḏayi ɣa izzenzen aqaṯ yusa-d."

⁴⁷Yallah Ƹisa issawaȓ yuweḍ-d Yahuḏa, ijjen zi ṯenƹac nni n arrusul nnes. Yuwi-d akiḏes ȓɣaci aṭṭas ysin ȓesyuf ḏ idebbuzen. Ssekken-ṯen-d arruyas n ȓfuqaha ḏ imeqqranen n Ayṯ-Israʼil.

⁴⁸Wenni iy ṯ ɣa izzenzen iƹni Yahuḏa qbeȓ tuɣa itafeq akiḏsen x yijjen n lƹalama inna-asen: Wenni xef ɣa seǧmeɣ ḏ wenni iy xef ṯrezzum, ṭṭfem-ṯ."

⁴⁹Ȓexddenni iqarreb Yahuḏa ɣar Ƹisa inna-as: "Ssalam a Siḏi." Uca iseǧem xas.

⁵⁰Inna-as Ƹisa: "Ay ameddukeȓ, minɣar d ṯusiḏ egg-iṯ." Uca qarrben-d ɣar Ƹisa ḥerṯen xas, ṭṭfen-ṯ.

⁵¹Ikkar-d yijjen zeg yinni ḏinni iǧan ak Ƹisa iswizzeḏ ijbeḏ-d ssif, yuwṯa zzayes ismeɣ n arrayes n ȓfuqaha iqess-as amezzuɣ.

⁵²Inna-as Ƹisa: "Arr ssif nnec ɣar umcan nnes, ȓaḥeqqac marra yinni ikessin ssif tmettan s ssif.

⁵³Ma tɣir-ac war zemmareɣ aḏ ttareɣ i Baba aḏayi d issekk ȓexxu ktar zi ṯenƹac n ljuyuc n lmalaʼikaṯ?

⁵⁴Walakin mammec iy ɣa ikemmeȓ wawaȓ iy inna Siḏi Arebbi belli manaya itxeṣṣa aḏ iwqeƹ ammu?"

⁵⁵Ȓexddenni inna-asen Ƹisa i yiwḏan nni: "Ma tɣir-awem qa nec ḏ lmujrim wami d ṯeysim ȓesyuf ḏ idebbuzen ḥima aḏayi ṯeṭṭfem niɣ? Tuɣa tɣimiɣ mkuȓ nhar ḏi ṯemzida ṯameqqrant, seȓmaḏeɣ ḏinni war ḏayi ṯeṭṭifem ca.

⁵⁶Walakin marra manaya iwqeƹ ḥima aḏ ikemmeȓ min yurin ḏi Lkutub n lʼanbiya." Uca semḥen ḏayes marra imeḥḍaren nnes arewȓen.

⁵⁷Yinni iṭṭfen Ƹisa uwin-ṯ ɣar arrayes n ȓfuqaha qqaren-as Qiyafa. Munen akiḏes imeqqranen n Ayṯ-Israʼil ḏ imseȓmaḏen n ccariƹa.

⁵⁸Iḏfar-iṯ Buṭrus zi ȓeggwaj, yuḏef ɣar ȓemraḥ n ṯeddarṯ n arrays n ȓfuqaha. Yuḏef iqqim ḏi ȓemraḥ ak iƹessasen ḥima aḏ iẓer min ɣa iweqƹen.

⁵⁹Arruyas n ȓfuqaha ḏ marra Jmaƹeṯ n lḥukkam n Ayṯ-Israʼil rezzun uw ɣa icehḏen ẓẓur x Ƹisa ḥima aṯ nɣen.

⁶⁰War ufin ca minxef rezzun waxxa aṭṭas iy xas icehhḏen ẓẓur. Menbaƹd ḥḍaren-d ṯnayen

⁶¹nnan: "Aryaz-a inna: Zemmareɣ aḏ heḏmeɣ ṯamziḏa ṯameqqrant n Arebbi, at bniɣ ḏi ṯeȓtiyyam."

⁶²Uca ibedd arrays n ȓefuqaha inna-as i Ƹisa: "Ma war ṯeqqareḏ walu cek? Min xac cehhḏen yiwḏan-a?"

⁶³Iqqim Ƹisa isqar war ḏas yinni walu. Uca inna-as arrays nni: "Tettareɣ zzayec aḏaneɣ ṯejjaǧeḏ s Arebbi iddaren ḥima aḏaneɣ ṯiniḏ: Ma cek ḏ Lmasiḥ ḏ Mmis n Arebbi?"

⁶⁴Inna-as Ƹisa: "Aqa ṯenniḏ-ṯ cek. Innama, aqa qqareɣ-awem: Zi ssa aȓ ṯsawent aḏ teẓrem Mmis n bnaḏem iqqim x ufusi n Lqawi. Aṯ ṯeẓrem ƹaweḏ ihewwa-d ak useynu n ujenna."

⁶⁵Ȓexddenni arrays nni n ȓfuqaha iɣareṣ arruḍ x yixef nnes inna-asen: "Ma ṯesȓim-as iqqar lmunkar x Siḏi Arebbi? War neḥḏij bu ȓechuḏ!

⁶⁶Min ḏawem imeḍharen?" Nedqen-d nnan: "Wanita isḏaheǧ ȓmewṯ!"

⁶⁷Ȓexddenni ssusufen xas x uɣembub ccaṯen-ṯ s ȓpunyaṯ. Ȓebƹaḍ zzaysen tseqqaȓen-ṯ

⁶⁸qqaren-as: "Iwa a nnabi Lmasiḥ, ssen uw c yuwṯin zzayneɣ!"

⁶⁹Buṭrus iqqim ɣar barra ḏi ȓemraḥ. Ṯqarreb ɣares ijjen n ṯxeddant ṯenna-as: "Uȓa ḏ cek ṯeǧiḏ ak Ƹisa zi Ljalil."

⁷⁰Inkar Buṭrus zzaṯ i yiwḏan nni marra inna-as: "War ssineɣ ca minxef ṯessawaȓeḏ!"

⁷¹Iffeɣ Buṭrus iruḥ ṭṭarf n ṯewwarṯ n ȓemraḥ. Ṯeẓri-ṯ ijjen n ṯxeddant nneɣni ṯenna-asen i yinni iḥḍaren ḏinni: "Aryaz-a itiȓi ak Ƹisa zi Naṣira!"

⁷²Inkar Buṭrus ƹaweḏ inna-asen: "Aḏawem jjaǧeɣ, aryaz-a war ṯ ssineɣ ca."

⁷³Menbaƹd cwayt qarrben-d ɣar Buṭrus yinni iḥḍaren ḏinni nnan-as: "Cek ḏ ijjen zzaysen, war ḏayes bu ccekk. Twaƹeqȓeḏ ɣir ḏeg wawaȓ nnec."

⁷⁴Ikkar Buṭrus ibḏa itḥarram ixef nnes itjaǧa iqqar-asen: "Nec aryaz-a war ṯ ssineɣ ca!" Ȓexddenni idden uyaziḍ.

⁷⁵Ḏinni ifekkar-d Buṭrus awaȓ nni n Ƹisa wami ḏas inna: Qbeȓ ma aḏ idden uyaziḍ ataf aḏayi ṯenkareḏ ṯȓaṯa n ṯwaȓaṯin." Iffeɣ ɣar barra iru imeṭṭawen ḏ imeǧaḥen aṭṭas.