Read Tarifit Matta 27 Bible Online

Matta 27 - Tarifit bible

Matta 27

¹Wami iṣbaḥ ȓḥaȓ, marra arruyas n ȓfuqaha ḏ imeqqranen n Ayṯ-Israʼil mcawaren jarasen ḥima aḏ nɣen Ƹisa.

²Carfen-ṯ uwin-ṯ aṯ sellmen i lḥakem arrumani umi qqaren Bilaṭus.

³Yahuḏa wenni ig izzenzen Ƹisa, wami iẓra belli Ƹisa itwaḥkem indem. Wami indem iruḥ ɣar arruyas n ȓfuqaha ḏ imeqqranen n Ayṯ-Israʼil yarra-asen ṯȓaṯin nni n ṯpeyyasin n nnuqarṯ.

⁴Inna-asen: "Nec ƹṣiɣ wami sellmeɣ ijjen i ȓmewṯ netta war iggi minxef!" Nnan-as niṯni: "Wenni ḏ ccɣeȓ nnec! Neccin, min ḏaneɣ iruḥen?"

⁵Ȓexddenni inḍar tmenyaṯ nni ḏi ṯemziḏa ṯameqqrant, iffeɣ ssenni iruḥ ijeyyef ixef nnes.

⁶Arruyas n ȓfuqaha jemƹen tmenyaṯ nni nnan: "Tmenyaṯ-a ḏ ttaman n iḏammen n bnaḏem.[66] Ccariƹa nneɣ war ḏaneɣ ṯsemmeḥ aṯent nsers ḏi ṣṣenduq n ṯemziḏa."

⁷Mcawaren jarasen, sɣin zzaysent ṯamurṯ nni umi qqaren <Iyer n wenni itṣennaƹen ȓeqcuƹ>[67] ḥima aḏayes ggen imeḍȓan i ȓbarrani.

⁸S manayenni iy ḏas qqaren "Iyer iḏammen" ar ȓexxu ƹaḏ.

⁹Amenni ikemmeȓ wawaȓ ig inna nnabi Irmiya ḏeg yijjen n zman: <Jemƹen ṯȓaṯin nni n ṯpeyyasin, ttaman nni iy xef tafqen yiwḏan n Ayṯ-Israʼil iy xas ggin x netta.

¹⁰Sɣin zzaysent ṯamurṯ n wenni itṣennaƹen ȓeqcuƹ; amenni iy ḏayi iweṣṣa Siḏi Arebbi.>

¹¹Ibedd Ƹisa zzaṯ i lḥakem nni arrumani. Isseqsa-ṯ lḥakem inna-as: "Ma ḏ cek ḏ azeǧiḏ n Ayṯ-Israʼil?" Inna-as Ƹisa: "Aqa ṯenniḏ-t cek."

¹²Wami ṯ tahamen arruyas n ȓfuqaha ḏ imeqqranen n Ayṯ-Israʼil, war xasen yarri ca.

¹³Inna-as Bilaṭus: "Ma war tesȓiḏ ca min qqaren ḏ marra min xak tceṯcan?"

¹⁴War xasen yarri Ƹisa bu wawaȓ. Iqqim lḥakem nni itƹejjeb aṭṭas.

¹⁵Ḏi mkuȓ Ȓƹiḏ Ameqqran inum lḥakem iḍeǧeq-asen-d i yijjen n umeḥbus ƹlaḥsab wenni ixes ccaƹb.

¹⁶Ḏi ȓweqṯ nni ɣarsen ijjen n umeḥbus maƹruf qqaren-as Barabas.

¹⁷Wami munen yiwḏan, isseqsa-ṯen lḥakem Bilaṭus inna-asen: "Manwen iy ṯexsem aḏawem d rxuɣ, ma i Barabas niɣ i Ƹisa wenni umi qqaren Lmasiḥ?"

¹⁸Tuɣa issen Bilaṭus belli sellmen-as Ƹisa ȓaḥeqqac ḥesḏen-ṯ.

¹⁹Wami iqqim lḥakem Bilaṭus x ȓkursi n ȓeḥkam, ṯessekk-d ɣares ṯemɣarṯ nnes ṯenna-as: "Tarek-as i uryaz-a iṣfan ȓaḥeqqac ƹeddbeɣ aṭṭas ǧiȓeṯ-a ḏi ṯirjiṯ x ssabab nnes."

²⁰Walakin arruyas n ȓfuqaha ḏ imeqqranen n Ayṯ-Israʼil qeȓben azeǧif i ȓɣaci ḥima aḏasen d isufeɣ Barabas, Ƹisa aḏ immeṯ.

²¹Isseqsa-ṯen lḥakem inna-asen: "Manwen iy ṯexsem zi ṯnayen-a aḏas rxuɣ?" Nnan-as: "Barabas."

²²Inna-asen Bilaṭus: "Iwa, min ḏas ɣa ggeɣ i Ƹisa wenni umi qqaren Lmasiḥ?" Nnan-as marra: "Ṣelleb-iṯ!"

²³Inna-asen Bilaṭus: "Mayemmi? Man ljarima ig igga wanita?" Walakin arennin snekkaren ṯɣuyyeṯ s jjheḏ qqaren: "Ṣelleb-iṯ!"

²⁴Wami yufa Bilaṭus belli war iqḍi walu arnin ḏi lfawḍa, iysi aman isireḏ ifassen nnes zzaṯ i ȓɣaci nni inna-asen: "Aqa nec tberriɣ azeǧif inu zeg iḏammen[68] n uryaz-a! Aqaṯ x yiri nwem!"

²⁵Arrin xas marra iḏsen nnan-as: "Iḏammen nnes x yiri nneɣ ḏ ṯarwa nneɣ!"

²⁶Ssenni iḍȓeq-asen-d i Barabas. Ƹisa uwṯin-ṯ s usɣun, uca isellem-asen-ṯ Bilaṭus ḥima aṯ ṣellben x ṣṣalib.

²⁷Uwin-ṯ ȓƹaskar n lḥakem ɣar ȓemraḥ n ȓeqṣar n lḥakem, smunen-d ḏinni marra lfirqa n ȓƹaskar nni.

²⁸Kksen-as arruḍ nnes, ggin xas aseȓham ḏ azeggwaɣ.

²⁹Muḏen-as ijjen n ttaj n isennanen, ggin-as-ṯ x uzeǧif nnes. Ggin-as ɣanim ḏeg ufus afusi, wḍan-as ɣar ifadden bḏan tbuṣaren xas. Qqaren-as ssalam ay azeǧiḏ n Ayṯ-Israʼil!

³⁰Ssusufen xas, ysin ɣanim nni bḏan ccaṯen-ṯ zzayes ɣar uzeǧif.

³¹Wami xas kemmȓen abuṣar, kksen-as aseȓham nni ggin-as arruḍ nnes uwin-ṯ ḥima aṯ ṣellben.

³²Ffɣen ssenni ȓƹaskar ufin ijjen n uryaz qqaren-as Simƹan zi ṯendint n Lqurina, ggin xas s bezzez aḏ yarbu ṣṣalib n Ƹisa.

³³Uwḍen ɣar yijjen n umcan qqaren-as "Gulguṭa" (ȓmaƹna n yisem-a: Amcan n Jumjuma).[69]

³⁴Ucin-as aman uḍiȓ ixelleṭ ḏaysen ijjen n ddwa ḏ amerzag. Wami ṯen iqqas, yugi aṯen isew.

³⁵Wami ṯ ṣellben, ggin lqurƹa x warruḍ nnes ferqen-ṯ jarasen.

³⁶Qqimen ḏinni ḥḍan-ṯ.

³⁷Ɣar uzeǧif nnes ggin-as ijjen n ṯeȓwiḥet ṯura ḏayes ttuhma nni iqqaren: "Wanita ḏ Ƹisa, azeǧiḏ n Ayṯ-Israʼil."

³⁸Ṣellben akiḏes ṯnayen n iceffaren, ijjen x ufusi ijjen x uẓeȓmaḍ nnes.

³⁹Iwḏan iy tekken ssenni tukkaren-ṯ thezzan azeǧif nsen,

⁴⁰qqaren-as: "Ma ḏ cek iy ɣa iheḏmen ṯamziḏa ṯameqqrant at tebniḏ ḏi ṯeȓtiyyam? Meȓa cek ḏ Mmis n Arebbi, nejja ixef nnec hwa-d zeg ujenna zi ṣṣalib-a!"

⁴¹Uȓa ḏ arruyas n ȓfuqaha akiḏsen imeqqranen n Ayṯ-Israʼil ḏ imseȓmaḏen n ccariƹa tbuṣaren xas qqaren:

⁴²"Isenjem inneɣni, walakin war izemmar ca ȓexxu aḏ isenjem ixef nnes!" Nnan-as: "Hwa-d ay azeǧiḏ n Ayṯ-Israʼil ȓexxu zeg ujenna zi ṣṣalib-a ḥima azzayek namen!

⁴³Itwekkeȓ x Arebbi; Meȓa irḍa xas Arebbi aṯ isenjem ȓexxu! Ȓaḥeqqac inna: Nec ḏ Mmis n Arebbi."

⁴⁴Amenni ƹaweḏ iy ṯ zawaren iceffaren nni iy kis iṣellben.

⁴⁵Ɣar ṯenƹac n uziȓ ṯehwa-d ṯaǧest x ṯmurṯ amen-ṯekmaȓ aȓ wami ƹȓayen ḏ ṯȓaṯa uƹecci.

⁴⁶Aȓ jwayeh nni n ṯȓaṯa uƹecci iȓaɣa Ƹisa s jjheḏ inna: "Ili, Ili, lma sbaqṯani?" Ȓmaƹna n wawaȓ-a: "Ya Arebbi, ya Arebbi, mayemmi ḏayi ṯsemḥeḏ?"[70]

⁴⁷Sȓin-as ȓebƹaḍ zeg yinni iḥḍaren ḏinni nnan: "Aqa itȓaɣa x nnabi Ilyas."

⁴⁸Ȓexddenni iruḥ ijjen zzaysen iqȓeƹ itazzeȓ, iysi ijjen n spunxa iseɣḏeṣ-it ḏeg waman uḍiȓ ḏ isemmamen, iggi-t x yij ukeccuḍ yuca-as aḏ isew.

⁴⁹Nnan-as yiwḏan nneɣni ḏinni: "Ejj-iṯ, a nẓer ma aḏ d yas nnabi Ilyas ma aṯ iƹṯeq niɣ lla!"

⁵⁰Iȓaɣa Ƹisa ƹaweḏ s yijjen n ṯmijja ṯemɣar uca isellem buḥbeȓ nnes.

⁵¹Ȓexddenni ig iqqars arrwaq n ṯemziḏa ṯameqqrant x ṯnayen zeg ujenna aȓ ṯmurṯ. Iwqeƹ zzinzal, nferqen yizra x ṯnayen.

⁵²Nurzmen imeḍȓan kkaren-d aṭṭas n ȓmuminin immuṯen

⁵³ffɣen-d zeg imeḍȓan. (Menbaƹd i ṯeȓtiyyam aḏ d ikkar Ƹisa zi ȓmewṯ, niṯni aḏ aḏfen ɣar ṯendint n Lquds aḏ d meḍharen i waṭṭas n yiwḏan.)

⁵⁴Aƹaskari nni ameqqran n arrumanus ḏ yinni akiḏes iḥeṭṭan Ƹisa ẓrin zzinzal nni ḏ min iweqƹen, ggwḏen aṭṭas nnan: "Wanita ḏ Mmis n Arebbi ḏ ṣṣaḥ!"

⁵⁵Ḏinni aṭṭas n ṯemɣarin xezzarent-id zi ȓeggwaj. Niṯenti tuɣa ḏfarent-ṯ, tsexxarent xas wami tuɣaṯ iǧa ḏi ṯmurṯ n Ljalil.

⁵⁶Ḏaysent Maryam ṯamagdaliṯ, ḏ Maryam yemmas n Yaƹqub amezyan ḏ Yusef, ḏ icten nneɣni nettaṯ ḏ yemmas n ṯarwa n Zabadi.

⁵⁷Wami d ṯuweḍ ṯmeddiṯ, yusa-d ijjen n ttajar qqaren-as Yusef zi dcar n Arimatya. Netta s yixef nnes tuɣa iḏweȓ ḏ ameḥḍar n Ƹisa.

⁵⁸Iruḥ ɣar lḥakem Bilaṭus ittar-as ddat n Ƹisa, ikkar Bilaṭus iweṣṣa xas aḏas t ucen.

⁵⁹Iruḥ Yusef sehwa-t-id zi ṣṣalib, ikeffen-it s ȓecfen inqa.

⁶⁰Isers-it ḏeg unḍeȓ nnes ḏ jḏiḏ. Netta tuɣa iɣez-iṯ zi qbeȓ ḏeg uzru igga am yifri. Iseqnunni ijjen n uzru ḏ ameqqran yarri-ṯ x uqemmum n unḍeȓ nni yuyur.

⁶¹Maryam ṯamagdaliṯ ḏ Maryam nni nneɣni aqaṯent ḏinni qqiment zzaṯ i unḍeȓ.

⁶²Ṯiwecca nnes, iƹni nhar n ssebṯ n lƹibada, ruḥen arruyas n ȓfuqaha ḏ ȓḥizeb n ifarrisiyen munen ɣar lḥakem Bilaṭus.

⁶³Nnan-as: "Neccin neƹqeȓ a siḏi belli wami tuɣa iddar uɣeddar nni inna-d menbaƹd i ṯeȓtiyyam nec aḏ d kkareɣ zi ȓmewṯ."

⁶⁴Nnan-as: "Iwa weṣṣa aḏ ggen ȓƹasseṯ x unḍeȓ nnes ḥetta aȓ wis ṯeȓtiyyam ḥima war d tisen imeḥḍaren nnes aḏ ysin ddat nnes aḏ inin i ccaƹb belli ikkar-d zi ȓmewṯ. Ssenni aḏ iwqeƹ uɣḏar nnes aneggaru ktar zeg wenni amezwaru."

⁶⁵Inna-asen lḥakem Bilaṭus: "Ha ȓƹaskar iy ɣa iƹesssen. Ruḥeṯ ggeṯ ȓƹasseṯ x unḍeȓ mammec ṯexsem kenniw."

⁶⁶Ruḥen ggin ȓƹasseṯ x unḍeȓ: cemƹen ṯawwarṯ nnes,[71] jjin ḏinni iƹessasen.