Read Tarifit Matta 28 Bible Online

Matta 28 - Tarifit bible

Matta 28

¹Wami iƹḏu nhar n ssebṯ n lƹibada, ɣar ȓefjar ḏi nhar n ȓḥad ṯusa-d Maryam ṯamagdaliṯ ḏ Maryam nneɣni ḥima aḏ ẓrent anḍeȓ n Ƹisa.

²Ƹlaɣafla ṯenhezz ṯmurṯ ij unhezzi ḏ ameqqran ȓaḥeqqac ṯehwa-d ijjen n lmalaʼika n Arebbi zeg ujenna, ṯekkes azru nni x ṯewwarṯ ṯeqqim xas.

³Uḏem nnes itceƹciƹ s nnur am wassam, arruḍ nnes netta ḏ acemȓaȓ amecnaw aḏfeȓ.

⁴Iƹessasen n unḍeȓ ggwḏen zzayes terjijin, qqimen am imettinen.

⁵Ṯendeq-d lmalaʼika nni ṯenna-asent i ṯemɣarin: "War teggwḏent ca, nec ssneɣ belli ṯrezzunt x Ƹisa itwaṣellben.

⁶Netta war ḏa iǧi ca, ikkar-d zi ȓmewṯ ƹlaḥsab mammec inna zi qbeȓ. Araḥent-id aḏ teẓrent amcan nni mani tuɣa iǧa.

⁷Ruḥent ḏeɣya ɣar imeḥḍaren nnes inint-asen aqa ikkar-d zi ȓmewṯ. Aḏ iraḥ ɣar ṯmurṯ n Ljalil akenniw iraja ḏinni. Ḏinni iy ṯ ɣa ṯeẓrem, qa nniɣ-awem-ṯ."

⁸Kkarent niṯenti ruḥent ḏeɣya zeg unḍeȓ nni, ggwḏent walakin farḥent aṭṭas. Tazzȓent aḏ ssiwḍent ȓexbar-a ɣar imeḥḍaren n Ƹisa.

⁹Ssenni imeȓqa akiḏsent Ƹisa inna-asent: "Azul." Qarrbent ɣares ṭṭfent ḏeg iḍaren nnes sejjḏent-as.

¹⁰Ȓexddenni inna-asent Ƹisa: "War teggwḏent ca. Ruḥent siwḍent ȓexbar inint i ayṯma: Ruḥeṯ ɣar ṯmurṯ n Ljalil ḏinni iy ḏayi ɣa ṯeẓrem."

¹¹Wami ruḥent niṯenti, ȓebƹaḍ n ȓƹaskar nni itƹesssen x unḍeȓ ḏewȓen ɣar ṯendint ssiwḍen-asen ȓexbar i arruyas n ȓfuqaha x marra min iweqƹen.

¹²Munen arruyas nni n ȓfuqaha ak imeqqranen n Ayṯ-Israʼil. Wami mcawaren jarasen, ucin-asen ijjen n lƹadad n tmenyaṯ i ȓƹaskar nni.

¹³Nnan-asen i ȓƹaskar: "Aḏ tinim i yiwḏan qa usin-d imeḥḍaren nnes s ǧiȓeṯ, ysin ddat nnes wami tuɣa neccin neṭṭeṣ.

¹⁴U meȓa yarra-d lḥakem ȓexbar, a nemsefham akiḏes akenniw nesbeƹƹeḏ x lmuckila-ya."

¹⁵Kkaren ysin tmenyaṯ nni ȓƹaskar, ggin ƹlaḥsab mammec ṯen weṣṣan. Amenni intacar wawaȓ jar Ayṯ-Israʼil ɣar ȓexxu.

¹⁶Ruḥen ḥiṭac nni n imeḥḍaren ɣar ṯmurṯ n Ljalil ɣar uḏrar nni ƹlaḥsab mammec tuɣa ṯen iweṣṣa Ƹisa zi qbeȓ.

¹⁷Wami ṯ ẓrin, sejjḏen-as walakin ḏinni ȓebƹaḍ ƹaḏ cekken.

¹⁸Iqarreb-d ɣarsen Ƹisa, issiweȓ akiḏsen inna-asen: "Ṯemmuc-ayi marra ssulṭa ḏeg ujenna ḏ ṯmurṯ.

¹⁹Iwa ruḥeṯ ɣar yiwḏan n marra ȓegnus, arrem-ṯen ḏ imeḥḍaren inu. Ṭehharem-ṯen s waman s yisem n Baba ḏ Mmis ḏ Arruḥ iqeddsen.

²⁰Sȓemḏem-asen aḏ ggen marra minzi kenniw weṣṣiɣ. Aqa nec akiḏwem iȓiɣ ȓebda aȓ ɣa ifna zman!"