Read Tarifit Matta 4 Bible Online

Matta 4 - Tarifit bible

Matta 4

¹Ssenni Arruḥ nni n Arebbi yuwi Ƹisa ɣar ȓexȓa ḥima aṯ ijarreb Ibȓis.

²Wami iẓumm Ƹisa arbeƹin yum jar ǧiyaȓi ḏ wussan yusa-as-d jjuƹ.

³Ikkar wenni itjarraben iqarreb-d ɣar Ƹisa inna-as: "Meȓa cek ḏ Mmis n Arebbi, ini-yasen i yizra-ya aḏ ḏewȓen ḏ aɣrum."

⁴Indeq-d Ƹisa inna-as: "Lla, Lkitab iqqar: <Bnaḏem war itƹic ca s uɣrum waha, itƹic s mkuȓ awaȓ ig iqqar Arebbi.>"[6]

⁵Ssenni Ibȓis yuwi Ƹisa ɣar ṯendint n Lquds, isiȓi-ṯ x ṯqiccat n ṯemziḏa ṯameqqrant.

⁶Inna-as: "Cek meȓa ḏ Mmis n Arebbi ngez ssanita ɣar ṯmurṯ. Aqa Lkitab iqqar: <Qa Arebbi aḏ iweṣṣa bac ac ḥḍant lmalaʼikaṯ nnes. Ac ysint x ifassen nsent bac war ṯeȓqifeḏ uȓa ḏ ij uzru s uḍar nnec.>"[7]

⁷Inna-as Ƹisa: "Lla, Lkitab iqqar: <War tjarrab ca Siḏi Arebbi nnec.>"[8]

⁸Ssenni Ibȓis yuwi Ƹisa ɣar ṯqiccat n yijjen n uḏrar yuƹȓa aṭṭas. Ismeḍhar-as-d marra lmemlakaṯ n ddunect-a ḏ ṯuṣubḥant nsent.

⁹Inna-as: "Aḏac uceɣ marra ṯina meȓa ṯewḍiḏ x ifadden nnec ṯsejjḏeḏ-ayi."

¹⁰Indeq-d Ƹisa inna-as: "Ruḥ, beƹƹeḏ-ayi a Cciṭan. Aqa Lkitab iqqar: <Sejjeḏ i Siḏi Arebbi nnec, ƹbeḏ-iṯ netta waḥḏes.>"[9]

¹¹Ssenni ibeƹƹeḏ xas Ibȓis. Usint-id lmalaʼikaṯ bḏant tsexxarent x Ƹisa.

¹²Wami isȓa Ƹisa belli Yaḥya aqa itwaḥebbes, iƹqeb ɣar Naṣira ɣar ṯmurṯ n Ljalil.

¹³Walakin war iqqim ca ḏi Naṣira, iruḥ aḏ izḏeɣ ḏeg yijjen n ubilaj qqaren-as Kafernaḥum ig iǧan x ṭṭarf n ȓebḥar n Ljalil, jjiheṯ n ṯmurṯ n Zafulun ḏ Naftalim.

¹⁴Amenni ikemmeȓ wawaȓ nni iy inna Siḏi Arebbi i nnabi umi qqaren Icaƹya ḏeg yijjen n zman:

¹⁵<Ṯamurṯ n Zafulun ḏ ṯmurṯ n Naftalim, ṯinni umi qqaren ṯamurṯ n Ljalil, x ubriḏ n ȓebḥar ḏi ccarq n yiɣzar n Lʼurdun, mani iy zeddɣen uȓa ḏ yinni war iǧin zi Ayṯ-Israʼil.

¹⁶Ccaƹb-a iy izeddɣen ḏi ṯaǧest, aḏ iẓer ṯfawṯ ḏ ṯameqqrant. Yina izeddɣen ḏi ṯaǧest n ȓmewṯ aḏasen d imeḍhar nnur.>[10]

¹⁷Zi ssenni ibḏa Ƹisa itbeccar iqqar-asen: "Tubeṯ, aqa yuḏes-d ȓmulk n ujenna."

¹⁸Iggur Ƹisa x cceṭṭ n ȓebḥar n Ljalil, yufa ḏinni ṯnayen n iḥeǧaqen n iseȓman niṯni ḏ awmaṯen. Ijjen qqaren-as Simƹan tȓaɣan-as s Buṭrus, akiḏes umas qqaren-as Andrus. Neṭṭaren ṯracca ḏi ȓebḥar.

¹⁹Inna-asen Ƹisa: "Ḏfarem-ayi-d, aqa ȓexxu iy kenniw ɣa arreɣ ḏ iḥeǧaqen n yiwḏan."

²⁰Ȓexddenni semḥen ḏi ṯracciwin nsen ḏfaren-ṯ.

²¹Iƹḏu aɣiȓin, yufa ṯnayen n wawmaṯen nneɣni, ijjen qqaren-as Yaƹqub ijjen qqaren-as Yuḥanna. Niṯni ḏ ṯarwa n yijjen n uryaz umi qqaren Zabadi. Aqaṯen ḏi ṯɣarrabut ak babaṯsen ƹeddȓen ṯiracciwin nsen. Iȓaɣa-yasen-d Ƹisa,

²²ḏeg umcan semḥen ḏi ṯɣarrabut nsen ḏ babaṯsen ḏfaren Ƹisa.

²³Iggur Ƹisa ḏi lʼiqlim n Ljalil marra, iseȓmaḏ ḏi ṯemziḏawin n Ayṯ-Israʼil itbeccar-iṯen s Lʼinjil n ȓmulk n Arebbi isgenfa marra ȓehȓacaṯ ḏ ddiƹan n ddat ḏeg yiwḏan.

²⁴Iffeɣ ȓexbar nnes ḏi Surya amen-ṯekmaȓ. Tawin-d ɣares marra yinni iheȓcen tƹeddaben s lʼanwaƹ n ȓehȓacaṯ ḏ ȓeḥȓiqaṯ, mkuȓ imaryaḥen ḏ imejnunen ḏ inecrufen netta isgenfa-ṯen.

²⁵Ḏfaren Ƹisa aṭṭas n ȓɣaci zi Ljalil ḏ lʼiqlim umi qqaren Dikaplis ḏ ṯendint n Lquds ḏ Yahuḏiya ḏ jjiheṯ n ccarq n yiɣzar n Lʼurdun.