Read Tarifit Matta 5 Bible Online

Matta 5 - Tarifit bible

Matta 5

¹Wami iẓra qaƹ ȓɣaci nni, yuȓi ɣar uḏrar iqqim usin-d ɣares imeḥḍaren nnes.

²Ibḏa iseȓmaḏ-iṯen inna-asen:

³"Ssaƹḏ nsen i yinni iǧan ḏ ȓmusakin ḏeg arruḥ nsen, aqa ȓmulk ujenna i niṯni.

⁴Ssaƹḏ nsen i yinni itrun, aqa aḏ twacejjƹen.

⁵Ssaƹḏ nsen i yinni iǧan ḏ drawec, aqa aḏ warṯen ddunect.

⁶Ssaƹḏ nsen i yinni iǧuzen iffuḏen ɣar min iǧan nican, ȓaḥeqqac niṯni aḏ jjawnen.

⁷Ssaƹḏ nsen i yinni ireḥḥmen, aqa aṯen irḥem Arebbi uȓa ḏ niṯni.

⁸Ssaƹḏ nsen i yinni ɣar iǧa wuȓ ḏ acemȓaȓ, aqa aḏ ẓren Arebbi.

⁹Ssaƹḏ nsen i yinni iṣeǧḥen iwḏan, aqa niṯni aṯen semman amecnaw ṯarwa n Arebbi.

¹⁰Ssaƹḏ nsen i yinni itwaƹeddaben x ssabab n min iǧan nican, aqa ȓmulk n ujenna i niṯni.

¹¹Ssaƹḏ nwem meȓa tzawaren-kenniw, ƹeddben-kenniw, niɣ nnan ḏaywem ȓƹib s ixarriqen x ssabab inu.

¹²Ḍeḥceṯ, farḥeṯ. Aqa ɣarwem ijjen n lʼajar ḏ ameqqran ḏeg ujenna ȓaḥeqqac amenni iy twaƹeddben lʼanbiya tuɣa iǧan qbeȓ nwem.

¹³Ḏ kenniw iy iǧan ḏ ȓemȓeḥ ṯaṣebḥant n ṯmurṯ. Walakin meȓa iruḥ-as lmaḏaq nnes, mamc ḏas ɣa negg aḏas ṯiḏ narr? Ataf war ṯṣeǧaḥ i walu, ɣir at nḍaren ɣar barra waha axas ƹeffsen yiwḏan.

¹⁴Kenniw ḏ ṯfawṯ n ddunect. Ijjen n ṯendint iy iǧan x uḏrar war ṯzemmar aḏ teqqim ṯnuffar.

¹⁵Iwḏan war sreqqin ca ȓqendiȓ ḥima axas qeȓben aqnuc; Lla, teggen-ṯ x ȓmarfaƹ ḥima aḏasen yuc ṯfawṯ i marra ug iǧan ḏi ṯeddarṯ.

¹⁶Ammu, jjeṯ ȓqendiȓ nwem iceƹƹeȓ i yiwḏan ḥima aḏ ẓren ȓexḏayem nwem ṯiṣebḥanin aḏ ḥemḏen Babaṯwem iǧan ḏeg ujenna.

¹⁷War tfekkareṯ ca belli usiɣ-d bac aḏ qḍiɣ x Ccariƹa n Musa niɣ x min nnan lʼanbiya; Lla, war d usiɣ ca axasen qḍiɣ, usiɣ-d bac aḏ kemmȓeɣ x wawaȓ nsen.

¹⁸Aqa tesȓam ȓḥaqq: War itekkes ijjen n ȓḥarf niɣ ḏ ijjen n ṯneqqiṭ zi ccariƹa aȓ ɣa itwakkes ujenna ḏ ṯmurṯ aȓ ɣa itwakemmeȓ kuȓci.

¹⁹Marra uw ɣa iḥarfen ijjen n ȓuṣiyeṯ ḏ ṯamezyant zi ccariƹa, ssenni aḏ iseȓmeḏ i yiwḏan x min itegg netta, ataf aḏ yiȓi ḏ amezyan s waṭṭas ḏi ȓmulk ujenna. Walakin wenni ɣa iṭaƹen i ccariƹa igga zzayes, ssenni aḏ iseȓmeḏ i yiwḏan aḏ ggen am netta, ataf aḏ yiȓi ḏ ameqqran s waṭṭas ḏi ȓmulk ujenna.

²⁰Aqa qqareɣ-awem: Meȓa war ṯṭiƹim ca i min iqqar Arebbi ktar zi min teggen imseȓmaḏen n ccariƹa ḏ ȓḥizeb n ifarrisiyen, ataf ƹemmarṣ aḏ taḏfem ȓmulk ujenna.

²¹Aqa ṯesȓim ḏi Lkitab belli itwanna-yasen i ȓejḏuḏ nwem: War neqq ca, aqa marra wenni iy ɣa inɣen ḥadd ataf aḏ itwaḥkem.

²²Walakin nec qqareɣ-awem: Marra uw ɣa iƹaṣben x wumas ataf aḏ itwaḥkem. Wenni ɣa yinin i wumas: Ay aɣyuȓ, ataf aḏ itwaḥkem ḏi lmaḥkama ṯameqqrant. Ḏ wenni ɣa yinin i wumas: Ay afɣuȓ, ataf isḏaheǧ aḏ iraḥ ɣar ṯmessi n jahennama.

²³Meȓa ṯruḥeḏ aḏ tqeddmeḏ dbiḥeṯ i Arebbi uca ṯfekkareḏ ijjen n wumac ixeyyeq xac,

²⁴ejj dbiḥeṯ nni ḏinni ɣar ȓmeḏbaḥ, ruḥ ḏ amezwaru aḏ tṣeȓḥeḏ ak wumac. Ƹaḏ iy d ɣa ṯḏewȓeḏ aḏ tqeddmeḏ dbiḥeṯ nnec i Arebbi.

²⁵Meȓa ithem-icek ca ḥadd menbaƹd uwin-ac-d lʼistidƹa ḥima akiḏes ṯraḥeḏ ɣar lmaḥkama, ƹḏeȓ akiḏes ḏeɣya ḏeg ubriḏ bac war c isiwwiḍ ca ɣar ȓqaḍi, ȓqaḍi nni aḏ iʼamar amxazni, amxazni nni ac inḍar ḏi ȓeḥbes.

²⁶Aqa tesȓiḏ ȓḥaqq: War ssenni d teffɣeḏ ca aȓ ɣa ṯxeǧseḏ ṣuldi aneggaru.

²⁷Ṯesȓim ḏi Lkitab belli itwanna ḏeg yijjen n zman: War zenna ca.

²⁸Walakin nec qqareɣ-awem: Marra wenni ixezzaren ɣar can ṯemɣarṯ s wuȓ nnes, ataf itwaḥsab izna.

²⁹Meȓa ṯiṭṭ nnec ṯafusiṯ tsebbab-ac ḏi can ȓefḍiḥeṯ, qȓeƹ-it zaƹma nḍar-it xak. Ḥsen i cek aḏ texsareḏ ijjen n ṭṭarf zi ddat nnec zi meȓa ṯmenḍar ddat nnec amen-ṯekmaȓ ḏi jahennama.

³⁰Meȓa fus nnec afusi itsebbab-ac ḏi can ȓefḍiḥeṯ, qess-iṯ zaƹma nḍar-iṯ xak. Ḥsen i cek aḏ texsareḏ ijjen n ṭṭarf zi ddat nnec zi meȓa ṯruḥ ddat nnec amen-ṯekmaȓ ḏi jahennama.

³¹Aqa itwanna ḏeg yijjen n zman ḏi Lkitab ƹaweḏ: Wenni ɣa iǧfen i ṯemɣarṯ nnes, ataf aḏas yuc ṯabrat nnes.

³²Walakin nec qqareɣ-awem: Marra wenni ɣa iǧfen i ṯemɣarṯ nnes, nettaṯ war ṯezni ca, ataf itarra-t ṯezna iƹni meȓa ṯƹaweḏ ȓemȓac. Wenni iy ɣa imeȓcen ak ṯenni iǧfen, ataf izna.

³³Aqa ṯesȓim ḏi Lkitab ƹaweḏ belli itwanna i ȓejḏuḏ nwem: Qa war txalaf bu ṯjaǧiṯ nnec, kemmeȓ ṯjaǧiṯ nnec iy ṯejjuǧeḏ zzaṯ i Siḏi Arebbi.[11]

³⁴Walakin nec qqareɣ-awem: War tjaǧam ca ƹemmarṣ: waxxa s ujenna ȓaḥeqqac netta ḏ lƹarc n Arebbi;

³⁵uȓa s ṯmurṯ ȓaḥeqqac xas itmarsen iḍaren nnes; waxxa s ṯendint n Lquds ȓaḥeqqac nettaṯ ḏ ṯandint n Uzeǧiḏ ameqqran.

³⁶War tjaǧa bu s uzeǧif nnec, ȓaḥeqqac war ṯzemmareḏ ca aḏ tarreḏ can n uzuṭṭu ḏ acemȓaȓ niɣ ḏ abercan.

³⁷Aḏ yiȓi wawaȓ nwem wah niɣ lla. Marra min ɣa ṯinim ḏ zzyada, ataf aẓwer nnes zi Cciṭan.

³⁸Aqa ṯesȓim ḏi Lkitab min itwannan ḏeg yijjen n zman: Wenni ɣa ikksen ṯiṭṭ i can yijjen, ataf aḏas kksen ṯiṭṭ. Wenni ɣa ikksen ṯiɣmest i can yijjen, ataf aḏas kksen ṯiɣmest.

³⁹Walakin nec qqareɣ-awem: War tƹarraḍem ca i wenni iǧan ḏ aƹeffan. Wenni c ɣa iseqqȓen ɣar uɣembub jjiheṯ ṯafusiṯ ḏewwaȓ-as jjiheṯ nneɣni.

⁴⁰Wenni ixsen ac yawi ɣar craƹ ḥima aḏac yawi ṯaqmijat, uc-as uȓa ḏ azeǧab nnec.

⁴¹Meȓa can yijjen zi ȓmexzen igga xak bezzez aḏ teysiḏ ȓeḥmeȓ ijjen n kilumit, ysi-ṯ cek ṯnayen kilumit.

⁴²Wenni ḏac ɣa ittaren can ṯmesȓayṯ, uc-as-t. Wenni d ɣa yasen ɣarek irezzu aḏ irḍeȓ war ṯ tarra ca ixwa.

⁴³Aqa ṯesȓim ḏi Lkitab min itwannan ḏeg yijjen n zman: Aḏ texseḏ ajjar nnec, aḏ tƹiffeḏ ȓaƹḏu nnec.

⁴⁴Walakin qqareɣ-awem nec: Xseṯ ȓƹaḏyan nwem, ttareṯ i Arebbi x yinni kenniw itƹeddaben,

⁴⁵ḥima aḏ tiȓim ḏ ṯarwa n Babaṯwem iy iǧan ḏeg ujenna. Ȓaḥeqqac itsummur-d ṯfuct x yinni iṣebḥanen ḏ yinni iƹeffanen. Iticc anẓar i yinni iteggen ȓxir ḏ yinni iteggen ccarr.

⁴⁶Meȓa kenniw texsem ɣir yinni iy kenniw itexsen, man lʼajar iy ɣarwem kenniw? Ma war iǧi amenni iy teggen uȓa ḏ iƹeccaren?[12]

⁴⁷Meȓa tseǧamem ɣir x imeddukaȓ nwem, iwa min teggem ḏ zzyada? Aqa uȓa ḏ ȓkuffar teggen manaya!

⁴⁸Iȓiṯ nican qaƹ, amecnaw mamc iǧa Babaṯwem ḏeg ujenna.