Read Tarifit Matta 6 Bible Online

Matta 6 - Tarifit bible

Matta 6

¹Ɣarwem aḏ teggem ȓxir zzaṯ i yiwḏan ḥima akenniw ẓren, ataf war ɣarwem itiȓi bu lʼajar zi Babaṯwem iǧan ḏeg ujenna.

²Ƹlaḥsab manaya, xmi ɣa ṯṣeddqeḏ i can n yijjen, war zzayes tberraḥ ca ḏi ȓbuq amecnaw mammec teggen lmunafiqin ḏi ṯemziḏawin ḏ znaqi bac azzaysen semɣaren yiwḏan. Aqa tesȓam ȓḥaqq: War ɣarsen itiȓi bu lʼajar.

³Walakin cek xmi ɣa ṯṣeddqeḏ i can n yijjen, itxeṣṣa fus nnec aẓeȓmaḍ war itessen min iticc fus afusi nnec.

⁴Ḥima ṣṣaḏaqa nnec aḏ twagg s ṯnufra. Ḏ Babac Arebbi ig iẓerren min itwaggen s ṯnufra ataf aḏac yuc lʼajar.

⁵Xmi ɣa ṯeẓẓaǧem, war tiȓim ca am lmunafiqin iy texsen aḏ ẓẓaǧen amen bedden ḏi ṯemziḏawin ḏ ṯɣemmura n znaqi ḥima aṯen ẓren yiwḏan. Aqa tesȓam ȓḥaqq: War ɣarsen itiȓi bu lʼajar.

⁶Walakin cek xmi ɣa ṯeẓẓaǧeḏ, aḏef ɣar uxxam nnec qqen xak ṯawwarṯ, ẓẓaǧ i Babac iǧan mani war ṯ itwiȓi ḥadd. Babac ig iẓerren min itwaggen s ṯnufra ataf ac ijaza.

⁷War tẓaǧam ca s wawaȓen war ɣarsen bu ȓmaƹna amecnaw mammec teggen ȓegnus. Ḥessben meȓa qqaren awaȓen aṭṭas, ataf Arebbi aḏasen istajeb.

⁸Lla, war teggem ca am niṯni ȓaḥeqqac Arebbi issen min ṯeḥḏajem qbeȓ ma ḏas t ṯettarem.

⁹Ha mammec iy ɣa ṯeẓẓaǧem: A Babaṯneɣ iǧan ḏeg ujenna, ḏ ameqqran ig iǧa yisem nnec.

¹⁰Aḏ d yas ȓmulk nnec, aḏ ggen ȓxaḍar nnec ḏi ṯmurṯ, mamc teggen ḏeg ujenna.

¹¹Uc-aneɣ kuȓ nhar aɣrum iy ɣa neḥḏaj.

¹²Ɣfar-aneɣ ȓmuƹṣiyaṯ nneɣ i neccin, mammec nsemmeḥ i yinni iy kiḏneɣ ixeṭṭan.

¹³War ḏaneɣ tegg ca ḏi ȓemḥayen, senjem-aneɣ zi ccarr. {Ȓaḥeqqac ȓmulk iǧan nnec, ḏ ṯizemmar, ḏ lƹaḍama i cek i ȓebda. Amin.}

¹⁴Meȓa ṯsemmḥem i yiwḏan ḏeg uxeṭṭi nni iy kiḏwem ixeṭṭan, ataf Babaṯwem iǧan ḏeg ujenna uȓa ḏ netta aḏawem iɣfar.

¹⁵Meȓa war ṯsemmḥem ca i yiwḏan ḏeg uxeṭṭi nni iy kiḏwem ixeṭṭan, ataf Babaṯwem uȓa ḏ netta war ḏawem iɣeffar ca x ddnub nwem.

¹⁶Xmi ɣa ṯẓummem, war teggem ca amecnaw mammec teggen lmunafiqin. Txeyyaqen ḥima marra iwḏan aṯen ssnen belli ẓummen. Aqa tesȓam ȓḥaqq: Ataf war ɣarsen itiȓi bu lʼajar.

¹⁷Walakin cek xmi ɣa ṯẓummeḏ, sireḏ aɣembub nnec mceḍ acewwaf nnec,

¹⁸ḥima iwḏan war tessnen ca qa cek ṯẓummeḏ. Walakin Siḏi Arebbi iy iǧan mani war ṯ itwiȓi ḥadd, netta ig issnen. U Siḏi Arebbi ig iẓerren min itwaggen s ṯnufra ataf ac ijaza.

¹⁹War snuffureṯ ca ȓkenz nwem ḏi ddunect-a mani yarecca tettent-ṯ ṯkeccawin ḏ mani ǧan iceffaren ccaṯen nqabeṯ[13] tacaren-ṯ.

²⁰Walakin snuffareṯ ȓkenz nwem ḏeg ujenna mani war yarecci ca war ṯ tettent ca ṯkeccawin ḏ mani war ǧin ca iceffaren ccaṯen nqabeṯ tacaren-ṯ.

²¹Aqa mani iǧa ȓkenz nnec, ḏinni iy ɣa yiȓi wuȓ nnec.

²²Ṯiṭṭawin am ṯfawṯ i ṯuḏarṯ nnec. Meȓa ɣarek ṯiṭṭawin ṣeḥḥant, ataf aɣarek ṯiȓi ṯfawṯ marra ḏi ṯuḏarṯ nnec.

²³Walakin meȓa ṯiṭṭawin nnec war ǧint ca mliḥ, ataf marra ṯuḏarṯ nnec aḏayes ṯiȓi ṯaǧest. Meȓa ṯfawṯ iy ḏayec ṯeḏwer ḏ ṯaǧest, cḥaȓ ḏ ṯubbarcent iy tiȓi ḏ ṯaǧest nni iy ḏayec.

²⁴War izemmar can yijjen aḏ yiȓi ḏ axeddam ɣar ṯnayen n siyaḏis. Mayemmi? Ima ijjen aṯ iƹiff, ijjen aṯ ixes. Niɣ ijjen aḏayes iṭṭef, ijjen aṯ iḥeggar. Aḏ txeḏmem i Arebbi niɣ aḏ txeḏmem i ȓewsex n ddunect-a, war iǧi bu s ṯnayen.

²⁵X manaya aḏawem iniɣ: War kessim ca s umnus i ṯuḏarṯ nwem ƹlaḥsab min ɣa ṯeccem niɣ ḏ min ɣa ṯeswem niɣ ḏ arruḍ iy ɣa ṯeḥḏajem i ddat nwem. Minzi ṯuḏarṯ-a tseggwa ktar zi macca. Ddat-a tseggwa ktar zeg warruḍ.

²⁶Xzareṯ mliḥ ɣar yijḍaḍ ujenna. War zerrƹen, war mejjaren, war xezznen ḏi ṯesȓafin. Walakin Babaṯwem iy iǧan ḏeg ujenna iy ḏasen iticcen aḏ ccen. Kenniw, ma war tseggwim ca aṭṭas s waṭṭas x yijḍaḍ?

²⁷Ug izemmaren zzaywem aḏ yarni s umnus nnes ɣir ṯsaƹƹat waha ḏi ȓƹumur nnes?

²⁸Mayemmi ṯkessim amnus i warruḍ? Xzareṯ ḏi nwar n ȓexȓa mammec igga, war yarebbeȓ war itxeyyiḍ.

²⁹Qqareɣ-awem nec: Uȓa ḏ azeǧiḏ Suliman mecḥaȓ ɣares ḏ agȓa war izemmar ca aḏ yareḍ ca n warruḍ igga am nwar-a wanita.

³⁰Meȓa Arebbi iticc arruḍ zaƹma i arbiƹ n ȓexȓa ig iǧan nhara aḏ iḥareq ṯiwecca ḏeg ufarran, ma war itegg akiḏwem kenniw ktar? Ḏaywem lʼiman nwem ḏ uqlil.

³¹War kessiṯ bu s umnus aḏ tinim, min ɣa necc? Niɣ ḏ min ɣa nsew? Niɣ ḏ min ɣa nareḍ ḏ arruḍ?

³²Marra manaya rezzun-ṯ ȓegnus. Aqa Babaṯwem iǧan ḏeg ujenna issen belli teḥḏajim ṯimesȓayin-a.

³³Rezzuṯ ḏ amezwaru x ȓmulk n Arebbi ḏ ṯuḏarṯ ig iǧan nican, ssenni ṯimesȓayin-a marra aḏawem marnint.

³⁴War kessiṯ bu s umnus i min ɣa iweqƹen ṯiwecca, aqa ṯiwecca aḏ iysi nniṯ s umnus i yixef nnes. Ȓhemm iy d imeḍehharen nhar nni aḏ ikfa nhar nni.