Read Tarifit Matta 7 Bible Online

Matta 7 - Tarifit bible

Matta 7

¹War tƹeyyabem ḥadd ḥima war kenniw itƹeyyib ca Arebbi.

²Mammec ɣa ṯƹeyybem amenni i kenniw iy ɣa iƹeyyeb Arebbi. Ȓaƹbar nni iy ṯsexḏamem ḏ wenni iy kiḏwem ɣa isexḏem Arebbi.

³Mayemmi tseḥqareḏ cwayt n uȓum ig iǧan ḏi ṯiṭṭ n wumac, cek tettuḏ akeccuḍ ig iǧan ḏi ṯiṭṭ nnec?

⁴Mammec teggeḏ ṯzeƹƹmeḏ aḏ tiniḏ i wumac: Ejj-ayi aḏac d kkseɣ ȓum-a ig iǧan ḏi ṯiṭṭ nnec, cek ƹaḏ tejjiḏ akeccuḍ ḏi ṯiṭṭ nnec?

⁵A lmunafiq, kkes ḏ amezwaru akeccuḍ zi ṯiṭṭ nnec. Ƹaḏ iy ɣa ṯetwaȓiḏ mliḥ ḥima aḏ tekkseḏ ȓum zi ṯiṭṭ n wumac.

⁶War ticceṯ ca min iqeddsen n Arebbi i iqzinen ḥima war ɣarwem d teƹqiben akenniw mezzqen. War neṭṭareṯ ca jjuwhar nwem zzaṯ i yiȓfan ḥima war xasen ƹeffsen ca.

⁷Ttarem, ataf aḏawem immuc. Rezzum, ataf aḏ tafem. Sqerqubem, ataf aḏawem rezmen.

⁸Minzi marra wenni ɣa ittaren aḏas immuc. Wenni ɣa irzun aḏ yaf. Wenni ɣa isqerqben aḏas ṯnurzem ṯewwarṯ.

⁹Meȓa can yijjen zzaywem ittar-as mmis aɣrum, ma aḏas yuc azru ḏeg umcan n uɣrum nni? Lla!

¹⁰Meȓa ittar-as asȓem, ma aḏas yuc fiɣer? Lla!

¹¹Meȓa kenniw ḏ iƹeffanen ṯessnem aḏ tucem i ṯarwa nwem min iǧan ḏ aṣebḥan, ataf Babaṯwem ig iǧan ḏeg ujenna itegg ktar. Iticc min iǧan ḏ aṣebḥan i yinni ḏas ṯ itettaren.

¹²Ggeṯ i yiwḏan min ṯexsem aḏawem ggen. Manaya ḏ ȓmaƹna n Ccariƹa n Musa ḏ ttaƹalim n lʼanbiya.

¹³Aḏfeṯ zi ṯewwarṯ iḥṣaren minzi ṯawwarṯ nni itawin ɣar jahennama ṯiriw aṭṭas, abriḏ nnes isheȓ. Aṭṭas iy zzayes iƹeddun.

¹⁴Walakin ṯawwarṯ iḥṣaren ḏ ubriḏ iqesḥen niṯni tawin ɣar ṯuḏarṯ. Ḏrus iy ɣa iƹḏun ssenni.

¹⁵Ḥḍam ixef nwem zeg yinni itarran ixef nsen ḏ lʼanbiya. Tasen-d ɣarwem am can n iḥuȓiyen walakin ḏeg wuȓawen nsen ḏ uccanen iwƹaren.

¹⁶Aṯen ṯessnem s ȓefƹayeȓ nsen. Ma zemmaren yiwḏan aḏ ȓeqḏen ṯazarṯ zeg isennanen, niɣ aḏ kksen aḍiȓ zi ṯzeggwarṯ?

¹⁷Ṯacejjarṯ ṯaṣebḥant tarew min iǧan ḏ aṣebḥan. Ṯacejjarṯ ṯaƹeffant tarew min iǧan ḏ aƹeffan.

¹⁸Ṯacejjarṯ ṯaṣebḥant war tirew ca min iǧan ḏ aƹeffan. Ṯenni ṯaƹeffant war tirew ca min iǧan ḏ aṣebḥan.

¹⁹Marra ṯacejjarṯ iy war itirwen ca min iǧan ḏ aṣebḥan aḏ twaqess aḏ tmenḍar ḏi ṯmessi.

²⁰Ammu s ȓefƹayeȓ nsen iy ɣa ṯessnem yinni itarran ixef nsen ḏ l'anbiya.

²¹Maci marra yinni iy ḏayi iqqaren a Siḏi a Siḏi aḏ aḏfen ɣar ȓmulk ujenna; Lla, war ṯ tiḏfen ca illa yinni iteggen min ixes Baba ig iǧan ḏeg ujenna.

²²Ḏi Yum Lḥisab ḏ Lƹiqab aṭṭas iy ḏayi ɣa inin: A Siḏi a Siḏi, yak s lḥikma n yisem nnec iy zi tuɣa nseȓmaḏ i yiwḏan? Yak s lḥikma n yisem nnec iy zi tuɣa nsufuɣ jnun? Yak s lḥikma n yisem nnec iy zi tuɣa ntegg ȓaƹjayeb?

²³Ȓexddenni aḏasen iniɣ: Tuɣayi nec ƹemmarṣ war kenniw ssineɣ ca. Beƹƹḏeṯ xafi a yinni iteggen ccarr!

²⁴Marra wenni itsȓan i wawaȓ inu ixeddem zzayes, netta am yijjen n bnaḏem ḏ amiɣis ibna ṯaddarṯ nnes x uzru.

²⁵Yuwṯa unẓar, ḥemȓen-d iɣezran, iṣuḍ-d arriḥ ijheḏ iƹḏu x ṯeddarṯ nni. Waxxa amenni war ṯewḍi ca ȓaḥeqqac ṯebna x dsas n uzru.

²⁶Marra wenni itsȓan i wawaȓ inu war zzayes ixeddem ca, netta am yijjen n ufɣuȓ ibna ṯaddarṯ nnes x yijḏi.

²⁷Yuwṯa unẓar, ḥemȓen-d iɣezran, iṣuḍ-d arriḥ ijheḏ iƹḏu x ṯeddarṯ nni. Ȓexddenni ṯewḍa, ṯeqqim ḏ ȓxirbeṯ."

²⁸Wami ikemmeȓ Ƹisa awaȓ nnes, tƹejjben ȓɣaci zeg useȓmeḏ nnes

²⁹minzi ɣares ssulṭa iy zi iseȓmaḏ, war iǧi bu amecnaw imseȓmaḏen nsen n ccariƹa.