Read Tarifit Matta 8 Bible Online

Matta 8 - Tarifit bible

Matta 8

¹Wami d ihwa Ƹisa zeg uḏrar nni ḏfaren-ṯ aṭṭas n ȓɣaci.

²Iqarreb-d ɣares ijjen ḏayes jḏam, isejjeḏ-as inna-as: "A Siḏi, cek meȓa ṯexseḏ ṯzemmareḏ aḏayi ṯessiṣfiḏ."

³Isers xas Ƹisa fus nnes iḥaḏa-ṯ inna-as: "Wah nec xseɣ, cek qa ṯgenfiḏ." Ṣafi ḏeg umcan igenfa umehȓuc nni zi jḏam nnes.

⁴Inna-as Ƹisa: "Xzar, war txebbar ḥadd." Inna-as: "Ruḥ ɣar ȓefqi seḍhar-as ixef nnec. Egg ṣṣeḏqeṯ nni iy zi iweṣṣa Musa ḥima aɣarsen ṯiȓi chaḏeṯ x min iweqƹen."

⁵Wami yuḏef Ƹisa ɣar ubilaj n Kafernaḥum, yusa-d ɣares ijjen n uƹaskari ḏ ameqqran n arrumanus. Iṭaleb-iṯ

⁶inna-as: "A Siḏi, aqa ɣari axeddam inu ḏ anecruf ḏi ṯeddarṯ itnezbar aṭṭas ḏi ṯassuṯ."

⁷Inna-as Ƹisa: "Aḏ raḥeɣ aṯ sgenfiɣ."

⁸Indeq-d uƹaskari nni ameqqran inna-as: "Lla a Siḏi, nec war sḏihiǧeɣ ca aḏ taḏfeḏ ɣar ṯeddarṯ inu. Ini ɣir ijjen n wawaȓ u ṣafi ataf aḏ igenfa uxeddam inu.

⁹Uȓa ḏ nec s yixef inu ɣari yinni xafi iḥekkmen. Ɣari ȓƹaskar x ufus inu ḥekkmeɣ xasen. Aḏ iniɣ i yijjen: Ruḥ, aḏ iraḥ. Aḏ iniɣ i yijjen: Araḥ-d, aḏ d yas. Aḏ iniɣ i uxeddam inu: Egg ṯa, at igg."

¹⁰Wami isȓa Ƹisa i manayenni itƹejjeb aṭṭas. Inna-asen i yinni ṯ iḏfaren: "Aqa tesȓam ȓḥaqq: Yinni iǧan zi Ayṯ-Israʼil war ḏaysen ufiɣ bu lʼiman imɣar aṭṭas am wanita!

¹¹Aqa qqareɣ-awem: Aḏ d asen aṭṭas n yiwḏan zi ccarq ḏ ȓɣarb aḏ qqimen ak Brahim ḏ Isḥaq ḏ Yaƹqub ɣar missa ḏi ȓmulk ujenna.

¹²Walakin yinni tuɣa itxeṣṣa aḏ warṯen ȓmulk n Arebbi, ataf aḏ menḍaren ɣar barra ḏi ṯaǧest mani ɣa iȓin imeṭṭawen ḏ uɣeẓẓaẓ n ṯeɣmas."

¹³Inna-as Ƹisa i uƹaskari nni: "Ruḥ! Aɣarec yiȓi anect min ṯumneḏ." Ȓexddenni igenfa uxeddam nni.

¹⁴Wami yuḏef Ƹisa ɣar ṯeddarṯ n Buṭrus, yufa ṯaḏeggwaȓṯ n Buṭrus ḏi ṯassuṯ ḏayes ṯimessi.

¹⁵Ɣir iḥaḏa-t s ufus ṯruḥ xas ṯmessi, ṯekkar ṯebḏa tsexxar xas.

¹⁶Wami ṯeɣȓi ṯfuct ɣar ṯmeddiṯ, uwin-d ɣar Ƹisa aṭṭas n yinni ḏi ǧan jnun. S lʼamar nnes isufuɣ zzaysen jnun isgenfa marra yinni iheȓcen.

¹⁷Manayenni ḥima aḏ ikemmeȓ wawaȓ iy inna Siḏi Arebbi i nnabi Icaƹya ḏeg yijjen n zman: "Iysi xaneɣ ȓeḥriqaṯ nneɣ, yarbu ȓehȓacaṯ nneɣ."[14]

¹⁸Wami iẓra Ƹisa aṭṭas n yiwḏan iy ḏas d innḍen, ikkar yumar imeḥḍaren nnes inna-asen: Yallah a neẓwam ɣar ujemmaḍ-in.

¹⁹Iqarreb-d ɣares ijjen n umseȓmaḏ n ccariƹa inna-as: "A Lmuƹallim, nec ac ḏfareɣ mani ma ṯruḥeḏ."

²⁰Inna-as Ƹisa: "Uccanen ɣarsen ifran nsen, ijḍaḍ ɣarsen ȓaƹwac nsen, walakin Mmis n bnaḏem war ɣares uȓa ḏ mani ɣa isummeṯ azeǧif nnes."

²¹Ƹaweḏ inna-as ij umeḥḍar nnes: "A Siḏi, sameḥ-ayi ḏ amezwaru aḏ raḥeɣ aḏ neḍȓeɣ baba."

²²Inna-as Ƹisa: "Ḏfar-ayi-d." Inna-as: "Yinni immuṯen ejj-iṯen aḏ neḍȓen imettinen nsen."

²³Inya Ƹisa ḏi ṯɣarrabut, ḏfaren-ṯ imeḥḍaren nnes.

²⁴Bȓa ȓexbar, ṯekkar-d ijjen n lƹaṣifa ṯejheḏ aṭṭas ḏi ȓebḥar ṯebḏa ṯɣarrabut tƹemmar s waman. Ƹisa netta tuɣaṯ iṭṭeṣ.

²⁵Qarrben ɣares imeḥḍaren, sfaqen-ṯ nnan-as: "A Siḏi, nejja-yaneɣ aqa neccin netmetta!"

²⁶Inna-asen Ƹisa: "Mayemmi teggwḏem qaƹ ammu? Lʼiman nwem ḏ uqlil." Ȓexddenni ikkar isbedd arriḥ ḏ ȓemwaj, yarsa ȓḥaȓ.

²⁷Qqimen iryazen nni tƹejjben ḏayes nnan: "Min iƹna wanitan? Uȓa ḏ arriḥ ḏ ȓebḥar tṭaƹan-as!"

²⁸Wami yuweḍ Ƹisa ɣar ujemmaḍ-in n ȓebḥar ɣar ṯmurṯ n ijariṯiyen, ȓqan-ṯ-iḏ ṯnayen n yiwḏan ḏaysen jnun ffɣen-d zeg imeḍȓan mani zeddɣen. Qesḥen, ccaṯen, war izemmar ḥadd axasen ikk x ubriḏ nni.

²⁹Ƹeyyḍen nnan-as: "Min ṯexseḏ zzayneɣ a Mmis n Arebbi? Ma ṯusiḏ-d aḏaneɣ ṯƹeddbeḏ qbeȓ i ȓweqṯ?"

³⁰Ɣar ȓeggwaj cwayt, ḏinni ijjen n ṯḥimerṯ ḏ ṯameqqrant n yiȓfan ṯarwes.[15]

³¹Jnun nni ttaren zi Ƹisa nnan-as: "Meȓa ṯsufɣeḏ-aneɣ, sekk-aneɣ ɣar ṯḥimerṯ-in n yiȓfan ḥima aḏaysen naḏef."

³²Inna-asen Ƹisa i jnun nni: "Ruḥem!" Ȓexddenni ffɣen zi ṯnayen nni n yiwḏan uḏfen ḏeg yiȓfan. Ṯehwa ṯḥimerṯ nni marra ḏi ṯeysarṯ ɣar ȓebḥar mmuṯen ḏeg waman.

³³Yinni yarewsen arewȓen ruḥen ɣar ubilaj, sufɣen ȓexbar ḏinni x marra min iweqƹen ḏ min iweqƹen i yiwḏan nni ḏi ǧan jnun.

³⁴Ȓexddenni ffɣen-d marra iwḏan n ubilaj bac aḏ raḥen aḏ ȓqan Ƹisa. Wami ṯ ẓrin, ḥeccmen-ṯ ḥima axasen ibeƹƹeḏ zi jjiheṯ nsen.