Read Tarifit Matta 9 Bible Online

Matta 9 - Tarifit bible

Matta 9

¹Inya Ƹisa ḏi ṯɣarrabut, iqḍeƹ ȓebḥar irewweḥ ɣar dcar nnes.

²Ḏinni can yiwḏan uwin-d ɣares ijjen n uryaz mmuṯen-as iḍaren, izzeȓ ḏi ṯassuṯ nnes. Wami Ƹisa iẓra lʼiman iy ḏaysen inna-as i unecruf nni: "War teggweḏ ca a mmi, qa twaɣfarent-ac ȓmuƹṣiyaṯ nnec."

³Ḏinni can imseȓmaḏen n ccariƹa qqaren ḏeg wuȓawen nsen: "Bnaḏem-a iqqar awaȓ war iḥȓin x Arebbi."

⁴Ƹisa issen min tfekkaren ḏi ȓaƹquȓaṯ nsen inna-asen: "Mayemmi tfekkarem ammu ḏi min war iḥȓin?

⁵Min isehȓen aṭṭas aḏas iniɣ i unecruf-a, ma aḏas iniɣ: Twaɣfarent-ac ȓmuƹṣiyaṯ nnec? Niɣ ma aḏas iniɣ: Kkar cek uyur?

⁶Nec xseɣ aḏ tessnem belli Mmis n bnaḏem ɣares ssulṭa x ṯmurṯ ḥima aḏ iɣfar ȓmuƹṣiyaṯ." Uca inna-as i unecruf nni: "Kkar, ysi ṯassuṯ nnec, ruḥ aḏ trewwḥeḏ ɣar ṯeddarṯ nnec!"

⁷Ikkar uryaz nni irewweḥ.

⁸Wami ẓrin yiwḏan manayenni, ggwḏen ḥemḏen Arebbi x ssulṭa iy ḏasen iticc i yiwḏan.

⁹Wami yuyur ssenni Ƹisa, yufa ijjen n uryaz qqaren-as Matta iqqim ḏeg umcan mani jemmƹen ḍḍariba. Inna-as Ƹisa: "Ḏfar-ayi-d." Uca ikkar Matta iḏfar-iṯ.

¹⁰Iqqim Ƹisa ḏi ṯeddarṯ n Matta itett netta ḏ imeḥḍaren nnes. Aṭṭas n iƹeccaren ḏ yinni iƹeṣṣan zaƹma qqimen tetten akiḏes.

¹¹Wami ẓrin ȓḥizeb n ifarrisiyen manayenni kkaren nnan-asen i imeḥḍaren nnes: "Mayemmi itett lmuƹallim nwem ak iƹeccaren ḏ yinni iƹeṣṣan?"

¹²Isȓa-yasen Ƹisa inna-asen: "Iwḏan iṣeḥḥan war teḥḏijin bu uḍbib, aḍbib teḥḏajan-ṯ imehȓac.

¹³Ruḥem rzum x ȓmaƹna n lʼaya iy iqqaren: Xseɣ aḏ treḥmem iwḏan, war xseɣ bu aḏ tɣarṣem i ȓebhayem."[16] Inna-asen: "War d usiɣ ca aḏ ȓaɣiɣ i yinni iǧan nican, usiɣ-d aḏ ȓaɣiɣ i yinni iƹeṣṣan!"

¹⁴Ṯumma qarrben-d imeḥḍaren n Yaḥya ɣar Ƹisa nnan-as: "Mayemmi neccin ḏ ȓḥizeb n ifarrisiyen ȓebda netẓumma, imeḥḍaren nnec war tẓummin ca?"

¹⁵Inna-asen Ƹisa: "Imeddukaȓ n muȓay, ma zemmaren aḏ xeyyqen ḏi nhar nni n ȓfarḥ nnes? Lla, walakin aḏ d asen wussan aḏ imeysi muȓay zi ȓwesṭ nsen. Ȓexddenni aḏ ẓummen!

¹⁶War iǧi ḥadd itreqqaƹ arruḍ ḏ ȓbaȓi s yijjen n ṯreqqiƹṯ n ttub ḏ jḏiḏ, mayemmi? Ȓaḥeqqac ṯareqqiƹṯ nni n jḏiḏ aḏ tnejmeƹ uca aḏ twakkes zeg warruḍ nni n ȓbaȓi. Ȓexddenni aḏ iqqim ucarrig imɣar!

¹⁷Uȓa ḏ aman n uḍiȓ ḏ jḏiḏ war xeǧqen ca ḏeg yiȓemawen iqḏimen, ḥima war dduqquzen war tzeǧiƹen ca waman n uḍiȓ aḏ ḍeyyƹen yiȓemawen nni. Walakin aman n uḍiȓ ḏ jḏiḏ xeǧqen ḏeg yiȓemawen ḏ jḏiḏ. Amenni war tḍeyyiƹ uȓa ḏ ijjen n ȓḥajeṯ: lla aman uḍiȓ, lla iȓemawen."

¹⁸Wami tuɣa ƹaḏ iqqar Ƹisa manaya, yusa-d ɣares ijjen n arrayes isejjeḏ-as inna-as: "Yeǧi qa ȓexxu iy ṯemmuṯ. Yallah akiḏi sers xas fus nnec ḥima aḏ teddar."

¹⁹Ikkar Ƹisa iḏfar-iṯ netta ḏ imeḥḍaren nnes.

²⁰Ḏinni ijjen n ṯemɣarṯ ṯenƹac iseggwusa zeg wami iy ṯehȓec, tazzeȓ s iḏammen.[17] Ṯeḏfar Ƹisa, ṯḥaḏa-yas ṭṭarf n useȓham nnes.

²¹Ṯenna qbeȓ ḏeg wuȓ nnes: "Meȓa ḥaḏiɣ ɣir aseȓham nnes ataf aḏ genfiɣ."

²²Ineqȓeb ɣares Ƹisa iẓri-t uca inna-as: "War teggweḏ ca a yeǧi, cem lʼiman nnem isgenfa-cem." Ṯgenfa ṯemɣarṯ nni ȓexddenni.

²³Wami yuweḍ Ƹisa ɣar ṯeddarṯ n arrayes nni, itwaȓa ḏinni ȓebƹaḍ zi ȓɣaci itzemmaren lmusiqa umettin u ḏ yijjen n lharaj.

²⁴Inna-asen Ƹisa: "Ffɣem ssa! Aqa ṯaḥenjirṯ-a war ṯemmuṯ ca, ṯeṭṭeṣ waha!" Ȓexddenni bḏan ḍeḥḥcen xas.

²⁵Wami sufɣen iwḏan nni, yuḏef ɣar uxxam iṭṭef-as ḏeg ufus i ṯḥenjirṯ nni uca ṯekkar.

²⁶Iffeɣ ȓexbar ɣar marra ayṯbab n ṯmurṯ nni.

²⁷Yuyur ssenni Ƹisa, ḏfaren-ṯ ṯnayen n iḍarɣaȓen tȓaɣan qqaren: "A Mmis n Ayṯ-Dawed, rḥem-aneɣ!"

²⁸Wami yuḏef Ƹisa ɣar ṯeddarṯ, qarrben ɣares iḍarɣaȓen nni. Inna-asen Ƹisa: "Ma ṯumnem belli nec zemmareɣ aḏ ggeɣ manaya?" Nnan-as: "Wah a Siḏi."

²⁹Uca iḥaḏa-yasen Ƹisa ṯiṭṭawin inna-asen: "Ƹlaḥsab lʼiman nwem iy ɣa twagenfam."

³⁰Ȓexddenni nurzment ṯiṭṭawin nsen. Iƹȓem-asen Ƹisa inna-asen: "Ɣarwem aḏ iffeɣ ȓexbar-a ɣar ca ḥadd!"

³¹Walakin niṯni ruḥen sufɣen ȓexbar nni x Ƹisa ḏi ṯmurṯ nni marra.

³²Ḏi ȓweqṯ iy ḏi ruḥen, can yiwḏan uwin-as-d i Ƹisa ijjen n uryaz ḏ azeynun ḏayes jjenn.

³³Wami isufeɣ Ƹisa jjenn nni, ibḏa uzeynun nni issawaȓ. Qqimen tƹejjben ȓɣaci nni nnan: "Ƹemmarṣ ma iwqeƹ manaya ḏi ṯmurṯ n Ayṯ-Israʼil."

³⁴Walakin ȓḥizeb n ifarrisiyen nnan: "Netta isufuɣ jnun ȓaḥeqqac arrayes n jnun yuca-as jjheḏ-a."

³⁵Yuyur Ƹisa ḏi marra ṯineddam[18] ḏ ȓedcur, iseȓmaḏ ḏi ṯemziḏawin n Ayṯ-Israʼil itḥeddaṯ itbeccar s ȓmulk n Arebbi. Isgenfa marra ȓehȓacaṯ ḏ ddiƹan n ddat.

³⁶Iẓerr Ƹisa ȓɣaci nni qqsen-as minzi twaƹeddaben tnehwaȓen, ggin amecnaw iḥuȓiyen war ɣarsen ca uw ṯen ɣa yarewsen.

³⁷Inna-asen i imeḥḍaren nnes: "Ṯafeǧaḥṯ aṭṭas walakin ḏrus icewwaren iy ɣa ixeḏmen.

³⁸Ttareṯ zi Bab n ṯfeǧaḥṯ aḏ yarni icewwaren ḏeg umarjeƹ nnes."