Read Tarifit Marqus 1 Bible Online

Marqus 1 - Tarifit bible

Marqus 1

¹Amezwaru n Lʼinjil n Ƹisa Lmasiḥ Mmis n Arebbi.

²Mammec iqqar Lkitab n nnabi Icaƹya: <Aqa tsekkiɣ-d ij n arrasul inu zzaṯec, ḥima aḏ isewjeḏ abriḏ nnec.

³Ṯmijja tȓaɣa ḏi ȓexȓa: Swejḏeṯ abriḏ i Siḏi Arebbi, ggeṯ ibriḏen nnes nican.>

⁴Yusa-d Yaḥya ɣar ȓexȓa. Itbeccar iwḏan ḥima aḏ tuben aḏ twaṭehharen s waman ḥima aḏ twaɣfarent ȓmuƹṣiyaṯ nsen.

⁵Tasen-d ɣares marra imezḏaɣ n ṯmurṯ n Yahuḏiya ḏ marra imezḏaɣ n ṯendint n Lquds, teƹtarafen s ȓmuƹṣiyaṯ nsen, Yaḥya itṭehhar-iṯen s waman ḏeg yiɣzar n Lʼurdun.

⁶Arruḍ n Yaḥya xeḏmen-ṯ s cƹar n uȓɣem, x nneṣṣ nnes ijjen n uḥezzam n yiȓem. Itett ṯmurɣi ḏ ṯamment ṯaḥurrect.

⁷Itḥeddaṯ iqqar: "Menbaƹd i nec aḏ d yas ijjen ijheḏ xafi, war sḏihiǧeɣ nec aḏ aḏreɣ ḥima aḏas fesyeɣ uȓa ḏ ifiȓan n ṯsiȓa nnes.

⁸Nec ṭehhareɣ-kenniw s waman, netta akenniw iṭehhar s Arruḥ iqeddsen."

⁹Ḏi ȓiyyam nni yusa-d Ƹisa zeg ubilaj n Naṣira iy iǧan ḏi ṯmurṯ n Ljalil, iṭehhar-iṯ Yaḥya s waman ḏeg yiɣzar n Lʼurdun.

¹⁰Wami d yuȓi zeg waman, ȓexddenni iẓra ajenna inurzem, ḏ Arruḥ n Arebbi ihewwa-d xas igga am yijjen n ṯeḏbirṯ.

¹¹Ḏ ijjen n ṯmijja zeg ujenna ṯeqqar: "Cek ḏ Memmi iƹizzen, nec farrḥeɣ zzayek."

¹²Ȓexddenni yuwi-ṯ Arruḥ nni ɣar ȓexȓa.

¹³Ikka ḏinni arbeƹin yum itjerrab-iṯ Cciṭan. Aqaṯ mani ǧan ȓuwḥuc, tsexxarent xas lmalaʼikaṯ.

¹⁴Wami ḥebbsen Yaḥya, yuyur Ƹisa iruḥ ɣar ṯmurṯ n Ljalil itbeccar ḏinni s Lʼinjil n Arebbi.

¹⁵Iqqar-asen: Aqa ȓweqṯ ṯuweḍ-d, ȓmulk n Arebbi yuḏes-d. Tubeṯ, amneṯ s Lʼinjil.

¹⁶Ƹisa wami iggur x cceṭṭ n ȓebḥar n Ljalil, iẓra Simƹan ḏ wumas Andrus neṭṭaren ṯracca ḏi ȓebḥar minzi niṯni ḏ iḥeǧaqen n iseȓman.

¹⁷Inna-asen Ƹisa: "Ḏfarem-ayi-d, aqa ȓexxu iy kenniw ɣa arreɣ ḏ iḥeǧaqen n yiwḏan."

¹⁸Ȓexddenni semḥen ḏi ṯracciwin nsen ḏfaren-ṯ.

¹⁹Iƹḏu cwayt aɣirin, iẓra Yaƹqub ḏ Yuḥanna niṯni ḏ ṯarwa n Zabadi, aqaṯen ḏi ṯɣarrabut ƹeddȓen ṯiracciwin.

²⁰Ȓexddenni iȓaɣa-yasen-d Ƹisa, semḥen ḏi babaṯsen Zabadi ig iǧan ḏi ṯɣarrabut ak ixeddamen nnes, ḏfaren-ṯ.

²¹Uḏfen ɣar ubilaj n Kafernaḥum. Ḏi nhar n ssebṯ n lƹibada yuḏef Ƹisa ḏi ṯemziḏa n Ayṯ-Israʼil ibḏa iseȓmaḏ ḏinni.

²²Tƹejjben ḏeg useȓmeḏ nnes ȓaḥeqqac ɣares ssulṭa iy zi iseȓmaḏ, war iǧi bu amecnaw imseȓmaḏen n ccariƹa.

²³Ȓexddenni ufin ḏi ṯemziḏa nni ijjen n bnaḏem ḏayes jjenn ḏ aƹeffan. Iȓaɣa s jjheḏ jjenn nni

²⁴inna-as: "Min ṯrezzuḏ zzayneɣ a Ƹisa Naṣiri? Ma ṯusiḏ-d axaneɣ ṯeqḍiḏ? Nec qa ssneɣ min ṯeƹniḏ; cek ḏ Lƹaḍim n Arebbi!"

²⁵Inha-ṯ Ƹisa inna-as: "Stuk cek, ffeɣ zzayes!"

²⁶Iserjijay-iṯ jjenn nni aƹeffan iƹeyyeḍ s yijjen n ṯmijja ṯemɣar iffeɣ zzayes.

²⁷Ḏehcen marra iwḏan nni nnan i wayawya: "Min iƹna manaya? Aseȓmeḏ-a ḏ jḏiḏ, ḏayes ssulṭa! Itʼamar uȓa ḏ jnun iƹeffanen, teggen-as array."

²⁸Ȓexddenni intacar ȓexbar nnes ḏi mkuȓ amcan ḏi jwayeh n Ljalil.

²⁹Wami d iffeɣ zi ṯemziḏa nni, yusa-d ɣar ṯeddarṯ n Simƹan ḏ Andrus akiḏes Yaƹqub ḏ Yuḥanna.

³⁰Yufa ṯaḏeggwaȓṯ n Simƹan ṯezzeȓ ḏi ṯassuṯ ḏayes ṯimessi. Ȓexddenni ƹawḏen-as xas.

³¹Iqarreb ɣares iṭṭef-it zeg ufus nnes isgaƹƹeḏ-it-id. Ṯeffeɣ-it ṯmessi, ṯekkar ṯebḏa tsexxar xasen.

³²Wami ṯeɣȓi ṯfuct ɣar ṯmeddiṯ, uwin-d ɣares marra yinni iheȓcen ḏ yinni ḏi ǧan jnun,

³³munen marra ayṯbab n ubilaj ḏinni ɣar ṯewwarṯ.

³⁴Isgenfa aṭṭas n imehȓac ḏaysen lʼanwaƹ n ȓehȓacaṯ. Isufeɣ aṭṭas n jnun, war ṯen ijji ca aḏ ssiwȓen minzi jnun-a ssnen min iƹna.

³⁵Ṯiwecca nnes zic wami ƹaḏ war iṣbiḥ ca ȓḥaȓ, ikkar iffeɣ iruḥ ɣar yijjen n umcan ixȓa, itẓaǧa ḏinni.

³⁶Irzu xas Simƹan ḏ yinni kiḏes iǧan.

³⁷Wami ṯ ufin nnan-as: "Marra rezzun xak."

³⁸Inna-asen: "Yallahiṯ akiḏi, a nraḥ ɣar ȓedcuraṯ nneɣni yuḏsen ḥima aḏ ḥeddṯeɣ uȓa ḏinni. X manaya mixef d usiɣ."

³⁹Iruḥ itḥeddaṯ ḏi ṯemziḏawin n Ayṯ-Israʼil ḏi marra ṯamurṯ n Ljalil isufuɣ jnun.

⁴⁰Yusa-d ɣar Ƹisa ijjen ihȓec ḏayes jḏam. Iwḍa x ifadden nnes iḥeccem-iṯ inna-as: "Cek meȓa ṯexseḏ, ṯzemmareḏ aḏayi ṯessiṣfiḏ."

⁴¹Iqqes-as i Ƹisa, iḥaḏa-ṯ s ufus nnes inna-as: "Wah nec xseɣ, cek qa ṯgenfiḏ!"

⁴²Ḏeg umcan ikkes-as jḏam nni iḏweȓ iṣfa.

⁴³Ȓexddenni issekk-iṯ Ƹisa iweṣṣa-ṯ aṭṭas

⁴⁴inna-as: "Xzar, war txebbar ḥadd." Inna-as: "Ruḥ ɣar ȓefqi seḍhar-as ixef nnec. Egg ṣṣeḏqeṯ nni iy zi iweṣṣa Musa ḥima aɣarsen ṯiȓi chaḏeṯ x min iweqƹen."

⁴⁵Walakin netta min igga? Iruḥ ibḏa issawaȓ aṭṭas, isufeɣ ȓexbar aȓ wami iḏweȓ Ƹisa war izemmar aḏ yaḏef ɣar ca n ubilaj bȓa ma aḏ isnuffar ixef nnes. Tuɣa labud itɣima ḏeg imucan ixwan, walakin waxxa amenni iwḏan tasen-d ɣares ḏinni zi marra imucan.