Read Tarifit Marqus 10 Bible Online

Marqus 10 - Tarifit bible

Marqus 10

¹Ikkar Ƹisa iffeɣ ssenni iruḥ ɣar jwayeh n Yahuḏiya ḏ ujemmaḍ-in n yiɣzar n Lʼurdun. Munen-d xas ḏinni ȓɣaci ƹaweḏ, ibḏa iseȓmaḏ-iṯen amecnaw ȓebda.

²Qarrben-d ɣares can yiwḏan zi ȓḥizeb n ifarrisiyen ḥima aṯ jarrben nnan-as: "Ma ḥalal aḏ iǧef can uryaz i ṯemɣarṯ nnes?"

³Inna-asen Ƹisa: "Minxef kenniw iweṣṣa Musa?"

⁴Nnan-as ifarrisiyen: "Musa ismeḥ i uryaz aḏ yari ṯabrat n waǧaf aḏas t yuc i ṯemɣarṯ nnes aḏas iǧef."

⁵Inna-asen Ƹisa: "Musa yura ȓuṣiyeṯ nni i kenniw minzi ɣarwem uȓ iqseḥ.

⁶Walakin zeg wami ṯebḏa ddunect Arebbi ixȓeq-d aryaz ḏ ṯemɣarṯ.

⁷S manayenni aryaz aḏ ismeḥ ḏi babas ḏ yemmas aḏ imun ak ṯemɣarṯ nnes,

⁸aḏ ḏewȓen s ṯnayen iḏsen ḏ ijjen. X manaya war tiȓin ca ḏ ṯnayen; Lla, aḏ iȓin ḏ ijjen.

⁹Iḏen, min ismun Arebbi war ṯ isfarreq ca bnaḏem."

¹⁰Ḏi ṯeddarṯ sseqsan-ṯ imeḥḍaren nnes ƹaweḏ x manayenni.

¹¹Inna-asen Ƹisa: "Marra wenni ɣa iǧfen i ṯemɣarṯ nnes yuwi can yicten nneɣni, ataf izna.

¹²Ṯamɣarṯ meȓa ṯeǧef i uryaz nnes ṯuwi can yijjen nneɣni, ataf ṯezna."

¹³Uwin-d yiwḏan can iḥenjiren ḏ imezyanen ɣar Ƹisa ḥima aṯen iḥaḏa, walakin ƹarrḍen-asen imeḥḍaren nnes.

¹⁴Iẓra Ƹisa manaya, war ḏas iƹjib bu ȓḥaȓ inna-asen: "Jjem iḥenjiren imezyanen aɣari d asen. War ḏasen tƹarraḍem ca ȓaḥeqqac ȓmulk n Arebbi itiȓi ɣar yinni iy iǧan am yina.

¹⁵Aqa tesȓam ȓḥaqq: Labud i bnaḏem aḏ yamen s ȓmulk n Arebbi mamc zzayes itamen uḥenjir amezyan. Meȓa lla, ataf bnaḏem nni ƹemmarṣ aḏ yaḏef ḏi ȓmulk n Arebbi."

¹⁶Iḏerreƹ-asen Ƹisa igga xasen ifassen nnes ibarek-iṯen.

¹⁷Ƹisa wami iggur x ubriḏ, yusa-d ɣares ijjen itazzeȓ iwḍa x ifadden zzaṯes inna-as: "A Lmuƹallim aṣebḥan, min ɣa ggeɣ ḥima aɣari ṯiȓi ṯuḏarṯ n ȓebda?"

¹⁸Inna-as Ƹisa: "Mayemmi ṯeqqareḏ qa nec ḏ aṣebḥan? War iǧi ḥadd ḏ aṣebḥan illa Arebbi waḥḏes.

¹⁹Ṯessneḏ ȓuṣiyaṯ: War neqq, war zenna, war tacar, war cehheḏ bu ẓẓur, war cemmeṯ, weqqar babac ḏ yemmac."

²⁰Inna-as uryaz nni: "A Lmuƹallim, zeg wami iy ǧiɣ nec ḏ amezyan tweqqareɣ qaƹ manaya."

²¹Ixzar ɣares Ƹisa yuḏef-as ɣar wuȓ nnes inna-as: "Qa ṯeqqim-ac ijjen n ȓḥajeṯ war t ṯeggiḏ ca." Inna-as: "Ruḥ zenz marra min ɣarek ḏ agȓa ṣeddeq-iṯ x ȓmusakin aɣarek yiȓi ȓkenz ḏeg ujenna, ȓexddenni araḥ-d cek ḏfar-ayi-d."

²²Wami isȓa i manayenni iruḥ ixeyyeq aṭṭas ȓaḥeqqac ɣares aṭṭas n wagȓa.

²³Ixzar ɣarsen Ƹisa inna-asen i imeḥḍaren nnes: "Mecḥaȓ iqseḥ xasen x twajar aḏ aḏfen ȓmulk n Arebbi."

²⁴Ḏehcen imeḥḍaren nnes x wawaȓ nni. Inna-asen Ƹisa ƹaweḏ: "A ṯarwa inu, mecḥaȓ iqseḥ aḏ yaḏef bnaḏem ȓmulk n Arebbi!

²⁵Aqa isheȓ aḏ iƹḏu ijjen n uȓɣem zi ṯiṭṭ n ṯseynefṯ qbeȓ ma aḏ yaḏef ijjen n ttajar ḏi ȓmulk n Arebbi!"

²⁶Imeḥḍaren tƹejjben aṭṭas nnan i wayawya: "Xyar, ug izemmaren aḏ injem!?"

²⁷Ixzar ɣarsen Ƹisa inna-asen: "Iwḏan war zemmaren ca i manaya. Walakin Arebbi wah, izemmar i kuȓci."

²⁸Indeq-d Buṭrus inna-as: "Aqa neccin nesmeḥ ḏi kuȓci neḏfar-ic!"

²⁹Inna-asen Ƹisa: "Aqa tesȓam ȓḥaqq: Marra wenni isemḥen ḏi ṯeddarṯ nnes niɣ ḏi ayṯmas niɣ ḏi suyṯmas niɣ ḏi yemmas niɣ ḏi babas niɣ ḏi ṯarwa nnes niɣ ḏeg imarjeƹiwen nnes x ssabab inu nec u ƹlaḥsab Lʼinjil,

³⁰ataf aɣares ṯiȓi miyya n ṯseqqar zi ṯuḏrin ḏ ayṯmas ḏ suyṯmas ḏ yemmas ḏ ṯarwa nnes ḏ imarjeƹiwen nnes. Aɣares yiȓi uƹeddeb ḏi zman-a, walakin ḏi zman iy d ɣa yasen aɣares ṯiȓi ṯuḏarṯ n ȓebda.

³¹Aṭṭas iy iǧan ḏ imezwura aḏ ḏewȓen ḏ ineggura; Yinni iy iǧan ḏ ineggura aḏ ḏewȓen ḏ imezwura."

³²Aqaṯen x ubriḏ tgaƹƹaḏen ɣar ṯendint n Lquds, Ƹisa aqaṯ zzaṯ. Imeḥḍaren nnes ḏehcen, yinni ṯ iḏfaren ggwḏen. Iruḥ yuwi ṯenƹac nni n imeḥḍaren nnes ṯwaȓa nneɣni waḥeḏsen, ibḏa issawaȓ akiḏsen x min ḏas ɣa iweqƹen inna:

³³"Aqa netgaƹƹaḏ ɣar Lquds mani ɣa itwaxḏeƹ Mmis n bnaḏem i arruyas n ȓfuqaha ḏ imseȓmaḏen n ccariƹa. Axas ḥekmen s ȓmewṯ, aṯ sellmen i yinni war iǧin ca zi Ayṯ-Israʼil.

³⁴Axas ḍeḥcen, axas ssusfen, aṯ uwṯen s usɣun, aṯ nɣen. Nhar wis ṯeȓtiyyam aḏ d ikkar zi ȓmewṯ."

³⁵Yaƹqub ḏ Yuḥanna iy iǧan ḏ ṯarwa n Zabadi qarrben ɣar Ƹisa nnan-as: "A Lmuƹallim, nrezzu aḏaneɣ ṯḏebbareḏ min ɣa nettar zzayek."

³⁶Inna-asen Ƹisa: "Min ṯrezzum aḏawem ḏebbareɣ?"

³⁷Nnan-as: "Ejj-aneɣ a neqqim ḏi lƹaḍama nnec ijjen x ufusi ijjen x uẓeȓmaḍ nnec."

³⁸Inna-asen Ƹisa: "Kenniw war ṯessinem ca min ṯettarem. Ma ṯzemmarem aḏ teswem zi ȓkas nni iy zi ɣa sweɣ nec? Niɣ aḏ tɣeḍsem ḏi ȓaƹḏab nni iy ḏi ɣa ɣeḍseɣ nec?"

³⁹Nnan-as: "Wah, nzemmar-as!" Inna-asen Ƹisa: "Wah, ataf aḏ teswem zi ȓkas nni iy zi ɣa sweɣ nec, aḏ tɣeḍsem ḏi ȓaƹḏab nni iy ḏi ɣa ɣeḍseɣ nec.

⁴⁰Walakin aɣimi x ufusi inu niɣ x uẓeȓmaḍ inu war iǧi bu ḏ nec iy ṯ ɣa yucen, aḏ immuc i yinni umi itwassewjeḏ."

⁴¹Ƹecra nni n imeḥḍaren wami sȓin x min rezzun Yaƹqub ḏ Yuḥanna war ḏasen iƹjib ca ȓḥaȓ.

⁴²Iȓaɣa-yasen-d Ƹisa marra iḏsen inna-asen: "Qa ṯessnem arruyas n ȓegnus ḥekkmen x ccuƹub nsen, yinni imeqqranen zzaysen tzeyyaren xasen.

⁴³Walakin manayenni itxeṣṣa war itiȓi ca jarawem; Lla, wenni irezzun aḏ iḏweȓ ḏ ameqqran jarawem itxeṣṣa-yas aḏ yiȓi ḏ axeddam nwem.

⁴⁴Wenni irezzun aḏ iḏweȓ ḏ amezwaru jarawem itxeṣṣa-yas aḏ yiȓi ḏ ismeɣ n marra.

⁴⁵Mmis n bnaḏem uȓa ḏ netta war d yusi ca ḥima axas xeḏmen yiwḏan; Lla, netta yusa-d ḥima axasen ixḏem, axasen iṣeddeq ṯuḏarṯ nnes ḥima aḏ isenjem aṭṭas zzaysen."

⁴⁶Uwḍen ɣar ṯendint n Ariḥa. Menbaƹd iffeɣ Ƹisa zi Ariḥa ak imeḥḍaren nnes ḏ waṭṭas n ȓɣaci. Ufin ḏinni ijjen n uḍarɣaȓ iqqim ṭṭarf n ubriḏ itettar, qqaren-as Bartimus mmis n Timus.

⁴⁷Itesȓa belli Ƹisa Naṣiri iy iƹeddun ssenni ibḏa isnekkar ṯɣuyyeṯ iqqar: "A Ƹisa a Mmis n Ayṯ-Dawed, rḥem-ayi!"

⁴⁸Zeyyaren xas aṭṭas n yiwḏan qqaren-as sqar. Netta yugi, iqqim isnekkar ṯɣuyyeṯ ƹaḏ s jjheḏ iqqar: "A Mmis n Ayṯ-Dawed, rḥem-ayi!"

⁴⁹Ibedd Ƹisa inna-asen: "Ȓaɣam-d xas." Ȓaɣan-d x uḍarɣaȓ nni nnan-as: "Fareḥ cek kkar, aqa itȓaɣa-d xak Ƹisa."

⁵⁰Ikkes azeǧab nnes inḍar-iṯ, inexḍef ḏeɣya ibedd x iḍaren nnes yusa-d ɣar Ƹisa.

⁵¹Inna-as Ƹisa: "Min ṯexseḏ aḏac ggeɣ?" Inna-as uḍarɣaȓ nni: "A Siḏi, qa nec xseɣ aḏ twaȓiɣ."

⁵²Indeq-d Ƹisa inna-as: "Ruḥ, qa lʼiman nnec isgenfa-cek!" Ȓexddenni ibḏa itwaȓa iḏfar Ƹisa ḏeg ubriḏ.