Read Tarifit Marqus 11 Bible Online

Marqus 11 - Tarifit bible

Marqus 11

¹Wami qarrben ɣar ṯendint n Lquds ɣar ibilajen n Bayt Faji ḏ Bayt Ƹanya zzaṯ i Uḏrar n Zzitun, ikkar Ƹisa issekk ṯnayen zeg imeḥḍaren nnes

²inna-asen: "Ruḥem ɣar ubilaj-in iy iǧan zzaṯwem. Xmi ɣa ṯawḍem ḏinni, aḏ tafem ij usnus iqqen ƹemmarṣ war xas inyi uȓa ḏ ijjen, fsim-as awim-ṯ-iḏ.

³Meȓa issiweȓ-d ɣarwem can yijjen inna-awem mayemmi teggem ammu, inim-as qa iḥḏaj-iṯ Siḏiṯneɣ, walakin aḏawem ṯiḏ yarr ḏanita ḏeɣya."

⁴Ruḥen ufin ijjen n usnus ḏi zzenqeṯ iqqen ɣar yijjen n ṯewwarṯ, fesyen-as.

⁵Nnan-asen ȓebƹaḍ zeg yinni ibedden ḏinni: Min teggem? Mayemmi ṯfessim i usnus-a?

⁶Jawben-ṯen ƹlaḥsab mammec ṯen iweṣṣa Ƹisa, uca jjin-ṯen.

⁷Uwin-ṯ-iḏ ɣar Ƹisa ggin xas izeǧuba nsen, netta inya xas.

⁸Aṭṭas n yiwḏan ssun-as abriḏ s izeǧuba nsen. Ȓebƹaḍ zzaysen qessen zeg imarjeƹiwen ȓefruƹ n ȓcejjur ssun-as zzaysen abriḏ.

⁹Yinni igguren zzaṯes ḏ yinni iy ṯ iḏeffaren qqaren: "Lḥamdu i Arebbi! Ssaƹḏ n wanita iy d yusin ƹlaḥsab isem n Siḏi Arebbi.

¹⁰Ssaƹḏ n ȓmulk nni iy d itasen n jeddiṯneɣ Dawed. Lḥamdu i Arebbi yuƹȓan."

¹¹Yuḏef Ƹisa ɣar ṯendint n Lquds ɣar ṯemziḏa ṯameqqrant n Ayṯ-Israʼil, ixzar min ḏinni marra. Walakin tuɣa iƹḏu ȓḥaȓ, iffeɣ ak ṯenƹac n imeḥḍaren nnes iruḥ ɣar Bayt Ƹanya.

¹²Ṯiwecca nnes teffɣen zi Bayt Ƹanya, Ƹisa iǧuz.

¹³Iẓra zi ȓeggwaj ijjen n ṯcejjarṯ n ṯazarṯ ḏayes ṯifray, iqarreb ɣares irezzu x ṯazarṯ. Wami ɣares yuweḍ yufa ḏayes ṯifray waha minzi ƹaḏ war d ṯuwiḍ ca ȓweqṯ n ṯazarṯ.

¹⁴Inna-as: "Cem zi ssa aȓ ṯsawent ƹemmarṣ war zzayem itett ḥadd." Imeḥḍaren nnes sȓan-as i min inna.

¹⁵Ṣafi uwḍen ɣar ṯendint n Lquds. Yuḏef Ƹisa ɣar ṯemziḏa ṯameqqrant ibḏa itazzeȓ x yinni issaɣen ḏ yinni iznuzan ḏinni ḏi ṯemziḏa. Iqȓeb-asen missaṯ n yinni itṣarrafen tmenyaṯ ḏ ȓekrasa n yinni iznuzan iḏbiren.

¹⁶War itijji uȓa ḏ ijjen aḏ ikk x ṯemziḏa meȓa ɣares sseȓƹaṯ.

¹⁷Iseȓmaḏ-iṯen inna-asen: "Ma iqqar Lkitab ma lla belli <Ṯaddarṯ inu aḏ tiȓi ḏ ṯaddarṯ n ṯẓaǧiṯ i marra ȓegnus>? Walakin kenniw ṯarrim-teṯ ḏ ifri n ixewwanen."

¹⁸Sȓin-as arruyas n ȓfuqaha ḏ imseȓmaḏen n ccariƹa, bḏan tfekkaren mammec ṯ ɣa nɣen. Ggwḏen zzayes wami marra ȓɣaci qqimen ḏehhcen s useȓmeḏ nnes.

¹⁹Ɣar ṯmeddiṯ teffɣen ɣar barra n ṯendint.

²⁰Ɣar sbaḥ zic wami gguren x ubriḏ ẓrin ṯacejjarṯ nni n ṯazarṯ ṯuzeɣ s iẓewran nnes.

²¹Ifekkar ḏayes Buṭrus inna-as i Ƹisa: "Xzar a Lmuƹallim, ṯacejjarṯ nni n ṯazarṯ iy ṯexziḏ aqa ṯuzeɣ!"

²²Indeq-d Ƹisa inna-asen: "Amnem zi Arebbi!

²³Aqa tesȓam ȓḥaqq: Meȓa can yijjen inna-as i uḏrar-a: Neqȓeƹ-d cek ssanita ṯmenḍared ḏi ȓebḥar, u ḏeg wuȓ nnes war ḏayes bu ccekk yumen aḏ iwqeƹ manayenni, ataf manayenni aḏ yiȓi.

²⁴X manaya aḏawem iniɣ: Qaƹ min ɣa ṯettarem i Arebbi ḏi ṯẓaǧiṯ nwem, amnem belli aḏ tiȓi aɣarwem d ṯaweḍ ataf aɣarwem d tiȓi.

²⁵Kenniw xmi ɣa ṯbeddem aḏ teẓẓaǧem, meȓa ɣarwem ca n lƹadawa ak can yijjen semḥem-as ḥima Babaṯwem iǧan ḏeg ujenna aḏawem iɣfar ddnub nwem.

²⁶{Meȓa war ṯsemḥem ca i yiwḏan, Babaṯwem iǧan ḏeg ujenna war ḏawem iɣeffar ca ddnub nwem.}"

²⁷Ṣafi ḏewȓen ɣar Lquds. Ƹisa iggur ḏi ṯemziḏa ṯameqqrant, usin-d ɣares arruyas n ȓfuqaha ḏ imseȓmaḏen n ccariƹa ḏ imeqqranen n Ayṯ-Israʼil.

²⁸Kkaren nnan-as: "Cek manis ḏac d ṯekka ssulṭa nni iy zi teggeḏ ṯimesȓayin-a? Wi ḏac yucin ssulṭa nni iy zi ṯent teggeḏ"

²⁹Ijaweb-iṯen Ƹisa inna-asen: "Uȓa ḏ nec akenniw sseqsiɣ x yijjen n ṯmesȓayṯ. Meȓa ṯjawbem-ayi-d xas, ataf aḏawem iniɣ zi manis ḏayi d ṯekka ssulṭa-ya iy zi teggeɣ ṯimesȓayin-a."

³⁰Inna-asen Ƹisa: "Yaḥya, man ssulṭa iy zi iṭehhar s waman, ma zi Arebbi ma zeg yiwḏan? Jawbem-ayi-d."

³¹Ssiwȓen jarasen nnan: "Meȓa nenna-as ssulṭa nni qa ṯekka-d zi Arebbi, ataf aḏaneɣ yini Ƹisa mayemmi war zzayes ṯuminem?

³²Walakin, meȓa nenna-as ssulṭa nni qa ṯekka-d zeg yiwḏan???" Ggwḏen niṯni zi ccaƹb aḏ inin amenni minzi qaƹ twaȓan belli Yaḥya netta ḏ nnabi.

³³Uca nnan-as i Ƹisa: "Neccin war nessin ca." Indeq-d Ƹisa inna-asen: "Iwa uȓa ḏ nec war ḏawem qqareɣ ca manis ḏayi d ṯekka ssulṭa-ya iy zi teggeɣ ṯimesȓayin-a."