Read Tarifit Marqus 12 Bible Online

Marqus 12 - Tarifit bible

Marqus 12

¹Ibḏa Ƹisa issawaȓ akiḏsen s ȓemƹani inna-asen: "Ijjen n ssiyyed iẓẓu aḍiȓ ḏeg yijjen n umarjeƹ nnes. Inneḍ-as-d ȓḥiḍ, igga ḏayes ṯasirṯ uḍiȓ. Ibna ḏayes ijjen n ṯsumƹeṯ i ȓƹasseṯ. Ijja ḏayes ixemmasen ṣafi iruḥ isafar.

²Wami d yuweḍ ȓweqṯ n uȓqeḍ n uḍiȓ, ikkar issekk ijjen n uxeddam ɣar ixemmasen nni bac aḏas d ucen ȓḥaqq nnes n umarjeƹ n uḍiȓ.

³Walakin min ggin ixemmasen nni? Ṭṭfen-ṯ uwṯin-ṯ, ssekken-ṯ-id ixwa.

⁴Issekk-asen ƹaweḏ ijjen n uxeddam nneɣni, merzen-as ƹedden xas.

⁵Issekk-asen ijjen nneɣni, nɣin-ṯ. Issekk-asen inneɣni aṭṭas, ijjen uwṯin-ṯ ijjen nɣin-ṯ.

⁶Iqqim-as memmis iƹizzen waḥḏes. Ɣar uneggaru issekk-iṯ ɣarsen inna aqa aḏ ggwḏen memmi.

⁷Ixemmasen nni min ggin? Kkaren nnan i wayawya: Aqa wenni iy ɣa iwarṯen! Aṯ nneɣ bac aḏas nawi amarjeƹ-a n uḍiȓ!

⁸Ṭṭfen-ṯ nɣin-ṯ, nḍaren-ṯ-iḏ ɣar barra i umarjeƹ uḍiȓ.

⁹Iwa, min ḏasen ɣa igg bab n umarjeƹ nni uḍiȓ? Aḏ d yas netta s yixef nnes aḏ ineɣ ixemmasen nni marra aḏ ijj amarjeƹ nni uḍiȓ i inneɣni.

¹⁰Ma ƹemmarṣ war ṯeɣrim min yurin ḏi Lkitab? <Azru iy ƹiffen ibennayen, iwqeƹ ḏeg umcan aṣebḥan ḏi ṯɣemmarṯ n dsas.

¹¹Ḏ Siḏi Arebbi ig iggin manaya, ḏ ijjen n ȓḥajeṯ ḏ ṯameqqrant!>"

¹²Lḥukkam n Ayṯ-Israʼil rezzun aḏ ṭṭfen Ƹisa, walakin ggwḏen zi ccaƹb. Fehmen belli issawaȓ xasen Ƹisa s ȓmaƹna-ya. Jjin-ṯ uyuren ssenni.

¹³Kkaren lḥukkam nni ssekken ɣar Ƹisa can ifarrisiyen ḏ can yiwḏan zi ȓḥizeb n uzeǧiḏ Hirudus, rzun aṯ ṭṭfen x ca n wawaȓ nnes.

¹⁴Wami d usin ɣar Ƹisa nnan-as: "A Lmuƹallim qa nessen belli cek nican iy ṯeǧiḏ. War teggwḏeḏ ca zeg yiwḏan ȓaḥeqqac war teggeḏ bu s wuḏemawen. Ṯseȓmaḏeḏ s ȓḥaqq mammec ixes Arebbi a nƹic. Ini-yaneɣ: Ma ṯsemmeḥ ccariƹa nneɣ a nxeǧes ḍḍariba i uzeǧiḏ Qayṣar niɣ lla? Ma ḏas t nxeǧes niɣ lla?"

¹⁵Issen Ƹisa ixarwiḍen nni iy ḏaysen inna-asen: "Mayemmi ḏayi ṯsewjaḏem ṯaxcebṯ? Awim-ayi-d dinar nni n ḍḍariba ḥima aṯ ẓreɣ."

¹⁶Ucin-as-ṯ-iḏ. Inna-asen: "Wi yiȓan teṣwirṯ-a ḏ yisem-a iy ḏayes?" Nnan-as: "N Qayṣar."

¹⁷Indeq-d Ƹisa inna-asen: "Min iǧan n Qayṣar ucem-as-ṯ i Qayṣar. Min iǧan n Arebbi ucem-as-ṯ i Arebbi." Uca qqimen tƹejjben ḏayes.

¹⁸Qarrben-d ɣar Ƹisa can yiwḏan zi ȓḥizeb n iṣadduqiyen (qqaren niṯni belli iwḏan war d tnekkaren ca zi ȓmewṯ). Kkaren nnan-as:

¹⁹"A Lmuƹallim, qa yura-aneɣ Musa aryaz meȓa immuṯ ijja ṯamɣarṯ nnes war kiḏes d ijji bu ṯarwa, ṯajjaȓṯ nni labud at yawi uȓwes nnes bac akiḏes d ijj ṯarwa i wumas nni immuṯen.

²⁰Neccin tuɣa akiḏneɣ sebƹa n wawmaṯen, imȓec umezwaru immuṯ war d ijji bu ṯarwa.

²¹Ṯamɣarṯ nni yuwi-t wis ṯnayen immuṯ war d ijji bu ṯarwa. Amenni ƹaweḏ wis ṯȓaṯa.

²²Amenni ƹaweḏ aȓ wis sebƹa, mmuṯen marra war kis d jjin bu ddurriṯ. Aȓ uneggaru uȓa ḏ ṯamɣarṯ nni ṯemmuṯ.

²³Yum Lqiyama, xmi d ɣa kkaren yinni immuṯen, umi ɣa ṯiȓi ṯemɣarṯ nni? Aqa uwin-t s sebƹa iḏsen."

²⁴Indeq-d Ƹisa inna-asen: "Kenniw ṯexḍam ȓaḥeqqac war ṯessinem ca Lkitab, war ṯessinem ca uȓa ḏ jjheḏ n Arebbi.

²⁵Xmi d ɣa kkaren yinni immuṯen iryazen ḏ ṯemɣarin war meǧcen ca war twasmeǧicen ca; Lla, aḏ iȓin amecnaw lmalaʼikaṯ ig iǧan ḏeg ujenna.

²⁶Walakin cuf, yinni immuṯen aḏ d kkaren zi ȓmewṯ. Ma ƹemmarṣ war ṯeɣrim min yurin ḏi Lkitab n Musa? Ḏi ȓqiṣṣa n uxcab,[8] wami issiweȓ Arebbi ak Musa inna-as qa nec ḏ Arebbi n Brahim, ḏ Arebbi n Isḥaq, ḏ Arebbi n Yaƹqub."[9]

²⁷Inna-asen Ƹisa: "Netta ḏ Arebbi n yinni iddaren maci n yinni immuṯen. Aqa kenniw ṯexḍam aṭṭas!"

²⁸Yusa-d ijjen zeg imseȓmaḏen n ccariƹa isȓa-yasen temnaqacen, yufa belli Ƹisa ijaweb-iṯen mliḥ. Ikkar netta inna-as i Ƹisa: "Min ṯeƹna ȓuṣiyeṯ iy iǧan ḏ ṯameqqrant qaƹ ḏi ccariƹa?"

²⁹Inna-as Ƹisa: "Ȓuṣiyeṯ ṯameqqrant ḏ ṯanita: Ṣennṭeṯ ay Ayṯ-Israʼil, Siḏi Arebbi ḏ lʼilah nneɣ, Siḏi Arebbi ḏ ijjen.

³⁰Aḏ texseḏ Siḏi Arebbi nnec s marra uȓ nnec, s marra arruḥ nnec, s marra ȓaƹqeȓ nnec, s marra jjheḏ nnec.

³¹Ȓuṣiyeṯ wis ṯnayen ḏ ṯanita: Aḏ texseḏ ajjar nnec amecnaw ixef nnec. War ḏinni bu can ȓuṣiyeṯ ktar zi ṯina."

³²Inna-as umseȓmaḏ nni n ccariƹa: "A Lmuƹallim mliḥ, min ṯenniḏ ḏ ȓḥaqq. Siḏi Arebbi ḏ ijjen, war ḏinni uȓa ḏ ijjen illa netta.

³³U ƹaweḏ meȓa bnaḏem itexs Siḏi Arebbi s marra uȓ nnes ḏ ȓaƹqeȓ nnes ḏ jjheḏ nnes aḏ ixes uȓa ḏ ajjar nnes amecnaw ixef nnes, manaya ḥsen zi bnaḏem meȓa iɣareṣ dbiḥeṯ issecmaḍ-it qaƹ ḏi tmessi niɣ aḏ iqeddem mana ktar i Arebbi."

³⁴Yufa Ƹisa aryaz nni ijaweb-iṯ s ȓefhameṯ, inna-as: "War ṯeggwijeḏ ca aṭṭas x ȓmulk n Arebbi." Ssenni war izƹim ḥadd aṯ isseqsa ƹaḏ ktar.

³⁵Ƹisa aqaṯ ḏi ṯemziḏa ṯameqqrant iseȓmaḏ ḏinni. Indeq-d inna-asen: "Mayemmi qqaren imseȓmaḏen n ccariƹa qa Lmasiḥ ḏ mmis n Dawed?"[10]

³⁶Inna-asen: "Qa Dawed inna netta s yixef nnes s Arruḥ iqeddsen: <Siḏi Arebbi inna-as i Siḏi: Qqim-d x ufusi inu, aȓ d ɣa ggeɣ ȓƹaḏyan nnec swadday i iḍaren nnec.>

³⁷Mammec ɣa yiȓi Lmasiḥ ḏ mmis n Dawed? Netta Dawed iqqar-as i Lmasiḥ A Siḏi." Aṭṭas n ȓɣaci tesȓan-as, farḥen.

³⁸Iseȓmaḏ-iṯen Ƹisa inna-asen: "Ḥḍam ixef nwem zeg imseȓmaḏen n ccariƹa. Niṯni texsen aḏ uyuren s iseȓhamen nni nsen, texsen axasen seǧmen ḏi ȓeswaq,

³⁹texsen aḏ qqimen ḏeg imucan imezwura ḏi ṯemziḏawin ḏ ȓefruḥ.

⁴⁰Tetten ṯajjaȓin, smeḍharen-d ixef nsen tẓaǧan aṭṭas ḥima aḏ beyynen i yiwḏan belli niṯni ṣebḥen aṭṭas zaƹma. Yina, lḥisab nsen aḏ yiȓi iqṣeḥ aṭṭas!"

⁴¹Iqqim Ƹisa ḏi ṯemziḏa ṯameqqrant zzaṯ i ṣṣenduq nnes. Iẓra mammec ȓɣaci srusan ṣṣaḏaqa nsen ḏi ṣṣenduq nni. Aṭṭas n twajar teggen ḏinni aṭṭas n tmenyaṯ.

⁴²Ṯusa-d ijjen n ṯajjaȓṯ ḏ ȓmeskina waha ṯegga ḏinni ṯnayen iṣuldan, iƹni ijjen n frank.

⁴³Iȓaɣa-d Ƹisa x imeḥḍaren nnes inna-asen: "Aqa tesȓam ȓḥaqq: Ṯajjaȓṯ-a ḏ ȓmeskina waha ṯegga ḏi ṣṣenduq ktar zi min ggin marra inneɣni.

⁴⁴Minzi marra inneɣni ucin zi min xasen izayḏen ḏ agȓa. Nettaṯ lla, waxxa ḏ ȓmeskina waha ṯṣeddeq marra min ṯeƹȓem."