Read Tarifit Marqus 2 Bible Online

Marqus 2 - Tarifit bible

Marqus 2

¹Menbaƹd i can wussan, iḏweȓ-d Ƹisa ƹaweḏ ɣar ubilaj n Kafernaḥum sȓin iwḏan belli aqaṯ ḏi ṯeddarṯ.

²Munen aṭṭas n ȓɣaci iƹemmar ȓḥaȓ aȓ wami war iqqim uȓa ḏ ijjen n umcan waxxa zzaṯ i ṯewwarṯ. Issawaȓ akiḏsen Ƹisa s wawar n Arebbi.

³Usin-d can yiwḏan uwin-as-d ijjen n uryaz mmuṯen-as iḍaren, ysin-ṯ arbeƹa iḏsen x ṯassuṯ nnes.

⁴War zemmiren ca aṯ siḏfen ɣar Ƹisa minzi ḏinni aṭṭas n ȓɣaci. Qeȓƹen ssqef cwayt rezmen-ṯ, sehwan anecruf nni x ṯassuṯ nnes ɣar uxxam mani iǧa Ƹisa.

⁵Wami iẓra Ƹisa lʼiman nsen, inna-as i unecruf nni: "A mmi twaɣfarent-ac ȓmuƹṣiyaṯ nnec."

⁶Can imseȓmaḏen n ccariƹa iy iqqimen ḏinni tfekkaren nnan ḏeg wuȓawen nsen:

⁷"Mammec issawaȓ bnaḏem-a ammu? Iqqar awaȓ war iḥȓin x Arebbi. Ug izemmaren aḏ iɣfar ȓmuƹṣiyaṯ illa Arebbi waḥḏes!?"

⁸Ḏeɣya issen Ƹisa ḏi nnefs nnes min tfekkaren ḏi ȓaƹquȓaṯ nsen inna-asen: "Mayemmi tfekkarem ammu kenniw ḏi ȓaƹquȓaṯ nwem?

⁹Min isehȓen aṭṭas aḏas iniɣ i unecruf-a, ma aḏas iniɣ: Twaɣfarent-ac ȓmuƹṣiyaṯ nnec? Niɣ ma aḏas iniɣ: Kkar cek, ysi ṯassuṯ nnec uyur?

¹⁰Nec xseɣ aḏ tessnem belli Mmis n bnaḏem ɣares ssulṭa x ṯmurṯ ḥima aḏ iɣfar ȓmuƹṣiyaṯ." Uca inna-as Ƹisa i unecruf nni:

¹¹"Aḏac iniɣ, bedd x iḍaren nnec ysi ṯassuṯ nnec ruḥ aḏ trewwḥeḏ ɣar ṯeddarṯ nnec!"

¹²Ȓexddenni ibedd x iḍaren nnes iysi ṯassuṯ nnes iffeɣ zzaṯ i yiwḏan marra. Qqimen kuȓci ḏehhcen ḥemmḏen Arebbi nnan: "Ƹemmarṣ ma neẓra manaya iwqeƹ zi qbeȓ."

¹³Iffeɣ Ƹisa ƹaweḏ ɣar ṭṭarf n ȓebḥar, usin-d ɣares marra ȓɣaci iseȓmaḏ-iṯen ḏinni.

¹⁴Wami iƹḏu ssenni, yufa Lawi mmis n Ḥalfa iqqim ɣar missa ḏeg umcan mani jemmƹen ḍḍariba. Inna-as Ƹisa: "Ḏfar-ayi-d." Uca ikkar iḏfar-iṯ.

¹⁵Iqqim Ƹisa ḏi ṯeddarṯ n Lawi, itett netta ḏ imeḥḍaren nnes. Aṭṭas n iƹeccaren ḏ yinni iƹeṣṣan zaƹma qqimen tetten akiḏes ȓaḥeqqac aṭṭas n yiwḏan iy ṯ iḏeffaren.

¹⁶Can imseȓmaḏen n ccariƹa zi ȓḥizeb n ifarrisiyen ufin Ƹisa itett ak iƹeccaren[1] ḏ yinni iƹeṣṣan zaƹma, nnan i imeḥḍaren nnes: "Mayemmi itett netta ak iƹeccaren ḏ yinni iƹeṣṣan?"

¹⁷Isȓa-yasen Ƹisa inna-asen: "Iwḏan iṣeḥḥan war teḥḏijin bu uḍbib, aḍbib teḥḏajan-ṯ imehȓac." Inna-asen: "Nec war d usiɣ ca aḏ ȓaɣiɣ i yinni iǧan nican, usiɣ-d ɣar yinni iƹeṣṣan."

¹⁸Tuɣa imeḥḍaren n Yaḥya ḏ imeḥḍaren n ȓḥizeb n ifarrisiyen niṯni tẓumman. Usin-d yiwḏan ɣar Ƹisa nnan-as: "Mayemmi imeḥḍaren n Yaḥya ḏ imeḥḍaren n ȓḥizeb n ifarrisiyen tẓumman, imeḥḍaren nnec war tẓummin ca?"

¹⁹Inna-asen Ƹisa: "Imeddukaȓ n muȓay, ma zemmaren aḏ ẓummen ḏi nhar nni n ȓfarḥ nnes? Lla, xmi itiȓi muȓay akiḏsen war zemmaren aḏ ẓummen.

²⁰Walakin aḏ d asen wussan aḏ imeysi muȓay zi ȓwesṭ nsen, ȓexddenni aḏ ẓummen ḏi nhar nni.

²¹War iǧi ḥadd itreqqaƹ arruḍ ḏ ȓbaȓi s yijjen n ṯreqqiƹṯ n ttub ḏ jḏiḏ, mayemmi? Ȓaḥeqqac ṯareqqiƹṯ nni n ttub ḏ jḏiḏ aḏ tnejmeƹ aḏ twakkes zeg warruḍ nni ḏ ȓbaȓi. Ȓexddenni aḏ iqqim ucarrig imɣar!

²²Uȓa ḏ aman n uḍiȓ ḏ jḏiḏ war xeǧqen ca ḏeg yiȓemawen iqḏimen, ḥima war dduqquzen war tzeǧiƹen ca waman n uḍiȓ aḏ ḍeyyƹen yiȓemawen nni. Walakin aman n uḍiȓ ḏ jḏiḏ xeǧqen ḏeg yiȓemawen ḏ jḏiḏ."

²³Ijjen n nhar n ssebṯ n lƹibada, iƹḏu Ƹisa ḏeg ubriḏ ḏi ȓwesṭ n imendi, gguren akiḏes imeḥḍaren nnes bḏan tekksen ṯiyḏerin.

²⁴Nnan-as ȓebƹaḍ zi ȓḥizeb n ifarrisiyen: "Xzar! Mayemmi imeḥḍaren nnec teggen min iǧan ḥram ḏi nhar n ssebṯ n lƹibada?"

²⁵Indeq-d Ƹisa inna-asen: "Ma war ṯeɣrim ca min igga Dawed wami iḥḏaj, iǧuz netta ḏ yinni akiḏes?

²⁶Yuḏef ɣar ṯemziḏa n Arebbi ḏi zman n Abyaṯar arrayes n ȓfuqaha, yufa ḏinni aɣrum nni iy iǧan ḏ ṣṣeḏqeṯ icca netta yuca-asen i yinni akiḏes; waxxa manayenni war iǧi ca ḥalal ɣir i ȓfuqaha waha."

²⁷Uca inna-asen: "Nhar n ssebṯ n lƹibada itwaxȓeq i ssabab n bnaḏem, maci ḏ bnaḏem itwaxeȓqen i ssabab n nhar n ssebṯ n lƹibada.

²⁸Ȓaḥeqqac Mmis n bnaḏem ig iǧan ḏ lḥakem ḥetta x nhar n ssebṯ n lƹibada."