Read Tarifit Marqus 3 Bible Online

Marqus 3 - Tarifit bible

Marqus 3

¹Yuḏef Ƹisa ƹaweḏ ɣar yijjen n ṯemziḏa n Ayṯ-Israʼil yufa ḏinni ijjen n uryaz fus nnes immuṯ.

²Tlaḥaḍen xas ma aṯ isgenfa ma lla ḏi nhar n ssebṯ n lƹibada ḥima aṯ tahmen.

³Inna-as Ƹisa i uryaz nni iy ɣar iǧa fus immuṯ: "Bedd ḏi ȓwesṭ."

⁴Isseqsa-ṯen Ƹisa inna-asen: "Nhar n lƹibada ma ḥalal a negg ȓxir niɣ a negg ccarr? A nsenjem nnefs niɣ aṯ nneɣ?" Walakin niṯni sqaren.

⁵Ixzar ɣarsen iƹeṣṣeb, ixeyyeq ȓaḥeqqac uȓawen nsen qesḥen. Inna-as i uryaz nni: "Sarreḥ fus nnec." Isarreḥ-iṯ uca iḏweȓ ufus nnes igenfa.

⁶Ȓexddenni ffɣen ȓḥizeb n ifarrisiyen munen ak yiwḏan zi ȓḥizeb n uzeǧiḏ Hirudus, mcawaren mammec iy ɣa ggen aḏ nɣen Ƹisa.

⁷Iffeɣ Ƹisa ak imeḥḍaren nnes ihwa ɣar cceṭṭ n ȓebḥar, iḏfar-iṯen ijjen n lƹadad ḏ ameqqran n yiwḏan zi ṯmurṯ n Ljalil ḏ ṯmurṯ n Yahuḏiya

⁸ḏ ṯendint n Lquds ḏ ṯmurṯ n Idumya ḏ ujemmaḍ-in i yiɣzar n Lʼurdun, ƹaweḏ zi jwayeh n Ṣur ḏ Ṣayda. Usin-d ɣares aṭṭas n ȓɣaci wami d arrin ȓexbar i marra min igga.

⁹Inna-asen Ƹisa i imeḥḍaren nnes: Swejḏem-ayi ijjen n ṯɣarrabut ḥima war xafi temziḥimen ȓɣaci-ya.

¹⁰Minzi netta tuɣa isgenfa aṭṭas n yiwḏan aȓ wami marra yinni ḏi iǧa ȓeḥriq mzaḥamen xas, xsen aṯ ḥaḏan.

¹¹Jnun iƹeffanen meȓmi ma ẓrin Ƹisa, weṭṭan ɣar iḍaren nnes snekkaren ṯɣuyyeṯ qqaren: "A cek ḏ Mmis n Arebbi."

¹²Iweṣṣa-ṯen Ƹisa aṭṭas inna-asen: "War ssawaȓeṯ ca ḥima war twassineɣ ca."

¹³Igaƹƹeḏ Ƹisa ɣar uḏrar iȓaɣa-d x yinni ixes uca usin-d ɣares.

¹⁴Ixḍar zzaysen ṯenƹac, iggi-ṯen ḏ arrusul ḥima akiḏes iȓin aṯen issekk aḏ ḥeddṯen,

¹⁵aɣarsen ṯiȓi ssulṭa ḥima aḏ sufɣen jnun.

¹⁶Ṯenƹac-a ig igga niṯni ḏ Simƹan, isemma-ṯ Buṭrus,

¹⁷ḏ Yaƹqub ḏ Yuḥanna ṯarwa n Zabadi, isemma-ṯen Bunarges (manaya ixes aḏ yini ṯarwa n wajjaj),

¹⁸ḏ Andrus, ḏ Filippas, ḏ Bartulumay, ḏ Matta, ḏ Tuma, ḏ Yaƹqub mmis n Ḥalfa, ḏ Taddi, ḏ Simƹan umi qqaren <Lmunaḍil>,

¹⁹ḏ Yahuḏa Isxaryuṭi iƹni wenni izzenzen Ƹisa.

²⁰Irewweḥ-d Ƹisa ɣar ṯeddarṯ, munen-d ƹaweḏ ȓɣaci aȓ wami war izemmar Ƹisa ḏ imeḥḍaren nnes aḏ ccen uȓa ḏ aɣrum.

²¹Wami sȓin ȓeḥbab nnes x manaya, usin-d ḥima aṯ awin akiḏsen nnan qa iruḥ-as ȓaƹqeȓ.

²²Imseȓmaḏen n ccariƹa iy d yusin zi Lquds nnan: "Ḏayes Bƹalzabul arrayes n jnun. Isufuɣ jnun minzi Bƹalzabul yuca-yas jjheḏ-a."

²³Iȓaɣa-d xasen Ƹisa issiweȓ akiḏsen s ȓemƹani inna-asen: "Mammec igga Cciṭan aḏ isufeɣ Cciṭan?

²⁴Lmemlaka iy ḏi tmenɣan ayṯbab nnes ijjen ak unneɣni war ṯzemmar aḏ teqqim.

²⁵Ṯaddarṯ iy ḏi tmenɣan ayṯbab nnes ijjen ak unneɣni war ṯzemmar aḏ teqqim.

²⁶Meȓa Cciṭan ikkar aḏ iqḍa x Cciṭan, war itɣimi ca, aḏ ifna.

²⁷War izemmar ḥadd aḏ ihjem x ṯeddarṯ n can yijjen ijheḏ bac aḏ yacar agȓa nnes illa meȓa icedd-iṯ ḏ amezwaru. Uca aḏas yawi marra min ɣares ḏi ṯeddarṯ.

²⁸Aqa tesȓam ȓḥaqq: Aḏ twaɣfarent marra ȓmuƹṣiyaṯ iy teggen yiwḏan ḏ kuȓ awaȓ nni war iḥȓin iy qqaren x Arebbi.

²⁹Walakin wenni ɣa yinin can wawaȓ war iḥȓin x Arruḥ iqeddsen, war ḏas iɣeffar lla ḏi ddunect-a u lla ḏi lʼaxira."

³⁰Minzi qqaren qa Ƹisa ḏayes ijjen n jjenn ḏ aƹeffan.

³¹Ṯusa-d ɣares yemmas ḏ ayṯmas, bedden barra i ṯeddarṯ ssekken ɣares ȓaɣan-d xas.

³²Ȓɣaci nni qqimen nnḍen-as nnan-as: "Aqa yemmac ḏ ayṯmac ḏ suyṯmac ḏi barra rezzun xak."

³³Indeq-d inna-asen: "Min ƹnan yemma ḏ ayṯma?"

³⁴Ixzar ɣar yinni iqqimen nnḍen-as uca inna: "Aqa yemma ḏ ayṯma."

³⁵Inna-asen: "Wenni iteggen s min ixes Arebbi, ataf netta ḏ uma ḏ učma ḏ yemma."