Read Tarifit Marqus 4 Bible Online

Marqus 4 - Tarifit bible

Marqus 4

¹Ƹaweḏ ibḏa Ƹisa iseȓmaḏ x ṭṭarf n ȓebḥar. Munen-d xas aṭṭas n ȓɣaci, ikkar netta inya ḏeg yijjen n ṯɣarrabut ḏi ȓwesṭ n waman iqqim ḏayes, iwḏan qqimen marra ḏi ȓbarr x ṭṭarf n ȓebḥar.

²Iseȓmaḏ-asen aṭṭas n ṯmesȓayin s ȓemƹani. Inna-asen ḏeg useȓmeḏ nnes:

³"Ṣennṭeṯ, iffeɣ ufeǧaḥ aḏ izreƹ.

⁴Wami izerreƹ, ṯewḍa-yas can zzarriƹeṯ x ṭṭarf n ubriḏ, usin-d ijḍaḍ ccin-teṯ.

⁵Can zzarriƹeṯ ṯewḍa-yas jar yizra war ḏinni bu caȓ aṭṭas. Ṯeɣmi-d ḏeɣya ȓaḥeqqac war ṯuǧiɣ ca ḏi ṯmurṯ aṭṭas.

⁶Walakin wami ṯsummar ṯfuct, ṯnezȓef ȓexddenni ṯisraw ȓaḥeqqac iẓewran nnes war uwṯin ca ɣar ȓaǧeɣ n ṯmurṯ.

⁷Can zzarriƹeṯ ṯewḍa jar isennanen. Ɣmin-d akiḏes isennanen nni jeyyfen-teṯ war ṯeggi bu ṯiyḏerin.

⁸Walakin can zzarriƹeṯ ṯewḍa x ṯmurṯ ṯaṣebḥant, ṯuȓi-d ṯemɣar ṯegga ṯiyḏerin. Ȓebƹaḍ ggint ṯȓaṯin, ȓebƹaḍ ggint settin, ȓebƹaḍ ggint miyya."

⁹Uca inna-asen Ƹisa: "Ṣenneṭ mliḥ a wenni itsȓan."

¹⁰Wami Ƹisa iqqim waḥḏes, sseqsan-ṯ yinni ḏas innḍen ak ṯenƹac n imeḥḍaren x ȓemƹani-ya.

¹¹Inna-asen: "Itwasmeḥ i kenniw aḏ tessnem min inuffaren ḏi ȓmulk n Arebbi. Yinni zi barra marra tas-asen-d s ȓemƹani waha:

¹²<Waxxa xezzaren, war twiȓin ca. Waxxa tesȓan, war fehhmen i ca war tubin ca, war ḏasen twaɣfarent ȓmuƹṣiyaṯ nsen.>"

¹³Inna-asen: "Ma war ṯefhimem ȓmaƹna-ya? Iwa, mammec ɣa ṯfehmem marra ȓemƹani?

¹⁴Afeǧaḥ netta izerreƹ awaȓ n Arebbi.

¹⁵Zzarriƹeṯ nni ig iwḍan x ubriḏ nettaṯ am yiwḏan iy tesȓan i wawaȓ n Arebbi. Itraḥ Cciṭan ḏeɣya itekkes awaȓ nni itwazerƹen ḏaysen ḏeg wuȓ.

¹⁶Zzarriƹeṯ nni ig iwḍan jar yizra nettaṯ am yiwḏan iy tesȓan i wawaȓ n Arebbi, qebȓen-ṯ s ȓefraḥeṯ.

¹⁷Wami war uwṯin bu iẓewran mliḥ ḏeɣya tneqȓaƹen. Xmi d tasent can ȓemḥayen niɣ ḏ can uƹeddeb x ssabab n wawaȓ n Arebbi, ḏeɣya teffɣen abriḏ.

¹⁸Zzarriƹeṯ nni ig iwḍan jar isennanen nettaṯ am yiwḏan iy tesȓan i wawaȓ n Arebbi

¹⁹ḏaysen amnus n ddunect, icemmeṯ-iṯen ṭṭmaƹ n wagȓa, ḏaysen ccehawaṯ n ṯmesȓayin nneɣni, ssenni itwajeyyef wawaȓ n Arebbi war ineffeƹ ca.

²⁰Walakin zzarriƹeṯ nni ig iwḍan ḏi ṯmurṯ ṯaṣebḥant nettaṯ am yiwḏan iy tesȓan i wawaȓ n Arebbi qebȓen-ṯ tarwen. Ȓebƹaḍ tarwen ṯȓaṯin, ȓebƹaḍ settin, ȓebƹaḍ miyya."

²¹Inna-asen: "Uȓa ḏ ijjen war d itiwi ȓqendiȓ ḥima axas iqȓeb aqnuc niɣ aṯ igg swadday i qama; Lla, itegg-iṯ x ȓmarfaƹ.

²²Aqa marra min inuffaren aḏ d imeḍhar. Marra min itwasnuffaren aḏ inefḍeḥ.

²³Ṣenneṭ mliḥ a wenni itsȓan."

²⁴Inna-asen: "Arrem-d ȓbaȓ nwem i min tesȓam. Ȓaƹbar iy ṯsexḏamem ḏ wenni iy kiḏwem ɣa isexḏem Arebbi u ƹaḏ ktar.

²⁵Ȓaḥeqqac wenni iǧan ɣares itmarni-yas. Walakin wenni war ɣar iǧi ca, itwaksi-yas uȓa ḏ min ɣares."

²⁶Inna-asen Ƹisa ƹaweḏ: "Ȓmulk n Arebbi igga am yijjen n bnaḏem izerreƹ zzarriƹeṯ ḏi ṯmurṯ.

²⁷Iteṭṭeṣ s ǧiȓeṯ itfaq-d ag ṣbaḥ itaf zzarriƹeṯ tgaƹƹaḏ temɣur. Netta war issin ca mammec iwqeƹ manayenni.

²⁸Minzi ṯamurṯ ticc ṯiḥebba nnes nniṯ. Ḏ amezwaru ṯɣemmi-d, ṯḏewweȓ ḏ ṯiyḏerin, ṯiyḏerin nni tƹemmarent s ṯḥebba.

²⁹Walakin ɣir aḏ iwjeḏ imendi, ȓexddenni aḏ iffeɣ aḏ imjar minzi ȓweqṯ n umjar ṯuweḍ-d."

³⁰Inna-asen ƹaweḏ: "Minḏi itcabbah ȓmulk n Arebbi? Niɣ s minzi ɣa ṯ nmeṯṯel?

³¹Ȓmulk n Arebbi igga am yijjen n zzarriƹeṯ n yijjen n nnuƹ n arbiƹ qqaren-as bugarḏaȓ. Xmi t zerƹen ḏi ṯmurṯ tiȓi ḏ ṯamezyant qaƹ x marra ṯiḥebba iǧan ḏi ṯmurṯ.

³²Walakin xmi t zerƹen, temɣar ṯḏewweȓ ḏ ṯameqqrant zi marra arbiƹ n ȓƹarseṯ tegg ȓefruƹ ḏ imeqqranen. Uȓa ḏ ijḍaḍ tasen-d teggen ḏayes ȓaƹwac nsen ḏi ṯiȓi nnes."

³³Issawaȓ Ƹisa ak ȓɣaci s waṭṭas n ȓemƹani am yina ƹlaḥsab min zemmaren aḏ fehmen.

³⁴War kiḏsen issiwiȓ ca illa s ȓemƹani, walakin imeḥḍaren nnes isefham-iṯen mliḥ xmi itiȓi akiḏsen waḥḏes.

³⁵Nhar nni wami d ṯuweḍ ṯmeddiṯ, inna-asen Ƹisa i imeḥḍaren nnes: "Yallah a neẓwam ɣar ujemmaḍ-in."

³⁶Wami semḥen ḏi ȓɣaci, iruḥ Ƹisa akiḏsen ḏi ṯɣarrabut nni iy ḏi iǧa ƹaḏ. Akiḏes ḏinni ṯiɣarruba nneɣni.

³⁷Ikkar-d ijjen n arriḥ ijheḏ aṭṭas ḏi ȓebḥar, ȓemwaj ccaṯent ṯaɣarrabut nni aȓ wami ṯebḏa tƹemmar s waman.

³⁸Netta iǧa ɣar puppa[2] n ṯɣarrabut iṭṭeṣ isummeṯ ijjen n ṯsunta.[3] Sfaqen-ṯ imeḥḍaren nnan-as: "A Lmuƹallim, ma war c ithimi ca manaya? Aqa neccin netmetta!"

³⁹Ikkar isbedd arriḥ inna-as i ȓebḥar: "Sqar, qḍeƹ ȓḥiss!" Uca ibedd arriḥ irsa ȓḥaȓ.

⁴⁰Inna-asen: "Mayemmi teggwḏem qaƹ ammu? Ma ƹaḏ war ḏaywem bu lʼiman?"

⁴¹Ggwḏen aṭṭas nnan i wayawya: "Min iƹna wanitan? Uȓa ḏ arriḥ ḏ ȓebḥar tṭaƹan-as!"