Read Tarifit Marqus 6 Bible Online

Marqus 6 - Tarifit bible

Marqus 6

¹Iffeɣ ssenni Ƹisa iḏweȓ ɣar ṯmurṯ nnes, ḏfaren-ṯ imeḥḍaren nnes.

²Nhar n ssebṯ n lƹibada, ibḏa iseȓmaḏ ḏi ṯemziḏa nni. Marra yinni ḏas itsȓan qqimen tƹejjben ḏayes nnan: "Mani yufa manaya? Min ṯeƹna ȓefhameṯ-a iy ḏas immucen? Mammec igga lmuƹjizaṯ-a ig iweqƹen x ifassen nnes?

³Ma war iǧi ca wanita ḏ anejjar mmis n Maryam umas n Yaƹqub ḏ Yusis ḏ Yahuḏa ḏ Simƹan, suyṯmas aqaṯent ḏanita akiḏneɣ?" X manayenni war ṯ qbiȓen ca.

⁴Inna-asen Ƹisa: "Nnabi meḥtarem mani ma, walakin ḏeg ubilaj nnes ḏ ȓeḥbab nnes ḏ ṯeddarṯ nnes lla!"

⁵War izemmar ca aḏ igg ḏinni lmuƹjiza, ɣir iḥaḏa ḏrus n imehȓac s ifassen nnes isgenfa-ṯen.

⁶Itƹejjeb ȓaḥeqqac lʼiman nsen ḏ uqlil. Ssenni iggur iseȓmaḏ zi dcar ɣar dcar iy ṯ yuḏsen ḏinni.

⁷Iȓaɣa-d Ƹisa x ṯenƹac n arrusul issekk-iṯen ṯnayen ṯnayen, yuca-asen ssulṭa aḏ ḥekmen x jnun iƹeffanen.

⁸Iweṣṣa-ṯen inna-asen: "War kiḏwem tawim walu ḏeg ubriḏ, awim akiḏwem ɣir aƹekkaz. War kiḏwem tawim ni aɣrum ni aqrab ni nneḥḥas ḏeg uḥezzam nwem.

⁹Ggeṯ ṯisiȓa, war teggem ca ṯnayen n ičammiren."

¹⁰Inna-asen: "Mani ma ṯuḏfem ɣar can ṯeddarṯ, qqimem ḏinni aȓ ɣa ṯuyurem ssenni.

¹¹Meȓa war kenniw qbiȓen ca ḏi can umcan niɣ war xsen ca aɣarwem ṣennṭen, ffɣem ssenni mesḥeṯ ṯaƹejjact zeg iḍaren nwem am ca n chaḏeṯ xasen."

¹²Kkaren niṯni ruḥen tḥeddaṯen i yiwḏan ḥima aḏ tuben.

¹³Sufɣen aṭṭas n jnun, ḏehnen i waṭṭas n imehȓac s zzect sgenfan-ṯen.

¹⁴Azeǧiḏ Hirudus yarra-d ȓexbar x min itegg Ƹisa minzi isem nnes iḏweȓ maƹruf aṭṭas. Ḏinni can yiwḏan qqaren qa wanita iƹni ḏ Yaḥya nni, itwasekkar-d netta zi ȓmewṯ! S manaya iy ɣares jjheḏ iy zi itegg lmuƹjizaṯ-a.

¹⁵Ijjen iqqar lla qa wanita ḏ nnabi nni Ilyas. Ijjen iqqar lla qa wanita ḏ ijjen n nnabi amecnaw ijjen zi lʼanbiya nni iqḏimen.

¹⁶Azeǧiḏ Hirudus wami isȓa manaya, inna qa wanita ḏ Yaḥya nni umi qesseɣ azeǧif, aqa itwasekkar-d zi ȓmewṯ!

¹⁷Qbeȓ i manaya, azeǧiḏ-a Hirudus imȓec ak yijjen n ṯemɣarṯ qqaren-as Hirudiya. Hirudus netta ḏ aȓwes n Hirudiya. Tuɣa nettaṯ qbeȓ ḏ ṯamɣarṯ n Filippas. Issekk Hirudus aḏ ṭṭfen Yaḥya wami tuɣa ḏas iqqar: Ḥram cek aḏ tawiḏ ṯamɣarṯ n wumac. Iḥebbes-iṯ ḏi ȓeḥbes.

¹⁸

¹⁹Hirudiya ṯenḍar ḏayes ṯiṭṭawin ṯrezzu aṯ tneɣ walakin war ṯzemmar.

²⁰Mayemmi? Ȓaḥeqqac Hirudus iteggweḏ zi Yaḥya. Issen belli netta ḏ ijjen n uryaz iǧa nican, ḏ amqeddes. Iḥemma-ṯ Hirudus, iteƹjib-as xmi itḥeddaṯ walakin itɣima istƹejjib ḏayes aṭṭas.

²¹Ṯusa-yas-d lfursa i Hirudiya wami igga uzeǧiḏ Hirudus ȓƹiḏ lmilad i yixef nnes igga amensi i imeqqranen nnes ḏ arruyas n ȓƹaskar ḏ imeqqranen n ṯmurṯ n Ljalil.

²²Ṯuḏef-d yeǧis n Hirudiya ṯecḍeḥ, iƹjeb-as ȓḥaȓ i uzeǧiḏ ḏ inewjiwen nnes. Inna-as uzeǧiḏ i ṯḥenjirṯ nni: "Ttar-ayi min ṯexseḏ, aḏam ṯ uceɣ."

²³Ijjuǧ-as inna-as: "Min ḏayi ɣa ṯettareḏ aḏam ṯ uceɣ, waxxa azyen n lmemlaka inu."

²⁴Ṯeffeɣ ṯenna-as i yemmas: "Min ḏas ɣa ttareɣ?" Ṯenna-as yemmas: "Rezzuɣ azeǧif n Yaḥya."

²⁵Ȓexddenni ṯeḏweȓ ḏeɣya ɣar uzeǧiḏ, ṯettar zzayes ṯenna-as: "Ȓexxu xseɣ aḏayi ṯuceḏ ḏa azeǧif n Yaḥya x ssiniyyeṯ!"

²⁶Ixeyyeq uzeǧiḏ aṭṭas walakin igga-as array ȓaḥeqqac ijjuǧ-as zzaṯ i inewjiwen nnes.

²⁷Ȓexddenni azeǧiḏ issekk ij uƹessas ɣar ȓeḥbes, yumar-iṯ ḥima aḏ d yawi azeǧif n Yaḥya. Iruḥ uƹessas nni iqess azeǧif n Yaḥya ḏi ȓeḥbes.

²⁸Yuwi-ṯ-iḏ x ssinniyeṯ, yuca-as-ṯ i ṯḥenjirṯ nni, ṯaḥenjirṯ nni ṯuca-as-ṯ i yemmas.

²⁹Wami sȓin imeḥḍaren n Yaḥya manaya, usin-d ysin ddat nnes ggin-t ḏeg unḍeȓ.

³⁰Munen arrusul ak Ƹisa ƹawḏen-as x marra min ggin ḏ marra min seȓmaḏen.

³¹Aṭṭas n yiwḏan tasen-d traḥen. Ƹisa ḏ imeḥḍaren nnes war ufin ȓweqṯ waxxa aḏ ccen. X manaya inna-asen: "Araḥem-d waḥeḏwem ɣar yijjen n umcan ixȓa aḏ ṯreyyḥem cwayt."

³²Ruḥen waḥeḏsen ḏi ṯɣarrabut ɣar yijjen n umcan ixȓa.

³³Ẓrin-ṯen aṭṭas n yiwḏan wami gguren. Ƹeqȓen-ṯen ffɣen ḏeɣya zi marra ibilajen nni tazzȓen marra ḏinni x iḍaren, izwaren-asen ɣar umcan nni.

³⁴Wami d iḍra Ƹisa zi ṯɣarrabut yufa ḏinni ȓɣaci nni, qqsen-as minzi ggin amecnaw iḥuȓiyen war ɣarsen ca uw ṯen ɣa yarewsen. Ibḏa iseȓmaḏ-asen aṭṭas n ṯmesȓayin.

³⁵Wami iƹḏu ȓḥaȓ, qarrben ɣares imeḥḍaren nnes nnan-as: "Ȓweqṯ ṯeƹḏu, amcan-a ḏ ȓexȓa waha.

³⁶Sekk iwḏan-a ɣar ȓedcuraṯ ḏ ṯuḏrin yuḏsen bac aḏ d sɣen min ɣa ccen."

³⁷Yarra xasen Ƹisa inna-asen: "Ucem-asen kenniw min ɣa ccen." Nnan-as: "Ma a nraḥ neccin a d nseɣ aɣrum s miyyatayen n ṯpeyyasin n nnuqarṯ, aḏasen ṯ nuc aḏ ccen?"

³⁸Inna-asen: "Cḥaȓ ɣarwem n uɣrum? Ruḥeṯ aḏ texzarem." Ruḥen ufin cḥaȓ nnan-as: "Ɣarneɣ xemsa n ṯxebbazin ḏ ṯnayen n iseȓman."

³⁹Ikkar Ƹisa yumar-iṯen ḥima aṯen sɣimen marra ḏ lfirqaṯ x arbiƹ aziza.

⁴⁰Ȓexddenni qqimen ḏ lfirqaṯ xemsin xemsin, miyya miyya.

⁴¹Iysi xemsa nni n ṯxebbazin ḏ ṯnayen nni n iseȓman iysi ṯiṭṭawin nnes ɣar ujenna uca icekkar Arebbi. Irza aɣrum nni yuca-asen-ṯ i imeḥḍaren nnes ak ṯnayen n iseȓman nni ḥima aṯen ferqen x yiwḏan nni marra.

⁴²Ccin jjiwnen marra.

⁴³Ȓexddenni ysin ṯenƹac n ṯeqrabin ƹemmarent s uɣrum iceṭṭen ak iseȓman.

⁴⁴Lƹadad n yinni iccin aɣrum nni niṯni xemsaȓaf n iryazen.

⁴⁵Ȓexddenni Ƹisa isney imeḥḍaren nnes ḏi ṯɣarrabut bac aḏ zwan ɣar ujemmaḍ-in n ȓebḥar ɣar ubilaj n Bayt Ṣayda, netta itemsafaḍ x ȓɣaci.

⁴⁶Wami xasen imsafaḍ, netta iruḥ ɣar uḏrar aḏ iẓẓaǧ.

⁴⁷Ɣar ṯmeddiṯ ṯaɣarrabut aqat ḏi ȓweṣt n ȓebḥar, netta aqaṯ ḏi ȓbarr waḥḏes.

⁴⁸Iẓri-ṯen tqeddafen, tƹeddaben minzi arriḥ itṣuḍ-d zi jjiheṯ nneɣni. Ƹȓayen iqarreb-d ȓefjar, iruḥ Ƹisa ɣar imeḥḍaren nnes iggur x iḍaren x waman n ȓebḥar ixes aṯen iƹḏu.

⁴⁹Wami ṯ ufin iggur x iḍaren x waman n ȓebḥar, tɣir-asen ḏ ȓexyaȓ bḏan snekkaren ṯɣuyyeṯ.

⁵⁰Marra ẓrin-ṯ ggwḏen. Walakin ḏeɣya inna-asen: "Ahnam! Aqa ḏ nec, war teggwḏem ca!"

⁵¹Inya akiḏsen ḏi ṯɣarrabut, irsa arriḥ. Tƹejjben aṭṭas ḏi nnefs nsen

⁵²mizi tuɣa war fhimen ca lmuƹjiza nni n uɣrum, uȓawen nsen twaqsḥen.

⁵³Iẓwa Ƹisa ḏ imeḥḍaren nnes ȓebḥar, uwḍen ɣar ṯmurṯ n Ganisarat qqnen ḏinni ṯaɣarrabut.

⁵⁴Wami ḍrin zi ṯɣarrabut, ȓexddenni ayṯbab n ṯmurṯ nni ƹeqȓen Ƹisa.

⁵⁵Tazzȓen-d zi ṯamurṯ nni marra, bḏan tawin-d imehȓac x ṯassuṯ ɣar mani sȓin iqqim netta.

⁵⁶Mani ma yuḏef ɣar ibilajen niɣ ɣar ṯneddam niɣ ɣar ȓkampawaṯ, iwḏan srusan imehȓac ḏi ȓeswaq. Tettaren-as aṯen ijj aḏ ḥaḏan ɣir ṭṭarf n warruḍ nnes. Ṣafi marra yinni ṯ iḥaḏan genfan.