Read Tarifit Marqus 7 Bible Online

Marqus 7 - Tarifit bible

Marqus 7

¹Ȓḥizeb n ifarrisiyen ḏ can imseȓmaḏen n ccariƹa zi Lquds munen-d x Ƹisa.

²Ẓrin can imeḥḍaren nnes tetten aɣrum bȓa ma aḏ sirḏen ifassen, iƹni bȓa ma aḏ ggen ȓuḍu nni.

³Ȓaḥeqqac ifarrisiyen ḏ marra Ayṯ-Israʼil meȓa war sirḏen ca ifassen nsen war tetten ca, minzi ṭṭfen aṭṭas ḏi lƹadaṯ n ȓejḏuḏ nsen.

⁴Meȓmi ma d ḏewwȓen zi ssuq, meȓa war sirḏen ca ataf war tetten ca. Aṭṭas n ȓeḥwayej nneɣni iy ḏeffaren, ȓemḏen-ṯen teṭṭfen-ṯen u ṣafi, amecnaw asireḏ n ȓkisan ḏ iɣarrafen ḏ ȓeqcuƹ n nneḥḥas ḏ ṯassuṯ.

⁵Sseqsan-ṯ ifarrisiyen ḏ can imseȓmaḏen n ccariƹa nnan-as: "Mayemmi imeḥḍaren nnec war teggen ca lƹadaṯ n ȓejḏuḏ nneɣ? Mayemmi war siriḏen ca ifassen nsen qbeȓ ma aḏ ccen aɣrum?"

⁶Inna-asen Ƹisa: "A lmunafiqin! Qa nnabi Icaƹya inna ȓḥaqq wami xawem issiweȓ ḏeg yijjen n zman: <Ccaƹb-a itweqqar-ayi s uqemmum waha, maca uȓ nnes iggwej xafi.

⁷Iwḏan-a ƹebbḏen-ayi ḏi ȓxawi, ȓaḥeqqac seȓmaḏen ṯimesȓayin iǧan ḏ ȓuṣiyaṯ n bnaḏem waha.>

⁸Kenniw ṯejjim ȓuṣiyeṯ n Arebbi, ṯeṭṭfem ḏi lƹadaṯ n yiwḏan u ṣafi."

⁹Inna-asen ƹaweḏ: "Iwa! Tbeṭṭaȓem ȓuṣiyeṯ n Arebbi ḥima aḏ qqiment lƹadaṯ nwem!

¹⁰Musa, min inna? Inna: Weqqar babac ḏ yemmac. Aqa wenni ɣa yukkaren babas niɣ ḏ yemmas, ataf itxeṣṣa-yas aḏ immeṯ.

¹¹Walakin kenniw ṯeqqarem belli war iǧi bu labud i yiwḏan aḏ weqqaren niɣ aḏ ƹawnen lwalidin. Tmenyaṯ nni iy ɣa ucen i lwalidin nsen aṯent ucen i ṯemziḏa.

¹³Ammu kenniw ṯbeddȓem ȓmaƹna n wawaȓ n Arebbi ḥima aḏ teggem mammec ḏawem iƹjeb ȓḥaȓ s lƹadaṯ nwem iy ṯȓemḏem. Teggem aṭṭas n ṯmesȓayin amecnaw ṯina."

¹⁴Iȓaɣa-d Ƹisa ƹaweḏ x ȓɣaci-ya inna-asen: "Ṣennṭeṯ ɣari marra iḏwem, fehmeṯ:

¹⁵Ma ḏinni ca n ṯmesȓayṯ itaḏfen ḏi bnaḏem zi barra tḥarram-iṯ? Lla, walu. Aqa min d iteffɣen zi bnaḏem aqa ḏ manayenni iy ṯ itḥarramen.

¹⁶{Ṣenneṭ mliḥ a wenni itsȓan!}"

¹⁷Wami ijja ȓɣaci, yuḏef ɣar ṯeddarṯ. Sseqsan-ṯ imeḥḍaren x ȓmaƹna-ya min texs aḏ tini.

¹⁸Inna-asen: "Uȓa ḏ kenniw ƹaḏ war ṯefhimem ca? Ma war ṯessinem belli marra min itaḏfen ḏi bnaḏem zi barra war ṯ itḥarrim ca?

¹⁹Minzi war itiḏef ca ɣar wuȓ nnes; Lla, itraḥ ɣar uƹeddis iteffeɣ zi ddat." (S manaya Ƹisa yarra marra lmakla ḥalal.)

²⁰Inna-asen: "Walakin min d iteffɣen zeg uqemmum n bnaḏem ḏ manaya itḥarramen bnaḏem.

²¹Mayemmi? Ȓaḥeqqac zi ḏaxeȓ iƹni zeg wuȓ n bnaḏem iy zi d tekkant lʼafkar ṯiƹeffanin ḏ lfasad ḏ ṯukkarḏa ḏ ṯmenɣiwṯ

²²ḏ zzna ḏ ṭṭmaƹ ḏ ccarr ḏ ȓbaṭeȓ ḏ ixarwiḍen ḏ ȓeqbaḥeṯ ḏ ṯiṭṭawin n yiwḏan ḏ ttakebbur ḏ ṯubuhȓiya.

²³Marra ṯimesȓayin-a ṯiƹeffanin teffɣent-id zi ḏaxeȓ n bnaḏem tḥarrament bnaḏem."

²⁴Ikkar Ƹisa yuyur ssenni iruḥ ɣar jwayeh n ṯendint n Ṣur yuḏef deg yijjen n ṯeddarṯ. Irezzu war itessen ḥadd belli aqaṯ ḏinni walakin iwḏan arrin-d ȓexbar.

²⁵Ḏinni ijjen n ṯemɣarṯ yeǧis ḏayes jjenn ḏ aƹeffan. Wami d ṯarra ȓexbar ḏeɣya ṯusa-d ɣar Ƹisa ṯewḍa-yas ɣar iḍaren nnes.

²⁶Ṯamɣarṯ nni ḏ ṯayunaniṯ, lʼaṣel nnes zi Surya Finiqya. Ṯettar zzayes aṭṭas ḥima aḏ isufeɣ jjenn nni aƹeffan zeg yeǧis.

²⁷Inna-as Ƹisa: "Ejj baƹda iḥenjiren aḏ jjawnen. Maci maƹqul aḏ itwakkes uɣrum n iḥenjiren aḏ imenḍar i iqzinen."

²⁸Ṯarra xas ṯemɣarṯ nni ṯenna-as: "Ɣarek ȓḥaqq a Siḏi, walakin uȓa ḏ iqzinen nni iǧan swadday n ṭabȓa tetten ifetwitten n uɣrum ig itweṭṭan zeg iḥenjiren."

²⁹Inna-as Ƹisa: "Ƹlaḥsab awar-a iy ṯenniḏ cem, ruḥ aqa jjenn nni iffeɣ zeg yeǧim."

³⁰Wami ṯeḏweȓ ɣar ṯeddarṯ nnes, ṯufa yeǧis ṯezzeȓ ḏi ṯassuṯ nnes iffeɣ zzayes jjenn nni.

³¹Iffeɣ Ƹisa ƹaweḏ zi jwayeh nni n Ṣur ikka x ṯmurṯ n Ṣayda, iruḥ ɣar ȓebḥar n Ljalil ḏ lʼiqlim nni umi qqaren Dikaplis.

³²Uwin-as-d ijjen n uḏehcur ḏ azeynun, ttaren i Ƹisa axas isers fus nnes.

³³Isbeƹƹed-iṯ Ƹisa x ȓɣaci ɣar yijjen n jjiheṯ nneɣni, igga iḍuḍan nnes ḏeg imejjunen n uryaz nni. Issusef Ƹisa, iḥaḏa-yas iȓes nnes.

³⁴Iysi ṯiṭṭawin nnes ɣar ujenna issuḥreṯ inna: "Ifataḥ!" (Awaȓ-a ixes aḏ yini twarzmen.)

³⁵Ȓexddenni iy genfan imejjunen nnes iḍȓeq iȓes nnes, ibḏa issawaȓ nican.

³⁶Iweṣṣa-ṯen inna-asen war tƹawaḏem manaya i ḥadd. Walakin niṯni mecḥaȓ ma iweṣṣa-ṯen txebbaren xas aṭṭas.

³⁷Tƹejjben aṭṭas nnan: "Marra min itegg ḏ aṣebḥan. Itarra ḥetta ḏ iḏehcuren tesȓan, ḥetta ḏ izeynunen ssawaȓen."