Read Tarifit Marqus 9 Bible Online

Marqus 9 - Tarifit bible

Marqus 9

¹Inna-asen Ƹisa: "Aqa tesȓam ȓḥaqq: Ȓebƹaḍ zeg yinni iǧan ḏa akiḏi war tmettin ca aȓ ɣa ẓren ȓmulk n Arebbi yusa-d s jjheḏ."

²Ṯeƹḏu settiyyam, Ƹisa yuwi akiḏes Buṭrus ḏ Yaƹqub ḏ Yuḥanna yuwi-ṯen waḥeḏsen ɣar yijjen n uḏrar yuƹȓa. Ḏinni zzaṯ i ṯiṭṭawin nsen iḏweȓ am yijjen n nnur.

³Iḏweȓ warruḍ nnes ḏ acemȓaȓ ireqq, war izemmar uȓa ḏ ijjen x ṯmurṯ aḏ yarr arruḍ ḏ acemȓaȓ am wenni.

⁴Imeḍhar-asen-d ḏinni nnabi Ilyas ḏ nnabi Musa. Twaȓan-ṯen ssawaȓen ak Ƹisa.

⁵Indeq-d Buṭrus inna-as i Ƹisa: "A Siḏi, ḏ aṣebḥan akiḏec neqqim ḏanita. Neccin a negg ṯȓaṯa n iqiḍan, ijjen i cek, ijjen i Musa, ijjen i Ilyas."

⁶Buṭrus tuɣa ifaja, war yufi ca min ɣa yini, niṯni ggwḏen.

⁷Yusa-d ijjen n useynu[6] ihwa-d xasen. Ṯendeq-d zzayes ijjen n ṯmijja ṯenna-asen: "Qa ḏ wanita ḏ Mmi iƹizzen, ṣennṭeṯ ɣares."

⁸Wami xzaren imeḥḍaren ammu ḏ wammu, ƹlaɣafla war akiḏsen ufin ḥadd illa Ƹisa.

⁹Wami d hewwan zeg uḏrar iweṣṣa-ṯen Ƹisa inna-asen: "War tƹawaḏem i ḥadd min ṯeẓrim aȓ d ɣa ikkar Mmis n bnaḏem zi ȓmewṯ."

¹⁰Jjin awaȓ nni jarasen, ssiwȓen ak wayawya nnan: Kifac, min ixes aḏ yini aḏ d ikkar zi ȓmewṯ?

¹¹Sseqsan-ṯ imeḥḍaren nnes nnan-as: "Mayemmi imseȓmaḏen n ccariƹa qqaren itxeṣṣa nnabi Ilyas aḏ d yas netta ḏ amezwaru?"

¹²Inna-asen Ƹisa: "Ḏ ṣṣaḥ itxeṣṣa aḏ d yas Ilyas ḏ amezwaru aḏ iƹḏeȓ kuȓci. Walakin mayemmi iqqar Lkitab belli itxeṣṣa-yas i Mmis n bnaḏem aḏ itwaƹeddeb, aṯ ƹiffen?

¹³Aḏawem iniɣ: Aqa Ilyas nni yusa-d, xeḏmen ḏayes min xsen mammec xas yura ḏi Lkitab."

¹⁴Ƹisa ḏ yinni akiḏes dewȓen-d ɣar imeḥḍaren ufin ḏinni ȓɣaci ḏ ameqqran munen-d xasen. Ufin ƹaweḏ can imseȓmaḏen n ccariƹa tmenɣan ak imeḥḍaren nni.

¹⁵Wami ẓrin Ƹisa, marra ȓɣaci nni ḏehcen uzzȓen ɣares axas seǧmen.

¹⁶Inna-asen Ƹisa: "Minxef tmenɣam?"

¹⁷Indeq-d yijjen zi ȓɣaci nni inna-as: "A Lmuƹallim, aqa uwiɣ-ac-d mmi ḏayes jjenn ḏ azeynun.

¹⁸Mani ma iṭṭef-iṯ iɣeṭṭaȓ-iṯ ɣar ṯmurṯ, isufuɣ-d netta kuffu zeg uqemmum nnes itɣeẓẓaẓ ṯiɣmas nnes iḏewweȓ war itenhezzi. Ttareɣ zeg imeḥḍaren nnec azzayes sufɣen jjenn nni walakin niṯni war ḏas zemmaren ca."

¹⁹Yarra xasen Ƹisa inna-asen: "A iwḏan n ȓweqṯ-a iy ḏi war iǧi bu lʼiman! Mecḥaȓ iy kiḏwem ɣa qqimeɣ u mecḥaȓ ḏawem ɣa ṣbareɣ? Awim-ayi-ṯ-id i nec."

²⁰Uwin-ṯ-id ɣar Ƹisa, jjenn nni yallah iẓra Ƹisa iserjiji aḥenjir nni iwḍa ɣar ṯmurṯ, iterjiji itekk-as-d kuffu zeg uqemmum.

²¹Inna-as Ƹisa i babas n uḥenjir nni: "Mecḥaȓ zeg wami iy ḏayes manaya?" Inna-as: "Zeg wami iǧa ḏ amezyan.

²²Aṭṭas n ṯwaȓaṯin ineṭṭar-iṯ ḏi ṯmessi niɣ ḏeg waman bac aṯ ineɣ. Cek meȓa ṯzemmareḏ, ƹawen-aneɣ rḥem-aneɣ."

²³Inna-as Ƹisa: "Mayemmi iy ɣa ṯiniḏ meȓa zemmareɣ? Iwa wenni yumnen izemmar i kuȓci."

²⁴Ȓexddenni issiweȓ s jjheḏ babas n uḥenjir nni inna-as: "Nec umneɣ! Ƹawen lʼiman inu ḏ uqlil."[7]

²⁵Wami yufa Ƹisa ȓɣaci ḏeɣya munen-d xas, isbedd jjenn nni aƹeffan inna-as: "A jjenn azeynun a jjenn aḏehcur, tamareɣ cek ffeɣ zzayes war ḏayes taḏaf ca ƹemmarṣ ƹaweḏ!"

²⁶Isnekkar ṯɣuyyeṯ jjenn nni iserjiji aḥenjir nni aṭṭas ȓexddenni iffeɣ zzayes. Aḥenjir nni iḏweȓ axmi immuṯ, nnan aṭṭas n yiwḏan aqa immuṯ ṣafi.

²⁷Walakin Ƹisa iṭṭef-iṯ zeg ufus nnes isbedd-iṯ ikkar.

²⁸Yuḏef Ƹisa ɣar ṯeddarṯ, sseqsan-ṯ imeḥḍaren nnes waḥḏes nnan-as: "Mayemmi zaƹma neccin tuɣa war nzemmar aṯ nsufeɣ?"

²⁹Yarra xasen inna-asen: "Nnuƹ n jjenn-a aṯ nsufeɣ ɣir s ṯẓaǧiṯ."

³⁰Ruḥen kkin ssenni x ṯmurṯ n Ljalil. Ƹisa war ixes ḥadd aḏ issen aqaṯen ḏinni

³¹minzi irezzu aḏ iseȓmaḏ i imeḥḍaren nnes. Inna-asen: "Mmis n bnaḏem aḏ itwasellem ɣar ifassen n yiwḏan. Aṯ nɣen, nhar wis ṯeȓtiyyam menbaƹd i ȓmewṯ nnes aḏ d ikkar."

³²Walakin niṯni war fhimen ca i wawaȓ nni, ggwḏen aṯ sseqsan x min ḏasen inna.

³³Usin-d ɣar ubilaj n Kafernaḥum. Aqaṯen ḏi ṯeddarṯ isseqsa imeḥḍaren nnes inna-asen: "Minxef tmenɣam ḏeg ubriḏ?"

³⁴War xas arrin ca seḏḥan minzi tmenɣan x ubriḏ ak wayawya ug iǧan ḏ ameqqran zzaysen.

³⁵Iqqim, iȓaɣa-d x ṯenƹac nni n imeḥḍaren nnes inna-asen: "Wenni irezzun aḏ iḏweȓ ḏ amezwaru jarawem itxeṣṣa-yas aḏ yiȓi ḏ aneggaru iƹni ḏ axeddam n marra."

³⁶Isqarreb-d ɣares ij uḥenjir ḏ amezyan, isbedd-iṯ ḏi ȓwesṭ nsen iḏerreƹ-as inna-asen:

³⁷"Wenni ɣa iqebȓen can uḥenjir am wanita ƹlaḥsab isem inu, axmi ḏ nec ig iqbeȓ. Wenni ḏayi ɣa iqebȓen, maci ḏ nec ig iqbeȓ; Lla, iqbeȓ wenni ḏayi d issekken."

³⁸Inna-as Yuḥanna: "A Lmuƹallim, qa neẓra ijjen isufuɣ jnun ƹlaḥsab isem nnec. Neccin nerzu aṯ nesbedd wami war iǧi ca ḏ ameḥḍar akiḏneɣ."

³⁹Inna-as Ƹisa: "War ṯ sbeddam ca. War izemmar can yijjen aḏ igg lmuƹjiza ƹlaḥsab isem inu ȓexddenni ḏeɣya axafi yini awaȓ ḏ aƹeffan.

⁴⁰Wenni war iǧin ca ḍed nneɣ, aqaṯ akiḏneɣ.

⁴¹Aqa tesȓam ȓḥaqq: Wenni ḏawem ɣa yucen ȓkas n waman ȓaḥeqqac teḏfarem Lmasiḥ ataf aḏ yawi lʼajar nnes war ṯ itḍeyyiƹ ca."

⁴²Wenni iy ɣa yawin ijjen zeg imezyanen-a iy zzayi itamnen ɣar ȓmuƹṣiyeṯ, ḥsen i netta aḏas cedden ijjen n uzru n ṯsirṯ s usɣun ɣar yiri nnes aṯ nḍaren ḏi ȓebḥar.

⁴³Cek fus nnec meȓa itsebbab-ac ḏi can ȓefḍiḥeṯ, qess-iṯ zaƹma. Ḥsen i cek aḏ taḏfeḏ jjenneṯ s yijjen n ufus zi meȓa qqimen ɣarek ṯnayen n ifassen aḏ tmenḍareḏ ḏi jahennama ɣar ṯmessi iy war ixessin ca ƹemmarṣ.

⁴⁴{Qa ḏinni ikeccawen war tmettin ca, ṯimessi war ṯxessi ca.}

⁴⁵Meȓa ḍar nnec itsebbab-ac ḏi can ȓefḍiḥeṯ, qess-iṯ zaƹma. Ḥsen i cek aḏ taḏfeḏ jjenneṯ s yijjen n uḍar zi meȓa qqimen ɣarek ṯnayen n iḍaren aḏ tmenḍareḏ ḏi jahennama.

⁴⁶{Qa ḏinni ikeccawen war tmettin ca, ṯimessi war ṯxessi ca.}

⁴⁷Meȓa ṯiṭṭ nnec tsebbab-ac ḏi can ȓefḍiḥeṯ, qȓeƹ-it zaƹma. Ḥsen i cek aḏ taḏfeḏ jjenneṯ s yijjen n ṯiṭṭ zi meȓa qqiment ɣarek ṯnayen n ṯiṭṭawin aḏ tmenḍareḏ ḏi jahennama.

⁴⁸Qa ḏinni ikeccawen war tmettin ca, ṯimessi war ṯxessi ca.

⁴⁹Minzi marra iwḏan aḏ twameǧḥen s ṯmessi.

⁵⁰Ȓemȓeḥ ṯṣeǧaḥ, walakin meȓa iruḥ-as lmaḏaq nnes, mamc ḏas ɣa negg aḏas ṯiḏ narr? Aɣarwem ṯiȓi ȓemȓeḥ ḏi nnefs nwem, iȓim ḏi ȓehna ak wayawya."