Read Tarifit Luqa 10 Bible Online

Luqa 10 - Tarifit bible

Luqa 10

¹Menbaƹd i manaya ixḍar Siḏiṯneɣ ijjen ṯnayen u sebƹin n imeḥḍaren, issekk-iṯen ṯnayen ṯnayen izwaren-as ɣar kuȓ ṯendint ḏ umcan ig igga netta aɣarsen iraḥ.

²Inna-asen i imeḥḍaren nnes: "Ṯafeǧaḥṯ aṭṭas walakin ḏrus icewwaren iy ɣa ixeḏmen. Ttareṯ zi Bab n ṯfeǧaḥṯ aḏ yarni icewwaren ḏeg umarjeƹ nnes.

³Ruḥeṯ, aqa ssekkeɣ-kenniw amecnaw izmaren jar wuccanen.

⁴War kiḏwem kessim ni ṯazeƹbuȓṯ, ni aqrab, ni ṯisiȓa. War tseǧamem ca x wenni ɣa ṯafem ḏeg ubriḏ.

⁵Xmi ɣa ṯaḏfem ɣar ca n ṯeddarṯ, inim ḏ amezwaru: Sȓam x ṯeddarṯ-a.

⁶Meȓa iqbeȓ-kenniw bab n ṯeddarṯ nni, ataf akiḏes tiȓi lbaraka nwem. Meȓa war kenniw iqbiȓ ca, ataf war kiḏes tɣimi ca lbaraka nwem.

⁷Qqimem ḏi ṯeddarṯ nni, ccem swem zi min ɣarsen minzi wenni itbeccaren ɣares ȓḥaqq aḏ itxaȓes. War traḥem ca zi ṯeddarṯ ɣar ṯeddarṯ.

⁸Xmi ɣa ṯaḏfem can ṯendint, meȓa qebȓen-kenniw ayṯbab nnes, ccem s minzi ḏawem ɣa ucen.

⁹Sgenfam imehȓac nsen inim-asen qa ȓmulk n Arebbi yuḏes-d ɣarwem.

¹⁰Meȓa ṯuḏfem ɣar ca n ṯendint war kenniw qbiȓen ca ayṯbab nnes, ffɣem ssenni ɣar ibriḏen nnes inim-asen qa uȓa ḏ ṯaƹejjact n ṯendint nwem ḏayneɣ iȓeṣqen ḏeg iḍaren nneɣ at nemseḥ. Walakin itxeṣṣa-kenniw aḏ tessnem belli ȓmulk n Arebbi yuḏes-d.

¹²Aḏawem iniɣ: Ḏi Yum Lḥisab ḏ Lƹiqab aḏ yiȓi lƹiqab n ṯendint nni ktar zi lƹiqab n ṯendint ṯaƹeffant n Sadum.

¹³Ya ȓefḍiḥeṯ nnec ya abilaj n Kurazim! Ya ȓefḍiḥeṯ nnec ya abilaj n Bayt Ṣayda! Maƹlik lmuƹjizaṯ-a iy ḏaywem iweqƹen, weqƹent ḏi ṯneddam ṯiƹeffanin n Ṣur ḏ Ṣayda, ataf ayṯbab nsent tuben mecḥaȓ zeg wami, iȓi ggin arruḍ n lḥuzen qqimen x yiɣɣeḏ[5] ḥima aḏ d tban tuba nsen.

¹⁴Aqa ṯineddam ṯiƹeffanin nni n Ṣur ḏ Ṣayda aḏ iȓint ḥsen zzaywem ḏi Yum Lḥisab ḏ Lƹiqab.

¹⁵Y cek, ay abilaj n Kafernaḥum! Ma tɣir-ac aḏ tgaƹƹḏeḏ ɣar ujenna? Lla, qa cek aḏ tehwiḏ ɣar Ljaḥim."

¹⁶Inna-asen Ƹisa i imeḥḍaren nnes: "Wenni itsȓan i wawaȓ nwem, ataf itesȓa-yayi i nec. Wenni war kenniw iqbiȓen ca, ataf uȓa ḏ nec war ḏayi iqbiȓ ca. Wenni war ḏayi iqbiȓen ca nec, ataf war iqbiȓ ca wenni ḏayi d issekken."

¹⁷Ḏewren-d ṯnayen u sebƹin nni n imeḥḍaren farrḥen. Nnan-as i Ƹisa: "A Siḏi, qa uȓa ḏ jnun teggen-aneɣ array ƹlaḥsab isem nnec."

¹⁸Inna-asen Ƹisa: "Tuɣa twaȓiɣ Cciṭan iwḍa-d zeg ujenna mamc d iweṭṭa ȓbarq.

¹⁹Aqa ticceɣ-awem jjheḏ iy zi ɣa ṯƹeffsem x ifiɣeran ḏ ṯɣirḏemiwin ḏ marra jjheḏ n ȓaƹḏu, war kenniw itḍarri walu.

²⁰Innama, war farrḥeṯ ca wami jnun ḏawem teggen array. Lla, farḥeṯ wami isemawen nwem urin zemmen ḏeg ujenna."

²¹Ȓexddenni ifareḥ Ƹisa s Arruḥ iqeddsen inna: "Ḥemḏeɣ-cek a Baba a Siḏi Arebbi n ujenna ḏ ṯmurṯ ȓaḥeqqac ṯesnuffareḏ manaya x imiɣisen ḏ lƹulama, ṯseḍhareḏ-ṯ-id i iḥenjiren imezyanen. Wah a Baba, ȓaḥeqqac ammu iy xak yarḍa.

²²Immuc-ayi kuȓci zi Baba. War issin ḥadd min iƹna Mmis menɣir Babas. War issin ḥadd min iƹna Babas menɣir Mmis. Babas, aṯ ssnen ɣir yinni umi ixes Mmis aḏasen ṯiḏ ismeḍhar."

²³Ineqȓeb ɣar imeḥḍaren nnes waḥeḏsen inna-asen: "Ssaƹḏ n ṯiṭṭawin nni iẓrin min ṯeẓrim!

²⁴Minzi aḏawem iniɣ: Aṭṭas n lʼanbiya ḏ izeǧiḏen rzun aḏ ẓren min twaȓam, walakin war ṯ ẓrin ca. Rzun aḏ sȓen min ṯesȓam, walakin war ṯ sȓin ca."

²⁵Yusa-d ijjen zeg yinni itcerraḥen ccariƹa ixes aḏ ijarreb Ƹisa inna-as: "A Lmuƹallim, min ɣa ggeɣ ḥima aɣari ṯiȓi ṯuḏarṯ n ȓebda?"

²⁶Inna-as Ƹisa: "Min ṯeqqar ccariƹa? Min ḏayes ṯessneḏ?"

²⁷Yarra xas wenni inna-as: "Itxeṣṣa-ac aḏ texseḏ Siḏi Arebbi nnec s marra uȓ nnec ḏ marra arruḥ nnec ḏ marra jjheḏ nnec ḏ marra ȓaƹqeȓ nnec. Aḏ texseḏ ajjar nnec amecnaw ixef nnec."

²⁸Inna-as Ƹisa: "Ɣarek ȓḥaqq ḏi min ṯenniḏ. Egg zzayes ḥima aɣarec ṯiȓi ṯuḏarṯ."

²⁹Walakin wenni itcerraḥen ccariƹa irezzu aḏ yuc ȓḥaqq x yixef nnes, inna-as i Ƹisa: "Min iƹna wajjar inu?"

³⁰Yarra xas Ƹisa inna-as: "Ijjen n bnaḏem ihewwa zi ṯendint n Lquds iggur ɣar ṯendint n Ariḥa. Ffɣen-d akiḏes ixewwanen ḏeg ubriḏ kksen-as arruḍ nnes, uwṯin-ṯ jjin-ṯ jar ṯuḏarṯ ḏ ȓmewṯ.

³¹Iƹḏu ssenni ijjen n ȓefqi ḏeg ubriḏ nni, iẓri-ṯ yarweȓ zzayes.

³²Ȓexddenni iƹḏu-d ssenni ijjen zi ccurfa n Ayṯ-Lawi, ƹaweḏ ixzar ḏayes yarweȓ.

³³Walakin ij uṯarras zi ṯmurṯ n Ayṯ-Samarya itsafar iƹḏu-d ssenni, iẓri-ṯ iqqes-as.

³⁴Iqarreb ɣares iysi zzect ḏ waman n uḍiȓ iḏhen-as s ijariḥen nnes icedd-as-ṯen. Ȓexddenni isney-ṯ x uɣyuȓ nnes, yuwi-ṯ ɣar yijjen n ṯeddarṯ n imsafaren ithella ḏayes igga ḏayes ȓxir.

³⁵Ṯiwecca nnes iysi-d ṯnayen n dinar yuca-as-ṯen i bab n ṯeddarṯ n imsafaren inna-as: Thilla ḏayes, cḥaȓ ma xas ṯɣasṭareḏ nneɣni, ataf nec xmi d ɣa aseɣ aḏac ṯen d arreɣ."

³⁶Inna-as Ƹisa i wenni: "Min twaȓiḏ cek? Min iƹna wenni zi ṯȓaṯa nni iy ɣa yiȓin ḏ ajjar n bnaḏem nni iy ṭṭfen ixewwanen?"

³⁷Inna-as wenni itcerraḥen ccariƹa qa ḏ aṯarras nni iy ḏayes iggin ȓxir. Inna-as Ƹisa: "Ruḥ, egg manayenni uȓa ḏ cek."

³⁸Ƹisa ḏ imeḥḍaren nnes gguren x ubriḏ. Yuḏef ɣar yijjen n dcar, ṯreḥḥeb zzayes ijjen n ṯemɣarṯ qqaren-as Marṯa ɣar ṯeddarṯ nnes.

³⁹Akiḏes ijjen n učmas nettaṯ qqaren-as Maryam ṯruḥ ṯeqqim ɣar iḍaren n Siḏiṯneɣ ṯebḏa tsennaṭ i wawaȓ nnes.

⁴⁰Marṯa ṯennuɣ aṭṭas ḏi ccɣeȓ n ṯeddarṯ. Ṯusa-d ṯenna-as i Ƹisa: "A Siḏi, ma war ḏac ṯecqi ca učma ṯeqqim waha ṯejja-ayi waḥḏi xeddmeɣ ccɣeȓ? Ini-yas aḏayi ṯƹawen baƹḏa!"

⁴¹Inna-as Siḏiṯneɣ: "A Marṯa a Marṯa, bnaḏem iteḥḏaja ɣir ijjen n ȓḥajeṯ. Cem ḏayem amnus txeyyaqeḏ x waṭṭas n ṯmesȓayin, Maryam ṯixḍar min iṣebḥan war ḏas itwakkes ca."