Read Tarifit Luqa 11 Bible Online

Luqa 11 - Tarifit bible

Luqa 11

¹Ijjen n wass Ƹisa itẓaǧa ḏeg yijjen n umcan. Wami ikemmeȓ ṯẓaǧiṯ nni inna-as ijjen zeg imeḥḍaren nnes: "A Siḏi, seȓmeḏ-aneɣ a neẓẓaǧ mammec iseȓmaḏ Yaḥya imeḥḍaren nnes."

²Inna-asen Ƹisa: "Meȓmi ɣa ṯeẓẓaǧem inim ammu: A Babaṯneɣ, ḏ ameqqran ig iǧa yisem nnec. Aḏ d yas ȓmulk nnec.

³Uc-aneɣ kuȓ nhar aɣrum iy ɣa neḥḏaj.

⁴Ɣfar-aneɣ ȓmuƹṣiyaṯ nneɣ i neccin, mammec nsemmeḥ i yinni iy kiḏneɣ ixeṭṭan. War ḏaneɣ tegg ca ḏi ȓemḥayen."

⁵Inna-asen Ƹisa: "Maṯalan ijjen zzaywem ɣares ameddukeȓ. Ḏi ȓwesṭ n ǧiȓeṯ iruḥ ɣar umeddukeȓ nnes inna-as: Ay ameddukeȓ, uc-ayi ṯȓaṯa n uɣrum minzi ijjen n umeddukeȓ inu isafar ikka-d xafi, nec war ɣari min ḏas ɣa uceɣ.

⁶

⁷Axas yarr umeddukeȓ nni nnes zi ḏaxeȓ n ṯeddarṯ aḏas yini: War ḏayi tseddaƹ ca! Nec ȓexxu ṯawwarṯ ṯbelleƹ ṯarwa inu ṭṭṣen akiḏi, war zemmareɣ ca aḏ kkareɣ aḏac uceɣ."

⁸Inna-asen Ƹisa: "Aḏawem iniɣ: Ḏ amezwaru yugi aḏ ikkar aḏas yuc min irezzu waxxa netta ḏ ameddukeȓ nnes, walakin aḏ ikkar aḏas yuc marra min iḥḏaj ȓaḥeqqac yusa-d ɣares ḏi ȓwesṭ n ǧiȓeṯ itrezza-yas azeǧif."

⁹"Nec aḏawem iniɣ: Ttarem, ataf aḏawem immuc. Rezzum, ataf aḏ tafem. Sqerqubem, ataf aḏawem rezmen.

¹⁰Minzi marra wenni ɣa ittaren aḏas immuc. Wenni ɣa irzun aḏ yaf. Wenni ɣa isqerqben aḏas ṯnurzem ṯewwarṯ.

¹¹Meȓa can yijjen zzaywem ittar-as mmis asȓem, ma aḏas yuc fiɣer ḏeg umcan n usȓem nni? Lla!

¹²Ma aḏas yuc babas ṯɣirḏent i memmis meȓa ittar-as ṯamǧaȓṯ? Lla!

¹³Meȓa kenniw ḏ iƹeffanen ṯessnem aḏ tucem i ṯarwa nwem min iǧan ḏ aṣebḥan, ataf Babaṯwem ig iǧan ḏeg ujenna itegg ktar, iƹni iticc Arruḥ iqeddsen i yinni ḏas ṯ itettaren."

¹⁴Isufeɣ Ƹisa ijjen n jjenn ḏ azeynun zeg yijjen n uryaz. Wami iffeɣ jjenn nni issiweȓ uryaz, qqimen tƹejjben ȓɣaci.

¹⁵Walakin ȓebƹaḍ zzaysen nnan: "Bnaḏem-a isufuɣ jnun minzi arrayes n jnun umi qqaren Bƹalzabul yuca-as jjheḏ-a."

¹⁶Inneɣni tettarren zzayes ijjen n lƹalama ḏ ṯameqqrant zeg ujenna bac aṯ jarrben.

¹⁷Issen Ƹisa min nwan inna-asen: "Mkuȓ lmemlaka iy ḏi tmenɣan ayṯbab nnes ijjen ak unneɣni aḏ tnehḏem. Mkuȓ ṯaddarṯ iy ḏi tmenɣan ayṯbab nnes ijjen ak unneɣni aḏ tewḍa.

¹⁸Meȓa Cciṭan ikkar aḏ iqḍa x Cciṭan, mammec ɣa ṯegg aḏ teqqim lmemlaka nnes? Minzi ṯeqqarem sufuɣeɣ jnun s jjheḏ n Bƹalzabul.

¹⁹Nec meȓa sufuɣeɣ jnun s jjheḏ n Bƹalzabul nni zaƹma, inim-ayi kenniw, mammec teggen yiwḏan nwem sufuɣen-ṯen uȓa ḏ niṯni? Niṯni s yixef nsen tbeyyanen belli kenniw war ɣarwem bu ȓḥaqq ḏi min ṯeqqarem.

²⁰Nec meȓa sufuɣeɣ jnun s jjheḏ n ufus n Arebbi, aqa ȓmulk n Arebbi yusa-d ɣarwem.

²¹Aryaz ijehḏen wenni ɣar iǧa ȓesnaḥ iḥeṭṭa ṯaddarṯ nnes, ataf agȓa nnes itiȓi ḏi ȓaman.

²²Walakin meȓa ihjem xas wenni xas ijehḏen, ataf aṯ iɣȓeb aḏas ikkes marra ȓesnaḥ iy xef iƹewweȓ aḏas yawi agȓa nnes marra."

²³Wenni war kiḏi iǧin ca, ataf aqaṯ ḍed inu. Wenni war kiḏi ismunen ca, ataf netta itzeǧaƹ.

²⁴Xmi ɣa itwasufeɣ jjenn aƹeffan zi can bnaḏem, ataf aḏ iggur ḏeg imucan yuzɣen irezzu amcan mani ɣa ireyyeḥ. Meȓa war yufi ca, ataf aḏ yini aqa nec aḏ raḥeɣ aḏ ḏewȓeɣ ɣar ṯeddarṯ inu manis iy ffɣeɣ.

²⁵Ssenni aɣares iḏweȓ at yaf ṯeƹḏeȓ, ṯenqa.

²⁶Uca aḏ iraḥ aḏ d yawi sebƹa n jnun nneɣni ḏ iƹeffanen ktar zzayes ḥima aḏ ḏewȓen kuȓci aḏayes zeḏɣen. Ataf aḏ tiȓi lḥala ṯaneggarut n bnaḏem nni ḏ ṯaƹeffant ktar zi lḥala nnes ṯamezwarut."

²⁷Wami tuɣa issawaȓ x manaya, ijjen n ṯemɣarṯ ṯȓaɣa ḏi ȓwesṭ n ȓɣaci ṯenna: "Ssaƹḏ n ṯemɣarṯ nni iy cek d yurwen, ṯenni iy c issuṭḍen."

²⁸Walakin netta inna: "Lla, ssaƹḏ n yinni itsȓan i wawaȓ n Arebbi, tṭaƹan-as."

²⁹Wami temzaḥamen ȓɣaci, ibḏa Ƹisa iqqar: "Iwḏan n ȓweqṯ-a ḏ iƹeffanen. Niṯni tettaren lƹalama ṯameqqrant walakin war ḏasen ticc illa ṯenni n nnabi Yunes.

³⁰Mammec tuɣa iǧa nnabi Yunes ḏ ijjen n lƹalama i ayṯbab n ṯendint n Ninwa, amenni ƹaweḏ aḏ yiȓi Mmis n bnaḏem ḏ ijjen n lƹalama i yiwḏan n ȓweqṯ-a.

³¹Yum Lḥisab ḏ Lƹiqab aḏ tekkar lmalika n Ljanub ak yiwḏan n ȓweqṯ-a axasen ṯceṯca, ȓaḥeqqac ṯusa-d nettaṯ zi ṯmurṯ yugjen ḥima aḏ tṣenneṭ i ȓefhameṯ n Suliman. U ḏanita ijjen ḏ ameqqran zi Suliman.

³²Yum Lḥisab ḏ Lƹiqab aḏ d kkaren imezḏaɣ n ṯendint n Ninwa ak yiwḏan n ȓweqṯ-a axasen ceṯcan, ȓaḥeqqac ayṯbab n ṯendint n Ninwa tuben wami ṯen inha nnabi Yunes. U ḏanita ijjen ḏ ameqqran zi Yunes.

³³Uȓa ḏ ijjen war itcaƹƹiȓ ȓqendiȓ ḥima aṯ isers ḏeg yij umcan inuffar niɣ axas iqȓeb aqnuc. Lla, itegg-iṯ x ȓmarfaƹ ḥima aḏasen yuc ṯfawṯ i yinni iy d ɣa yaḏfen.

³⁴Ṯiṭṭ nnec nettaṯ ḏ ṯfawṯ i ṯuḏarṯ nnec. Meȓa ɣarek ṯiṭṭawin ṣeḥḥant, ataf aɣarek ṯiȓi ṯfawṯ marra ḏi ṯuḏarṯ nnec. Meȓa ṯiṭṭawin nnec war ǧint ca mliḥ, ataf aḏ tiȓi marra ṯuḏarṯ nnec ḏ ṯaǧest.

³⁵Ḥḍa ixef nnec mliḥ ḥima nnur iy ḏayek war itḏewwiȓ ca ḏ ṯaǧest.

³⁶Meȓa marra ddat nnec ḏayes ṯfawṯ war ḏayes bu ṯaǧest, ataf aḏ tceƹceƹ aṭṭas aḏ tegg ṯfawṯ amecnaw mammec ḏawem iticc ȓqendiȓ ṯfawṯ."

³⁷Wami issiweȓ Ƹisa, yusa-d ijjen zi ȓḥizeb n ifarrisiyen iƹareḍ-iṯ ḥima akiḏes icc. Yuḏef Ƹisa iqqim ɣar missa,

³⁸afarrisi nni itƹejjeb wami yufa Ƹisa war isireḏ ca ifassen nnes qbeȓ ma aḏ icc.

³⁹Inna-as Siḏiṯneɣ: "Kenniw ifarrisiyen ṯsiriḏem ȓkas nwem ḏ ṭṭebsi nwem ɣar barra mliḥ, walakin ɣar ḏaxeȓ nwem ṯeccurem s ṭṭmaƹ ḏ ccarr.

⁴⁰A yinni war ifehhmen! Arebbi ḏ netta ig iggin ddat, ḏ netta ƹaweḏ ig iggin min ḏayes ɣar ḏaxeȓ.

⁴¹Ṣeddqem min ḏaywem ɣar ḏaxeȓ, ataf marra aḏ iḏweȓ isireḏ i kenniw.

⁴²Ya ȓefḍiḥeṯ nwem a ȓḥizeb n ifarrisiyen! Ticcem ȓaƹcur uȓa x naƹnaƹ ḏ uwram[6] ḏ marra ȓaƹcub, walakin war tehtimim ca zi ȓḥaqq ḏ ȓemḥibbeṯ n Arebbi. Lla, ixeṣṣa-awem aḏ tehtamem s manaya bȓa ma tettum ȓaƹcur.

⁴³Ya ȓefḍiḥeṯ nwem a ȓḥizeb n ifarrisiyen! Minzi texsem imucan imezwura ḏi ṯemziḏawin, iteƹjib-awem axawem seǧmen yiwḏan ḏi ȓeswaq.

⁴⁴Ya ȓefḍiḥeṯ nwem, kenniw amecnaw imeḍȓan iweddaren gguren xasen yiwḏan war d arrin ca ȓexbar."

⁴⁵Indeq-d ijjen zeg yinni itcerraḥen ccariƹa inna-as: "A Lmuƹallim, wami ṯeqqareḏ manaya aqa uȓa ḏ neccin tḥeggareḏ-aneɣ!"

⁴⁶Yarra xas Ƹisa inna: "Ya ȓefḍiḥeṯ nwem uȓa ḏ kenniw a yinni itcerraḥen ccariƹa minzi tceddam ȓeḥmeȓ iḏeqȓen iqesḥen x yiwḏan ḥima aṯ arbun, walakin kenniw war tḥiḏim bu ȓeḥmeȓ nni uȓa s yijjen n uḍaḍ nwem.

⁴⁷Ya ȓefḍiḥeṯ nwem minzi kenniw ṯbennam imeḍȓan n lʼanbiya tarrim-ṯen ḏ imrabḏen u kenniw ȓejḏuḏ nwem ḏ niṯni iy ṯen inɣin.

⁴⁸Tafaqem ak ȓejḏuḏ nwem, kenniw ḏ ȓechuḏ x min xeḏmen minzi d niṯni ig inɣin lʼanbiya u kenniw ṯbennam imrabḏen nsen.

⁴⁹X manaya ƹaweḏ ṯeqqar lḥikma n Arebbi aḏasen ssekkeɣ lʼanbiya ḏ arrusul, ijjen aṯ nɣen ijjen axas azzȓen.

⁵⁰Ḥima iwḏan n ȓweqṯ-a aḏ twaƹaqben x marra iḏammen iy yuzzȓen zi lʼanbiya zeg wami ṯeǧa ddunect-a.

⁵¹Zeg iḏammen n Habil aȓ iḏammen n Zakariya wenni inɣin jar ȓmeḏbaḥ ḏ ṯemziḏa ṯameqqrant. Wah, aḏawem iniɣ: Marra lƹiqab x manayenni ḏ iwḏan n ȓweqṯ-a iy xas ɣa itwaḥesben!

⁵²Ya ȓefḍiḥeṯ nwem a yinni itcerraḥen ccariƹa! Ṯeṭṭfem ȓmeftaḥ n ȓefhameṯ, kenniw war tiḏfem ca ḏayes war tejjim wi ɣa yaḏfen."

⁵³Wami ssenni iffeɣ, bḏan imseȓmaḏen n ccariƹa ḏ ȓḥizeb n ifarrisiyen tƹarraḍen-ṯ ktar, tseddaƹen-ṯ x waṭṭas n ṯmesȓayin.

⁵⁴Ḥeṭṭan-ṯ ḥima aḏ yini can wawaȓ aṯ ṭṭfen zzayes.