Read Tarifit Luqa 12 Bible Online

Luqa 12 - Tarifit bible

Luqa 12

¹Ȓexddenni munen aṭṭas n uȓufaṯ n yiwḏan aȓ wami ḏewȓen ƹeffsen x wayawya. Ibḏa Ƹisa iqqar-asen i imeḥḍaren nnes: "Ḥḍam ixef nwem zi nnifaq n ȓḥizeb n ifarrisiyen iǧan am untun.[7]

²Marra min itwasnuffaren aḏ inefḍeḥ. Marra min inuffaren aḏ itwassen.

³X manaya, marra min ṯeqqarem ḏi ṯaǧest aḏas tesȓan s uziȓ. Marra min ṯeqqarem s ȓḥess ɣar ḏaxeȓ i ixammen, azzayes tƹeyyaḍen x ṯzeqqa.

⁴Aḏawem iniɣ ay imeddukaȓ inu: War teggwḏem ca zi yinni ineqqen ddat waha war ɣarsen min ɣa ggen ktar zi manayenni.

⁵Lla, aḏawem iniɣ wi zi ɣa ṯeggwḏem: Ggwḏeṯ zi Wenni iy ɣa inɣen ddat nwem menbaƹd aɣares yiȓi jjheḏ bac aḏ igg ktar, at inḍar ḏi jahennama. Wah, qqareɣ-awem: Wenni ggwḏem-ṯ.

⁶Ma war tmenzin xemsa n izawjiwen s ṯnayen n duru? Walakin Arebbi war itettu uȓa ḏ ijjen zzaysen.

⁷Uȓa ḏ izuṭṭan iy ɣarwem x uzeǧif nwem iḥseb-iṯen Arebbi marra. War teggwḏem ca, kenniw ṯseggwam ktar s waṭṭas x izawjiwen.

⁸Aḏawem iniɣ: Wenni zzayi ɣa icehḏen nec zzaṯ i yiwḏan, ataf azzayes cehḏeɣ nec Mmis n bnaḏem zzaṯ i lmalaʼikaṯ n Arebbi.

⁹Wenni ḏayi ɣa inkaren zzaṯ i yiwḏan, ataf aḏ itwankar zzaṯ i lmalaʼikaṯ n Arebbi.

¹⁰Wenni ɣa yinin can wawaȓ war iḥȓin x Mmis n bnaḏem ataf axas iɣfar. Wenni ɣa yinin can wawaȓ war iḥȓin x Arruḥ iqeddsen ataf war xas iɣeffar ca ƹemmarṣ.

¹¹Axmi kenniw ɣa awin ɣar ṯemziḏawin n Ayṯ-Israʼil niɣ ḏ ȓḥukkam ḏ imxazniyen, bȓa ma aḏ teysim amnus ḏi ȓaƹquȓaṯ nwem minzi ɣa ṯdafƹem x yixef nwem niɣ ḏ min ɣa ṯinim.

¹²Minzi Arruḥ iqeddsen aḏawem yuc min ɣa ṯinim ḏi ṯsaƹƹat nni."

¹³Inna-as ijjen n uryaz zi ȓɣaci nni: "A Lmuƹallim, in-as i wuma akiḏi ifreq ȓwarṯ."

¹⁴Inna-as Ƹisa: "A bnaḏem, wi ḏayi iggin jarawem ḏ ȓqaḍi niɣ ḏ wenni iferqen ȓwarṯ?"

¹⁵Inna-asen: "Ḥḍam ixef nwem, beƹƹḏeṯ x ṭṭmaƹ minzi ṯuḏarṯ n bnaḏem war tiȓi ca s waṭṭas n wagȓa."

¹⁶Issiweȓ akiḏsen s yijjen n ȓmaƹna inna-asen: "Ijjen n bnaḏem ḏ ttajar ṯamurṯ nnes ṯurew-as aṭṭas.

¹⁷Inna ḏi nnefs nnes: War ufiɣ bu amcan mani ɣa xemmȓeɣ ṯafeǧaḥṯ-a, min ɣa ggeɣ?

¹⁸Inna: Aḏ heḏmeɣ ixezzanen inu, aḏ bniɣ inneɣni ḏ jḏiḏ ḏ imeqqranen xasen, aḏaysen xemmȓeɣ marra ṯafeǧaḥṯ ḏ arzeq inu.

¹⁹Aḏ iniɣ i yixef inu: Ṣafi, ɣari aṭṭas n ȓxir iy ḏayi ɣa iqidden i waṭṭas n iseggwusa, aḏ qqimeɣ waha aḏ cceɣ aḏ sweɣ aḏ farḥeɣ!

²⁰Walakin inna-as Arebbi: Ay afɣuȓ! Umi ṯsewjaḏeḏ manaya? Ḏi ǧiȓeṯ-a ṯanita aḏ itwaffeɣ buḥbeȓ nnec.

²¹Amenni iy ɣa yiȓi wenni ijemmƹen agȓa i yixef nnes waha war ijemmeƹ ca i Arebbi."

²²Inna-asen Ƹisa i imeḥḍaren nnes: "X manaya aḏawem iniɣ: War kessim ca s umnus i ṯuḏarṯ nwem ƹlaḥsab min ɣa ṯeccem niɣ ḏ arruḍ iy ɣa ṯeḥḏajem i ddat nwem.

²³Minzi ṯuḏarṯ-a tseggwa ktar zi macca. Ddat-a tseggwa ktar zeg warruḍ.

²⁴Xzarem ɣar ibaɣeriwen. War zerrƹen, war mejjaren. War ɣarsen ṯisrafin uȓa ḏ mani ɣa xezznen. Ḏ Arebbi iy ḏasen iticcen aḏ ccen. Kenniw, ma war tseggwim ca aṭṭas s waṭṭas x yijḍaḍ?

²⁵Ug izemmaren zzaywem aḏ yarni s umnus nnes ɣir ṯsaƹƹat waha ḏi ȓƹumur nnes?

²⁶Meȓa war ṯzemmarem ca uȓa i min iǧan ḏ amezyan, mayemmi ṯkessim amnus i ca n ȓḥajeṯ nneɣni?

²⁷Xzareṯ ḏi nwar n ȓexȓa mammec igga, war yarebbeȓ war itxeyyiḍ. Qqareɣ-awem nec: Uȓa ḏ azeǧiḏ Suliman, mecḥaȓ ɣares ḏ agȓa war izemmar ca aḏ yareḍ ca n warruḍ igga am nwar-a wanita.

²⁸Meȓa Arebbi iticc arruḍ zaƹma i arbiƹ n ȓexȓa ig iǧan nhara aḏ iḥreq ṯiwecca ḏeg ufarran, ma war itegg akiḏwem kenniw ktar? Ḏaywem lʼiman nwem ḏ uqlil.

²⁹War rezzuṯ ca min ɣa ṯeccem niɣ ḏ min ɣa ṯeswem, war kessiṯ bu s umnus.

³⁰Marra manaya rezzun-ṯ ȓegnus n ddunect-a, kenniw Babaṯwem issen belli teḥḏajim ṯimesȓayin-a.

³¹Rezzuṯ kenniw x ȓmulk n Arebbi, ssenni ṯimesȓayin-a aḏawem marnint.

³²War teggwḏem ca a ṯḥimerṯ inu ṯamezyant, irḍa Babaṯwem aḏawem yuc ȓmulk nnes.

³³Zenzeṯ agȓa nwem, ṣeddqem-ṯ. Ggeṯ ṯicemmusin n tmenyaṯ iy war ifennin ca niṯenti ḏ ijjen n ȓkenz ḏeg ujenna war iqeṭṭin ca. War itqarrib ca ḏinni uceffar, ṯikeccawin war ṯ tettent ca.

³⁴Aqa mani iǧa ȓkenz nwem, ḏinni iy ɣa yiȓi wuȓ nwem.

³⁵Iȓim ṯewjḏem geffḍem, aḏ iȓin ȓeqnaḏeȓ nwem caƹƹȓen.

³⁶Iȓim ṯwejḏem am yiwḏan iy trajan siḏiṯsen aḏ d iḏweȓ zi ȓfarḥ, aḏ d yas aḏ isqerqeb aḏas rezmen ḏeɣya.

³⁷Ssaƹḏ n ixeddamen nni meȓa yusa-d siḏiṯsen yufi-ṯen ƹaḏ war ṭṭiṣen ca. Aqa tesȓam ȓḥaqq: Aḏ igeffeḍ siḏiṯsen aṯen isɣim, aḏ ibḏa itsexxar xasen.

³⁸Meȓa yusa-d yufi-ṯen ƹaḏ war ṭṭiṣen ca waxxa ḏi ȓwesṭ n ǧiȓeṯ niɣ qbeȓ i ȓefjar, ataf ssaƹḏ n ixeddamen nni.

³⁹Itxeṣṣa-awem aḏ tessnem manaya: Mȓi bab n ṯeddarṯ issen ṯsaƹƹat iy ḏi d ɣa yas uceffar, iȓi war ṯ itijji ca aḏ d yaḏef ṯaddarṯ nnes.

⁴⁰Swejḏem ixef nwem minzi Mmis n bnaḏem aḏ d yas ḏeg yijjen n ṯsaƹƹat war ṯ trijim ca."

⁴¹Indeq-d Buṭrus inna-as: "A Siḏi, ȓmaƹna-ya ma ṯeqqareḏ-ṯ ɣir i neccin ma i marra iwḏan?"

⁴²Yarra xas Siḏiṯneɣ inna-as: "Iwa min iƹna uweqqaf nni iǧan ḏ amiɣis ḏayes ȓaman? Netta ḏ wenni ig itkellaf siḏes aḏasen yuc lmakla i ixeddamen nnes ḏi ȓweqṯ nican.

⁴³Ssaƹḏ n uweqqaf nni xmi d ɣa iḏweȓ siḏes aṯ yaf ixeddem.

⁴⁴Aqa tesȓam ȓḥaqq: Aṯ ikellef siḏes x marra agȓa nnes.

⁴⁵Walakin aweqqaf nni meȓa inewwa ḏeg yixef nnes iqqar: Siḏi itƹeṭṭaȓ aṭṭas war d itis ca, ṯumma aḏ ibḏa iccaṯ ixeddamen ḏ ṯxeddamin itett isess aqaṯ ak iskayriyen waha,

⁴⁶ataf aḏ d yas siḏes n uweqqaf nni ḏeg yijjen n nhar war ṯ inwi ca, ḏeg yijjen n ṯsaƹƹat war t issin ca. Aṯ iqess ḏ iwezwizen, aṯ inḍar ḏeg umcan nni n yinni iy ḏi war iǧi ca lʼiman.

⁴⁷Aweqqaf nni netta issen min irezzu siḏes walakin war isewjiḏ ca i siḏes war itegg ca min irezzu siḏes, ataf aḏ itwaƹaqeb aṭṭas.

⁴⁸Wenni war issinen ca min irezzu siḏes itegg ṯimesȓayin isḏahǧen aƹmuḏ, ataf aḏ itwaƹaqeb ḏrus waha. Marra wenni umi immuc aṭṭas, azzayes rzun aṭṭas. Wenni ig itwakellfen x waṭṭas, azzayes rzun aṭṭas.

⁴⁹Usiɣ-d aḏ nḍareɣ ijjen n ṯmessi icemmḍen x ṯmurṯ, u mecḥaȓ tmenniɣ at afeɣ ȓexxu ṯceƹƹeȓ!

⁵⁰Itxeṣṣa-ayi aḏ twaƹaddbeɣ, xeyyqeɣ aṭṭas ḥetta aȓ ɣa ƹḏuɣ manayenni.

⁵¹Ma tfekkarem belli usiɣ-d aḏ ggeɣ ȓehna ḏi ddunect-a? Lla! Aḏawem iniɣ usiɣ-d aḏ ggeɣ amenɣi.

⁵²Ssa aȓ ṯsawent xemsa n yiwḏan aḏ menɣen ak wayawya ḏeg yijjen n ṯeddarṯ: ṯȓaṯa aḏ menɣen ak ṯnayen, ṯnayen aḏ menɣen ak ṯȓaṯa.

⁵³Babas aḏ imneɣ ak mmis, mmis aḏ imneɣ ak babas. Yemmas aḏ temneɣ ak yeǧis, yeǧis aḏ temneɣ ak yemmas. Lalla aḏ temneɣ ak ṯesȓiṯ, ṯasȓiṯ aḏ temneɣ ak lallas."

⁵⁴Inna-asen Ƹisa i ȓɣaci nni: "Meȓa ṯeẓrim aseynu igaƹƹeḏ-d zi ȓɣarb, ḏeɣya aḏ tinim aḏ yiȓi unẓar. U ḏ manayenni iy ɣa yiȓin.

⁵⁵Meȓa iṣuḍ-d arriḥ zi ljanub, aḏ tinim aḏ yiȓi ȓeḥmu aṭṭas. U ḏ manayenni iy ɣa yiȓin."

⁵⁶Inna-asen: "A lmunafiqin! Lḥala n ujenna ḏ ṯmurṯ ṯessnem aṯen tcarrḥem mamc ǧan. Mayemmi war ṯzemmarem ca aḏ tcarrḥem lḥala n zman-a iy ḏi neǧa ȓexxu?"

⁵⁷Kenniw, mayemmi war tmeyyizem ca s yixef nwem min iǧan ḏ ȓḥaqq?

⁵⁸Cuf, meȓa ithem-icek ca ḥadd menbaƹd uwin-ac-d lʼistidƹa ḥima akiḏes ṯraḥeḏ ɣar lmaḥkama, ƹḏeȓ akiḏes ḏeɣya ḏeg ubriḏ bac war c isiwwiḍ ca ɣar ȓqaḍi, ȓqaḍi nni aḏ iʼamar amxazni, amxazni nni ac inḍar ḏi ȓeḥbes.

⁵⁹Nniɣ-ac: War ssenni d teffɣeḏ ca aȓ ɣa ṯxeǧseḏ frank aneggaru."