Read Tarifit Luqa 13 Bible Online

Luqa 13 - Tarifit bible

Luqa 13

¹Ḏi nhar nni ḥḍaren-d can yiwḏan xebbaren Ƹisa x ca n yiwḏan zi Ayṯ-Ljalil tuɣa ɣarrṣen i dbiḥaṯ nsen wami d yusa lḥakem ḏ arumani Bilaṭus inɣi-ṯen, iḏammen nsen xellṭen ak iḏammen n dbiḥaṯ nsen.

²Yarra xasen Ƹisa inna-asen: "Ma ṯḥesbem ȓmuƹṣiyaṯ n ijaliliyen-a ktar zi ȓmuƹṣiyaṯ n marra Ayt-Ljalil wami d tehwa xasen ȓmuṣiba-ya?

³Qqareɣ-awem lla. Meȓa war ṯtubem ca, ataf marra iḏwem aḏ temmṯem amecnaw niṯni.

⁴Niɣ ṯmenṭac nni iy xef d tewḍa ṣṣumƹeṯ ḏi ḥay-Silwam ṯenɣi-ṯen, ma tɣir-awem belli ggin dunub ktar zi marra iwḏan izeddɣen ḏi ṯendint ṯekmaȓ n Lquds?

⁵Qqareɣ-awem lla. Meȓa war ṯtubem ca, ataf marra iḏwem aḏ temmṯem amecnaw niṯni."

⁶Issiweȓ akiḏsen s ȓmaƹna-ya inna-asen: "Ijjen n uryaz ɣares ṯacejjarṯ n ṯazarṯ ṯeẓẓu ḏi ȓaƹraṣi nnes, yusa-d netta azzayes iȓqeḏ ṯazarṯ yufa war ḏayes walu qaƹ.

⁷Inna-as i wenni ixeddmen ȓaƹraṣi nnes: Ṯacejjarṯ-a ṯeȓt snin nec taseɣ-d ɣares ḥima azzayes ȓeqḏeɣ ṯazarṯ war ḏayes tifeɣ walu. Araḥ-d qess-it! Mayemmi t ɣa nejj aḏ tḍeyyeƹ ṯamurṯ waha?

⁸Yarra xas uxeddam nni inna-as: A siḏi, ejj-it ɣir ȓƹam-a waha axas neqceɣ aḏas ggeɣ ȓeɣbar.

⁹Meȓa ṯurew-d ṯazarṯ ḏeg useggwas-a iy d ɣa yasen, ataf mliḥ. Meȓa ƹaḏ walu, ataf ṣafi qess-it."

¹⁰Tuɣa Ƹisa iseȓmaḏ ḏeg yijjen n ṯemziḏa n Ayṯ-Israʼil ḏi nhar n ssebṯ n lƹibada.

¹¹Yufa ḏinni ijjen n ṯemɣarṯ ṯmenṭac iseggwusa zeg wami ṯehȓec ḏayes jjenn, ṯeqwes war ṯzemmar ca aḏ tbedd nican.

¹²Wami t iẓra Ƹisa iȓaɣa-d xas inna-as: "A ṯamɣarṯ, cem ȓexxu ṯenfekkeḏ zi ȓehȓac nnem."

¹³Isers xas ifassen nnes ȓexddenni ṯbedd nican ṯebḏa ṯḥemmeḏ Arebbi.

¹⁴Arrayes n ṯemziḏa nni war ḏas iƹjib bu ȓḥaȓ wami Ƹisa isgenfa ṯamɣarṯ nni ḏi nhar n ssebṯ n lƹibada. Ikkar netta inna-asen i yiwḏan: "Arebbi yuca settiyyam n ȓxeḏmeṯ, ḏi settiyyam nni iy d ɣa tasem aḏ tgenfim, war iǧi bu ḏi nhar n lƹibada."

¹⁵Inna-as Siḏiṯneɣ: "A lmunafiqin, ma war ṯḍeǧqem ca ifunasen ḏ iɣyaȓ nwem zi ȓkuri ḏi nhar n lƹibada ḥima aṯen ṯsesswem?

¹⁶Ṯamɣarṯ-a meskina iǧan zi ddurriṯ n Brahim iḥebbes-it Cciṭan ṯmenṭac iseggwusa, ma war ḏas nrezzem ca zi ȓeḥbes-a ḏi nhar n lƹibada ma lla?"

¹⁷Wami inna awaȓ-a, marra yinni akiḏes itmenɣan seḏḥan. Iwḏan nneɣni marra farḥen zi ȓexḏayem ṯimeqqranin ig itegg.

¹⁸Inna-asen Ƹisa: "Minḏi itcabbah ȓmulk n Arebbi? Niɣ s minzi ɣa ṯ meṯṯleɣ?

¹⁹Ȓmulk n Arebbi igga am yijjen n zzarriƹeṯ n yijjen n nnuƹ n arbiƹ qqaren-as bugarḏaȓ. Iysi-t ijjen n uryaz yuwi-t iẓẓu-t ḏi ȓƹarseṯ nnes. Ṯemɣar ṯḏewweȓ am ṯcejjarṯ, ijḍaḍ tasen-d teggen ḏayes ȓaƹwac nsen."

²⁰Inna-asen ƹaweḏ: "S minzi ɣa meṯṯleɣ ȓmulk n Arebbi?

²¹Netta am untun ṯeysi-ṯ ijjen n ṯemɣarṯ ṯuggwa zzayes ȓmudd n waren, antun nni isgaƹƹeḏ-iṯ-id marra."

²²Ikka Ƹisa x ibilajen ḏ ȓedcuraṯ, iseȓmaḏ iggur ɣar ṯendint n Lquds.

²³Isseqsa-ṯ ijjen n uryaz inna-as: "A Siḏi, ma ḏrus iy ɣa iraḥen ɣar ṯuḏarṯ n ȓebda?" Inna-as Ƹisa:

²⁴"Ggeṯ mamc ɣa ṯaḏfem zi ṯewwarṯ iḥṣaren. Aḏawem iniɣ: Aṭṭas n yiwḏan ataf aḏ rzun aḏ aḏfen walakin war zemmaren.

²⁵Bab n ṯeddarṯ aḏ ikkar aḏ ibelleƹ ṯawwarṯ ṣafi. Kenniw meȓa ṯeqqimem ɣar barra ṯesqerqubem ḏi ṯewwarṯ ṯeqqarem: A siḏi, rzem-aneɣ! Aḏawem yini: Nec war ssineɣ ca zi manis d tusim!

²⁶Ssenni aḏ tebḏam aḏ tinim: Neccin necca neswa akiḏec, tuɣa ṯseȓmaḏeḏ-aneɣ ḏeg ibriḏen nneɣ!

²⁷Aḏawem yini: Nec war ssineɣ ca zi manis d tusim. Beƹƹḏem xafi a yinni iteggen ccarr!

²⁸Ḏinni i ɣa yiȓin imeṭṭawen ḏ uɣeẓẓaẓ n ṯeɣmas xmi ɣa ṯeẓrem Brahim ḏ Isḥaq ḏ Yaƹqub ḏ marra lʼanbiya ɣar ḏaxeȓ ḏi ȓmulk n Arebbi, kenniw tmenḍarem ɣar barra!

²⁹Aḏ d asen yiwḏan zi ccarq ḏ ȓɣarb ḏ ccamal ḏ ljanub, aḏ qqimen ɣar missa ḏi ȓmulk n Arebbi.

³⁰Yinni iǧan ḏ ineggura aḏ ḏewȓen ḏ imezwura; Yinni iy iǧan ḏ imezwura aḏ ḏewȓen ḏ ineggura."

³¹Nhar nni qarrben ȓebƹaḍ zi ȓḥizeb n ifarrisiyen ɣar Ƹisa nnan-as: "Ffeɣ ssanita aqa azeǧiḏ Hirudus irezzu ac ineɣ!"

³²Inna-asen Ƹisa: "Ruḥeṯ inim-as i wuccen nni: Qa nec sufuɣeɣ jnun, sgenfayeɣ iwḏan nhara ḏ ṯiwecca. Ḏi nhar wis ṯeȓtiyyam aḏ kemmȓeɣ.

³³Walakin labud aḏ uyureɣ nhara ḏ ṯiwecca ḏ nhar iy ṯiḏ ɣa iḏfaren minzi war izemmar aḏ immeṯ can nnabi illa ḏi ṯendint n Lquds.

³⁴Ya Lquds, ya Lquds! Ḏ cem ig ineqqen lʼanbiya, ḏ cem ig irejjmen yinni ɣarem d issekk Arebbi! Nec mecḥaȓ n ṯwaȓaṯin xseɣ aḏ smuneɣ ṯarwa nnem am can ṯyaziṭ iteḥbubuḍen x ifiǧusen nnes walakin kenniw ṯugim.

³⁵Aqa ṯaddarṯ nwem aḏ texȓa! Aḏawem iniɣ belli war ḏayi ṯẓerrem ca ƹaweḏ ḥetta aȓ nhar nni iy ɣa ṯinim: Ssaƹḏ ya wenni iy d yusin ƹlaḥsab isem n Siḏi Arebbi."