Read Tarifit Luqa 14 Bible Online

Luqa 14 - Tarifit bible

Luqa 14

¹Ijjen n nhar n ssebṯ n lƹibada iruḥ Ƹisa yuḏef ṯaddarṯ n yijjen zeg imeqqranen n ȓḥizeb n ifarrisiyen ḥima aḏ icc aɣrum, niṯni ḥeṭṭan-ṯ.

²Ḏinni zzaṯes ijjen n uryaz ihȓec ḏayes ṯuffet.

³Inna-asen Ƹisa i yinni itcerraḥen ccariƹa ḏ yinni zi ȓḥizeb n ifarrisiyen: "Ma ḥalal aḏ itwasgenfa bnaḏem ḏi nhar n lƹibada ma lla?"

⁴Niṯni sqaren waha. Uca Ƹisa isqarreb-iṯ-iḏ ɣares isgenfa-ṯ, inna-as iwa ruḥ.

⁵Indeq-d Ƹisa inna-asen: "Meȓa can yijjen zzaywem iwḍa-yas mmis niɣ ḏ ayenduz nnes ḏeg wanu ḏi nhar n ssebṯ n lƹibada, ma war ṯiḏ isiȓi ca ḏeɣya niɣ lla?"

⁶Niṯni ugin aṯ jawben x manaya.

⁷Ƹisa wami yufa ḏinni yinni itwaƹarḍen qqimen rezzun x imucan imezwura ɣar missa, ibḏa issawaȓ akiḏsen s yijjen n ȓmaƹna inna-asen:

⁸"Meȓa iƹareḍ-ic can yijjen ɣar yijjen n ȓfarḥ, war tɣima ca cek ḏeg umcan amezwaru; Lla, imken ƹarḍen can ijjen ɣares lqima ktar zzayek.

⁹Aɣarek d yas wenni iy xawem iƹarḍen aḏac yini uc-as amcan nnec i wanita! Ataf aḏ tseḏḥiḏ aḏ tekkareḏ aḏ traḥeḏ ɣar umcan aneggaru.

¹⁰Lla, meȓa ƹarḍen xak, ruḥ qqim ḏeg umcan aneggaru. Aɣarek d yas wenni iy c iƹarḍen aḏac yini ay ameddukeȓ inu gaƹƹeḏ ḏiha. Ataf aḏ temɣareḏ ɣar marra yinni itwaƹarḍen.

¹¹Ȓaḥeqqac wenni isemɣaren ixef nnes, ataf aḏ yiȓi ḏ amezyan. Wenni isemzayen ixef nnes, ataf aḏ yiȓi ḏ ameqqran."

¹²Inna-as Ƹisa i wenni iy ṯ iƹarḍen: "Meȓa ṯeggiḏ amecri niɣ ḏ amensi, war ƹarreḍ ca x imeddukaȓ nnec niɣ ḏ ayṯmac niɣ ḏ familya nnec niɣ ḏ jjiran iǧan ḏ twajar minzi meȓa ƹarḍen-c uȓa ḏ niṯni, ataf war ɣarek bu lʼajar x manaya.

¹³Lla, meȓa ṯeggiḏ zarrdeṯ ƹareḍ x ȓmusakin ḏ inecrufen ḏ izeḥḥafen ḏ iḍarɣaȓen.

¹⁴Ssaƹḏ nnec ƹlaḥeqqac war ɣarsen minzi c ɣa xeǧsen. Ataf aḏac itwaxȓef ḏi Nhar nni xmi d ɣa kkaren zi ȓmewṯ yinni iǧan nican."

¹⁵Ikkar ijjen zeg yinni itwaƹarḍen isȓa i wawaȓ nni inna-as i Ƹisa: "Ssaƹḏ n wenni iy ɣa iccen aɣrum ḏi ȓmulk n Arebbi!"

¹⁶Inna-as Ƹisa: "Ijjen n uryaz igga amensi ḏ ameqqran iƹareḍ x waṭṭas n yiwḏan.

¹⁷Issekk axeddam nnes ḏi ȓweqṯ n umensi i yinni xef iƹareḍ bac aḏasen yini: Araḥem-d aqa kuȓci iwjeḏ!

¹⁸Marra iḏsen bḏan teggen ssabab bac war triḥen ca. Ḏ amezwaru inna-as ijjen: Nec sɣiɣ ij umarjeƹ itxeṣṣa-ayi aḏ raḥeɣ aṯ ẓreɣ, sameḥ-ayi.

¹⁹Inna-as ijjen ƹaweḏ: Nec sɣiɣ xemsa n ṯyuya n ifunasen. Ȓexxu aḏ raḥeɣ ḥima aṯen qeǧbeɣ, sameḥ-ayi.

²⁰Inna-as ijjen nneɣni: Nec uwiɣ ijjen n ṯemɣarṯ, x manaya war zemmareɣ aḏ d aseɣ.

²¹Iḏweȓ-d uxeddam nni ɣar siḏes iƹaweḏ-as min iweqƹen. Ȓexddenni iɣḍeb bab n ṯeddarṯ inna-as i uxeddam nnes: Ffeɣ ḏeɣya ɣar ccawariƹ ḏ znaqi, siḏef-d ȓmusakin ḏ inecrufen ḏ iḍarɣaȓen ḏ izeḥḥafen.

²²Inna-as uxeddam: Aqayi ggiɣ min ḏayi ṯenniḏ a siḏi walakin ƹaḏ qqimen imucan xwan.

²³Inna-as siḏes: Ffeɣ ɣar ibriḏen ḏ imesruqen, siḏef-d iwḏan s bezzez bac aḏ aḏfen bac aḏ tƹemmar ṯeddarṯ inu.

²⁴Aḏawem iniɣ: Uȓa ḏ ijjen zeg yinni iy xef ƹarḍeɣ war itqisi amensi inu!"

²⁵Ḏinni aṭṭas n ȓɣaci gguren ak Ƹisa, ineqȓeb-d ɣarsen inna-asen:

²⁶"Wenni ɣari d itasen nec, meȓa iƹizz xas babas ktar zzayi nec niɣ ḏ yemmas niɣ ḏ ṯemɣarṯ nnes niɣ ḏ ṯarwa nnes niɣ ḏ ayṯmas niɣ ḏ swiṯmas niɣ ḏ ixef nnes, ataf war izemmar aḏ yiȓi ḏ ameḥḍar inu.[8]

²⁷Wenni irezzun aḏayi iḏfar war ikessi ca ṣṣalib nnes mix ɣa iƹeddeb, ataf war izemmar aḏ yiȓi ḏ ameḥḍar inu.

²⁸Meȓa can ijjen zzaywem irzu aḏ ibna ṣṣumƹeṯ, itxeṣṣa-yas ḏ amezwaru aḏ igg ȓeḥsab mecḥaȓ minzi ɣa ṯenqam ma izemmar-as at ikemmeȓ ma lla.

²⁹Maci aḏ igg dsas waha, ṣṣumƹeṯ nni war izemmar ca at ikemmeȓ. Yinni iy ḏayes ixezzaren ataf marra axas ḍeḥcen,

³⁰aḏ inin qa aryaz-a ibḏa ibenna walakin war izemmar ca at ikemmeȓ.

³¹Azeǧiḏ, meȓa iruḥ aḏ igg ȓḥarb ak yijjen n uzeǧiḏ nneɣni, itxeṣṣa-yas ḏ amezwaru aḏ ifekkar ma aḏ irbeḥ ȓḥarb nni s ƹecraȓaf n ȓƹaskar ȓƹaḏu nnes ɣares ƹicrin aȓaf n ȓƹaskar.

³²Meȓa war ḏas izemmar ca, aɣares issekk nnuyab nnes netta ƹaḏ iggwej war d yuwiḍ ca bac azzayes ttaren mamc ɣa ggen aḏ ƹeḏȓen jarasen.

³³Amenni ƹaweḏ war izemmar ca uȓa ḏ ijjen zzaywem aḏ yiȓi ḏ ameḥḍar inu illa meȓa ismeḥ ḏi marra min ɣares.

³⁴Ȓemȓeḥ ṯṣeǧaḥ, walakin meȓa iruḥ-as lmaḏaq nnes, mamc ḏas ɣa negg aḏas ṯiḏ narr?

³⁵Ataf war ṯṣeǧaḥ lla i ṯmurṯ lla i ṯzewbayṯ, ɣir at nḍaren ɣar barra waha. Ṣenneṭ mliḥ a wenni itsȓan."