Read Tarifit Luqa 15 Bible Online

Luqa 15 - Tarifit bible

Luqa 15

¹Marra yinni iǧan ḏ iƹeccaren ḏ yinni iƹeṣṣan qarrben-d ɣar Ƹisa ḥima aḏas ṣennṭen.

²Ȓḥizeb n ifarrisiyen ḏ imseȓmaḏen n ccariƹa ssawaȓen ḏi Ƹisa nnan: "Aryaz-a itreḥḥab zeg yinni iƹeṣṣan itett akiḏsen!"

³Indeq-d Ƹisa inna-asen ȓmaƹna-ya:

⁴"Ijjen zzaywem ɣares miyya n iḥuȓiyen maṯalan. Meȓa iweddar-as ijjen zzaysen, ataf aḏ ijj tesƹa u tesƹin ḏi ȓexȓa aḏ iraḥ aḏ irzu x wenni iweddaren aȓ ṯ ɣa yaf. Amenni niɣ lla?

⁵Xmi ṯ ɣa yaf aṯ iysi x uɣiȓ nnes aḏ ifareḥ.

⁶Aḏ iḏweȓ ɣar ṯeddarṯ nnes aḏ d iȓaɣa x imeddukaȓ nnes ḏ jjiran nnes aḏasen yini farḥem akiḏi aqa ufiɣ aḥuȓi nni iy tuɣa ḏayi iweddaren!

⁷Aḏawem iniɣ: Aḏ farḥen ḏeg ujenna aṭṭas x yijjen meȓa iḏweȓ-d ɣar ubriḏ ktar zi min ɣa farḥen x tesƹa u tesƹin nni war ffiɣen ca abriḏ.

⁸Niɣ, can ṯemɣarṯ ɣares ƹecra n dinar maṯalan, iweddar-as ijjen. Ataf aḏ tceƹƹeȓ ȓqendiȓ aḏ tsekk ḏi ṯeddarṯ aḏ terzu aṭṭas x dinar nni aȓ ṯ ɣa ṯaf. Amenni niɣ lla?

⁹Xmi ṯ ɣa ṯaf, aḏ tȓaɣa x ṯmeddukaȓ ḏ ṯajjarin aḏasent ṯini: Farḥent akiḏi aqa ufiɣ dinar nni iy tuɣa ḏayi iweddaren!

¹⁰Aḏawem iniɣ: Amenni ijjen meȓa iƹṣa menbaƹd itub, ataf akiḏes farḥent lmalaʼikaṯ n Arebbi."

¹¹Ƹisa inna ƹaweḏ: "Tuɣa ijjen n uryaz ɣares ṯnayen n iḥenjiren.

¹²Wenni amezyan inna-as i babas: A baba uc-ayi ȓḥaqq inu ḏi ȓwarṯ. Ṣafi ikkar uryaz nni ifreq agȓa i ṯarwa nnes.

¹³Wami ƹḏun cwayt n wussan, aḥenjir nni amezyan iysi marra min ɣares ḏ agȓa iruḥ ɣar yijjen n ṯmurṯ ṯiggwej isperḏer ḏinni tmenyaṯ nnes ḏi teflayes.

¹⁴Wami iḍeyyeƹ marra agȓa nnes, iwqeƹ ḏi ṯmurṯ nni ijjen n buheyyuf war yufi min ɣa icc.

¹⁵Ssenni ibḏa ixeddem ɣar yijjen n uryaz zi ṯmurṯ nni issekk-iṯ aḏ yarwes iȓfan ḏeg imarjeƹiwen nnes.

¹⁶Ḏayes imezȓan aḏ ijjawen s iqaccwen n ṯsȓiɣwa yinni iy tetten yiȓfan nni, war ṯ iƹṯiq ḥadd.

¹⁷Ibḏa ȓexddenni itxemmam mliḥ ḏeg yixef nnes inna: Mecḥaȓ ɣares ḏ ixeddamen ɣar baba itceṭṭa xasen uɣrum, nec aqayi ḏanita tmettiɣ s jjuƹ.

¹⁸Inna: Aḏ kkareɣ aḏ ḏewȓeɣ ɣar baba aḏas iniɣ: A baba ƹṣiɣ Siḏi Arebbi, ƹṣiɣ cek.

¹⁹Ȓexxu war sḏihǧeɣ ca aḏ iȓiɣ ḏ mmic, egg-ayi am uxeddam nnec waha.

²⁰Ikkar iruḥ ɣar babas. Netta aqaṯ ƹaḏ iggwej aṭṭas x ṯeddarṯ wami ṯ iẓra babas iqqes-as. Iruḥ ɣares itazzeȓ iḏerreƹ-as iseǧem xas.

²¹Inna-as mmis: A baba ƹṣiɣ Siḏi Arebbi, ƹṣiɣ cek. War sḏihǧeɣ ca aḏ iȓiɣ ḏ mmic.

²²Inna-asen babas i ixeddamen nnes: Ruḥem ḏeɣya awim-d čammir ḏ aṣebḥan arḍem-as-ṯ. Ggem-as ṯxaḏent ḏeg ufus nnes, ggem-as ṯisiȓa ḏeg iḍaren nnes.

²³Awim-d ayenduz nni iṣeḥḥen ɣarṣem-as. A necc a nfareḥ minzi mmi tuɣa immuṯ, ȓexxu iddar. Tuɣa iweddar, ȓexxu itwaf. Niṯni bḏan farrḥen.

²⁵Mmis ameqqran netta tuɣaṯ ƹaḏ ḏeg umarjeƹ. Wami d iḏweȓ ɣar ṯeddarṯ iqarreb-d, itesȓa i lmusiqa ḏ cḍiḥ.

²⁶Iȓaɣa-d x yijjen zeg ixeddamen isseqsa-ṯ, inna-as min ḏa iweqƹen?

²⁷Inna-as uxeddam nni qa umac iḏweȓ-d. Ȓexxu babac iɣareṣ-as i uyenduz iseḥḥen ȓaḥeqqac ireḥḥeb zeg wumac wami d iḏweȓ s buḥbeȓ nnes.

²⁸Iqqes-as ȓḥaȓ i mmis ameqqran yugi aḏ yaḏef ɣar ṯeddarṯ. Iffeɣ-d ɣares babas ɣar barra ibḏa itḥeccam-iṯ bac aḏ yaḏef.

²⁹Inna-as i babas: Nec mecḥaȓ n iseggwusa aqayi xeddmeɣ akiḏec ȓebda tṭaƹaɣ-ac, ƹemmarṣ war ḏayi ṯuciḏ uȓa ḏ iɣiyḏ ḥima aḏ farḥeɣ zzayes ak imeddukaȓ inu.

³⁰Wami d yusa mmic-a wanita ig isperḍren agȓa nnec ḏi lfasdaṯ waha, cek min ṯeggiḏ? Ṯɣarṣeḏ-as i uyenduz iṣeḥḥen?

³¹Inna-as babas: Lla a mmi inu, cek aqac akiḏi ḏanita i ȓebda, marra min ɣari ḏ agȓa inu aḏ iḏweȓ i cek.

³²Ȓexxu itxeṣṣa-aneɣ a nfareḥ a nezhu aṭṭas minzi umac tuɣa immuṯ, ȓexxu iddar. Tuɣa iweddar, ȓexxu itwaf."