Read Tarifit Luqa 16 Bible Online

Luqa 16 - Tarifit bible

Luqa 16

¹Ƹisa inna-asen ƹaweḏ i imeḥḍaren nnes: "Ijjen n ssiyyed ḏ ttajar ɣares aweqqaf. Ucin-as ȓexbar x uweqqaf nnes iḍeyyeƹ-as aṭṭas n tmenyaṯ.

²Ikkar ssiyyed nni iȓaɣa-d xas inna-as: Min xak tesȓiɣ? Uc-ayi-d ȓeḥsab iǧan jaraneɣ. Zi nhara aȓ ṯsawent war tɣimiḏ ca aḏ tiȓiḏ ḏ aweqqaf inu.

³Inna uweqqaf ḏi nnefs nnes: Min ɣa ggeɣ? Ȓexxu bab n ci aḏayi ikkes lwakala. Nec war ḏayi bu jjheḏ aḏ neqceɣ, aḏ seḏḥiɣ aḏ ttareɣ.

⁴Uca inna: Ssneɣ min ɣa ggeɣ. Meȓa ikkes-ayi lwakala, ataf azzayi reḥḥben yiwḏan ɣar ṯuḏrin nsen.

⁵Ȓexddenni iȓaɣa-d i kuȓ ijjen umi itars bab n ci. Inna-as i umezwaru: Mecḥaȓ ḏac itars bab n ci inu?

⁶Yarra xas inna-as: Miyya n ṯbarmiȓin n zzect. Inna-as uweqqaf nni: Ysi-d lisṭa nnec qqim ḏeɣya, ari ḏayes ɣir xemsin!

⁷Ƹaweḏ inna-as i unneɣni: Y cek, mecḥaȓ ḏac itars? Yarra xas inna-as: Miyya n iqendaren n yirḏan. Inna-as uweqqaf nni: Ysi-d lisṭa nnec, ari ḏayes ɣir ṯmanin!

⁸Bab n ci icekkar aweqqaf nnes ḏi iǧa lḥila x ȓefṭaneṯ nnes. Cuf, ṯarwa n zman-a ḏaysen ȓefṭaneṯ jarasen ktar zi ṯarwa n nnur.

⁹Nec aḏawem iniɣ: Ggem imeddukaȓ zi ȓewsex n ddunect-a. Ataf xmi ɣa itwaqḍa aḏ twaqebȓem ḏi ṯuḏrin n ȓebda.

¹⁰Wenni ḏi iǧa ȓaman x ḏrus, ḏayes ȓaman x waṭṭas. Wenni war ḏi iǧi ȓaman x ḏrus, war ḏayes bu ȓaman x waṭṭas.

¹¹Meȓa war ḏaywem bu ȓaman x ȓewsex n ddunect-a, wi ḏaywem ɣa iggen ȓaman x wagȓa n ṣṣaḥ?

¹²Meȓa war ḏaywem bu ȓaman x min war iǧin nwem, wi ḏaywem ɣa yucen min iǧan nwem?

¹³War izemmar aḏ yiȓi can yijjen ḏ axeddam ɣar ṯnayen n siyaḏis. Mayemmi? Ima ijjen aṯ iƹiff, ijjen aṯ ixes. Niɣ ijjen aḏayes iṭṭef, ijjen aṯ iḥeggar. Aḏ txeḏmem i Arebbi niɣ aḏ txeḏmem i ȓewsex n ddunect-a, war iǧi bu s ṯnayen."

¹⁴Ȓḥizeb n ifarrisiyen niṯni zeg yinni itexsen tmenyaṯ, wami sȓin i marra manaya ḍeḥcen xas.

¹⁵Inna-asen Ƹisa: "Kenniw ḏ yinni iy irezzun aḏ ucen ȓḥaqq x yixef nsen zzaṯ i yiwḏan, walakin Arebbi issen min ɣarwem ḏeg wuȓawen nwem. Min itarran bnaḏem ɣares lqima, ataf manayenni ḏ aƹeffan aṭṭas ɣar Arebbi.

¹⁶Ccariƹa n Musa ḏ useȓmeḏ n lʼanbiya tuɣa ǧan aȓ wami d yusa Yaḥya. Zi ȓweqṯ n Yaḥya ssenni aȓ ṯsawent ibḏa itwabeccar ȓmulk n Arebbi, kuȓ ijjen itemḏeḥḥas ḥima aḏayes yaḏef.

¹⁷Innama, isheȓ aḏ itwakkes ujenna ḏ ṯmurṯ qbeȓ iy ɣa ttwakkes ijjen n ṯneqqiṭ zi ccariƹa.

¹⁸Marra wenni ɣa iǧfen i ṯemɣarṯ nnes yuwi can yicten nneɣni, ataf izna. Marra wenni iy ɣa imeȓcen ak ṯenni iǧfen, ataf izna."

¹⁹"Cuf, tuɣa ijjen ḏ ttajar, netta itareḍ arruḍ iɣȓan kuȓ nhar itƹic ḏeg yijjen n nniƹmeṯ izehhu.

²⁰Ḏinni ƹaweḏ ijjen nneɣni netta ḏ ȓmeskin waha qqaren-as Liƹazar, ḏayes aṭṭas n ṯḥebba netta itmenḍar ɣar ṯewwarṯ n ttajar nni.

²¹Itmenna aḏ icc min iweṭṭan zi missa n ttajar nni. Arnin-as uȓa ḏ iqzinen tasen-d ȓessḥen-as ṯiḥebba nnes.

²²Ṣafi immuṯ ȓmeskin nni, ysint-ṯ lmalaʼikaṯ sersent-ṯ x ufuḏ n Brahim. Ƹaweḏ immuṯ ttajar nni ysin-ṯ neḍȓen-ṯ.

²³Isiȓi ttajar ṯiṭṭawin nnes itƹeddab ḏi Ljaḥim, iẓra Brahim ḏ Liƹazar akiḏes aqaṯen ḏi ȓeggwaj.

²⁴Iȓaɣa-yas inna-as: A baba Brahim rḥem-ayi, sekk-d Liƹazar ḥima aḏ isuff ijjen n ṯicceṭ n uḍaḍ n ufus nnes ḏeg waman bac azzayes semḍeɣ iȓes inu minzi nec tƹeddabeɣ ḏi ṯmessi-ya.

²⁵Inna-as Brahim: Ƹqeȓ a mmi inu, cek ṯeysiḏ ȓḥaqq nnec zi ȓxir ḏi ṯuḏarṯ nnec, Liƹazar iƹic mƹaddeb. Ȓexxu netta aqaṯ ḏa mliḥ, cek aqac ḏi ȓaƹḏab.

²⁶U ƹaweḏ ḏinni ijjen n ȓaǧeɣ yuǧeɣ jaraneɣ. Ijjen ssanita meȓa ixes aɣarwem d iƹḏu war izemmar ca. Ijjen ssenni meȓa ixes aɣarneɣ d iƹḏu war izemmar ca.

²⁷Inna-as ttajar nni: A baba Brahim, x manaya tettareɣ zzayek aḏ tessekkeḏ Liƹazar ɣar ṯeddarṯ n baba.

²⁸Ɣari xemsa n ayṯma xseɣ aṯen iƹȓem ḥima uȓa ḏ niṯni war tƹeddiben ca ḏeg umcan-a.

²⁹Inna-as Brahim: Lla, ayṯmac ɣarsen Musa ḏ lʼanbiya nneɣni, itxeṣṣa aḏasen ṣennṭen.

³⁰Inna-as ttajar nni: A baba Brahim! Meȓa iruḥ ɣarsen can yijjen zeg yinni immuṯen, ataf aḏ tuben.

³¹Inna-as Brahim: Lla, meȓa niṯni war tesȓin ca i Musa ḏ lʼanbiya, waxxa ikkar-d can yijjen zi ȓmewṯ ataf war ṯen isneqniƹ ca."