Read Tarifit Luqa 17 Bible Online

Luqa 17 - Tarifit bible

Luqa 17

¹Inna-asen Ƹisa i imeḥḍaren nnes: "Ȓebda tewqiƹent ṯmesȓayin iy ɣa iɣeḍȓen iwḏan ḏi ȓmuƹṣiyaṯ, walakin ya tamara n bnaḏem nni ig iǧan ḏ ssabab n ȓmuƹṣiyaṯ nni.

²Netta, meȓa cedden ijjen n uzru n ṯsirṯ s usɣun ɣar yiri nnes aṯ nḍaren ḏi ȓebḥar, ataf ḥsen i netta zi meȓa yuwi ijjen zeg imezyanen-a ɣar ȓmuƹṣiyeṯ.

³Ḥḍam ixef nwem. Meȓa ixḍa akiḏec umac nha-ṯ. Meȓa indem sameḥ-as.

⁴Meȓa ixḍa akiḏec sebƹa n ṯwaȓaṯin ḏi nhar iḏweȓ-d ɣarek sebƹa n ṯwaȓaṯin inna-ac ndemmeɣ x min xeḏmeɣ, ataf aḏas ṯsamḥeḏ."

⁵Nnan-as arrusul i Siḏiṯneɣ: "Arni ḏayneɣ lʼiman."

⁶Yarra xasen Siḏiṯneɣ inna-asen: "Mȓi ḏaywem lʼiman ɣir anect ijjen n ṯḥebbuct n bugarḏaȓ, ataf aḏas ṯinim i ṯcejjarṯ-a n ttuṯ: Neqȓeƹ-d cem s iẓewran ruḥ aḏ teẓẓuḏ ixef nnem ḏi ȓebḥar, ataf aḏawem ṯegg array."

⁷"Cuf, can yijjen zzaywem maṯalan ɣares axeddam itfeǧaḥ niɣ itrass iḥuȓiyen. Xmi ɣa d iƹqeb zeg umarjeƹ, ma aḏas ṯiniḏ qqim ḏeɣya aḏ tecceḏ?

⁸Lla, aḏas ṯiniḏ sewjeḏ-ayi-d min ɣa cceɣ. Geffeḍ, sexxar xafi aȓ ɣa cceɣ aḏ sweɣ. Ƹaḏ ȓexddenni iy ɣa ṯecceḏ cek aḏ tesweḏ.

⁹Axeddam nni, ma ṯ ṯcekkareḏ meȓa igga-ac array? Lla.

¹⁰Ammu uȓa ḏ kenniw. Meȓa ṯeggim marra minxef kenniw weṣṣan, ataf aḏ tinim neccin ḏ ixeddamen waha, ntegg ɣir lwajib nneɣ itxeṣṣa aṯ negg."

¹¹Ƹisa ḏeg ubriḏ ɣar ṯendint n Lquds, ikka x ubriḏ mani tḥedda ṯmurṯ n Samarya ḏ ṯmurṯ n Ljalil.

¹²Yuḏef ɣar yijjen n dcar yufa ḏinni ƹecra n iryazen ḏaysen jḏam. Bedden ɣar ȓeggwaj

¹³tȓaɣan-as s jjheḏ qqaren: "A Ƹisa a Lmuƹallim, rḥem-aneɣ!"

¹⁴Ixzar ḏaysen inna-asen: "Ruḥem ɣar ȓfuqaha seḍharem-asen ixef nwem!" Niṯni wami uyuren ḏeg ubriḏ nsen ṣafi genfan.

¹⁵Ijjen zzaysen wami yufa ixef nnes igenfa, iḏweȓ-d iḥemmeḏ Arebbi s jjheḏ.

¹⁶Isejjeḏ-as i Ƹisa ɣar iḍaren nnes ibḏa itcekkar-iṯ. Netta aryaz nni zi Samarya.

¹⁷Inna Ƹisa: "Ƹecra nni, genfan marra ma lla? Mani ǧan tesƹa nni nneɣni?

¹⁸Ma abarrani-ya waha iy d iḏewȓen iḥemmeḏ Arebbi?"

¹⁹Inna-as: "Kkar aḏ trewwḥeḏ, lʼiman nnec isenjem-ic."

²⁰Iwḏan zi ȓḥizeb n ifarrisiyen sseqsan Ƹisa nnan-as: Meȓmi d ɣa yas ȓmulk n Arebbi? Inna-asen Ƹisa: "Ȓmulk n Arebbi war d itis ca s lƹalamaṯ nni iy zi ɣa ṯetwaȓam.

²¹Lla, ataf iwḏan war qqaren ca qa xzareṯ aqaṯ ḏiha niɣ aqaṯ ḏa! Mayemmi? Ataf ȓmulk n Arebbi aqaṯ ḏaywem."

²²Inna-asen i imeḥḍaren nnes: "Aḏ d asent ȓiyyam aḏaysent ṯrezzum aḏ teẓrem ijjen n nhar zi nhuraṯ n Mmis n bnaḏem walakin war ṯ tẓerrem ca.

²³Aḏawem inin yiwḏan aqaṯ ḏa niɣ aqaṯ ḏiha! Walakin war ḏinni triḥem ca, war ṯen tḏeffarem ca.

²⁴Minzi am wassam itebsissiqen ḏi ṭṭarf n ujenna aḏ igg ṯfawṯ ḏi ṭṭarf nneɣni, amenni iy ɣa yiȓi Mmis n bnaḏem ḏi nhar nnes.

²⁵Walakin itxeṣṣa-as ḏ amezwaru aḏ itwaƹeddeb aṭṭas, aṯ ƹiffen yiwḏan n ȓweqṯ-a.

²⁶Amecnaw mamc iwqeƹ ḏi ȓiyyam nni n Nuḥ, amenni iy ɣa iwqeƹ ḏi ȓiyyam n Mmis n bnaḏem:

²⁷Iwḏan tuɣa tetten sessen, meǧcen twasmeǧacen, ḥetta aȓ nhar nni wami yuḏef Nuḥ ḏeg uɣarrabu. Yusa-d ṭṭufan inɣi-ṯen marra iḏsen.

²⁸Ƹaweḏ mammec iwqeƹ ḏi ȓiyyam n Luṭ: Iwḏan tuɣa tetten sessen, ssaɣen znuzan, teẓẓun bennan.

²⁹Walakin ḏi nhar nni iy ḏi iffeɣ Luṭ zi ṯendint n Sadum ṣafi isehwa-d xasen Arebbi ṯimessi ḏ izra issecmaḍen zeg ujenna, inɣi-ṯen marra.

³⁰Amenni iy ɣa iweqƹen ḏi Nhar nni iy ḏi d ɣa imeḍhar Mmis n bnaḏem.

³¹Ḏi Nhar nni, wenni ɣa yiȓin x ṯzeqqa ȓeḥwayej nnes aqaṯen swedday ḏi ṯeddarṯ itxeṣṣa-as war ihewwi ca ɣar ṯeddarṯ ḥima aḏ iysi ȓeḥwayej nnes. Ƹaweḏ wenni ɣa yiȓin ḏeg umarjeƹ itxeṣṣa-as war iteƹqib ca ɣar ṯeddarṯ.

³²Fekkareṯ ḏi min ḏas iweqƹen i ṯemɣarṯ n Luṭ![9]

³³Wenni ixsen aḏ isenjem ṯuḏarṯ nnes ataf at ixsar. Wenni iy ɣa ixsaren ṯuḏarṯ nnes ataf at isenjem.

³⁴Aḏawem iniɣ: Ḏi ǧiȓeṯ nni aḏ iȓin ṯnayen ṭṭṣen ḏeg yijjen n ṯassuṯ, ijjen aḏ imeysi ijjen aḏ iqqim.

³⁵Aḏ iȓint ṯnayen n ṯemɣarin ḏi ṯsirṯ ḥerrint ṯiḥebba, icten aḏ tmeysi icten aḏ teqqim.

³⁶{Aḏ iȓin ṯnayen n iryazen ḏeg yij umarjeƹ, ijjen aḏ imeysi ijjen aḏ iqqim."}

³⁷Sseqsan-ṯ imeḥḍaren nnes nnan-as: "A Siḏi, mani ɣa iwqeƹ manaya?" Indeq-d netta inna-asen: "Mani ǧan imurḍas, ḏinni ig itmunen ibaɣeriwen."