Read Tarifit Luqa 18 Bible Online

Luqa 18 - Tarifit bible

Luqa 18

¹Issiweȓ akiḏsen Ƹisa s yijjen n ȓmaƹna bac aḏ ssnen belli itxeṣṣa-yasen aḏ tẓaǧen ȓebda war tiḥȓen ca.

²Inna-asen: "Ijjen n twaȓa ḏeg yijjen n ṯendint ijjen n ȓqaḍi war iteggweḏ ca Arebbi, war itweqqir ca iwḏan.

³Ḏinni ḏi ṯendint nni ijjen n ṯajjaȓṯ traḥ ɣares teqqar-as: Uc-ayi ȓḥaqq inu x wenni ḏayi iḍellmen!

⁴Aṭṭas zeg wami itagi aḏas yuc min ḏas tettar nettaṯ. Walakin menbaƹd i manaya inna ḏi nnefs nnes: Waxxa war teggwḏeɣ ca Arebbi, war tweqqireɣ ca iwḏan,

⁵ṯajjaȓṯ-a ṣafi ṯsiḥeȓ-ayi. Aḏas uceɣ ȓḥaqq ḥima war d tƹiqib ṯwaȓa nneɣni aḏayi ṯseddeƹ."

⁶Inna-asen Siḏiṯneɣ: "Ṣennṭeṯ i min inna ȓqaḍi-ya iḍeǧmen.

⁷Arebbi, ma war ḏasen iticc ȓḥaqq i yiwḏan nnes iy ṯ itettaren ǧiȓeṯ ḏ nhar? Ma axasen iƹeṭṭaȓ war ḏasen istijib ca?

⁸Aḏawem iniɣ: Aḏasen yuc ȓḥaqq ḏeɣya. Innama, Mmis n bnaḏem nhar iy ḏi d ɣa yas, ma aḏ yaf lʼiman ḏi ṯmurṯ?"

⁹Issiweȓ s ȓmaƹna-ya ak can yiwḏan tuɣa tarran ixef nsen nican, tḥeggaren inneɣni:

¹⁰"Ijjen n nhar ruḥen ijjen ṯnayen n iryazen ɣar ṯemzida ṯameqqrant n Ayṯ-Israʼil ḥima aḏ ẓẓaǧen, ijjen zi ȓḥizeb n ifarrisiyen, ijjen ijemmeƹ ḍḍariba.

¹¹Ibedd ufarrisi nni itẓaǧa ḏi nnefs nnes inna: Ya Arebbi tcekkareɣ-cek, minzi war ǧiɣ ca am yiwḏan nneɣni iǧan ḏ ixewwanen niɣ ḏ yinni war iǧin ca nican niɣ ḏ yinni izennan niɣ am wanita ig ijemmƹen ḍḍariba!

¹²Tẓummiɣ yumayen ḏi ssimana, tƹeccareɣ x marra min rebḥeɣ ḏ agȓa.

¹³Walakin wenni ijemmƹen ḍḍariba ibedd ɣar ȓeggwaj. War izƹim ḥetta aḏ iysi ṯiṭṭawin nnes ɣar ujenna, iccaṯ ḏeg wuȓ nnes inna: Ya Arebbi, rḥem-ayi nec ḏ lƹaṣi!

¹⁴Aḏawem iniɣ: Wenni ijemmƹen ḍḍariba iḏweȓ ɣar ṯeddarṯ nnes mliḥ imeṣȓaḥ ak Arebbi, afarrisi nni lla. Minzi wenni isemɣaren ixef nnes, ataf aḏ yiȓi ḏ amezyan. Wenni isemzayen ixef nnes, ataf aḏ yiȓi ḏ ameqqran."

¹⁵Tuɣa iwḏan tawin-as-d uȓa ḏ iseyman i Ƹisa ḥima aṯen iḥaḏa. Walakin imeḥḍaren nnes wami ẓrin manayenni tƹarraḍen-asen.

¹⁶Ikkar Ƹisa iȓaɣa-d x iḥenjiren uca inna-asen i imeḥḍaren nnes: "Jjem iḥenjiren imezyanen aɣari d asen. War ḏasen tƹarraḍem ca ȓaḥeqqac ȓmulk n Arebbi itiȓi ɣar yinni iy iǧan am yina.

¹⁷Aqa tesȓam ȓḥaqq: Labud i bnaḏem aḏ yamen s ȓmulk n Arebbi mamc zzayes itamen uḥenjir amezyan. Meȓa lla, ataf bnaḏem nni ƹemmarṣ aḏ yaḏef ḏi ȓmulk n Arebbi."

¹⁸Isseqsa-ṯ ijjen zi lḥukkam n Ayṯ-Israʼil inna-as: "A Lmuƹallim aṣebḥan, min ɣa ggeɣ ḥima aɣari ṯiȓi ṯuḏarṯ n ȓebda?"

¹⁹Yarra xas Ƹisa inna-as: "Mayemmi ṯeqqareḏ qa nec ḏ aṣebḥan? War iǧi ḥadd ḏ aṣebḥan illa Arebbi waḥḏes.

²⁰Ṯessneḏ ȓuṣiyaṯ: War zenna, war neqq, war tacar, war cehheḏ bu ẓẓur, weqqar babac ḏ yemmac."

²¹Inna-as uryaz nni: "Zeg wami iy ǧiɣ nec ḏ amezyan tweqqareɣ qaƹ manaya."

²²Ƹisa wami isȓa i wawaȓ nnes inna-as: "Qa ṯeqqim-ac ijjen n ȓḥajeṯ war t ṯeggiḏ ca. Ruḥ zenz marra min ɣarek ḏ agȓa ṣeddeq-iṯ x ȓmusakin. Ssenni aɣarek yiȓi ȓkenz ḏeg ujenna, ȓexddenni araḥ-d cek ḏfar-ayi-d."

²³Wami isȓa i manayenni ixeyyeq aṭṭas ȓaḥeqqac ɣares aṭṭas n wagȓa.

²⁴Ixzar ḏayes Ƹisa inna: "Mecḥaȓ iqseḥ xasen x twajar aḏ aḏfen ȓmulk n Arebbi.

²⁵Aqa isheȓ aḏ iƹḏu uȓɣem zi ṯiṭṭ n ṯseynefṯ qbeȓ ma aḏ yaḏef ttajar ḏi ȓmulk n Arebbi!"

²⁶Nnan yinni itesȓan: "Xyar, ug izemmaren aḏ injem!?"

²⁷Indeq-d Ƹisa inna-asen: "Min war ḏas zemmaren ca yiwḏan, izemmar-as Arebbi."

²⁸Inna-as Buṭrus: "Aqa neccin nesmeḥ ḏi kuȓci neḏfar-ic!"

²⁹Inna-asen Ƹisa: "Aqa tesȓam ȓḥaqq: Marra wenni isemḥen ḏi ṯeddarṯ nnes niɣ ḏi ṯemɣarṯ nnes niɣ ḏi ayṯmas niɣ ḏi babas niɣ ḏi yemmas niɣ ḏi ṯarwa nnes ƹlaḥsab ȓmulk n Arebbi,

³⁰ataf aɣares ṯiȓi ḏi ddunect-a ktar s waṭṭas. U ḏi zman iy d ɣa yasen ataf aɣares ṯiȓi ṯuḏarṯ n ȓebda."

³¹Iruḥ Ƹisa yuwi ṯenƹac nni n imeḥḍaren nnes waḥeḏsen inna-asen: "Aqa netgaƹƹaḏ ɣar Lquds mani iy ɣa ikemmeȓ marra min urin lʼanbiya x Mmis n bnaḏem.

³²Aṯ sellmen i yinni war iǧin ca zi Ayṯ-Israʼil, axas ḍeḥcen, aṯ seḥqaren, axas ssusfen.

³³Aṯ uwṯen s usɣun, aṯ nɣen. Nhar wis ṯeȓtiyyam aḏ d ikkar zi ȓmewṯ."

³⁴Imeḥḍaren nni war fhimen walu zeg wawaȓen-a. Ȓmaƹna n wawaȓen-a inuffar xasen, war ssinen ca minxef issawaȓ.

³⁵Wami iqarreb Ƹisa ɣar ṯendint n Ariḥa, ufin ḏinni ijjen n uḍarɣaȓ iqqim ṭṭarf n ubriḏ itettar.

³⁶Wami isȓa i ȓɣaci ƹeddun inna-asen min iweqƹen?

³⁷Nnan-as qa Ƹisa Naṣiri netta iy ssa iƹeddun.

³⁸Ibḏa isnekkar ṯɣuyyeṯ iqqar-as: "A Ƹisa a Mmis n Ayṯ-Dawed, rḥem-ayi!"

³⁹Yinni izwaren i Ƹisa nhan-ṯ nnan-as sqar. Netta yugi, iqqim isnekkar ṯɣuyyeṯ ƹaḏ s jjheḏ iqqar: "A Mmis n Ayṯ-Dawed, rḥem-ayi!"

⁴⁰Ibedd Ƹisa yumar-iṯen ḥima aḏas ṯiḏ awin. Wami ɣares d iqarreb isseqsa-ṯ inna-as:

⁴¹"Min ṯexseḏ aḏac ggeɣ?" Inna-as uḍarɣaȓ nni: "A Siḏi, qa nec xseɣ aḏ twaȓiɣ."

⁴²Indeq-d Ƹisa inna-as: "Twaȓa, qa lʼiman nnec isgenfa-cek!"

⁴³Ȓexddenni ibḏa itwaȓa, iḏfar Ƹisa isemɣar Arebbi. Wami ẓrin yiwḏan nni min iweqƹen, marra bḏan ḥemmḏen Arebbi.