Read Tarifit Luqa 19 Bible Online

Luqa 19 - Tarifit bible

Luqa 19

¹Yuḏef Ƹisa ɣar ṯendint n Ariḥa iƹeddu-d ssenni.

²Ḏinni ijjen n uryaz ḏ ttajar zeg imeqqranen n iƹeccaren qqaren-as Zaki.

³Irezzu aḏ issen Ƹisa min iƹna walakin war izemmar aṯ iẓer ƹlaḥeqqac ḏinni aṭṭas n ȓɣaci u netta ḏ aquḍaḍ.

⁴Yuzzeȓ ɣar zzaṯ igaƹƹeḏ x yijjen n ṯcejjarṯ n ṯazarṯ n isemɣan x ubriḏ nni manis d ɣa ikk Ƹisa ḥima aṯ iẓer.

⁵Wami yuweḍ Ƹisa ɣar umcan nni, irfeƹ ṯiṭṭawin nnes iẓri-ṯ inna-as: "Hwa-d ḏeɣya ssenni a Zaki, itxeṣṣa-ayi nhara aḏ raḥeɣ ɣar ṯeddarṯ nnec."

⁶Ihwa-d ḏeɣya ireḥḥeb zzayes s ȓefraḥeṯ.

⁷Iwḏan marra ẓrin manaya bḏan tgemgumen nnan qa yuḏef Ƹisa aḏ iqqim ḏi ṯeddarṯ n yijjen n uryaz ḏ lƹaṣi!

⁸Ibedd Zaki inna-as i Siḏiṯneɣ: "A Siḏi, aḏ uceɣ azyen n wagȓa inu i ȓmusakin. Meȓa cemṯeɣ can yijjen aḏas arniɣ arbeƹa n ṯseqqar."

⁹Inna-as Ƹisa i Zaki: "Nhara ayṯbab n ṯeddarṯ-a nejmen minzi aryaz-a wanita uȓa ḏ netta zi ddurriṯ n Brahim.

¹⁰Mmis n bnaḏem yusa-d ḥima aḏ irzu aḏ isenjem yinni iweddaren."

¹¹Wami tesȓan i manaya, issiweȓ akiḏsen Ƹisa s yijjen n ȓmaƹna nneɣni ȓaḥeqqac tuɣaṯ yuḏes ɣar ṯendint n Lquds. Ƹaweḏ tɣir-asen ȓmulk n Arebbi aḏ d imeḍhar ȓexddenni.

¹²Inna-asen: "Ijjen n ssiyyed lʼaṣel nnes zeg imeqqranen isafar zi ṯmurṯ nnes ɣar yijjen n ṯmurṯ ṯiggwej ḥima aḏ iysi tesriḥ aḏ iḏweȓ aḏ iḥkem x ṯmurṯ nnes.

¹³Iȓaɣa-d x ƹecra zeg ixeddamen nnes, kuȓ ijjen zzaysen yuca-as ƹecra n ȓuznaṯ n nnuqarṯ. Inna-asen: Ggem zzaysent ttijara aȓ d ɣa ḏewȓeɣ.

¹⁴Walakin ccaƹb nnes ƹiffen-ṯ seḏfaren-as ca n nnuyab aȓ mani ɣa iraḥ bac aḏ inin qa neccin war nexs ca aryaz-a aḏ yiȓi ḏ azeǧiḏ xaneɣ.

¹⁵Wami iḏweȓ ḏ azeǧiḏ iƹqeb-d, yumar ḥima aḏas d awin ixeddamen nni umi yuca tmenyaṯ nni ḥima aḏ ixzar mecḥaȓ irbeḥ mkuȓ ijjen zzaysen.

¹⁶Yusa-d uxeddam amezwaru inna-as: A siḏi, ƹecra n ȓuznaṯ n nnuqarṯ nnec kuȓ icten ṯarni ƹecra nneɣni.

¹⁷Azeǧiḏ nni inna-as: Ṯeggiḏ mliḥ ay axeddam aṣebḥan! Cek ḏayek ȓaman x ḏrus, ȓexxu aḏac uceɣ aḏ tḥekmeḏ x ƹecra n ṯneddam.

¹⁸Yusa-d wenni wis ṯnayen inna-as: A siḏi, ƹecra nni n ȓuznaṯ n nnuqarṯ iy ḏayi ṯuciḏ kuȓ icten ṯarni xemsa nneɣni.

¹⁹Inna-as uzeǧiḏ: Aḏac uceɣ aḏ tḥekmeḏ x xemsa n ṯneddam.

²⁰Yusa-d wenni wis ṯȓaṯa inna-as: A siḏi, aqac ƹecra nni n ȓuznaṯ n nnuqarṯ iy ḏayi ṯuciḏ. Tuɣa nec xemmȓeɣ-ṯent ḏeg yijjen n zzif

²¹minzi ggwḏeɣ zzayek. Cek ḏ ijjen n bnaḏem ṯeqsḥeḏ, ṯkessiḏ min war ṯesrusiḏ ṯmejjareḏ min war ṯzerrƹeḏ.

²²Indeq-d uzeǧiḏ nni inna-as: Cek min ṯenniḏ axak ḥekmeɣ zzayes ay axeddam amcum. Iwa ṯessneḏ belli nec ḏ ijjen n uryaz qesḥeɣ, kessiɣ min war srusiɣ, mejjareɣ min war zerrƹeɣ.

²³Mayemmi war ṯejjiḏ tmenyaṯ inu ɣar iṣarrafen ataf nec aḏ d aseɣ aḏ ysiɣ tmenyaṯ inu ḏ ȓefḍeȓ akiḏsent?

²⁴Uca inna-asen i yinni iǧan ḏinni: Kksem-as ƹecra n ȓuznaṯ n nnuqarṯ i wanita, arnim-ṯent i wenni ɣar iǧa miyya n ȓuznaṯ n nnuqarṯ.

²⁵Nnan-as: Mayemmi zaƹma a siḏi? Aqa wenni ṣafi, ɣares miyya n ȓuznaṯ n nnuqarṯ!

²⁶Aḏawem iniɣ: Wah, wenni iǧan ɣares itmarni-yas. Walakin wenni war ɣar iǧi ca, itwaksi-yas uȓa ḏ min ɣares.

²⁷Amma ȓƹaḏyan inu yinni tuɣa war ixsen ca axasen iȓiɣ ḏ azeǧiḏ, awim-ṯen-d ḏanita nɣem-ṯen zzaṯi."

²⁸Ƹisa wami inna awaȓ-a ikkar netta iggur bac aḏ igaƹƹeḏ ɣar ṯendint n Lquds.

²⁹Wami ƹȓayen aḏ yaweḍ ɣar ibilajen umi qqaren Bayt Faji ḏ Bayt Ƹanya ɣar uḏrar umi qqaren Aḏrar n Zzitun, ikkar netta issekk ṯnayen zeg imeḥḍaren nnes

³⁰inna-asen: "Ruḥem ɣar ubilaj-in iy iǧan zzaṯwem. Xmi ɣa ṯawḍem ḏinni, aḏ tafem ijjen n usnus iqqen ƹemmarṣ war xas inyi ḥadd, fsim-as awim-ayi-ṯ-id.

³¹Meȓa issiweȓ ɣarwem can yijjen inna-awem mayemmi ḏas ṯ fsim, inim-as qa iḥḏaj-iṯ Siḏiṯneɣ."

³²Ruḥen yinni itwasekken ɣar zzaṯ ufin mammec ḏasen inna Ƹisa.

³³Wami fessin i usnus nni nnan-asen ayṯbab nnes: "Min teggem? Mayemmi ṯfessim i usnus-a?"

³⁴Arrin xasen nnan-asen: "Iḥḏaj-iṯ Siḏiṯneɣ."

³⁵Ȓexddenni uwin-ṯ-iḏ ɣar Ƹisa, ggin xas izeǧuba nsen senyen xas Ƹisa.

³⁶Netta wami tuɣa iggur, iwḏan tsun-as abriḏ s izeǧuba nsen.

³⁷Iqarreb ɣar ṯeksarṯ n ubriḏ zzaṯ i Uḏrar n Zzitun, bḏan aṭṭas n imeḥḍaren nnes farrḥen ḥemmḏen Arebbi s jjheḏ x marra lmuƹjizaṯ nni iy ẓrin.

³⁸Qqaren: "Ssaƹḏ n uzeǧiḏ iy d yusin ƹlaḥsab isem n Siḏi Arebbi. Ȓehna ḏeg ujenna, lḥamdu i Arebbi yuƹȓan!"

³⁹Ȓebƹaḍ zi ȓḥizeb n ifarrisiyen iǧan ḏi ȓɣaci nni nnan-as: "A Lmuƹallim, nha imeḥḍaren nnec."

⁴⁰Inna-asen: "Aḏawem iniɣ: Meȓa sqaren niṯni, ataf izra aḏ snekkaren ṯɣuyyeṯ."

⁴¹Wami ƹȓayen aḏ yaweḍ ɣar ṯendint n Lquds, iẓri-t ibḏa itru xas.

⁴²Inna: "A ṯandint n Lquds, cem maƹlik tuɣa ṯessneḏ nhara ṯimesȓayin iy d iticcen ȓehna! Walakin lla, ȓexxu nuffarent x ṯiṭṭawin nnem.

⁴³Aqa axam d asen nhuraṯ xmi xam d ɣa sennḍen ȓƹaḏyan nnem ijjen n ṣṣur, aḏam d nnḍen, acem seḥsaȓen zi mkuȓ jjiheṯ.

⁴⁴Acem sheḏmen cem ḏ ṯarwa nnem iy iǧan ɣar ḏaxeȓ nnem. War ḏayem tejjin bu uzru x unneɣni minzi ifqeḏ-icem Arebbi, cem war xas ṯeƹqireḏ."

⁴⁵Ssenni yuḏef ɣar ṯemziḏa ṯameqqrant n Ayṯ-Israʼil ibḏa itazzeȓ x yinni iznuzan ḏinni.

⁴⁶Inna-asen: "Lkitab iqqar: <Ṯaddarṯ inu aḏ tiȓi ḏ ṯaddarṯ n ṯẓaǧiṯ.> Walakin kenniw ṯarrim-teṯ ḏ ifri n ixewwanen."

⁴⁷Tuɣa iseȓmaḏ mkuȓ nhar ḏi ṯemziḏa ṯameqqrant. Arruyas n ȓfuqaha ḏ imseȓmaḏen n ccariƹa ḏ imeqqranen n ccaƹb rezzun aṯ nɣen.

⁴⁸War ufin mammec ɣa ggen minzi marra ccaƹb tuɣa itesȓa-yas iqqim ḏeg wawaȓ nnes.