Read Tarifit Luqa 2 Bible Online

Luqa 2 - Tarifit bible

Luqa 2

¹Ḏi ȓiyyam nni azeǧiḏ Qayṣar Agusṭus yuca lʼamar aḏ ḥesben marra imezḏaɣ n ṯmura iy ḏi iḥkem.

²Aḥsab-a amezwaru iwqeƹ wami iḥkem Kurinus ḏi ṯmurṯ n Surya.

³Ruḥen marra iwḏan ḥima aḏ sejjlen, kuȓ ijjen iruḥ ɣar ubilaj nnes.

⁴Igaƹƹeḏ Yusef zi ṯmurṯ n Ljalil zeg ubilaj n Naṣira iruḥ ɣar ṯmurṯ n Yahuḏiya ɣar ubilaj n Dawed wenni umi qqaren Bayt Laḥm minzi netta zi ddurriṯ n Dawed ḏ ȓeḥbab nnes.

⁵Igaƹƹeḏ ḏinni aḏ isejjel netta ḏ Maryam ṯenni iy keḏ igga zzujiya, nettaṯ aqat s uƹeddis.

⁶Wami uwḍen ḏinni, ṯuweḍ-d ȓweqṯ nnes ḥima aḏ tarew.

⁷Ṯurew mmis amenzu ṯseḥnunneḍ-iṯ ṯeggi-ṯ ḏi ȓmeḏweḏ minzi war ufin bu umcan ḏi ṯeddarṯ n imsafaren.

⁸Tuɣa ḏinni aȓ jjiheṯ nni imeksawen ḥeṭṭan ṯiḥimeriwin nsen s ǧiȓeṯ.

⁹Ṯusa-d ijjen n lmalaʼika n Siḏ Arebbi ṯbedd-d ɣarsen, itceƹciƹ nnur n lƹaḍama n Siḏ Arebbi inneḍ-d xasen ggwḏen aṭṭas.

¹⁰Ṯenna-asen lmalaʼika nni: "War teggwḏem ca. Aqa nec tbeccareɣ-kenniw s yijjen n ȓexbar imɣar aṭṭas azzayes ifareḥ marra ccaƹb.

¹¹Ixȓeq-d nhara ḏeg ubilaj n Dawed wenni iy kenniw ɣa isnejmen, netta ḏ Siḏiṯneɣ Lmasiḥ.

¹²Kenniw aḏ tafem ijjen n lƹalama aḏ tafem ijjen n useymi iḥnunneḍ iṭṭeṣ ḏi ȓmeḏweḏ."

¹³Ƹlaɣafla meḍharen-d ak lmalaʼika nni aṭṭas n imezḏaɣ n ujenna ḥemmḏen Arebbi qqaren:

¹⁴"Lƹaḍama i Arebbi Yuƹȓan, ḏ ȓehna n yinni ḏi ṯmurṯ mixef irḍa."

¹⁵Wami ruḥent lmalaʼikaṯ nni ƹeqbent ɣar ujenna, ssiwȓen imeksawen nni jarasen nnan: "Yallahet a nraḥeṯ ɣar Bayt Laḥm a nẓer manaya ig iweqƹen min xaneɣ issiweȓ Siḏi Arebbi."

¹⁶Ruḥen ḏeɣya ufin Maryam ḏ Yusef ḏ useymi nni iṭṭeṣ ḏi ȓmeḏweḏ.

¹⁷Wami ṯ ufin ḏinni, kkaren xbaren iwḏan min ḏasen ṯenna lmalaʼika nni x uḥenjir-a.

¹⁸Marra wenni itsȓan itƹejjeb ḏeg wawaȓ nni iy ḏasen nnan imeksawen.

¹⁹Amma Maryam, ṯxemmeȓ marra ṯimesȓayin-a ḏeg wuȓ nnes txemmam ḏaysent.

²⁰Ssenni ƹeqben imeksawen nni semɣaren Arebbi ḥemmḏen-ṯ x marra min sȓin ḏ min ẓrin, ufin ṯimesȓayin nni weqƹent nican amecnaw mamc ḏasen ṯenna lmalaʼika nni.

²¹Wami ikemmeȓ uḥenjir nni ṯmeniyyam ḥima aḏayes iṭehhar, semman-ṯ Ƹisa s yisem nni mamec ṯ isemma lmalak nni zi qbeȓ ma aḏ yiȓi ḏeg uƹeddis n yemmas.

²²Wami kemmȓen wussan nni iy ḏi teggen ruḍu bac lwalidin nnes aḏ iȓin ṣfan ƹlaḥsab Ccariƹa n Musa, uwin-ṯ ɣar ṯendint n Lquds ḥima axas ttaren i Siḏ Arebbi.

²³Ammu ig yuri ḏi Lkitab n Siḏ Arebbi: <Mkuȓ mmis amenzu aḏ yiȓi ḏ ameqqran ɣar Siḏ Arebbi.>

²⁴Ƹaweḏ bac aḏ qeddmen ijjen n dbiḥeṯ mamc d yusa ḏi Lkitab n Siḏ Arebbi: <Ṯnayen n ṯeḏbirin n ȓexȓa, niɣ ṯnayen n ṯeḏbirin ḏ ṯimezyanin.>

²⁵Tuɣa ḏinni ḏi ṯendint n Lquds ijjen n bnaḏem qqaren-as Cimƹun. Iggur nican, iteggweḏ Arebbi, itraja Ayṯ-Israʼil aḏ nejmen, Arruḥ iqeddsen aqaṯ xas.

²⁶Tuɣa netta ixbar-iṯ Arruḥ iqeddsen war itmetti ca aȓ ɣa iẓer Lmasiḥ n Siḏ Arebbi.

²⁷Ikkar Cimƹun isuyur-iṯ Arruḥ iqeddsen ɣar ṯemziḏa ṯameqqrant. Wami uḏfen lwalidin n Ƹisa ḥima aḏas ggen min ṯeqqar Ccariƹa n Musa,

²⁸yufa Cimƹun aḥarmuc nni iysi-ṯ jar ifassen nnes icekkar Arebbi inna:

²⁹"Ya Mulana, ejj-ayi ȓƹabḏ nnec aḏ raḥeɣ ȓexxu ɣar ṯeddarṯ n ȓehna, amecnaw mamc ṯenniḏ cek s wawaȓ nnec.

³⁰Minzi ṯiṭṭawin inu ẓrint asenjem nnec,

³¹iy ṯeswejḏeḏ i marra iwḏan.

³²Netta ḏ ijjen n nnur iy ṯesmeḍhareḏ i ȓegnus, netta ḏ ijjen n lƹaḍama n ccaƹb nnec n Ayṯ-Israʼil."

³³Babas ḏ yemmas qqimen tƹejjben ḏi min xas itwannan.

³⁴Ibarek-iṯen Cimƹun inna-yas i yemmas Maryam: "Aqa wanita iggi-ṯ Siḏi Arebbi aḏ d isehwa aḏ isiȓi aṭṭas n yiwḏan ḏi Ayṯ-Israʼil. Netta ḏ ijjen n lƹalama ataf war t txisen ca,

³⁵aḏ nfeḍḥen lʼafkar n waṭṭas n wuȓawen. ḏ ijjen n lḥuzen am ssif iqeḍƹen aḏ icukk ȓaƹmar nnem."

³⁶Tuɣa ḏinni ƹaweḏ ijjen n nnabiya ḏ ṯawessarṯ qqaren-as Ḥanan nettaṯ ḏ yeǧis n Fanwil zi ṯeqbiȓṯ n Ƹacur. Ṯƹic ak uryaz nnes sebƹa iseggwusa.

³⁷Ȓexddenni immuṯ netta, ṯeqqim nettaṯ ḏ ṯajjaȓṯ ḥetta wami ṯemmuṯ x arbeƹa u ṯmanin iseggwusa. Tɣima ȓebda ḏi ṯemziḏa ṯameqqrant, ṯƹebbeḏ Arebbi tẓumma tẓaǧa ǧiȓeṯ ḏ wass.

³⁸Ḏi ȓweqṯ nni ṯusa-d ṯḥemmeḏ Arebbi ṯessiweȓ x uḥenjir nni ak marra yinni itrajan nhar nni ḏi ɣa ifekk Arebbi Lquds.

³⁹Wami Yusef ḏ Maryam ṣafi kemmȓen marra min zzaysen ṯumar Ccariƹa n Siḏ Arebbi, ḏewȓen ɣar ṯmurṯ n Ljalil ɣar ubilaj nsen n Naṣira.

⁴⁰Ƹisa itemɣar itejhiḏ itcar s ȓefhameṯ, xas arḍa n Arebbi.

⁴¹Lwalidin nnes traḥen mkuȓ aseggwas ɣar Lquds ḏi Ȓƹiḏ Ameqqran n Ayṯ-Israʼil.

⁴²Ƹisa wami yuweḍ ṯenƹac n iseggwusa, gaƹƹḏen ɣar Lquds ƹlaḥsab taqalid n Ȓƹiḏ.

⁴³Wami kemmȓen wussan n Ȓƹiḏ rewwḥen netta iqqim ḏi Lquds, walakin niṯni war ssinen ca belli netta ƹaḏ iqqim ḏinni.

⁴⁴Tɣir-asen aqaṯ akiḏsen ak lmejmaƹ nsen. Uyuren nhar ikmaȓ, bḏan rezzun xas jar familya ḏ imeddukaȓ.

⁴⁵Wami war ṯ ufin ca, ḏewȓen ɣar ṯendint rezzun xas.

⁴⁶Kkin ṯeȓtiyyam uca ufin-ṯ iqqim ḏi ṯemzida ṯameqqrant jar yinni iseȓmaḏen, itsȓa-yasen itseqsa-ṯen.

⁴⁷Marra yinni ḏas itsȓan tƹejjben ḏayes s ȓaƹqeȓ nnes ḏ ljawabaṯ nnes.

⁴⁸Wami ṯ ẓrin lwalidin nnes tƹejjben ḏayes, ṯenna-as yemmas: "Mayemmi ḏaneɣ ṯeggiḏ ammu? Aqa nec ḏ babac nrezzu xak, ṯejjiḏ-aneɣ ḏi ȓaƹḏab."

⁴⁹Inna-asen Ƹisa: "Mayemmi xafi ṯrezzum? Ma war ṯessinem ca belli nec itxeṣṣa-ayi aḏ iȓiɣ ḏi ṯeddarṯ n Baba?"

⁵⁰War ḏas fhimen ca i wawaȓ nni iy ḏasen inna.

⁵¹Iḏweȓ-d akiḏsen ɣar Naṣira itegg-asen array. Yemmas txemmam ḏi marra manaya ḏeg wuȓ nnes.

⁵²Ƹisa yarenni ḏi ȓefhameṯ ḏ ṭṭul, itemɣar ḏi arḍa ɣar Arebbi ḏ ȓƹabḏ.