Read Tarifit Luqa 21 Bible Online

Luqa 21 - Tarifit bible

Luqa 21

¹Ixzar Ƹisa itwaȓa twajar mammec teggen ṣṣaḏaqa nsen ḏi ṣṣenduq n ṯemziḏa ṯameqqrant.

²Iẓra ƹaweḏ ijjen n ṯajjaȓṯ ḏ ȓmeskina waha ṯegga ḏinni ṯnayen iṣuldan.

³Inna: "Aqa tesȓam ȓḥaqq: Ṯajjaȓṯ-a ḏ ȓmeskina waha ṯegga ḏi ṣṣenduq ktar zi min ggin marra inneɣni.

⁴Minzi marra inneɣni ucin zi min xasen izayḏen ḏ agȓa. Nettaṯ lla, waxxa ḏ ȓmeskina waha ṯṣeddeq marra min ṯeƹȓem."

⁵Can yiwḏan ssawaȓen x ṯemziḏa ṯameqqrant qqaren mecḥaȓ ṯeṣbaḥ, ṯzewweq s uzru aṣebḥan u s ṣṣeḏqeṯ. Indeq-d Ƹisa inna-asen:

⁶"Ṯimesȓayin-a iy twaȓam qa aḏ d yas ijjen n nhar war ḏa itɣimi uȓa ḏ ijjen n uzru x unneɣni, marra manaya aḏ inehḏem."

⁷Sseqsan-ṯ nnan-as: "A Lmuƹallim, meȓmi ɣa iwqeƹ manaya? Min ṯeƹna lƹalama nni xmi ƹȓayen ɣa weqƹent ṯmesȓayin-a?"

⁸Inna-asen: "Ḥḍam ixef nwem ḥima war kenniw ixeddeƹ ḥadd. Aṭṭas iy d ɣa yasen s yisem inu zaƹma aḏ inin qa nec ḏ Lmasiḥ! Ƹaweḏ aḏawem inin qa ȓweqṯ ṯuweḍ-d! Walakin kenniw itxeṣṣa war ṯen teḏfirem ca.

⁹Xmi ɣa ṯesȓam x lḥuȓub ḏ lfitnaṯ war teggwḏem ca minzi ṯimesȓayin nni labud aḏ weqƹent ḏ amezwaru. Walakin ddunect-a ƹaḏ war ṯfenni ca."

¹⁰Inna-asen: "Dduwla aḏ tehjem x dduwla, lmemlaka aḏ tehjem x lmemlaka.

¹¹Aḏ iwqeƹ zzinzal imɣar ḏeg waṭṭas n imucan. Aḏ yiȓi jjuƹ ḏ ȓehȓacaṯ ḏ waṭṭas n ṯmesȓayin isaggwaḏen, ḏ lƹalamaṯ ḏ ṯimeqqranin ḏeg ujenna.

¹²Qbeȓ i marra manaya akenniw ṭṭfen, akenniw ƹeddben, akenniw sellmen i ṯemziḏawin nsen. Akenniw ḥebsen, akenniw jarren ɣar izeǧiḏen ḏ lḥukkam ƹlaḥsab isem inu.

¹³Manaya aɣarwem yiȓi ḏ ijjen n lfurṣa i chaḏeṯ.

¹⁴Bȓa ma aḏ teysim amnus ḏ amezwaru ḏi ȓaƹquȓaṯ nwem minzi ɣa ṯdafƹem x yixef nwem.

¹⁵Lla, aḏawem uceɣ awaȓen ḏ ȓefhameṯ ḥima marra yinni kiḏwem itmenɣan war zemmaren ca axawem d arren.

¹⁶Akenniw zzenzen lwalidin nwem ḏ ayṯmaṯwem ḏ ȓeḥbab nwem ḏ imeddukaȓ nwem, aḏ nɣen ȓebƹaḍ zzaywem.

¹⁷Akenniw ƹiffen marra iwḏan ƹlaḥsab isem inu.

¹⁸Waxxa amenni war iweṭṭi uȓa ḏ ij uzuṭṭu zeg uzeǧif nwem.

¹⁹S ṣṣbar nwem ataf aḏ tnejmem.

²⁰Meȓa ṯeẓrim ṯandint n Lquds nnḍen-as-d ȓƹaskar, aqa aḏ tessnem belli ƹȓayen aḏ tnehḏem.

²¹Ȓexddenni yinni iǧan ḏi ṯmurṯ n Yahuḏiya itxeṣṣa aḏ arewȓen ɣar iḏurar; ḏ yinni iǧan ḏi Lquds itxeṣṣa aḏ arewȓen ɣar barra; ḏ yinni iǧan ḏeg imarjeƹiwen itxeṣṣa war tiḏfen ca ɣar Lquds.

²²Aqa ȓiyyam nni ḏ ȓiyyam n uƹmuḏ, aḏaysen ikemmeȓ marra min yurin ḏi Lkutub n lʼanbiya.

²³Ya tamara x ṯemɣarin nni iy ɣa yiȓin s iƹeddisen ḏeg wussan nni ḏ ṯinni issuṭuḍen! Minzi ḏi ṯmurṯ-a aḏ iwqeƹ ijjen n uƹeddeb ḏ ameqqran ḏ uɣḍab x ccaƹb-a.

²⁴Aṯen nɣen s ȓesyuf, aṯen awin ḏ imeḥbas ɣar marra ȓegnus. Ssenni yinni war iǧin ca zi Ayṯ-Israʼil aḏ heḏmen Lquds aȓ ɣa fnant lʼawqat nsen.

²⁵Aḏ d meḍharent lƹalamaṯ ḏ ṯimeqqranin ḏi ṯfuct ḏ ṯziri ḏ yiṯran. Ḏi ṯmurṯ, ȓegnus aḏ yiȓi ḏaysen amnus minzi war fhimen ca i ssdaƹ n ȓmujaṯ n ȓebḥar.

²⁶Aḏ sexfen yiwḏan s ṯiggwḏi ḏ umnus x min itewqiƹen ḏi ddunect minzi marra yinni ijehḏen ḏeg ujenna aṯen isenhezz Arebbi.

²⁷Ȓexddenni iy ɣa ẓren Mmis n bnaḏem ihewwa-d ḏeg useynu s lƹaḍama ḏ jjheḏ nnes imɣaren.

²⁸Xmi ɣa ibḏa aḏ iwqeƹ manaya, beddeṯ sgaƹƹḏeṯ azeǧif nwem minzi ƹȓayen aḏ tnejmem."

²⁹Issiweȓ akiḏsen Ƹisa s yijjen n ȓmaƹna inna-asen: "Xzareṯ ɣar ṯcejjarṯ n ṯazarṯ ḏ marra ȓcejjur.

³⁰Ɣir ȓefruƹ nnes aḏ ḥebbben aḏ ggen ṯifray ataf aḏ tessnem yallah anebḏu iqarreb-d.

³¹Amenni uȓa ḏ kenniw, xmi ɣa ṯeẓrem ṯimesȓayin-a itewqiƹen ataf aḏ tessnem illa ȓmulk n Arebbi yuḏes-d.

³²Aqa tesȓam ȓḥaqq: Yiwḏan n ȓweqṯ-a war tmettin ca aȓ ɣa iwqeƹ marra manaya.

³³Aḏ ifna ujenna ḏ ṯmurṯ, walakin awaȓen inu war fennin ca ƹemmarṣ.

³⁴Ma ṯexsem aḏ teccem uȓ nwem? Ḥḍaṯ ixef nwem zi lmaddla n ssekra ḏ waṭṭas n ccreb ḏ ȓehmum n ddunect-a. Qa aḏ d yas Nhar nni aneggaru ƹlaɣafla am yijjen n ṯexcefṯ.

³⁵Nhar nni aḏ iṭṭef marra yinni iǧan x ṯmurṯ.

³⁶Ḥḍaṯ, ẓaǧem ḏi mkuȓ ȓweqṯ ḥima ataf ṯzemmarem aḏ tnejmem zi marra min ɣa iweqƹen aḏ tbeddem zzaṯ i Mmis n bnaḏem."

³⁷Kuȓ nhar Ƹisa itraḥ iseȓmaḏ ḏi ṯemziḏa ṯameqqrant. S ǧiȓeṯ itraḥ isnusa ḏeg Uḏrar n Zzitun.

³⁸Marra iwḏan traḥen ɣares zic ɣar ṯemziḏa ṯameqqrant ḥima aḏ ṣennṭen i wawaȓ nnes.