Read Tarifit Luqa 22 Bible Online

Luqa 22 - Tarifit bible

Luqa 22

¹Iqarreb-d Ȓƹid n Ṯefḍirṯ umi qqaren Ȓƹiḏ Ameqqran n Ayṯ-Israʼil.

²Arruyas n ȓfuqaha ḏ imseȓmaḏen n ccariƹa rezzun mammec ḏas ɣa ggen ḥima aḏ nɣen Ƹisa walakin ggwḏen zi ccaƹb.

³Yuḏef Cciṭan ḏeg wuȓ n Yahuḏa wenni umi qqaren Isxaryuṭi, netta zi ṯenƹac nni n arrusul.

⁴Ikkar iruḥ aḏ itafeq ak arruyas n ȓfuqaha ḏ imeqqranen n iƹessasen n ṯemziḏa ṯameqqrant n Ayṯ-Israʼil x mamc ɣa igg aḏasen izzenz Ƹisa.

⁵Farḥen, weƹḏen-ṯ aḏas ucen tmenyaṯ.

⁶Ssenni iwafeq netta, irezzu lfurṣa mammec iy ɣa igg aḏ izzenz Ƹisa bȓa ma akiḏes yiȓi ccaƹb.

⁷Yuweḍ-d nhar n Ȓƹiḏ n Ṯefḍirṯ nhar nni iy ḏi ɣarrṣen i ȓƹiḏ.

⁸Iruḥ Ƹisa issekk Buṭrus ḏ Yuḥanna inna-asen: "Ruḥem swejḏem-aneɣ amensi n Ȓƹiḏ Ameqqran ḥima aṯ necc."

⁹Nnan-as: "Mani ṯexseḏ a nraḥ aṯ nsewjeḏ?"

¹⁰Inna-asen: "Xmi ɣa ṯaḏfem ɣar ṯendint, akiḏwem imeȓqa ijjen n uryaz iysi-d aqnuc n waman, ḏfarem-ṯ ɣar ṯeddarṯ mani ɣa yaḏef.

¹¹Inim-as i bab n ṯeddarṯ nni: Qa inna-ac lmuƹallim, mani iǧa uxxam n inewjiwen iy ḏi ɣa ƹeyyḏeɣ nec ḏ imeḥḍaren inu?

¹²Akenniw yawi ɣar yijjen n ṯɣurfat ḏ ṯameqqrant ṯessu, ṯeƹḏeȓ. Ḏinni iy ḏaneɣ ɣa ṯeswejḏem."

¹³Ruḥen ufin nican mamc ḏasen inna. Ṣafi swejḏen amensi n Ȓƹiḏ.

¹⁴Wami d tuweḍ ȓweqṯ yusa-d Ƹisa iqqim ɣar missa aḏ icc ak arrusul nnes.

¹⁵Inna-asen: "Mecḥaȓ nec tuɣa trajiɣ akiḏwem munsweɣ ḏi Ȓƹiḏ Ameqqran-a qbeȓ iy ɣa twaƹeddbeɣ.

¹⁶Aqa qqareɣ-awem: Zi ssa aȓ ṯsawent war zzayes tetteɣ ca aȓ ɣa iwqeƹ ḏi ȓmulk n Arebbi."

¹⁷Iysi-d Ƹisa ȓkas icekkar Arebbi inna-asen: "Ysim ȓkas-a, ferqem-ṯ jarawem.

¹⁸Aqa qqareɣ-awem: Zi ssa aȓ ṯsawent war sesseɣ ca zeg waman-a n uḍiȓ aȓ d ɣa yas ȓmulk n Arebbi."

¹⁹Iysi aɣrum icekkar Arebbi irzi-ṯ yuca-asen-ṯ inna-asen: "Ḏ wa ig iǧan ḏ ddat inu iy ɣa immucen ƹlaḥsab kenniw. Teggeṯ manaya ḥima aḏayi ṯfekkarem."

²⁰Ammu ƹaweḏ menbaƹd i umensi iysi-d ȓkas inna-asen: "Ȓkas-a ḏ ȓƹaheḏ ḏ jḏiḏ iy kiḏwem teggeɣ s iḏammen[12] inu aḏ azzȓen ƹlaḥsab kenniw."

²¹Inna-asen: "Walakin wenni irezzun aḏayi izzenz fus nnes aqaṯ akiḏi x missa.

²²Mmis n bnaḏem aḏas iwqeƹ ƹlaḥsab mamc xas iqqar Lkitab, walakin ya ȓefḍiḥeṯ n bnaḏem nni iy ṯ ɣa izzenzen."

²³Bḏan imeḥḍaren ssawaȓen jarasen qqaren, Manwen zzayneɣ iy ɣa iggen manaya?

²⁴Tmenɣan ƹaweḏ ak wayawya ƹlaḥsab wenni iḥessben zzaysen ḏ ameqqran.

²⁵Inna-asen Ƹisa: "Izeǧiḏen n ȓegnus ḥekkmen x ccuƹub nsen. Lḥukkam nsen qqaren-asen ssadat.

²⁶Walakin manayenni itxeṣṣa war itiȓi ca jarawem; Lla, wenni iǧan ḏ ameqqran jarawem itxeṣṣa-yas aḏ yiȓi am umezyan nwem ḏ wenni iḥekkmen itxeṣṣa-yas aḏ yiȓi am wenni itsexxaren.

²⁷Ug iǧan ḏ ameqqran? Ma ḏ wenni iqqimen aḏ icc niɣ ḏ wenni iy xas itsexxaren? Yac ḏ wenni iqqimen aḏ icc niɣ lla? Walakin nec aqayi akiḏwem am wenni iy xawem itsexxaren.

²⁸Ḏ kenniw iy kiḏi iṣbaren ḏi ȓemḥayen inu.

²⁹Mamc ḏayi yuca Baba ijjen n ȓmulk i nec, uȓa ḏ nec aḏawem uceɣ ijjen n ȓmulk.

³⁰Iƹni ḏi ȓmulk inu aḏ teqqimem akiḏi ɣar missa aḏ teccem aḏ teswem. Aḏ teqqimem x ȓƹarcaṯ ḥima aḏ tḥekmem x ṯenƹac n ṯqebbaȓ n Ayṯ-Israʼil."

³¹Inna-as Ƹisa: "Xzar a Simƹan: Cciṭan irezzu akenniw iɣarbeȓ am mammec tɣarbaȓen irḏan.

³²Tettareɣ akiḏec ɣar Siḏi Arebbi ḥima lʼiman nnec war ineqqeṣ ca. Xmi ɣari d ɣa ṯḏewȓeḏ, cejjeƹ ayṯmac."

³³Inna-as Buṭrus: "A Siḏi, aqayi akiḏec wejḏeɣ meȓa ṯuḏfeḏ ȓeḥbes akiḏec aḏfeɣ, meȓa ṯemmuṯeḏ akidec mmṯeɣ."

³⁴Yarra xas Ƹisa inna-as: "Aḏac iniɣ a Buṭrus: Qbeȓ ma aḏ idden uyaziḍ nhara ataf aḏayi ṯenkareḏ ṯȓaṯa n ṯwaȓaṯin war ḏayi ṯessineḏ ca."

³⁵Ȓexddenni inna-asen Ƹisa i imeḥḍaren nnes: "Wami kenniw ssekkeɣ bȓa ṯazeƹbuȓṯ, bȓa aqrab, bȓa ṯisiȓa, ma ixeṣṣi-kenniw ca?" Nnan-as: "Lla."

³⁶Inna-asen: "Ȓexxu wenni ɣar ṯeǧa can ṯzeƹbuȓṯ niɣ can uqrab aṯ iysi. Wenni war ɣar iǧi ca ssif, aḏ izzenz arruḍ nnes aṯ iseɣ.

³⁷Aḏawem iniɣ: U labud aḏayi iwqeƹ min yurin ḏi Lkitab ƹlaḥsab mamc iqqar: <Ḥesben-ṯ ak lmujrimin.> Iwa min xafi yurin ṣafi aḏ iwqeƹ."

³⁸Nnan-as: "Aqa ɣarneɣ ṯnayen n ȓesyuf a Siḏi." Inna-asen: "Wah, ṣafi."

³⁹Iffeɣ Ƹisa am ȓebda iruḥ ɣar Uḏrar n Zzitun, ḏfaren-ṯ ƹaweḏ imeḥḍaren nnes.

⁴⁰Wami yuweḍ ɣar umcan nni inna-asen: "Ẓẓaǧem ḥima war tiḏfem ca ḏi ȓemḥayen."

⁴¹Ibeƹƹeḏ xasen cwayt, isejjeḏ ɣar ṯmurṯ ibḏa itettar i Arebbi.

⁴²Inna: "A Baba, meȓa ṯexseḏ sbeƹƹeḏ-iṯ xafi ȓkas-a n ȓaƹḏab. Maci mamc xseɣ nec; Lla, mamc ixes ȓxaḍar nnec cek."

⁴³Ȓexddenni ṯbedd-d ɣares ijjen n lmalaʼika zeg ujenna ḥima aḏas ṯuc jjheḏ.

⁴⁴Ixeyyeq wuȓ nnes yarni itẓaǧa ktar ƹaḏ, ṯiḏi nnes ṯehwa-d zzayes ɣar ṯmurṯ ṯegga am ṯneqqiḍin n iḏammen nican.

⁴⁵Wami ikemmeȓ ṯẓaǧiṯ nnes, iḏweȓ ɣar imeḥḍaren nnes yufi-ṯen ṭṭṣen s lḥuzen.

⁴⁶Inna-asen: "Mayemmi teṭṭṣem? Kkarem, ẓẓaǧem ḥima war tiḏfem ca ḏi ȓemḥayen."

⁴⁷Yallah Ƹisa issawaȓ yuweḍ-d Yahuḏa, ijjen zi ṯenƹac n arrusul nnes. Yuwi-d akiḏes ȓɣaci aṭṭas, iqarreb ɣares ḥima axas iseǧem x uɣembub nnes.

⁴⁸Inna-as Ƹisa: "Ma s sȓam-a iy zi ɣa ṯezzenzeḏ Mmis n bnaḏem a Yahuḏa?"

⁴⁹Wami ẓrin imeḥḍaren manaya nnan-as: "A Siḏi, ma a nuweṯ s ssif?"

⁵⁰Ijjen zeg yinni ḏinni iǧan yuwṯa ismeɣ n arrayes n ȓfuqaha iqess-as amezzuɣ afusi.

⁵¹Inna-asen Ƹisa: "Ṣafi, beddeṯ!" Iḥaḏa amezzuɣ n uryaz nni isgenfa-ṯ.

⁵²Inna-asen Ƹisa i arruyas n ȓfuqaha ḏ imeqqranen n iƹessasen n ṯemziḏa ṯameqqrant ḏ imeqqranen n Ayṯ-Israʼil iy ɣares d yusin: "Ma tɣir-awem qa nec ḏ lmujrim wami d ṯeysim ȓesyuf ḏ idebbuzen ḥima aḏayi ṯeṭṭfem niɣ?

⁵³Tuɣa tɣimiɣ akiḏwem mkuȓ nhar ḏi ṯemzida ṯameqqrant war ḏayi ṯeṭṭifem ca. Walakin ȓexxu ḏ ṯsaƹƹat nwem ḏ jjheḏ n ṯaǧest."

⁵⁴Ṭṭfen Ƹisa, uwin-ṯ ɣar ṯeddarṯ n arrayes n ȓfuqaha siḏfen-ṯ. Iḏfar-iṯ Buṭrus zi ȓeggwaj.

⁵⁵Ceƹƹȓen ṯimessi ḏi ȓwesṭ n ȓemraḥ n ṯeddarṯ. Qqimen ḏinni, iqqim akiḏsen Buṭrus.

⁵⁶Ṯeẓri-ṯ ijjen n ṯxeddant iqqim zzaṯ i ṯmessi, ṯexzar ḏayes mliḥ ṯenna-asen: "Bnaḏem-a wanita tuɣa iǧa akiḏes."

⁵⁷Inkar Buṭrus inna-as: "A ṯamɣarṯ, war ṯ ssineɣ ca."

⁵⁸Menbaƹd cwayt iẓri-ṯ ijjen nneɣni inna-as: "Cek ḏ ijjen zzaysen?" Inna-as Buṭrus: "A bnaḏem, nec lla!"

⁵⁹Wami ṯeƹḏu can ṯsaƹƹat inna-as ijjen nneɣni u netta mʼakked: "Ḏ ṣṣaḥ, aṯarras-a wanita tuɣa iǧa akiḏes minzi uȓa ḏ netta zi Ljalil."

⁶⁰Inna-as Buṭrus: "A bnaḏem, nec war ssineɣ ca minxef ṯessawaȓeḏ cek!" Netta wami tuɣaṯ ƹaḏ issawaȓ, ȓexddenni idden uyaziḍ.

⁶¹Ineqȓeb-d Siḏiṯneɣ ixzar ɣar Buṭrus, Buṭrus ifekkar-d awaȓ nni iy ḏas inna Siḏiṯneɣ: Qbeȓ ma aḏ idden uyaziḍ ataf aḏayi ṯenkareḏ ṯȓaṯa n ṯwaȓaṯin.

⁶²Iffeɣ ɣar barra iru imeṭṭawen ḏ imeǧaḥen aṭṭas.

⁶³Bḏan yinni iḥeṭṭan Ƹisa ḍeḥḥcen xas ccaṯen-ṯ.

⁶⁴Ȓeḥḥfen-as x uɣembub nnes qqaren-as: "Iwa a nnabi siweȓ, ssen uw c yuwṯin zzayneɣ!"

⁶⁵Arnin x wawaȓen nni, qqaren-as ṯimesȓayin nneɣni war iḥȓin ca.

⁶⁶Wami iṣbeḥ ȓḥaȓ munen imeqqranen n Ayṯ-Israʼil ḏ arruyas n ȓfuqaha ḏ imseȓmaḏen n ccariƹa, uwin Ƹisa ɣar Jmaƹṯ n lḥukkam nsen.

⁶⁷Nnan-as: "Meȓa cek ḏ Lmasiḥ ini-yaneɣ-t!" Inna-asen: "Meȓa nniɣ-awem-t, kenniw ataf war ḏayi timnem ca.

⁶⁸Meȓa sseqsiɣ-kenniw, ataf war ḏayi tjiwibem ca.

⁶⁹Walakin zi ssa aȓ ṯsawent aḏ iqqim Mmis n bnaḏem x ufusi n Lqawi."

⁷⁰Nnan-as marra iḏsen: "Iwa cek ḏ Mmis n Arebbi baƹda?" Inna-asen: "Aqa ṯennam-ṯ kenniw ḏ nec."

⁷¹Ȓexddenni nnan: "Ma ƹaḏ a neḥḏaj ca n ȓechuḏ? Neccin marra iḏneɣ nesȓa-yas min inna netta s uqemmum nnes."