Read Tarifit Luqa 24 Bible Online

Luqa 24 - Tarifit bible

Luqa 24

¹Nhar amezwaru n ssimana iƹni ḏ ȓḥad, ṯimɣarin nni ruḥent ɣar ṣbaḥ zic ɣar yifri n unḍeȓ nni, uwint lƹiṭar iy tuɣa swejḏent.

²Ufint azru itwakkes x unḍeȓ.

³Wami uḏfent ḏayes war ufint ca ḏinni ddat n Siḏiṯneɣ Ƹisa.

⁴Niṯenti wami qqiment ḏehhcent ḏi manayenni, bedden-d ɣarsent ṯnayen n iṯarrasen ggin arruḍ itceƹciƹ.[15]

⁵Ggwḏent ṯemɣarin nni aṭṭas sejjḏent ɣar ṯmurṯ, nnan-asent ṯnayen n iṯarrasen nni: "Mayemmi ṯrezzunt x wenni iddaren jar yinni immuṯen?

⁶Netta war ḏa iǧi ca, ikkar-d zi ȓmewṯ. Ma war ṯeƹqiȓent ca wami kiḏwem issiweȓ u netta tuɣaṯ ƹaḏ ḏi ṯmurṯ n Ljalil?

⁷Inna-awem qa itxeṣṣa Mmis n bnaḏem aḏ itwasellem i yinni iƹeṣṣan, niṯni aṯ ṣellben netta aḏ d itwasekkar ḏi nhar n wis ṯeȓtiyyam."

⁸Ssenni niṯenti ƹeqȓent x wawaȓ nni n Ƹisa.

⁹Ḏewȓent-id zeg unḍeȓ ssiwḍent marra ȓexbar-a ɣar ḥiṭac n arrusul ḏ marra inneɣni.

¹⁰Ṯinni issiwḍen ȓexbar-a ɣar arrusul niṯenti ḏ Maryam ṯamagdaliṯ, ḏ Ayunna, ḏ Maryam yemmas n Yaƹqub, ḏ ṯinneɣni.

¹¹Arrusul-a war uminen ca ṯimɣarin nni minzi fekkaren niṯenti ssawaȓent waha.

¹²Walakin Buṭrus ikkar yuzzeȓ ɣar yifri n unḍeȓ nni, wami issij ḏinni yufa ȓecfen imars waḥḏes. Iruḥ netta iḏweȓ ɣar ṯeddarṯ itƹejjeb ḏi nnefs nnes ƹlaḥsab min iweqƹen.

¹³Nhar nni, ṯnayen n imeḥḍaren nnes traḥen ɣar yijjen n dcar qqaren-as Ƹinwas. Iggwej x ṯendint n Lquds ijjen n ḥiṭac n kilumit.

¹⁴Ssawaȓen jarasen x ṯmesȓayin iweqƹen.

¹⁵Wami ssawaȓen temnaqacen imeȓqa akiḏsen Ƹisa netta s yixef nnes ibḏa iggur akiḏsen.

¹⁶Walakin niṯni war itwasmiḥ ca aṯ ƹeqȓen.

¹⁷Inna-asen Ƹisa: "Min iƹna manaya iy xef ṯessawaȓem ammu wami ṯuggurem ḏeg ubriḏ?" Bedden, iban lḥuzen x wuḏem nsen.

¹⁸Indeq-d ijjen zzaysen qqaren-as Klupas inna-as: "Ma ḏ cek waḥḏec ḏanita iy d izuren ɣar Lquds ḏeg wussan-a qa war ṯessineḏ ca min iweqƹen?!"

¹⁹Inna-asen Ƹisa: "Min iweqƹen ḏinni?" Nnan-as: "Qa Ƹisa naṣiri tuɣa iǧa ḏ ijjen n nnabi ɣares jjheḏ ḏi min itegg ḏ min iqqar zzaṯ i Arebbi ḏ marra iwḏan.

²⁰Ṭṭfen-ṯ arruyas n ȓfuqaha ḏ lḥukkam nneɣ sellmen-ṯ aṯ nɣen, ṣellben-ṯ.

²¹Neccin tuɣa netmenna belli ḏ netta iy ɣa isnejmen Ayṯ-Israʼil! Nhara ḏ wis ṯeȓtiyyam zeg wami iwqeƹ manaya.

²²Ƹaweḏ ḏinni can ṯemɣarin zzayneɣ jjint-aneɣ nestƹejjeb minzi ruḥent ɣar unḍeȓ zic

²³war ḏinni ufint ca ddat nnes. Ḏewȓent-id, nnant-aneɣ belli meḍharent-id lmalaʼikaṯ xebbarent-ṯent belli aqaṯ iddar.

²⁴Ȓexddenni ruḥen can yiwḏan zzayneɣ ɣar unḍeȓ nnes, ufin nican mamc ḏaneɣ nnant ṯemɣarin nni, walakin netta war ṯ ufin ca ḏinni."

²⁵Inna-asen Ƹisa: "A yinni war ifhimen ca! A yinni war itimnen ca ḏeɣya ḏi marra min nnan lʼanbiya!

²⁶Tuɣa itxeṣṣa i Lmasiḥ aḏ iƹeddeb, ssenni aḏ yaḏef ɣar lƹaḍama nnes."

²⁷Ḏinni ibḏa-yasen Ƹisa zi Ccariƹa n Musa ḏ Lkutub n marra lʼanbiya isefhem-iṯen min xas yurin ḏi marra Lkutub nni.

²⁸Qarrben ɣar dcar iy ɣar traḥen, Ƹisa igga ixef nnes axmi ixes aḏ ikemmeȓ x ubriḏ nnes.

²⁹Walakin bḏan niṯni teḥcamen-ṯ nnan-as: "Qqim akiḏneɣ minzi ƹȓayen ḏ ṯameddiṯ qa iruḥ ȓḥaȓ." Ssenni yuḏef ɣarsen ḥima akiḏsen isens.

³⁰Wami akiḏsen iqqim aḏ icc, ikkar iysi aɣrum icekkar Arebbi irzi-ṯ ibḏa ifarreq-asen-ṯ.

³¹Ḏinni iy nurzment ṯiṭṭawin nsen ƹeqȓen-ṯ, walakin netta inerfeƹ war iqqim ca aṯ ẓerren.

³²Nnan i wayawya: "Neccin nesḥissa can ȓḥajeṯ ṯeccaṯ ḏeg wuȓawen nneɣ wami tuɣaṯ issawaȓ akiḏneɣ ḏeg ubriḏ isefhem-aneɣ Lkutub."

³³Ȓexddenni kkaren ḏewȓen ɣar Lquds. Ufin ḥiṭac n arrusul ḏ yinni iy kiḏsen imunen ḏinni.

³⁴Nnan-asen: "Manaya ḏ ṣṣaḥ! Ikkar-d Siḏiṯneɣ zi ȓmewṯ, tuɣa iban-d i Simƹan!"

³⁵Txebbaren-ṯen s min iweqƹen ḏeg ubriḏ ḏ mammec ssnen Siḏiṯsen wami irza aɣrum.

³⁶Wami ssawaȓen x manaya yusa-d Ƹisa ibedd ḏi ȓwesṭ nsen inna-asen: "Sȓam xawem."

³⁷Ggwḏen aṭṭas tɣir-asen aqa twaȓan can ȓexyaȓ.

³⁸Inna-asen: "Min kenniw yuɣin ṯenxeȓƹem? Mayemmi uȓawen nwem ḏaysen ccekk?

³⁹Xzarem ifassen inu ḏ iḍaren inu, aqa ḏ nec. Ḥaḏam-ayi, xzarem. Aqa ȓexyaȓ war ḏayes bu uysum uȓa ḏ yixsan ammu iy ḏayi twaȓam nec."

⁴⁰Inna-asen manaya, isbeyyen-asen-d ifassen nnes ḏ iḍaren nnes.

⁴¹Niṯni qqimen ƹaḏ war uminen ca min iweqƹen minzi farrḥen ḏehhcen. Uca inna-asen: "Ma ḏa can lmakla at cceɣ?"

⁴²Ucin-as cwayt n iseȓman cenfen.

⁴³Iysi-t icci-t zzaṯsen.

⁴⁴Inna-asen: "Ḏ wa ḏ awaȓ iy zi kiḏwem ssiwȓeɣ wami ƹaḏ tuɣa ǧiɣ akiḏwem, iƹni labud aḏ ikemmeȓ marra min xafi yurin ḏi Ccariƹa n Musa ḏ Lkutub n lʼanbiya ḏ Zzabur."

⁴⁵Ȓexddenni irzem Ƹisa ȓaƹquȓaṯ nsen ḥima aḏ fehmen Lkutub.

⁴⁶Inna-asen: "Ammu iy yura ḏi Lkitab qa itxeṣṣa i Lmasiḥ aḏ itwaƹeddeb aḏ d ikkar zi ȓmewṯ wis ṯeȓtiyyam.

⁴⁷Aḏ beccaren marra ȓegnus ḥima aḏ tuben aḏ twaɣfarent ȓmuƹṣiyaṯ nsen s yisem n Lmasiḥ. Aḏ ibḏa manaya ḏi Lquds.

⁴⁸Kenniw aqa ṯcehhḏem x manaya.

⁴⁹Ataf minḏi kenniw iwƹeḏ Baba aḏawem ṯiḏ ssekkeɣ nec. Qqimem ḏi ṯendint-a aȓ xawem d ɣa ihwa jjheḏ zeg ujenna."

⁵⁰Isufeɣ-iṯen zi ṯendint yuwi-ṯen ɣaȓ Bayt Ƹanya. Isgaƹƹeḏ ifassen nnes ibarek-iṯen.

⁵¹Wami ṯen itbarak, itgaƹƹaḏ xasen itwarfeƹ ɣar ujenna.

⁵²Sejjḏen-as, ḏewȓen-d ɣar Lquds niṯni farrḥen aṭṭas.

⁵³Ssenni qqimen ḏi ṯemziḏa ṯameqqrant ḥemmḏen Arebbi.