Read Tarifit Luqa 3 Bible Online

Luqa 3 - Tarifit bible

Luqa 3

¹Azeǧiḏ Qayṣar Tibaryus yuweḍ xemessṭacar ssna zeg wami iteḥkam, lƹam nni ƹaweḏ Bilaṭus Lbanṭi netta ḏ lḥakem x Yahuḏiya, Hirudus netta ḏ lwali x Ljalil, umas Filippas netta ḏ lwali x Iṭurya ḏ jwayeh n Tarxanitis, Laṣan netta ḏ lwali x Abilina,

²Ḥanin ḏ Qiyafa niṯni ḏ arruyas n ȓfuqaha. Ḏi ȓweqṯ nni yusa-d wawaȓ n Arebbi i Yaḥya mmis n Zakariya ḏi ȓexȓa.

³Ikkar netta ikka x marra imucan ṭṭarf n iɣzar n Lʼurdun ibḏa itbeccar iwḏan ḥima aḏ tuben aḏ twaṭehharen s waman ḥima aḏ twaɣfarent ȓmuƹṣiyaṯ nsen.

⁴Manaya ƹlaḥsab min yura ḏi Lkitab n wawaȓ n nnabi Icaƹya: <Ṯmijja tȓaɣa ḏi ȓexȓa ṯeqqar: Swejḏeṯ abriḏ i Siḏi Arebbi, ggem ibriḏen nnes nican.

⁵Aḏ itwanṭu kuȓ iɣzar, aḏ iwaṭa kuȓ aḏrar ḏ ṯaƹrurṯ. Min war icnin aḏ icna, aḏ twaƹeḏȓen ibriḏen itwaḥfaren.

⁶Marra iwḏan aḏ ẓren asenjem n Arebbi.>

⁷Yaḥya iqqar-asen i ȓɣaci yinni iffɣen bac aḏ twaṭehharen s waman: "Ya ṯarwa n ifiɣeran, wi ḏawem iƹeȓmen aḏ tarewȓem zi lɣaḍab n Siḏi Arebbi iy d ɣa yasen?

⁸Meȓa ṯtubem ḏ ṣṣaḥ, ggeṯ ȓexḏayem ḏ ṯiṣebḥanin. Maci aḏ tinim ḏi nnefs nwem qa neccin ḏ ṯarwa n Brahim u ṣafi. Meȓa ixes Arebbi ṯarwa n Brahim, ataf aḏ iysi izra-ya aṯen yarr ḏ ṯarwa n Brahim!

⁹Aqa caqur iwjeḏ ḥima aḏ iqess iẓewran n ȓcejjur. Mkuȓ ṯacejjarṯ iy war itirwen ca min iǧan ḏ aṣebḥan ataf aḏ twaqess aḏ tmenḍar ḏi ṯmessi."

¹⁰Nnan-as ȓɣaci: "Y neccin min ɣa negg?"

¹¹Yarra xasen Yaḥya inna-asen: "Wenni ɣar ǧant ṯnayen n ṯeqmijaṯin itxeṣṣa aḏ yuc icten i wenni war ɣar iǧi ca. Ƹaweḏ wenni ɣar iǧa min ɣa icc itxeṣṣa aḏ yuc i wenni war ɣar iǧi ca."

¹²Usin-d ɣares ȓebƹaḍ zeg yinni ijemmƹen ḍḍariba bac aḏ twaṭehharen s waman nnan-as: "A Lmuƹallim, min ɣa negg neccin?"

¹³Yarra xasen inna-asen: "War jemmƹeṯ bu ktar zi lqanun."

¹⁴Ƹaweḏ sseqsan-ṯ ȓƹaskar nnan-as: "Y neccin min ɣa negg?" Inna-asen Yaḥya: "War tkessim bu tmenyaṯ s bessif. War znuzam ḥadd x ȓbaṭeȓ. Qenƹem s min ṯrebḥem."

¹⁵Qaƹ iwḏan nni trajan Lmasiḥ tfekkaren ḏeg wuȓ nsen Yaḥya ma netta ḏ Lmasiḥ ma lla.

¹⁶Ijaweb-iṯen Yaḥya marra inna-asen: "Qa nec ṭehhareɣ-kenniw s waman, walakin aḏ d yas ijjen ijheḏ xafi, war sḏihiǧeɣ ca aḏas fesyeɣ uȓa ḏ ifiȓan n ṯsiȓa nnes. Netta akenniw iṭehhar s Arruḥ iqeddsen ḏ yiȓesawen n ṯmessi.[1]

¹⁷Ɣares ṯazzarṯ ḏeg ufus ḥima aḏ izuzzar ṯaffa nnes qaƹ, aḏ ismun ṯiḥebba n yirḏan aṯent igg ḏi ṯesrafṯ. Min war ineffƹen ca aṯ issecmeḍ ḏi ṯmessi iy war ixessin ƹemmarṣ."

¹⁸Amenni Yaḥya iseȓmaḏ iwḏan itbeccar-iṯen s waṭṭas n ṯmesȓayin nneɣni.

¹⁹Menbaƹd lwali Hirudus yuwi icten qqaren-as Hirudya u nettaṯ ḏ ṯamɣarṯ n wumas. Yaḥya inha Hirudus x manaya, ƹaweḏ inha-ṯ x marra lʼaɣlaṭ nneɣni iy itegg.

²⁰Hirudus netta min igga? Yarni ḏi ccarr nnes igga Yaḥya ḏi ȓeḥbes.

²¹Wami marra ccaƹb ittwaṭehhar s waman, yusa-d uȓa ḏ Ƹisa itwaṭehhar s waman. Netta wami itẓaǧa, ṯnurzem ṯewwarṯ ḏeg ujenna

²²ihwa-d Arruḥ iqeddsen ḏi ṣṣifeṯ n ṯeḏbirṯ yarsa-d x Ƹisa. Ḏ ijjen n ṯmijja zeg ujenna ṯeqqar-as qa cek ḏ Memmi iƹizzen, nec farrḥeɣ zzayek.

²³Wami ibḏa Ƹisa ḏi ȓxeḏmeṯ nnes tuɣa ɣares ca n ṯȓaṯin iseggwusa. Tɣir-asen ḏ mmis n Yusef, n Ƹali,

²⁴n Maṭyu, n Lawi, n Mluki, n Yani, n Yusef,

²⁵n Maṭyusus, n Amun, n Naḥum, n Ḥuṣni, n Naji,

²⁶n Muḥit, n Maṭyusus, n Camƹi, n Yuski, n Yuḍa,

²⁷n Yuhan, n Ris, n Zarubbabil, n Cƹaltihil, n Nir,

²⁸n Mluki, n Adi, n Qasem, n Lmudam, n Ƹir,

²⁹n Yassu, n Liƹazar, n Yurim, n Maṭyu, n Lawi,

³⁰n Cimƹun, n Yahuḏa, n Yusef, n Yunam, n Lyaqim,

³¹n Malyu, n Mennan, n Maṭyus, n Naṯan, n Dawed,

³²n Yassa, n Ƹubid, n Buƹazza, n Salmun, n Nassun,

³³n Ƹaminadab, n Admi, n Ƹarni, n Ḥaṣrun, n Faris, n Yahuḏa,

³⁴n Yaƹqub, n Isḥaq, n Brahim, n Taraḥ, n Naḥur,

³⁵n Sarug, n Raƹu, n Falaj, n Ƹabir, n Ṣalaḥ,

³⁶n Qinan, n Arfakceḏ, n Sam, n Nuḥ, n Lamak,

³⁷n Matucaliḥ, n Axnux, n Yarid, n Muhallil, n Qinan,

³⁸n Anuc, n Cuṯ, n Adam mmis n Arebbi.