Read Tarifit Luqa 4 Bible Online

Luqa 4 - Tarifit bible

Luqa 4

¹Iḏweȓ-d Ƹisa zeg iɣzar n Lʼurdun iccur s Arruḥ iqeddsen, ȓexddenni yuwi-ṯ Arruḥ nni ɣar ȓexȓa.

²Ikka ḏinni arbeƹin yum itjerrab-iṯ Ibȓis. Ḏeg wussan nni war icci walu. Wami kemmȓen wussan nni iǧuz.

³Ikkar Ibȓis inna-as i Ƹisa: "Cek meȓa ḏ Mmis n Arebbi, ini-yasen i yizra-ya aḏ ḏewȓen ḏ aɣrum."

⁴Yarra xas Ƹisa inna-as: "Lla, Lkitab iqqar: <Bnaḏem war itƹic ca s uɣrum waha.>"

⁵Ikkar Ibȓis yuwi Ƹisa ɣar yijjen n umcan yuƹȓa, ismeḍhar-as-d marra lmemlakaṯ n ddunect-a ḏeg yijjen n dqiqeṯ.

⁶Inna-as Ibȓis: "Aḏac uceɣ marra jjheḏ-a ḏ lƹaḍama-ya nsent ȓaḥeqqac nec ṯemmuc-ayi, at uceɣ i wumi ma xseɣ.

⁷Meȓa ṯsejjḏeḏ-ayi, aḏ yiȓi qaƹ manaya i cek."

⁸Inna-as Ƹisa: "Lla, Lkitab iqqar: <Sejjeḏ i Siḏi Arebbi nnec, ƹbeḏ-iṯ netta waḥḏes.>"

⁹Ikkar Ibȓis yuwi Ƹisa ɣar ṯendint n Lquds, isiȓi-ṯ x ṯqiccat n ṯemziḏa ṯameqqrant inna-as: "Cek meȓa ḏ Mmis n Arebbi, ngez ssanita ɣar ṯmurṯ.

¹⁰Aqa Lkitab iqqar: <Qa Arebbi aḏ iweṣṣa bac ac ḥḍant lmalaʼikaṯ nnes.>

¹¹Ƹaweḏ iqqar: <Ac ysint x ifassen nsent bac war ṯeȓqifeḏ uȓa ḏ ij uzru s uḍar nnec.>"

¹²Indeq-d Ƹisa inna-as: "Lla, Lkitab iqqar: <War tjarrab ca Siḏi Arebbi nnec.>"

¹³Ibȓis wami ikemmeȓ akiḏes marra ajerrab nni, ikkar ibeƹƹeḏ xas aȓ yijjen n ṯwaȓa nneɣni.

¹⁴Iḏweȓ Ƹisa ɣar ṯmurṯ n Ljalil s jjheḏ n Arruḥ iqeddsen, itentacar ȓexbar nnes marra ḏi jwayeh nni.

¹⁵Iseȓmaḏ ḏi ṯemziḏawin nsen semɣaren-ṯ marra iwḏan.

¹⁶Yusa-d ɣar ubilaj n Naṣira mani irebba. Nhar n ssebṯ n lƹibada iruḥ ɣar ṯemzida am ȓebda, ikkar ḥima aḏ iɣar.

¹⁷Ucin-as Lkitab nni n nnabi Icaƹya, irzem-iṯ yufa amcan iy ḏi yura wawaȓ-a:

¹⁸<Aqa Arruḥ n Siḏi Arebbi aqaṯ xafi, ixḍar-ayi ḥima aḏ beccareɣ ȓmusakin. Issekk-ayi-d aḏ xbareɣ lḥurriya i imeḥbas, yinni itwaḍarɣȓen aṯen arreɣ twaȓan, yinni itwaḍeȓmen aḏasen d rxuɣ.

¹⁹Aḏ xbareɣ x useggwas n arḍa n Siḏi Arebbi.>

²⁰Ibelleƹ lkitab nni yarra-as-ṯ i uxeddam iqqim. Marra yinni iǧan ḏi ṯemziḏa qqimen txezzaren ḏayes.

²¹Ibḏa iqqar-asen: "Nhara qa iffeɣ-d wawaȓ n Lkitab-a iy umi ṯesȓim."

²²Marra ssawaȓen xas mliḥ, tƹejjben ḏeg wawaȓen iṣebḥanen iy d iffɣen zeg uqemmum nnes. Nnan xas: Ma war iǧi ca wanita ḏ mmis n Yusef?

²³Inna-asen Ƹisa: "Bȓa ccekk aḏayi ṯinim ȓmaƹna-ya: Cek ay aḍbib mȓi ṯeddawiḏ, iȓi ṯeddawiḏ ixef nnec. Aḏayi ṯinim ƹaweḏ qa min nesȓa iweqƹen ḏeg ubilaj n Kafernaḥum, ȓexxu manayenni egg-iṯ uȓa ḏanita ḏi ṯmurṯ nnec."

²⁴Inna-asen: "Aqa tesȓam ȓḥaqq: War iǧi ca can nnabi qebȓen-ṯ ḏi ṯmurṯ nnes.

²⁵Aqa tesȓam ȓḥaqq: Tuɣa ḏinni aṭṭas n ṯajjaȓin ḏi ṯmurṯ n Ayṯ-Israʼil ḏi zman n nnabi Ilyas wami war yuwṯi bu unẓar ṯeȓt snin u sett chur wami iwqeƹ ijjen n buheyyuf ḏi ṯmurṯ ṯekmaȓ.

²⁶Walakin ṯajjaȓin nni war ɣarsent d itwassekk ca nnabi Ilyas, itwassekk-d ɣir ɣar yicten n ṯajjaȓṯ waha ḏi dcar n Ṣarepta ḏi ṯmurṯ n Ṣayda.

²⁷Ƹaweḏ tuɣa aṭṭas n yiwḏan heȓcen ḏaysen jḏam ḏi ṯmurṯ n Ayṯ-Israʼil ḏi zman nni n nnabi Alicaƹ. Arebbi war zzaysen isgenfi uȓa ḏ ijjen, isgenfa illa Nuƹman zi Surya."

²⁸Yinni imunen ḏi ṯemziḏa wami sȓin i wawaȓ-a ɣeḍben aṭṭas.

²⁹Kkaren sufɣen-ṯ ɣar barra n ṯendint. Uwin-ṯ ɣar jjarf n uḏrar mani ṯebna ṯendint nsen bac aṯ seyyben x jjarf nni.

³⁰Walakin netta ifȓeṯ-asen yuyur.

³¹Iruḥ Ƹisa ɣar ubilaj n Kafernaḥum ig iǧan ḏi ṯmurṯ n Ljalil, ibḏa iseȓmaḏ iwḏan ḏinni ḏi nhar n lƹibada nsen kuȓ ssebṯ.

³²Qqimen yiwḏan nni tƹejjben ḏeg useȓmeḏ nnes minzi ɣares ssulṭa iy zi iseȓmaḏ.

³³Ufin ḏi ṯemziḏa nni ijjen n uryaz ḏayes ijjen n jjenn ḏ aƹeffan. Ibḏa isnekkar ṯɣuyyeṯ s jjheḏ

³⁴inna-as i Ƹisa: "Min ḏayneɣ ṯrezzuḏ a Ƹisa Naṣiri? Ma ṯusiḏ-d axaneɣ ṯeqḍiḏ? Nec qa ssneɣ min ṯeƹniḏ; cek ḏ Lƹaḍim n Arebbi!"

³⁵Izeyyar-iṯ Ƹisa inna-as: "Stuk cek, ffeɣ zzayes!" Iseɣḍeȓ jjenn aryaz nni ɣar ṯmurṯ ḏi ȓwesṭ nsen ȓexddenni iffeɣ zzayes war ḏas iggi walu.

³⁶Qqimen marra iwḏan nni ḏehhcen nnan i wayawya: "Min iƹna manaya? Itʼamar uȓa ḏ jnun iƹeffanen s yijjen n ssulṭa ḏ ṯzemmar niṯni teffɣen."

³⁷Itentacar ȓexbar nnes ḏi mkuȓ amcan ḏi jwayeh nni.

³⁸Ssenni Ƹisa iffeɣ-d zi ṯemziḏa nni yuḏef ɣar ṯeddarṯ n Simƹan. Yufa ḏinni ṯaḏeggwaȓṯ n Simƹan qa ṯehȓec ḏayes ṯimessi aṭṭas, ttaren zzayes ḥima at isgenfa.

³⁹Yuḏar aɣares isbedd ṯimessi ṯeffeɣ-it. Ḏeg umcan ṯekkar ṯebḏa tsexxar xasen.

⁴⁰Wami ṯeɣȓi ṯfuct ɣar ṯmeddiṯ, iwḏan uwin ɣar Ƹisa imehȓac nsen kuȓ ijjen mamec igga ȓehȓac nnes. Mkuȓ ijjen zzaysen isrusa xas fus nnes isgenfa-ṯ.

⁴¹Zeg waṭṭas n yiwḏan ƹaweḏ teffɣen jnun snekkaren ṯɣuyyeṯ qqaren-as qa cek ḏ Mmis n Arebbi." Walakin netta itzeyyar-iṯen, war ṯen itejji ca aḏ ssiwȓen minzi ssnen netta ḏ Lmasiḥ.

⁴²Wami iṣbaḥ ȓḥaȓ iffeɣ Ƹisa iruḥ ɣar yijjen n umcan n ȓexȓa. Iwḏan nni bḏan rezzun xas, usin-d ɣares ṭṭfen-ṯ ḥima war xasen iggur ca.

⁴³Inna-asen: "Lla, nec itxeṣṣa-ayi aḏ beccareɣ s ȓmulk n Arebbi ḏi ṯneddam nneɣni minzi twassekkeɣ-d i manaya."

⁴⁴Iruḥ itḥeddaṯ ḏi ṯemziḏawin nsen n Yahuḏiya.