Read Tarifit Luqa 6 Bible Online

Luqa 6 - Tarifit bible

Luqa 6

¹Ijjen n nhar n ssebṯ n lƹibada, iƹḏu Ƹisa ḏeg ubriḏ ḏi ȓwesṭ n imendi akiḏes imeḥḍaren nnes. Bḏan imeḥḍaren nnes tekksen ṯiyḏerin, tqeccaren-ṯent s ifassen nsen, tetten-ṯent.

²Nnan-asen ȓebƹaḍ zi ȓḥizeb n ifarrisiyen: "Mayemmi teggem min iǧan ḥram ḏi nhar n lƹibada?"

³Indeq-d Ƹisa inna-asen: "Ma war ṯeɣrim ca min igga Dawed wami tuɣa iǧuz netta ḏ yinni akiḏes?

⁴Yuḏef ɣar ṯemziḏa n Arebbi yufa ḏinni aɣrum nni iy iǧan ḏ ṣṣeḏqeṯ icca netta yuca-asen i yinni akiḏes; waxxa manayenni war iǧi ca ḥalal ɣir i ȓfuqaha waha."

⁵Inna-asen Ƹisa: "Mmis n bnaḏem ig iǧan ḏ lḥakem ḥetta x nhar n ssebṯ n lƹibada."

⁶Ijjen n nhar n ssebṯ n lƹibada nneɣni, yuḏef Ƹisa ɣar yijjen n ṯemziḏa n Ayṯ-Israʼil ibḏa iseȓmaḏ. Ḏinni ijjen n uryaz fus nnes afusi immuṯ.

⁷Imseȓmaḏen n ccariƹa ḏ ȓḥizeb n ifarrisiyen tlaḥaḍen xas ma aṯ isgenfa ma lla ḏi nhar n lƹibada ḥima aṯ tahmen.

⁸Ƹisa issen min ɣarsen ḏi ȓaƹquȓaṯ nsen, inna-as i uryaz nni iy ɣar iǧa fus immuṯ: "Kkar bedd ḏi ȓwesṭ." Aryaz nni ikkar ibedd ḏinni.

⁹Inna-asen Ƹisa: "Akenniw sseqsiɣ: Ḏi nhar n lƹibada ma ḥalal a negg ȓxir niɣ a negg ccarr? A nsenjem nnefs niɣ aṯ nneɣ?"

¹⁰Ixzar ɣarsen marra ij-ij, inna-as i uryaz nni: "Sarreḥ fus nnec!" Isarreḥ-iṯ uca iḏweȓ ufus nnes igenfa.

¹¹Niṯni min ggin? Ɣeḍben aṭṭas mcawaren jarasen min ɣa ggen i Ƹisa.

¹²Ḏeg wussan nni, igaƹƹeḏ Ƹisa ɣar uḏrar aḏ iẓẓaǧ iqqim ḏinni ǧiȓeṯ ṯekmaȓ itẓaǧa i Arebbi.

¹³Wami iṣbaḥ ȓḥaȓ, iȓaɣa-d x imeḥḍaren nnes ixḍar ṯenƹac zzaysen iggi-ṯen ḏ arrusul.

¹⁴Ḏinni Simƹan, isemma-ṯ Buṭrus, ḏ wumas Andrus, ḏ Yaƹqub, ḏ Yuḥanna, ḏ Filippas, ḏ Bartulumay,

¹⁵ḏ Matta, ḏ Tuma, ḏ Yaƹqub mmis n Ḥalfa, ḏ Simƹan umi qqaren <Lmunaḍil>,

¹⁶ḏ Yahuḏa mmis n Yaƹqub, ḏ Yahuḏa Isxaryuṭi iƹni wenni izzenzen Ƹisa.

¹⁷Ihwa-d Ƹisa ibedd ḏeg yijjen n umcan ḏ ȓewḍa. Ḏinni aṭṭas n imeḥḍaren nnes ḏ waṭṭas n yiwḏan zi ṯmurṯ n Yahuḏiya ṯekmaȓ, zi Lquds, ƹaweḏ zi Ṣur ḏ Ṣayda ig iǧan x uɣezḏis n ȓebḥar.

¹⁸Usin-d ɣares ḥima aḏ sȓan i wawaȓ nnes, ƹaweḏ ḥima aṯen isgenfa zi ȓehȓacaṯ nsen. Yinni itƹeddaben s jnun ḏ iƹeffanen uȓa ḏ niṯni tgenfan.

¹⁹Xsen marra ȓɣaci nni aṯ ḥaḏan minzi ijjen n jjheḏ iteffeɣ-d zzayes, isgenfa-ṯen marra iḏsen.

²⁰Iysi ṯiṭṭawin nnes Ƹisa ɣar imeḥḍaren nnes inna-asen: "Ssaƹḏ nwem a ȓmusakin, aqa ȓmulk n Arebbi i kenniw.

²¹Ssaƹḏ nwem a yinni iǧuzen, aqa aḏ tejjawnem. Ssaƹḏ nwem a yinni itrun, aqa aḏ tḍeḥcem.

²²Ssaƹḏ nwem meȓa tƹiffan-kenniw yiwḏan, war kenniw qebȓen ssawaȓen ḏaywem s ȓƹib, tzawaren-kenniw ƹlaḥsab Mmis n bnaḏem.

²³Ḏi Nhar nni farḥem negzem s ȓefraḥeṯ ȓaḥeqqac aɣarwem yiȓi ijjen n lʼajar ḏ ameqqran ḏeg ujenna minzi ammu iy iggin ȓejḏuḏ nsen i lʼanbiya.

²⁴Walakin, ya ȓefḍiḥeṯ nwem a twajar, minzi ṯƹicem min ṯƹicem.

²⁵Ya ȓefḍiḥeṯ nwem a yinni ijjiwnen ȓexxu, minzi akenniw iȓqef jjuƹ. Ya ȓefḍiḥeṯ nwem a yinni iḍeḥcen ȓexxu, minzi aḏ txeyyqem aḏ trum.

²⁶Ya ȓefḍiḥeṯ nwem meȓa tcekkaren-kenniw yiwḏan minzi ammu iy iggin ȓejḏuḏ nsen i yinni itarran ixef nsen ḏ lʼanbiya.

²⁷Aḏawem iniɣ a yinni itesȓan: Xseṯ ȓƹaḏyan nwem, ggeṯ ȓxir ḏeg yinni kenniw itƹiffan.

²⁸Barkeṯ wenni iy kenniw ineƹȓen, ttareṯ i Arebbi x yinni kenniw itƹeddaben.

²⁹Wenni c ɣa yuwṯan ɣar umeggiz nnec, uc-as cek uȓa ḏ ameggiz nnec nneɣni. Wenni ḏac ɣa iysin azeǧab nnec, ejj-iṯ cek aḏac iysi uȓa ḏ ṯaqmijat nnec.

³⁰Wenni ḏac ɣa ittaren can ṯmesȓayṯ, uc-as-t. Wenni ḏac ɣa ikksen ṯimesȓayin nnec, war ṯ tettar ca aḏac ṯent yarr.

³¹Mammec texsem aḏawem ggen yiwḏan, uȓa ḏ kenniw ggem-asen amenni.

³²Meȓa kenniw texsem ɣir yinni iy kenniw itexsen, man lʼajar iy ɣarwem? Iwa uȓa ḏ yinni iƹeṣṣan texsen yinni ṯen itexsen.

³³Meȓa teggem ȓxir ɣir ḏeg yinni iy ḏaywem iteggen ȓxir, man lʼajar iy ɣarwem? Uȓa ḏ yinni iƹeṣṣan teggen manaya.

³⁴Meȓa ṯerḍȓem i yinni ṯessnem aḏawem d arren, man lʼajar iy ɣarwem? Uȓa ḏ yinni iƹeṣṣan reṭṭȓen i yinni iƹeṣṣan ḥima aḏ d arren amarwas nsen.

³⁵Walakin xseṯ ȓƹaḏyan nwem, ggeṯ ḏaysen ȓxir. Reḍȓeṯ war trajaṯ walu. Uca aɣarwem yiȓi lʼajar ḏ ameqqran, aḏ tiȓim ḏ ṯarwa n Arebbi Yuƹȓan. Minzi netta ḏ aṣebḥan ak yinni war ṯ itcekkaren ca ḏ yinni iteggen ccarr.

³⁶Reḥmeṯ iwḏan mammec ireḥḥem Babaṯwem.

³⁷War tƹeyyabem ḥadd ḥima war kenniw itƹeyyib ca Arebbi. War tzawaȓem ḥadd ḥima war kenniw itzawaȓ ca Arebbi. Semḥem i yiwḏan, aḏawem iɣfar Arebbi.

³⁸Ucem-asen i yiwḏan, ataf aḏawem immuc. Aḏawem immuc ȓaƹbar ḏ aṣebḥan ḏeg waḥsi n uzeǧab nwem, aṯ shezzen aṯ ḏekknen ḥetta aḏ infeyyeḍ. Ȓaƹbar iy ṯsexḏamem ḏ wenni iy kiḏwem ɣa isexḏem Arebbi."

³⁹Issiweȓ akiḏsen ƹaweḏ Ƹisa s yijjen n ȓmaƹna inna-asen: "Aḍarɣaȓ, ma aḏ ijarr aḍarɣaȓ? Ma war weṭṭin ca s ṯnayen iḏsen ḏi can ṯesrafṯ?

⁴⁰Ameḥḍar war iǧi ca ḏ ameqqran x lmuƹallim nnes. Walakin mkuȓ ameḥḍar ig ikemmȓen ṯɣuri nnes itiȓi amecnaw lmuƹallim nnes.

⁴¹Mayemmi tseḥqareḏ cwayt n uȓum ig iǧan ḏi ṯiṭṭ n wumac, cek tettuḏ akeccuḍ ig iǧan ḏi ṯiṭṭ nnec?

⁴²Mammec teggeḏ ṯzeƹƹmeḏ aḏ tiniḏ i wumac: Ay uma, ejj-ayi aḏac d kkseɣ ȓum-a ig iǧan ḏi ṯiṭṭ nnec, cek ƹaḏ tejjiḏ akeccuḍ ḏi ṯiṭṭ nnec? A lmunafiq, kkes ḏ amezwaru akeccuḍ zi ṯiṭṭ nnec. Ƹaḏ iy ɣa ṯetwaȓiḏ mliḥ ḥima aḏ tekkseḏ ȓum ig iǧan ḏi ṯiṭṭ n wumac!

⁴³War ṯeǧi ṯcejjarṯ ṯaṣebḥant tarew min iǧan ḏ aƹeffan. War ṯeǧi ƹaweḏ ṯcejjarṯ ṯaƹeffant tarew min iǧan ḏ aṣebḥan.

⁴⁴Minzi kuȓ ṯacejjarṯ ṯḍehhar-d s min tarew. War d ȓeqḏen bu ṯazarṯ zeg isennanen. War d tekksen bu uḍiȓ zi ṯzeggwarṯ.

⁴⁵Bnaḏem aṣebḥan isufuɣ-d min iǧan ḏ aṣebḥan zi ȓkenz aṣebḥan n wuȓ nnes. Bnaḏem aƹeffan isufuɣ-d min iǧan ḏ aƹeffan zi ȓkenz aƹeffan n wuȓ nnes. Ȓaḥeqqac aqemmum n bnaḏem issawaȓ min iǧan ḏeg wuȓ nnes.

⁴⁶Mayemmi ḏayi ṯeqqarem a Siḏi, a Siḏi u kenniw war teggem min ḏawem qqareɣ?

⁴⁷Marra wenni ɣari d itasen itesȓa i wawaȓ inu ixeddem zzayes ataf aḏawem iniɣ mindi itcabbah.

⁴⁸Itcabbah ḏeg yijjen n uryaz ig ibennan ṯaddarṯ nnes, iɣza aṭṭas igga dsas x uzru. Wami d iḥmeȓ iɣzar iƹḏu x ṯeddarṯ nni, war izemmar at isenhezz minzi ṯebna mliḥ.

⁴⁹Wenni itsȓan i wawaȓ inu war zzayes ixeddem ca ataf itcabbah ḏeg yijjen n uryaz ibna ṯaddarṯ nnes x ucaȓ bȓa dsas. Wami xas iƹḏu iɣzar nni ṯewḍa ḏeɣya ḏ abriḏ, ṯeqqim ḏ ȓxirbeṯ."