Read Tarifit Luqa 7 Bible Online

Luqa 7 - Tarifit bible

Luqa 7

¹Wami ikemmeȓ Ƹisa awaȓ nnes ak yiwḏan iy tuɣa ḏas itesȓan, yuḏef ɣar ubilaj n Kafernaḥum.

²Ḏinni ijjen n uƹaskari ḏ ameqqran n arrumanus ɣares ijjen n uxeddam itƹewwaȓ xas aṭṭas, walakin axeddam nni ihȓec ƹȓayen aḏ immeṯ.

³Wami isȓa x Ƹisa issekk ɣares ca n ȓecyux n Ayṯ-Israʼil ḥima aṯ ḥeccmen aḏ d yas aḏ isgenfa axeddam nnes.

⁴Wami d usin ɣar Ƹisa ḥeccmen-ṯ nnan-as: Bnaḏem-a isḏaheǧ aṯ tƹawneḏ

⁵minzi itexs ccaƹb nneɣ ƹaweḏ ibna ṯamziḏa nneɣ.

⁶Ikkar Ƹisa iruḥ akiḏsen. Wami iqarreb ɣar ṯeddarṯ nni issekk-d ɣares uƹaskari nni can imeddukaȓ nnes inna-as: "A Siḏi ṯƹeddbeḏ ixef nnec waha, nec war sḏihiǧeɣ ca aḏ taḏfeḏ ɣar ṯeddarṯ inu.

⁷X manaya nec ḥesbeɣ ixef inu war sḏihǧeɣ ca aḏ d aseɣ ɣarek. Ini ɣir ijjen n wawaȓ u ṣafi ataf aḏ igenfa uxeddam inu.

⁸Uȓa ḏ nec s yixef inu ɣari yinni xafi iḥekkmen. Ɣari ȓƹaskar x ufus inu ḥekkmeɣ xasen. Aḏ iniɣ i yijjen: Ruḥ, aḏ iraḥ. Aḏ iniɣ i yijjen: Araḥ-d, aḏ d yas. Aḏ iniɣ i uxeddam inu: Egg ṯa, at igg."

⁹Wami isȓa Ƹisa i manayenni itƹejjeb ḏayes aṭṭas, ineqȓeb ɣar ȓɣaci iy ṯ iḏfaren inna-asen: "Aḏawem iniɣ: Yinni iǧan zi Ayṯ-Israʼil war ḏaysen ufiɣ bu lʼiman imɣar aṭṭas am wanita!"

¹⁰Yinni issekk uƹaskari nni ḏewȓen ɣar ṯeddarṯ ufin axeddam igenfa.

¹¹Ṯiwecca nnes iruḥ Ƹisa ɣar yijjen n ubilaj qqaren-as Naƹin, akiḏes imeḥḍaren nnes ḏ ȓɣaci aṭṭas.

¹²Wami iqarreb ɣar ṯewwarṯ n ubilaj, yufa ḏinni ysin-d ijjen n umettin aṯ neḍȓen. Netta iy ɣares ɣar yemmas waḥḏes, nettaṯ ḏ ṯajjaȓṯ. Akiḏes ḏinni aṭṭas n ȓɣaci zeg ubilaj nni.

¹³Wami t iẓra Siḏiṯneɣ ṯeqqes-as inna-as: "War tru ca!"

¹⁴Iqarreb ɣar ȓmeḥmeȓ iḥaḏa-ṯ, bedden yinni ṯ iysin. Inna: "Kkar ay aḥenjir."

¹⁵Ikkar-d umettin nni ibḏa issawaȓ, yarr-iṯ Ƹisa i yemmas.

¹⁶Marra ggwḏen semɣaren Arebbi nnan: "Imeḍhar-d jaraneɣ ijjen n nnabi ḏ ameqqran. Arebbi ifqeḏ ccaƹb nnes!"

¹⁷Iffeɣ ȓexbar-a x Ƹisa ḏi marra ṯamurṯ n Yahuḏiya ḏ marra jwayeh iy ḏas d innḍen.

¹⁸Yaḥya yarra-d ȓexbar x marra manaya zeg imeḥḍaren nnes. Iȓaɣa-d x ṯnayen zzaysen

¹⁹issekk-iṯen ɣar Siḏiṯneɣ ḥima aḏas inin ma ḏ cek iy xef netsȓa aḏ d taseḏ niɣ a nraja can yijjen nneɣni?

²⁰Wami d usin ṯnayen nni n iryazen ɣar Ƹisa, nnan-as qa isqaḏ-aneɣ-d ɣarek Yaḥya ac nesseqsa: Ma ḏ cek iy netraja aḏ d taseḏ niɣ ḏ can yijjen nneɣni?

²¹Ḏi ȓweqṯ nni isgenfa Ƹisa aṭṭas n imehȓac ḏ yinni ḏi iǧa ȓeḥȓiq ḏ yinni ḏi ǧan jnun ḏ iƹeffanen. Ƹaweḏ yarra aṭṭas n iḍarɣaȓen twaȓan.

²²Inna-asen Ƹisa: "Ƹeqbeṯ ɣar Yaḥya ƹawḏem-as min twaȓam ḏ min tesȓam: iḍarɣaȓen twaȓan, izeḥḥafen gguren, yinni iy ḏi iǧa jḏam genfan, iḏehcuren tesȓan, yinni immuṯen tnekkaren-d, ȓmusakin twabeccaren.

²³Ssaƹḏ n yinni war ḏayi itcekkin ca."

²⁴Ṣafi rewwḥen yinni issekk Yaḥya, Ƹisa ibḏa issawaȓ x Yaḥya iqqar-asen i ȓɣaci nni: "Minxef ṯeffɣem aḏ teẓrem ḏi ȓexȓa? Ma ɣar yij uɣanim ithezza-ṯ arriḥ? Lla!

²⁵Meȓa lla, minxef ṯeffɣem aḏ teẓrem? Ma ḏ ijjen n uryaz yareḍ arruḍ ḏ aṣebḥan? Lla, yinni iy ɣar iǧa warruḍ ḏ aṣebḥan tƹicen mliḥ tiȓin ḏi ȓquṣur n izeǧiḏen!

²⁶Meȓa lla, minxef ṯeffɣem aḏ teẓrem? Ma ḏ ijjen n nnabi? Qqareɣ-awem: Wah, netta ktar zeg yijjen n nnabi.

²⁷Ḏ Yaḥya iy xef issawaȓ Lkitab: <Aqa tsekkiɣ-d ijjen n arrasul inu zzaṯec, ḥima aḏac isewjeḏ abriḏ nnec.>

²⁸Aqa tesȓam: Zi min d jjint ṯemɣarin war iǧi ḥadd ḏ ameqqran zi Yaḥya, walakin wenni iy iǧan ḏ amezyan qaƹ ḏi ȓmulk n Arebbi netta ḏ ameqqran zi Yaḥya."

²⁹Marra iwḏan tesȓan xas, uȓa ḏ iƹeccaren niṯni s yixef nsen ƹtarfen belli manaya iǧa nican minzi niṯni twaṭehharen s waman ƹlaḥsab Yaḥya.

³⁰Walakin ȓḥizeb n ifarrisiyen ḏ yinni itcerraḥen ccariƹa war xisen ca min ixes Arebbi, ugin aṯen iṭehhar Yaḥya s waman.

³¹"X manaya wi ḏi ɣa cabbheɣ iwḏan n ȓweqṯ-a? Minḏi tcabbahen?

³²Niṯni am ca n iḥenjiren iy iqqimen ḏi ssaḥa tȓaɣan i wayawya qqaren: Netṣuḍ ḏi ṯemja, war ṯecḍiḥem ca. Netƹezza-kenniw, war ṯetrum ca.

³³Minzi Yaḥya yusa-d itẓumma war isess aman n uḍiȓ kenniw ṯennim aqa ḏayes jnun!

³⁴Yusa-d Mmis n bnaḏem itett isess war itẓummi ca. Kenniw ṯennim aqa bnaḏem-a itett isess aṭṭas, ƹaweḏ netta ḏ ameddukeȓ n iƹeccaren ḏ yinni iƹeṣṣan.

³⁵Innama, ȓefhameṯ n Arebbi qebbȓen-teṯ marra yinni itefhamen."

³⁶Ij ufarrisi iƹareḍ Ƹisa ḥima aḏ icc akiḏes. Yuḏef ɣar ṯeddarṯ n ufarrisi nni iqqim ɣar missa.

³⁷Ḏinni ḏeg ubilaj nni ijjen n ṯemɣarṯ ṯƹeṣṣa. Ṯarra-d ȓexbar Ƹisa iqqim aḏ icc ḏi ṯeddarṯ n ufarrisi nni, ṯusa-d nettaṯ ɣares ijjen n ṯzeyyat ḏayes aman n lwarḏ.

³⁸Ṯeqqim ɣar ḏeffar n Ƹisa ɣar iḍaren nnes ṯebḏa ṯetru wḍan-as imeṭṭawen nnes x iḍaren n Ƹisa. Ṯruḥ ṯemseḥ-iṯen s ucewwaf nnes, ṯseǧem-iṯen ṯeḏhen-iṯen s waman n lwarḏ.

³⁹Afarrisi nni iy ṯ iƹarḍen wami iẓra manaya inna ḏi nnefs nnes: Wanita maƹlik ḏ nnabi ataf aḏ issen min ṯeƹna ṯemɣarṯ-a iy ṯ itḥaḏan, nettaṯ ṯeƹṣa Arebbi.

⁴⁰Indeq-d Ƹisa inna-as: "A Simƹan, ɣari ij n ȓḥajeṯ aḏac t iniɣ." Inna-as Simƹan: "Siweȓ a Lmuƹallim."

⁴¹"Ḏinni ijjen n ssiyyed irḍeȓ tmenyaṯ i ṯnayen n yiwḏan. Ijjen irḍeȓ-as xemsmiyya dinar, ijjen irḍeȓ-as xemsin dinar.

⁴²Walakin war ɣarsen minzi ɣa arren, ṣafi ssiyyed nni ismeḥ-asen marra. In-ayi cek: Manwen iy ṯ ɣa iḥibben aṭṭas?"

⁴³Inna-as Simƹan: "Imken wenni umi ismeḥ ḏeg waṭṭas n umarwas." Inna-as Ƹisa: "Ɣarek ȓḥaqq."

⁴⁴Ineqȓeb ɣar ṯemɣarṯ nni inna-as i Simƹan: "Aqa twaȓiḏ ṯamɣarṯ-a? Usiɣ-d ɣar ṯeddarṯ nnec war ḏayi d ṯuwiḏ cek uȓa ḏ aman iy zi ɣa sirḏeɣ iḍaren inu. Nettaṯ ṯsireḏ-ayi iḍaren inu s imeṭṭawen nnes ṯemseḥ-iṯen s ucewwaf nnes.

⁴⁵Cek war xafi ṯseǧmeḏ ca. Zeg wami d usiɣ nettaṯ ṯseǧam-ayi iḍaren inu.

⁴⁶Cek war ḏayi ṯeḏhineḏ azeǧif uȓa s zzect. Nettaṯ ṯeḏhen-ayi iḍaren inu s waman n lwarḏ.

⁴⁷X manaya aḏac iniɣ, ȓmuƹṣiyaṯ nni iy ṯegga aṭṭas twaɣfarent-as minzi nettaṯ ḏayes ȓemḥibbeṯ aṭṭas. Wenni umi twaɣfarent ȓmuƹṣiyaṯ ḏrus, netta ḏayes ȓemḥibbeṯ ḏrus."

⁴⁸Inna-as i ṯemɣarṯ nni: "Ȓmuƹṣiyaṯ nnem twaɣfarent-am."

⁴⁹Bḏan yinni iy kis iqqimen qqaren i wayawya: "Min iƹna wanita ig iɣfaren ȓmuƹṣiyaṯ-a?"

⁵⁰Inna-as Ƹisa i ṯemɣarṯ nni: "Cem isenjem-icem lʼiman nnem, ruḥ ḏi ȓehna."