Read Tarifit Yuḥanna 10 Bible Online

Yuḥanna 10 - Tarifit bible

Yuḥanna 10

¹"Aqa tesȓam ȓḥaqq: Wenni war itiḏfen ca zi ṯewwarṯ n ȓkuri n iḥuȓiyen itgaƹƹaḏ manis nneɣni, netta itwaḥsab ḏ aceffar ḏ axewwan.

²Walakin wenni d ɣa yaḏfen zi ṯewwarṯ netta ig yarewwsen iḥuȓiyen nnes.

³Aƹessas n ȓkuri aḏas irzem ṯawwarṯ i wenni iy yarewwsen, iḥuȓiyen nnes tesȓan i ṣṣut nnes. Itȓaɣa x iḥuȓiyen nnes s yisemawen nsen, aṯen isufeɣ.

⁴Aḏ isufeɣ marra iḥuȓiyen nnes iggur zzaṯsen, iḥuȓiyen nni ḏeffaren-ṯ minzi ssnen ṣṣut nnes.

⁵Walakin aṯarras n midden war ṯ ḏeffaren ƹemmarṣ, azzayes arewȓen minzi niṯni war ssinen ca ṣṣut n uṯarras n midden."

⁶Inna-asen Ƹisa ȓmiṯal-a, walakin niṯni war fhimen ca ṯimesȓayin mixef iy ḏasen issawaȓ.

⁷Inna-asen Ƹisa ƹaweḏ: "Aqa tesȓam ȓḥaqq: Nec ḏ ṯawwarṯ n ȓkuri.

⁸Marra yinni d yusin qbeȓ i nec niṯni twaḥasben ḏ iceffaren ḏ ixewwanen, iḥuȓiyen niṯni war ɣarsen sȓin ca.

⁹Nec ḏ ṯawwarṯ, wenni zzayi ɣa yaḏfen aḏ injem. Aḏ yiȓi amecnaw ijjen n uḥuȓi itaḏef iteffeɣ itaf min ɣa icc.

¹⁰Netta aceffar itas-d ɣir aḏ yacar aḏ ineɣ aḏ ihḏem. Nec usiɣ-d ḥima aɣarsen ṯiȓi ṯuḏarṯ nni n ṯuḏarṯ bȓa ȓeqyas.

¹¹Nec ig yarewwsen ḏ ṣṣaḥ. Wenni ig yarewwsen ḏ ṣṣaḥ itṣeddaq ṯuḏarṯ nnes x iḥuȓiyen nnes.

¹²Axeddam maci am wenni yarewwsen iḥuȓiyen nnes nniṯ. Axeddam, meȓa iẓra uccan yusa-d aḏ ismeḥ ḏeg iḥuȓiyen nni aḏ yarweȓ. Uccan aḏ ihjem x iḥuȓiyen aṯen iƹzeȓ x wayawya.

¹³Axeddam aḏ yarweȓ minzi netta ḏ axeddam waha, war ṯ thimmin ca iḥuȓiyen.

¹⁴Nec ḏ wenni iy ṯen yarewwsen ḏ ṣṣaḥ. Ssneɣ iḥuȓiyen inu iḥuȓiyen inu ssnen-ayi, mammec ḏayi issen Baba nec ssneɣ-ṯ. Ṯuḏarṯ inu, tṣeddaqeɣ-t x iḥuȓiyen inu.

¹⁶Ɣari iḥuȓiyen nneɣni war ǧin ca ḏi ȓkuri-ya, itxeṣṣa-ayi aṯen d awiɣ. Aḏ sȓen i ṣṣut inu aḏ tiȓi ḏ ijjen n ṯḥimerṯ ḏ ijjen iy ṯen ɣa yarewsen.

¹⁷S manaya Baba itḥibba-ayi minzi nec tṣeddaqeɣ ṯuḏarṯ inu ḥima ƹaweḏ atid arreɣ.

¹⁸Uȓa ḏ ijjen war zzayi t itekkes ca; Lla, nec tṣeddaqeɣ ṯuḏarṯ inu s ȓxaḍar inu. Ɣari jjheḏ ḥima at ṣeddqeɣ. Ɣari jjheḏ ḥima atid arreɣ ƹaweḏ. Ammu iy ḏayi iweṣṣa Baba."

¹⁹Iwqeƹ lxilaf ƹaweḏ jar israʼiliyen x wawaȓen-a.

²⁰Nnan aṭṭas zzaysen: "Wanita ḏayes jnun. Netta ḏ abuhaȓi, mayemmi ɣares tesȓam?"

²¹Nnan inneɣni: "Awaȓen-a war ṯen iqqar ca wenni iy ḏi ǧan jnun. Ma izemmar can yijjen zi jnun aḏ isgenfa ṯiṭṭawin n iḍarɣaȓen?"

²²Yuweḍ-d Ȓƹiḏ lmilad n ṯemziḏa ṯameqqrant n Ayṯ-Israʼil ḏi Lquds. Manaya ḏi ȓmecta,

²³Ƹisa iggur ḏeg Useqqif n Suliman ḏi ṯemziḏa ṯameqqrant.

²⁴Munen xas israʼiliyen nnan-as: "Aȓ meȓmi c ɣa nraja? Meȓa cek ḏ Lmasiḥ, ini-yaneɣ-ṯ nican!"

²⁵Inna-asen Ƹisa: "Nniɣ-awem-ṯ, kenniw war timnem ca. Ȓexḏayem iy teggeɣ ƹlaḥsab isem n Baba cehhḏent xafi.

²⁶Walakin kenniw war timnem ca minzi war ṯeǧim ca ḏ iḥuȓiyen inu.

²⁷Iḥuȓiyen inu tesȓan ɣar ṣṣut inu, ssneɣ-ṯen niṯni ḏeffaren-ayi.

²⁸Ticceɣ-asen ṯuḏarṯ n ȓebda ƹemmarṣ war fennin ca, war ṯen ixeṭṭef uȓa ḏ ijjen zeg ufus inu.

²⁹Ḏ Baba iy ḏayi ṯen yucin u netta ḏ ameqqran zi kuȓci. War izemmar uȓa ḏ ijjen aṯen ixḍef zeg ufus n Baba.

³⁰Nec ḏ Baba ḏ ijjen."

³¹Israʼiliyen nni ysin-d ƹaweḏ izra aṯ rejmen.

³²Inna-asen Ƹisa: "Sbeyyneɣ-awem-d aṭṭas n ȓexḏayem ṯiṣebḥanin zi Baba, mant ȓxeḏmeṯ iy ṯexsem aḏayi ṯrejmem xas?"

³³Nnan-as israʼiliyen: "War c nrejjem ca x ȓxeḏmeṯ iṣebḥan; Lla, ac nerjem wami ṯenniḏ lbuhtan x Arebbi. Qa cek ḏ bnaḏem, ṯarriḏ ixef nnec ḏ Arebbi."

³⁴Inna-asen Ƹisa: "Ma ṯura niɣ lla ḏi ccariƹa nwem belli Arebbi inna: <Nec nniɣ-awem kenniw ḏ arebbiṯen>!?

³⁵Netta iy ḏasen iqqaren <arebbiṯen> i yinni umi d yusa wawaȓ n Arebbi, u Lkitab ȓebda iqqar ȓḥaqq.

³⁶Ma ṯeqqarem i wenni ixḍar Baba issekk-iṯ-iḏ ɣar ddunect cek ṯenniḏ lbuhtan x Arebbi minzi nniɣ nec ḏ Mmis n Arebbi?

³⁷Meȓa war xḏimeɣ ca ȓexḏayem n Baba, war zzayi tamneṯ ca.

³⁸Meȓa xeḏmeɣ-ṯent, amneṯ zi ȓexḏayem nni waxxa war zzayi ṯuminem. Ammu aḏ tessnem qa Baba aqaṯ ḏayi, nec aqayi ḏi Baba."

³⁹Rezzun aṯ ṭṭfen walakin inufseȓ-asen jar ifassen nsen.

⁴⁰Iḏweȓ ƹaweḏ ɣar ujemmaḍ-in n yiɣzar n Lʼurdun ɣar umcan mani tuɣa itṭehhar Yaḥya ḏeg umezwaru, iqqim ḏinni.

⁴¹Usin-d ɣares aṭṭas nnan, Yaḥya war iggi uȓa ḏ ijjen n lmuƹjiza, walakin marra min inna x wanita ḏ ṣṣaḥ.

⁴²Umnen zzayes aṭṭas n yiwḏan ḏinni.