Read Tarifit Yuḥanna 11 Bible Online

Yuḥanna 11 - Tarifit bible

Yuḥanna 11

¹Ijjen n bnaḏem qqaren-as Liƹazar ihȓec, netta zeg ubilaj nni umi qqaren Bayt Ƹanya. Zeddɣent ḏinni suyṯmas, icten qqaren-as Maryam icten qqaren-as Marṯa.

²Maryam ḏ nettaṯ ig iḏehnen iḍaren n Ƹisa s waman n lwarḏ ṯemseḥ-as-ṯen s ucewwaf nnes. Umas n Maryam Liƹazar ihȓec.

³Suyṯmas nni ssekkent-id ɣar Ƹisa nnant-as a Siḏi, qa wenni xak iƹizzen qa ihȓec.

⁴Wami isȓa i manayenni Ƹisa inna ȓeḥȓac-a war d yusi ca ḥima aḏ immeṯ; Lla, yusa-d ḏ ssabab i lƹaḍama n Arebbi ḥima azzayes itwasemɣar Mmis n Arebbi.

⁵Tuɣa ƹizzen xas x Ƹisa Marṯa ḏ učmas ḏ umas Liƹazar.

⁶Wami isȓa netta qa ihȓec, iqqim ḏinni yumayen mani iǧa.

⁷Menbaƹd i manaya inna-asen i imeḥḍaren nnes: "Yallah a neḏweȓ ƹaweḏ ɣar ṯmurṯ n Yahuḏiya."

⁸Nnan-as imeḥḍaren: "Mammec a Lmuƹallim? Israʼiliyen nni tuɣa rezzun ac rejmen, cek ṯexseḏ aḏ tƹeqbeḏ ḏinni?"

⁹Inna-asen Ƹisa: "Ḏinni ṯenƹac n swayaƹ n ṯfawṯ ḏi nhar. Wenni igguren ḏi nhar war itneqriḍ ca minzi itwaȓa ṯfawṯ n ddunect-a.

¹⁰Meȓa can yijjen iggur s ǧiȓeṯ itneqraḍ minzi ǧiȓeṯ war ḏayes bu ṯfawṯ."

¹¹Wami inna manaya, yarni inna-asen: "Ameddukeȓ nneɣ Liƹazar qa iṭṭeṣ, aḏ raḥeɣ aṯiḏ sfaqeɣ."

¹²Nnan-as imeḥḍaren: "A Siḏi, meȓa netta iṭṭeṣ aḏ ikkar nniṯ."

¹³Walakin Ƹisa issiweȓ x ȓmewṯ nnes, niṯni tɣir-asen issawaȓ x arraḥeṯ nni n yinni iṭṭṣen.

¹⁴Uca inna-asen nican: "Qa Liƹazar immuṯ.

¹⁵Nec farḥeɣ wami war ḏinni ǧiɣ ḥima aḏ tamnem. Yallah aɣares nraḥ."

¹⁶Tuma iƹni wenni umi qqaren Acniw[6] inna-asen i imeḥḍaren iy iǧan ḏ imeddukaȓ nnes: "Akis nuyur uȓa ḏ neccin akiḏes nemmeṯ."

¹⁷Wami d yusa Ƹisa, yufa ṯeƹḏu arbeƹiyyam zeg wami itwanḍeȓ.

¹⁸Bayt Ƹanya ṯeggwej ṯȓaṯa kilumit x Lquds.

¹⁹Aṭṭas n israʼiliyen usin-d ɣar Marṯa ḏ Maryam ḥima aṯent ƹezzan x umaṯsent.

²⁰Wami ṯesȓa Marṯa qa Ƹisa iggur-d, ṯruḥ aṯ teȓqa walakin Maryam ṯeqqim ḏi ṯeddarṯ.

²¹Ṯenna-as Marṯa i Ƹisa: "A Siḏi, maƹlik aqac ḏanita iȓi war immuṯ ca uma.

²²Nec ssneɣ belli ƹaḏ ȓexxu qa Arebbi aḏac yuc min ma ṯettareḏ-as."

²³Inna-as Ƹisa: "Aḏ d ikkar ƹaweḏ wumam."

²⁴Ṯenna-as Marṯa: "Ssneɣ aḏ d ikkar ḏi ȓweqṯ n Lqiyama ḏi Nhar Aneggaru."

²⁵Inna-as Ƹisa: "Nec ḏ lqiyama nec ḏ ṯuḏarṯ, wenni itamnen zzayi ataf aḏ iddar waxxa immuṯ.

²⁶Marra wenni iddaren u netta itamen zzayi ataf war itmetti i ȓebda. Ma ṯumneḏ zi manaya?"

²⁷Ṯenna-as: "Wah a Siḏi. Nec umneɣ qa cek ḏ Lmasiḥ, cek ḏ Mmis n Arebbi, cek ḏ wenni iy d itasen ɣar ddunect."

²⁸Wami ṯenna manaya, ṯruḥ ṯȓaɣa-d i učmas s ȓḥess ṯenna-as: "Lmuƹallim yusa-d irezzu xam."

²⁹Wami ṯesȓa manaya, ṯekkar s ṯazȓa ṯraḥ ɣares.

³⁰Ƹisa ƹaḏ war d yusi ca ɣar ubilaj, aqaṯ ḏeg umcan mani ṯ teȓqa Marṯa.

³¹Israʼiliyen nni aqaṯen ak Maryam ḏi ṯeddarṯ tƹezzan-t. Wami ẓrin Maryam ṯekkar s ṯazȓa ṯeffeɣ niṯni ḏfaren-t tɣir-asen aḏ traḥ ɣar unḍeȓ aḏ tru ḏinni.

³²Wami d tusa Maryam mani iǧa Ƹisa, ṯeẓri-ṯ ṯewḍa-yas ɣar iḍaren nnes ṯenna-as: "A Siḏi, maƹlik aqac ḏanita iȓi war immuṯ ca uma."

³³Ƹisa wami t iẓra ṯetru ḥetta ḏ israʼiliyen nni iy kiḏes d yusin uȓa ḏ niṯni trun, netta uȓ nnes iɣȓeb-iṯ ixeyyeq ḏi nnefs nnes.

³⁴Inna-asen: "Mani ṯ tneḍȓem?" Nnan-as: "Araḥ-d a Siḏi aḏ teẓreḏ."

³⁵Ƹisa itru.

³⁶Nnan israʼiliyen nni xzarem mecḥaȓ tuɣa xas iƹizz.

³⁷Nnan ȓebƹaḍ zzaysen qa ḏ wanita iy isgenfan ṯiṭṭawin n uḍarɣaȓ, ma war izemmar ataf igga can ȓḥajeṯ bac war itmetti ca Liƹazar?

³⁸Ƹisa iziǧez-as ƹaweḏ ḏeg wuȓ nnes, yusa-d ɣar yifri n unḍeȓ yufa xas azru.

³⁹Inna Ƹisa: "Sbeƹƹḏeṯ xas azru-ya." Ṯenna-as Marṯa učmas n wenni immuṯen: "A Siḏi, qa yurṣuḍ ȓaḥeqqac ṯeƹḏu xas arbeƹiyyam zeg wami immuṯ."

⁴⁰Inna-as Ƹisa: "Yac nniɣ-am, meȓa ṯumneḏ aḏ teẓreḏ lƹaḍama n Arebbi?"

⁴¹Uca niṯni sbeƹƹḏen azru nni. Iysi Ƹisa ṯiṭṭawin ɣar ujenna inna: "Tcekkareɣ-cek a Baba ṯestajbeḏ-ayi.

⁴²Nec ssneɣ qa cek ȓebda testajabeḏ-ayi, walakin nec qqareɣ manaya ƹlaḥsab x ȓɣaci-ya iy ḏayi d innḍen, ḥima aḏ amnen belli qa ḏ cek iy ḏayi d issekken."

⁴³Wami inna manaya, iȓaɣa s jjheḏ inna: "A Liƹazar, ffeɣ-d ssenni!"

⁴⁴Iffeɣ-d wenni immuṯen, inneḍ-as ȓecfen x ifassen ḏ iḍaren x uɣembub nnes xas ȓqabb. Inna-asen Ƹisa: "Kksem xas ȓecfen nni, jjem-ṯ aḏ yuyur."

⁴⁵Aṭṭas n israʼiliyen iy d yusin ɣar Maryam ẓrin min igga Ƹisa umnen zzayes.

⁴⁶Walakin inneɣni ruḥen ɣar ifarrisiyen nnan-asen min igga.

⁴⁷Munen arruyas n ȓfuqaha ḏ ifarrisiyen ak Jmaƹṯ n lḥukkam n Ayṯ-Israʼil nnan: "Min ɣa negg? Qa aryaz-a itegg aṭṭas n lmuƹjizaṯ.

⁴⁸Meȓa nejji-ṯ ammu, marra azzayes amnen. Aḏ d asen irumaniyen, aḏaneɣ xarben ṯamziḏa ṯameqqrant nneɣ ḏ lʼumma nneɣ."

⁴⁹Ijjen zzaysen qqaren-as Qiyafa, netta ḏ arrayes n ȓfuqaha ḏeg useggwas nni. Ikkar netta inna-asen: "Kenniw war ṯessinem walu,

⁵⁰war ṯefhimem ca. Ḥsen i kenniw aḏ immeṯ ijjen n uryaz x ccaƹb ḥima war ṯfenni ca lʼumma nneɣ marra."

⁵¹Netta ḏeg useggwas nni tuɣaṯ ḏ arrayes n ȓfuqaha. War inni ca manayenni zeg yixef nnes; Lla, yusa-as-d manayenni zi Arebbi belli Ƹisa aḏ immeṯ x lʼumma n Ayṯ-Israʼil.

⁵²War iǧi bu x lʼumma n Ayṯ-Israʼil waha, uȓa ḏ ṯarwa n Arebbi itemzeǧaƹen ḏi ṯmura, aṯen ismun Arebbi ḏ ijjen.

⁵³Zi nhar nni tafqen ḥima aṯ nɣen.

⁵⁴X manaya war iqqim ca Ƹisa itraḥ itas-d jar israʼiliyen. Iruḥ ɣar can ṯmurṯ ṯuḏes ȓexȓa, ɣar yij ubilaj qqaren-as Afrayim iqqim ḏinni ak imeḥḍaren nnes.

⁵⁵Iqarreb-d Ȓƹiḏ Ameqqran n Ayṯ-Israʼil. Usin-d aṭṭas n yiwḏan zi ȓedcur ɣar Lquds ḥima aḏ ṭehharen ixef nsen qbeȓ i Ȓƹiḏ.

⁵⁶Tuɣa rezzun x Ƹisa, ssawaȓen wami bedden ḏi ṯemziḏa ṯameqqrant n Ayṯ-Israʼil qqaren jarasen, Min twaȓam? Ma war d itis ca ɣar Ȓƹiḏ?

⁵⁷Arruyas n ȓfuqaha ḏ ifarrisiyen weṣṣan wenni iy ɣa iẓren mani iǧa Ƹisa, asen t yini bac aḏ raḥen aṯ ṭṭfen.