Read Tarifit Yuḥanna 12 Bible Online

Yuḥanna 12 - Tarifit bible

Yuḥanna 12

¹Settiyyam qbeȓ i Ȓƹiḏ Ameqqran, yusa-d Ƹisa ɣar Bayt Ƹanya mani izeddeɣ Liƹazar wenni iy d isekkar Ƹisa zi ȓmewṯ.

²Ggin-as amensi ḏinni, učmas Marṯa tsexxar Liƹazar iqqim akiḏsen.

³Ṯeysi-d Maryam azyen n litru n waman n lwarḏ ṣfan zeg yinni iɣȓan s waṭṭas, ṯeḏhen-as i Ƹisa iḍaren nnes, ṯemseḥ-as iḍaren nnes s ucewwaf nnes. Ṯaddarṯ marra ṯeccur s arriḥeṯ n waman nni n lwarḏ.

⁴Ijjen zeg imeḥḍaren nnes, wenni umi qqaren Yahuḏa Isxaryuṭi u ḏ netta iy ɣa izzenzen Ƹisa, inna-asen:

⁵"Mayemmi war zzenzen ca aman nni n lwarḏ s ṯeȓṯmiyya n ṯpeyyasin n nnuqarṯ aḏ mmucent i imesƹan?"

⁶Wami inna ammu maci ziǧzen-as imesƹan; Lla, netta ḏ aceffar mkellef x ucemmus n tmenyaṯ itacar zi min ḏin srusan.

⁷Inna-as Ƹisa: "Ejj-it, nettaṯ ṯxemmeȓ aman-a i nhar n ṯenḍeȓṯ inu.

⁸Imesƹan aqaṯen akiḏwem ȓebda, nec war kiḏwem tɣimiɣ ca i ȓebda."

⁹Usin-d aṭṭas n ȓɣaci n israʼiliyen wami d arrin ȓexbar belli netta aqaṯ ḏinni. War iǧi x Ƹisa waha, usin-d aḏ ẓren uȓa ḏ Liƹazar wenni iy d isekkar zi ȓmewṯ.

¹⁰X manayenni tafqen arruyas n ȓfuqaha aḏ nɣen uȓa ḏ Liƹazar.

¹¹Mayemmi? Ȓaḥeqqac netta ḏ ssabab minzi tbeƹƹaḏen xasen aṭṭas n israʼiliyen tamnen zi Ƹisa.

¹²Ṯiwecca nnes qaƹ ȓɣaci nni iy d yusin ɣar Ȓƹiḏ sȓin belli Ƹisa iggur-d ɣar Lquds.

¹³Ysin afriwen n ṯcejjura n tmar bac azzayes reḥben ffɣen aṯ ȓqan s ȓefraḥeṯ. Tƹeyyaḍen qqaren lḥamdu i Arebbi! Ssaƹḏ n wanita iy d yusin ƹlaḥsab isem n Siḏi Arebbi, qa netta ḏ azeǧiḏ n Ayṯ-Israʼil!

¹⁴Yufa Ƹisa ijjen n usnus inya xas mammec iy yura ḏi Lkitab:

¹⁵"War teggweḏ ca a yeǧis n Lquds. Xzar, azeǧiḏ nnem aqa yusa-d ɣarem, inya-d x usnus."

¹⁶Imeḥḍaren nnes war fhimen ca i ṯmesȓayin-a ḏeg umezwaru. Walakin wami itwarfeƹ Ƹisa ƹaḏ iy d fekkaren manaya yura xas ḏi Lkitab belli iwqeƹ-as.

¹⁷Ȓɣaci nni kiḏes, ẓrin wami d iȓaɣa x Liƹazar zeg unḍeȓ isekkar-iṯ-iḏ zi ȓmewṯ, ȓɣaci-ya ƹaḏ qqimen cehhḏen x manayenni.

¹⁸S manaya ȓqan-ṯ-iḏ ȓɣaci nneɣni minzi ȓɣaci-ya sȓin belli tuɣa igga lmuƹjiza nni.

¹⁹Nnan ifarrisiyen jarasen: "Aqa twaȓam war ṯuwwiḍem ɣar walu! Ddunect marra ṯḏeffar-iṯ."

²⁰Yinni igaƹƹḏen aḏ ƹebḏen ḏi Ȓƹiḏ akiḏsen ȓebƹaḍ n iyunaniyen.

²¹Iyunaniyen-a usin-d ɣar Filippas, Filippas netta zeg ubilaj n Bayt Ṣayda ḏi Ljalil. Tettaren-as nnan-as, A siḏi nexs a nẓer Ƹisa.

²²Iruḥ Filippas ɣar Andrus bac aḏas ṯ yini, uca ruḥen s ṯnayen iḏsen ɣar Ƹisa nnan-as-ṯ.

²³Indeq-d Ƹisa inna-asen: "Ṯusa-d ȓweqṯ aḏ itwarfeƹ Mmis n bnaḏem.

²⁴Aqa tesȓam ȓḥaqq: Ṯaḥebbuct n yirḏan meȓa war twaẓẓu ca ḏi ṯmurṯ iƹni meȓa war twanḍeȓ ca, ataf aḏ teqqim ḏ ṯaḥebbuct waha. Meȓa twanḍeȓ aḏ tuc aṭṭas n ȓḥabb.

²⁵Wenni itexsen ṯuḏarṯ nnes, ataf at ixsar. Wenni itƹiffan ṯuḏarṯ nnes ḏi ddunect-a, ataf at yaf ḏi ṯuḏarṯ n ȓebda.

²⁶Wenni ixsen aḏayi ixḏem, itxeṣṣa aḏayi iḏfar. Mani ɣa iȓiɣ nec, aḏ yiȓi ƹaweḏ ḏ axeddam inu. Wenni ḏayi ɣa ixeḏmen, aṯ ikarrem Baba.

²⁷Ȓexxu ȓaƹmar inu ixeyyeq. Ma aḏ iniɣ: A Baba senjem-ayi zi ȓweqṯ-a? Lla, x ssabab n ȓweqṯ-a minxef iy d usiɣ.

²⁸A Baba, semɣar isem nnec." Uca yusa-d ijjen n ṣṣut zeg ujenna inna, Semɣareɣ-ṯ, aṯ semɣareɣ ƹaweḏ.

²⁹Ȓɣaci nni tuɣa ibedden tesȓan, nnan aqa wa ḏ ajjaj. Inneɣni nnan, aqa ṯessiweȓ ɣares ijjen n lmalaʼika.

³⁰Inna-asen Ƹisa: "Ṣṣut-a war iǧi bu i yixef inu lla, i kenniw.

³¹Ȓexxu aḏ twaƹaqeb ddunect-a. Ȓexxu Lmufsid nni[7] ameqqran n ddunect-a axas azzȓen.

³²Xmi ɣa twasbeddeɣ ḏeg ujenna i ṯmurṯ, aḏ seḏfareɣ ɣari marra iwḏan."

³³S wawaȓ-a irezzu asen d isbeyyen ȓmewṯ nni iy ɣa immeṯ.

³⁴Nnan-as ȓɣaci nni: "Neccin nesȓa zi min iqqar Lkitab qa Lmasiḥ aḏ iqqim i ȓebda. Iwa, mammec ṯeqqareḏ cek qa Mmis n bnaḏem itxeṣṣa aḏ itwasbedd ḏeg ujenna? Min iƹna Mmis-a n bnaḏem qaƹ?"

³⁵Inna-asen Ƹisa: "Ḏrust n ȓweqṯ iy kiḏwem itiȓi nnur. Uyurem madama ƹaḏ ɣarwem nnur-a ḥima war xawem d ṯḥarreṯ ṯaǧest. Wenni igguren ḏi ṯaǧest war issin mani iggur.

³⁶Xmi ƹaḏ ɣarwem nnur, amneṯ zi nnur-a ḥima kenniw aḏ tḏewȓem ḏ ṯarwa n nnur." Wami inna manaya Ƹisa yuyur innuffar zzaysen.

³⁷Ƹisa waxxa igga aṭṭas n lmuƹjizaṯ zzaṯsen, war zzayes uminen ca.

³⁸Manaya ḥima aḏ ikemmeȓ i min inna nnabi umi qqaren Icaƹya: <Ay Arebbi, wi yumnen s wawaȓ nneɣ? I wumi d isbeyyen jjheḏ n ufus n Arebbi?>

³⁹S manaya war zemmaren ca aḏ amnen minzi Icaƹya inna ƹaweḏ:

⁴⁰<Isḍerɣeȓ-iṯen zi ṯiṭṭawin nsen, isseqseḥ-asen uȓawen nsen, ḥima war twiȓin s ṯiṭṭawin nsen, ḥima war fehhmen s wuȓawen nsen, bac war ɣari d ḏewwiȓen nec aṯen sgenfiɣ.>

⁴¹Nnabi Icaƹya inna manaya x Ƹisa wami iẓra lƹaḍama nnes issiweȓ xas netta.

⁴²Innama, iwḏan aṭṭas waxxa zi arruyas nni umnen zzayes. Walakin x ssabab n ifarrisiyen ugin yiwḏan-a at inin ḥima war ṯen ṭerden ca zi ṯemziḏa.

⁴³Aqa rezzun arḍa n yiwḏan ktar zi arḍa n Arebbi.

⁴⁴Ƹisa itxaṭab s jjheḏ inna: "Wenni itamnen zzayi, maci itamen zzayi itamen zi wenni iy ḏayi d issekken.

⁴⁵Wenni iy ḏayi iẓrin, iẓra wenni iy ḏayi d issekken.

⁴⁶Usiɣ-d ɣar ddunect-a ḏ nnur ḥima wenni iy zzayi yumnen war itɣimi ca ḏi ṯaǧest.

⁴⁷Wenni ɣa isȓen i wawaȓ inu war ḏas itṭiƹi ca ataf nec war ṯ tḥisibeɣ ca. Aqa nec war d usiɣ ca aḏ ḥasbeɣ ddunect; Lla, usiɣ-d ḥima aḏ senjmeɣ ddunect.

⁴⁸Wenni iy ḏayi itƹeyyaben netta war iqebbeȓ ca awaȓ inu, ataf ɣares wi ṯ ɣa iḥasben. Awaȓ-a iy nniɣ ḏ wenni iy ṯ ɣa iḥasben ḏi Nhar Aneggaru.

⁴⁹Aqa war ssiwȓeɣ ca zi ɣari; Lla, nec ssawaȓeɣ nec qqareɣ zi ȓuṣiyeṯ iy ḏayi yuca Baba iƹni wenni iy ḏayi d issekken.

⁵⁰Ssneɣ ȓuṣiyeṯ nnes nettaṯ ḏ ṯuḏarṯ n ȓebda. Min ssawaȓeɣ nec, ssawaȓeɣ-ṯ ƹlaḥsab mammec iy ḏayi inna Baba."