Read Tarifit Yuḥanna 16 Bible Online

Yuḥanna 16 - Tarifit bible

Yuḥanna 16

¹"Nniɣ-awem manaya ḥima war ṯsemḥem ca ḏi lʼiman nwem.

²Akenniw ṭerden zi ṯemziḏawin. Ƹaḏ aḏ d tas ȓweqṯ aḏas itɣir i wenni iy kenniw ɣa inɣen belli itegg lʼajar i Arebbi.

³Niṯni teggen manaya minzi war ssinen ca Baba, war ḏayi ssinen uȓa ḏ nec.

⁴Qa nniɣ-awem ṯimesȓayin-a ȓexxu bac meȓmi d ɣa ṯas ȓweqṯ, aḏ tƹaqȓem belli nniɣ-awem-ṯent nec. Ḏeg umezwaru war ḏawem nniɣ ca ṯimesȓayin-a minzi nec aqayi akiḏwem.

⁵Ȓexxu nec aḏ raḥeɣ ɣar wenni iy ḏayi d issekken, walakin kenniw uȓa ḏ ijjen zzaywem war ḏayi isseqsi mani ɣa raḥeɣ.

⁶Wami ḏawem nniɣ manaya, uȓawen nwem ḏaysen ȓeḥȓiq aṭṭas.

⁷Aqa tesȓam ȓḥaqq: Ḥsen i kenniw aḏ raḥeɣ. Meȓa war ruḥeɣ ca, ataf war ɣarwem d itis ca Lmuƹawin nni. Walakin meȓa ruḥeɣ, ataf aḏawem ṯiḏ ssekkeɣ.

⁸Xmi d ɣa yas, aḏ d isbeyyen i yiwḏan n ddunect ɣalṭen x ȓmuƹṣiyeṯ ḏ min iṣeȓḥan ḏ lḥisab.

⁹Ɣalṭen x ȓmuƹṣiyeṯ nsen minzi niṯni war zzayi timnen ca.

¹⁰Ɣalṭen x min iṣeȓḥan minzi ggureɣ ɣar Baba, war ḏayi ṯẓerrem ca zi ssa aȓ ṯsawent.

¹¹U ɣalṭen x lḥisab minzi Lmufsid[10] nni ameqqran n ddunect-a itwaḥkem.

¹²Ɣari aṭṭas n ṯmesȓayin aḏawem ṯent iniɣ, walakin ȓexxu qesḥent xawem.

¹³Xmi d ɣa yas Arruḥ n lḥaqiqa, ataf aḏawem d isbeyyen lḥaqiqa ṯekmaȓ. Aqa netta war issiwiȓ ca zeg yixef nnes, issawaȓ illa zi min ḏas ɣa yini Arebbi. Aḏawem ixebbar ḏi ṯmesȓayin iy d ɣa yasen.

¹⁴Netta iy ḏayi ɣa isemɣaren minzi ikessi zi min ɣari, aḏawem ixebbar zzayes.

¹⁵Marra min ɣares ɣar Baba, ɣari uȓa ḏ nec. S manaya nniɣ-awem belli netta ikessi zi min ɣari, aḏawem ixebbar zzayes."

¹⁶Inna-asen Ƹisa: "Cwit n ȓweqṯ war ḏayi ṯẓerrem ca, cwit n ȓweqṯ ƹaḏ aḏayi ṯeẓrem."

¹⁷Nnan ȓebƹaḍ n imeḥḍaren nnes jarasen: "Min ixes aḏ yini s wawaȓ-a? Iqqar-aneɣ cwit n ȓweqṯ war ḏayi ṯẓerrem ca, cwit n ȓweqṯ ƹaḏ aḏayi ṯeẓrem. Ƹaweḏ iqqar, ȓaḥeqqac nec aḏ raḥeɣ ɣar Baba."

¹⁸Qqaren: "Min ixes aḏ yini ȓmaƹna n <cwit n ȓweqṯ>? War nefhim ca min iqqar."

¹⁹Issen Ƹisa qa rezzun aṯ sseqsan, uca inna-asen: "Mayemmi tseqsam ayawya x wawaȓ iy ḏawem nniɣ: <Cwit n ȓweqṯ war ḏayi ṯẓerrem ca, cwit n ȓweqṯ ƹaḏ aḏayi ṯeẓrem>?

²⁰Aqa tesȓam ȓḥaqq: Kenniw aḏ trum aḏ tḥeznem, walakin ddunect-a aḏ tfareḥ. Kenniw aḏaywem yiȓi ȓeḥȓiq, walakin ȓeḥȓiq nwem aḏ iḏweȓ ḏ ȓefraḥeṯ.

²¹Ṯamɣarṯ xmi tarew, itiȓi ḏayes ȓeḥȓiq ȓaḥeqqac ȓweqṯ nnes ṯuweḍ-d. Walakin xmi ɣa ṯarew aseymi, war tfekkir ca ƹaḏ ḏi ȓeḥȓiq nni s ȓefraḥeṯ nnes minzi ṯurew-d ijjen n useymi ɣar ddunect-a.

²²Uȓa ḏ kenniw ḏaywem ȓeḥȓiq ȓexxu, walakin akenniw ẓreɣ ƹaweḏ. Ȓexddenni aḏ tfarḥem s wuȓawen nwem, war ḏawem itekkes ȓefraḥeṯ nwem ḥadd.

²³Nhar nni iy d ɣa yasen kenniw war ḏayi tseqsim x walu. Aqa tesȓam ȓḥaqq: Baba aḏawem yuc marra min ḏas ɣa ṯettarem ƹlaḥsab isem inu.

²⁴Ḥetta aȓ ȓexxu war ṯettarem walu ƹlaḥsab isem inu. Ttareṯ aḏ tafem, ataf ȓefraḥeṯ nwem aḏ tiȓi ṯekmaȓ.

²⁵Ssiwȓeɣ-awem manaya s ȓemƹani. Aḏ d tas ijjen n ȓweqṯ war kiḏwem ssiwiȓeɣ ca s ȓemƹani. Aḏawem xebbareɣ x Baba s wawaȓen nican bȓa ȓemƹani.

²⁶Nhar nni kenniw aḏ tettarem i Baba ƹlaḥsab isem inu. Qqareɣ-awem belli maci ḏ nec iy ɣa ittaren ḏeg umcan nwem.

²⁷Minzi Baba s yixef nnes itḥibba-kenniw wami ḏayi ṯḥibbem ṯumnem belli nec ffɣeɣ-d zi Arebbi.

²⁸Ffɣeɣ-d zi Baba wḍeɣ-d ɣar ddunect-a. Aḏ uyureɣ zi ddunect-a aḏ ƹeqbeɣ ƹaweḏ ɣar Baba."

²⁹Nnan-as imeḥḍaren nnes: "Ȓexxu cek ṯessawaȓeḏ nican, war iǧi ca s ȓemƹani.

³⁰Ȓexxu neccin netwaȓa belli ṯessneḏ kuȓci war ṯeḥḏijeḏ wi c ɣa isseqsan. S manaya numen belli ṯusiḏ-d zi Arebbi."

³¹Indeq-d Ƹisa inna-asen: "Ȓexxu iy ṯumnem niɣ?

³²Aḏ d tas ijjen n ȓweqṯ aqa ȓexxu ṯusa-d, aḏ temzeǧaƹem kenniw kuȓ ijjen zzaywem aḏ irewwaḥ. Aḏayi ṯsemḥem aḏ iȓiɣ waḥḏi, walakin war tiȓiɣ ca waḥḏi minzi Baba aqaṯ akiḏi.

³³Qqareɣ-awem manaya ḥima aḏ teysim zzayi ȓehna. Ḏi ddunect-a ṯanita axawem ṯekk ḏayes tamara, walakin cejjƹeṯ ixef nwem aqa nec rebḥeɣ ddunect-a."