Read Tarifit Yuḥanna 18 Bible Online

Yuḥanna 18 - Tarifit bible

Yuḥanna 18

¹Menbaƹd i ṯẓaǧiṯ nni, iffeɣ Ƹisa ak imeḥḍaren nnes ẓwan iɣzar n Qidrun. Ḏinni ijjen n jarda, uḏfen ḏayes netta ḏ imeḥḍaren nnes.

²Tuɣa Yahuḏa wenni iy ṯ ɣa izzenzen issen amcan nni minzi Ƹisa tuɣa itmeȓqa ḏinni aṭṭas ak imeḥḍaren nnes.

³Ṣafi, yusa-d Yahuḏa ɣar jarda nni yuwi-d akiḏes ȓƹaskar, twassekken-d akiḏes ƹaweḏ can n iƹessasen zeg ifarrisiyen u zi arruyas n ȓfuqaha. Usin-d s ȓefnaraṯ ḏ iṣfeḍawen ḏ ȓesnaḥ.

⁴Issen Ƹisa marra min ḏas ɣa iweqƹen, iffeɣ-d ɣarsen inna-asen: "Minxef ṯrezzum?"

⁵Nnan-as: "X Ƹisa zi Naṣira." Inna-asen: "Aqa ḏ nec." Ibedd akiḏsen Yahuḏa wenni iy ṯ izzenzen.

⁶Wami ḏasen inna qa ḏ nec, ḏewȓen ɣar ḏeffar wḍan ɣar ṯmurṯ.

⁷Inna-asen ƹaweḏ: "Minxef ṯrezzum?" Nnan-as: "X Ƹisa zi Naṣira."

⁸Inna-asen Ƹisa: "Qa nniɣ-awem-ṯ ḏ nec. Meȓa ṯrezzum xafi jjem yina aḏ uyuren."

⁹S wawaȓ-a ikemmeȓ min inna Ƹisa zi qbeȓ iƹni <War ḏayi iweddar ḥadd zeg yinni iy ḏayi ṯuciḏ.>

¹⁰Simƹan Buṭrus tuɣa ɣares ssif, ijbeḏ-iṯ-iḏ yuwṯa zzayes ismeɣ n arrayes n ȓfuqaha iqess-as amezzuɣ afusi. Ismeɣ nni qqaren-as Maȓxus.

¹¹Inna-as Ƹisa i Buṭrus: "Arr ssif nnec ɣar umcan nnes. Ȓkas-a n ȓaƹḏab iy ḏayi yuca Baba, ma war sesseɣ ca zzayes?"

¹²Ȓƹaskar ḏ arrayes nsen ḏ iƹessasen n israʼiliyen ṭṭfen Ƹisa carfen-ṯ.

¹³Ḏ amezwaru nedhen-ṯ ɣar yijjen qqaren-as Ḥannin minzi netta ḏ babas n ṯemɣarṯ n Qiyafa. Qiyafa tuɣaṯ ḏ arrayes n ȓfuqaha ḏeg useggwas nni.

¹⁴Netta tuɣa inṣeḥ israʼiliyen inna-asen qa ḥsen aḏ immeṯ ijjen n uryaz x ccaƹb.

¹⁵Simƹan Buṭrus ḏ ijjen n umeḥḍar nneɣni ḏfaren Ƹisa. Ameḥḍar nni maƹruf ɣar arrayes n ȓfuqaha, yuḏef ak Ƹisa ɣar ȓemraḥ n ṯeddarṯ n arrayes nni.

¹⁶Buṭrus ibedd itraja barra ɣar ṯewwarṯ. Iffeɣ-d umeḥḍar nni ig iǧan maƹruf ɣar arrayes n ȓfuqaha, issiweȓ ak ṯƹessast nni itiȓin ḏi ṯewwarṯ issiḏef-d Buṭrus.

¹⁷Ṯaƹessast nni iḥeṭṭan ḏi ṯewwarṯ ṯenna-as i Buṭrus: "Ma war ṯeǧiḏ cek zeg imeḥḍaren n bnaḏem-a?" Inna-as: "Nec, lla!"

¹⁸Ixeddamen ḏ iƹessasen bedden ḏinni, ggin ṯimessi s ȓefḥam zɣaren ɣares minzi ṯesmeḍ. Ibedd uȓa ḏ Buṭrus akiḏsen ḥima aḏ izɣar.

¹⁹Ibḏa arrayes n ȓfuqaha itseqsa Ƹisa x imeḥḍaren nnes ḏ min iseȓmaḏ.

²⁰Inna-as Ƹisa: "Tbeccareɣ zzaṯ i yiwḏan, seȓmaḏeɣ-ṯen ȓebda ḏi ṯemziḏawin uȓa ḏi ṯemziḏa ṯameqqrant mani tmunen israʼiliyen marra. War ssiwiȓeɣ walu s ṯnufra.

²¹Nec, mayemmi ḏayi tseqsiḏ? Sseqsa yinni ḏayi isȓin min ḏasen nniɣ. Niṯni ssnen min nniɣ."

²²Inna-as Ƹisa manaya ȓexddenni ijjen zeg iƹessasen ibedden ḏinni yuca-as ijjen n useqqiȓ i Ƹisa inna-as: "Ma s wawaȓ-a iy zi ɣa ṯarreḏ x arrayes n ȓfuqaha?"

²³Inna-as Ƹisa: "Meȓa xḍiɣ ḏeg wawaȓ, in-ayi minḏi xḍiɣ. Meȓa ssiwȓeɣ nican, mayemmi ḏayi ṯuwṯiḏ?"

²⁴Ssenni issekk-iṯ Ḥannin ḏ ameḥbus ɣar Qiyafa arrayes n ȓfuqaha.

²⁵Buṭrus ibedd ḏinni izɣar ɣar ṯmessi. Nnan-as: "Ma war ṯeǧiḏ uȓa ḏ cek zeg imeḥḍaren nnes?" Netta inkar inna-asen: "Nec, lla!"

²⁶Ȓexddenni ijjen zeg ixeddamen n arrayes n ȓfuqaha, netta iteƹna-d i wenni umi iqess Buṭrus amejjun, iruḥ inna-as i Buṭrus: "Ma war ṯeǧiḏ ḏ cek iy ẓriɣ akiḏes ḏi jarda nni?"

²⁷Buṭrus inkar ƹaweḏ, ȓexddenni idden uyaziḍ.

²⁸Uwin Ƹisa zi ṯeddarṯ n Qiyafa ɣar ȓeqṣar n lḥakem, tuɣa zic. Israʼiliyen war uḏifen ca ɣar ȓeqṣar ḥima war sḥerrimen ca ȓƹiḏ x yixef nsen.[11]

²⁹Iffeɣ-d ɣarsen lḥakem ḏ arumani qqaren-as Bilaṭus, inna-asen: "Man ttuhmeṯ iy ɣarwem x bnaḏem-a?"

³⁰Nnan-as: "Maƹlik war iǧi ḏ lmujrim, ataf war ḏac ṯiḏ ntiwi ca ḏa."

³¹Inna-asen Bilaṭus: "Iwa awim-ṯ kenniw, axas ṯḥekmem s ccariƹa nwem." Nnan-as israʼiliyen: "War ḏaneɣ ṯsemmḥem ca kenniw a nneɣ uȓa ḏ ijjen."

³²Iwqeƹ manaya ḥima aḏ ikemmeȓ wawaȓ iy inna Ƹisa x ȓmewṯ iy ɣa immeṯ.

³³Ssenni yuḏef-d ƹaweḏ Bilaṭus ɣar ȓeqṣar, iȓaɣa x Ƹisa inna-as: "Ma ḏ cek ḏ azeǧiḏ n Ayṯ-Israʼil?"

³⁴Inna-as Ƹisa: "Manaya, ma ṯeqqareḏ-t zi ɣarek niɣ nnan-ac-ṯ xafi inneɣni?"

³⁵Inna-as Bilaṭus: "Ma nec ḏ aʼisraʼili? Lʼumma nnec ḏ arruyas n ȓfuqaha iy c d yuwin ɣari, min ṯeggiḏ?"

³⁶Inna-as Ƹisa: "Ȓmulk inu maci zi ddunect-a. Maƹlik ȓmulk inu zi ddunect-a, ataf imeḥḍaren inu ḥarben ḥima war weṭṭiɣ ca ḏeg ifassen n israʼiliyen; Lla, ȓmulk inu war iǧi ca ssanita."

³⁷Inna-as Bilaṭus: "Zaƹma, cek ḏ azeǧiḏ?" Inna-as Ƹisa: "Ṯenniḏ cek nec ḏ azeǧiḏ. Nec xeȓqeɣ-d usiɣ-d ɣar ddunect-a ḥima aḏ cehḏeɣ i lḥaqiqa. Marra wenni iǧan zi lḥaqiqa aḏ iḏfar awaȓ inu."

³⁸Inna-as Bilaṭus: "Iwa min ṯeƹna lḥaqiqa-ya?" Wami inna ammu, iffeɣ ƹaweḏ ɣar israʼiliyen inna-asen: "War ḏayes ufiɣ bu ttuhmeṯ.

³⁹Walakin ṯnumem ḍeǧqeɣ-awem-d i yijjen n umeḥbus ḏi Ȓƹiḏ Ameqqran. Ȓexxu, ma ṯexsem aḏawem d ḍeȓqeɣ i uzeǧiḏ n Ayṯ-Israʼil?"

⁴⁰Ƹeyyḍen s jjheḏ nnan: "War d ḍeǧeq ca i wanita, ḍȓeq-aneɣ-d i Barabas!" Tuɣa Barabas ḏ aqeṭṭaƹ ibriḏen.