Read Tarifit Yuḥanna 2 Bible Online

Yuḥanna 2 - Tarifit bible

Yuḥanna 2

¹Ḏi nhar wis ṯeȓtiyyam ḏinni ijjen n ȓfarḥ ḏeg ubilaj n Qana ḏi ṯmurṯ n Ljalil. Ḏinni yemmas n Ƹisa.

²Uȓa ḏ Ƹisa ḏ imeḥḍaren nnes twaƹarḍen ɣar ȓfarḥ nni.

³Wami war ɣarsen qqimen waman n uḍiȓ, ṯenna-as yemmas i Ƹisa qa aman n uḍiȓ qḍan.

⁴Inna-as Ƹisa: "A ṯamɣarṯ, maci ḏ ccɣeȓ inu. Nec ȓweqṯ inu ƹaḏ war d tusi ca."

⁵Ṯenna-asen yemmas i ixeddamen: "Ggem min ḏawem iqqar."

⁶Ḏinni ḏi ṯeddarṯ nni setta n iqnucen n waman ƹlaḥsab mammec nnumen teggen zzaysen israʼiliyen ȓuḍu. Iqnucen nni twaxeḏmen s uzru, kuȓ ijjen ikessi zi ṯmanin aȓ miyya u ƹicrin litru n waman.

⁷Inna-asen Ƹisa i ixeddamen: "Ƹemmarem iqnucen-a s waman." Ƹemmaren-ṯen s waman aȓ uqemmum.

⁸Inna-asen: "Aymem cwayt awim-ṯen i wenni itkellafen zi ȓfarḥ." Uca uwin-as ci ḥaja.

⁹Ufin aman ƹadi nni ḏewȓen ḏ aman n uḍiȓ. Wenni itkellafen zi ȓfarḥ-a iqqas-iṯen walakin netta war issin ca manis d kkin waman-a n uḍiȓ. Ixeddamen nnes iy ḏas d yuymen aman-a, ḏ niṯni ig ssnen manis d ikka manaya. Ṯumma wenni ikellfen zi ȓfarḥ issiweȓ ak muȓay

¹⁰inna-as: "Ƹadatan ḏeg umezwaru iwḏan ticcen-asen i inewjiwen aman n uḍiȓ iṣebḥanen. Xmi tiȓi swin zzaysen aṭṭas, ḏi ȓweqṯ nni iy ḏasen ticcen aman n uḍiȓ ƹadi. Cek lla, ṯxemmȓeḏ aman n uḍiȓ iṣebḥanen aȓ ȓexxu."

¹¹Ṯanita ḏ lmuƹjiza ṯamezwarut ig igga Ƹisa. Iggi-t ḏeg ubilaj n Qana ḏi ṯmurṯ n Ljalil. Ismeḍhar-d lƹaḍama nnes, umnen zzayes imeḥḍaren nnes.

¹²Menbaƹd i manaya ihwa ɣar ubilaj n Kafernaḥum, netta ḏ yemmas ḏ ayṯmas ḏ imeḥḍaren nnes, qqimen ḏinni ḏrus n wussan.

¹³Wami d yuweḍ Ȓƹiḏ Ameqqran n Ayṯ-Israʼil, ikkar Ƹisa yuȓi ɣar ṯendint n Lquds.

¹⁴Yufa ḏi ṯemziḏa ṯameqqrant znuzan ḏayes ifunasen ḏ iḥuȓiyen ḏ iḏbiren, uȓa ḏ iṣarrafen qqimen ḏinni tṣerrafen tmenyaṯ.

¹⁵Imuḏ iseɣwan, s iseɣwan nni yuzzeȓ xasen marra zi ṯemziḏa ṯameqqrant s iḥuȓiyen ḏ ifunasen. Iqȓeb-asen missaṯ n yinni itṣarrafen, izeǧeƹ-asen tmenyaṯ nni ḏi ṯmurṯ.

¹⁶Inna-asen i yinni iznuzan iḏbiren: "Ysiṯ manaya ssanita. War tarraṯ ca ṯaddarṯ n Baba ḏ ssuq!"

¹⁷Fekkaren imeḥḍaren nnes manaya yusa-d ḏi Lkitab: "Aḏ ṣeddqeɣ ṯuḏarṯ inu x ȓemḥibbeṯ n ṯemziḏa nnec."

¹⁸Kkaren israʼiliyen nnan-as: "Man lƹalama ṯameqqrant iy ɣa ṯeggeḏ bac aɣarec yiȓi ȓḥaqq aḏ teggeḏ manaya?"

¹⁹Inna-asen Ƹisa: "Heḏmeṯ ṯamziḏa-ya ṯameqqrant, nec atid siȓiɣ ḏi ṯeȓtiyyam!"

²⁰Nnan-as israʼiliyen: "Cek, atid ṯsiȓiḏ ḏi ṯeȓtiyyam? Ṯamziḏa-ya ṯameqqrant ṯebna ḏi setta u arbeƹin iseggwusa!"

²¹Walakin ṯamziḏa ṯameqqrant minxef issawaȓ Ƹisa nettaṯ ḏ ddat nnes.

²²Wami d ikkar zi ȓmewṯ, fekkaren imeḥḍaren nnes min ḏasen inna, umnen zi Lkitab ḏ wawaȓ iy inna Ƹisa.

²³Wami iǧa ḏi ṯendint n Lquds ḏi Ȓƹiḏ Ameqqran n Ayṯ-Israʼil, aṭṭas n yiwḏan iy zzayes yumnen zeg yisem nnes wami ẓrin lmuƹjizaṯ ig itegg.

²⁴Walakin netta war ḏaysen ittiqi ca minzi issen iwḏan marra min ḏaysen.

²⁵War iteḥḏiji bu ȓechuḏ x yiwḏan, netta iƹȓem x wuȓawen nsen.