Read Tarifit Yuḥanna 21 Bible Online

Yuḥanna 21 - Tarifit bible

Yuḥanna 21

¹Menbaƹd i manaya imeḍhar-d Ƹisa ƹaweḏ i imeḥḍaren nnes x cceṭṭ n ȓebḥar n Ṭabarya. Ammu iy iwqeƹ.

²Munen ḏinni ȓebƹaḍ n imeḥḍaren nnes: Simƹan Buṭrus ḏ Tuma wenni umi qqaren <Acniw>,[22] ḏ Naṯnahil netta zeg ubilaj n Qana ḏi ṯmurṯ n Ljalil, ḏ ṯarwa n Zabadi, ḏ ṯnayen nneɣni.

³Ikkar Simƹan Buṭrus inna-asen nec aḏ raḥeɣ aḏ ymareɣ. Nnan-as akic nraḥ uȓa ḏ neccin. Ffɣen, nyin ḏi ṯɣarrabut. Ḏi ǧiȓeṯ nni war ymaren walu.

⁴Wami iṣbaḥ ȓḥaȓ, ufin Ƹisa ibedd x cceṭṭ n ȓebḥar walakin imeḥḍaren war ṯ ƹqiȓen ca.

⁵Inna-asen: "Ay iḥenjiren, ma ṯeymarem can iseȓman?" Nnan-as: "Lla, walu."

⁶Inna-asen Ƹisa: "Seyybeṯ ṯracca x ufusi n ṯɣarrabut aḏ tafem iseȓman." Wami t seyyben war zemmaren atid jebḏen ȓaḥeqqac ṯƹemmar s iseȓman aṭṭas.

⁷Ameḥḍar nni iƹizzen x Ƹisa aṭṭas inna-as i Buṭrus qa win ḏ Siḏiṯneɣ. Wami isȓa Simƹan Buṭrus qa win ḏ Ƹisa, ikkar yareḍ čammir nnes ȓaḥeqqac tuɣa ikkes-iṯ, ȓexddenni inḍew ḏi ȓebḥar bac aḏ iraḥ ɣar Ƹisa.

⁸Walakin imeḥḍaren nni nneɣni iy kiḏes iǧan ḏfaren-ṯ-iḏ s ṯɣarrabut, jebbḏen-d ṯracca nni ṯeccur s iseȓman. War ggwijen ca x ȓbarr ɣir can miyyat mitru waha.

⁹Wami d uwḍen ɣar ȓbarr, ufin ṯimessi n ȓefḥam xas iseȓman ḏ uɣrum.

¹⁰Inna-asen Ƹisa: "Awim-d cwayt n iseȓman iy d ṯeymarem ȓexxu."

¹¹Inya Simƹan Buṭrus ijbeḏ-d ṯracca nni ɣar ȓbarr, ḏayes miyya u ṯȓaṯa u xemsin n iseȓman ḏ imeqqranen. Qaƹ manaya, war ṯeqqares ca ṯracca nni.

¹²Inna-asen Ƹisa: "Araḥem-d aḏ teccem." War izƹim uȓa ḏ ijjen zeg imeḥḍaren aṯ isseqsa, min ṯeƹniḏ cek? Ȓaḥeqqac ssnen qa ḏ Siḏiṯsen.

¹³Iruḥ Ƹisa iysi-d aɣrum nni ḏ iseȓman nni ifreq-iṯen xasen.

¹⁴Ṯanita ḏ wis ṯeȓt marraṯ iy ḏi itmeḍhar-d Ƹisa i imeḥḍaren nnes zeg wami iy d ikkar zi ȓmewṯ.

¹⁵Wami reyyqen, inna-as Ƹisa i Simƹan Buṭrus: "A Simƹan a mmis n Yuḥanna, ma tḥibbiḏ-ayi ktar zi yina?" Inna-as Simƹan Buṭrus: "Wah a Siḏi, cek ṯessneḏ qa nec texseɣ-c." Inna-as Ƹisa: "Secc izmaren inu."

¹⁶Inna-as Ƹisa wis marrṯayen: "A Simƹan a mmis n Yuḥanna, ma tḥibbiḏ-ayi?" Yenna-as Simƹan: "Wah a Siḏi, cek ṯessneḏ qa nec texseɣ-c." Inna-as Ƹisa: "Arwes iḥuȓiyen inu."

¹⁷Inna-as Ƹisa wis ṯeȓt marraṯ: "A Simƹan a mmis n Yuḥanna, ma texseḏ-ayi?" Iqqes-as ȓḥaȓ i Buṭrus ȓaḥeqqac inna-as-ṯ wis ṯeȓt marraṯ, cek ma texseḏ-ayi? Inna-as: "A Siḏi, cek ṯessneḏ kuȓci. Ṯessneḏ qa nec texseɣ-c." Inna-as Ƹisa: "Secc iḥuȓiyen inu.

¹⁸Aqa tesȓiḏ ȓḥaqq: Ḏi ṯemẓi nnec tḥezzameḏ ixef nnec traḥeḏ mani ma ṯexseḏ. Walakin xmi ɣa ṯewsareḏ, aḏ tḍeȓqeḏ ifassen nnec ataf ḥadd nneɣni ac iḥezzem ac yawi mani war texseḏ ca."

¹⁹Inna manayenni Ƹisa ḥima aḏ isbeyyen mamc ɣa immeṯ Buṭrus ḥima aḏ tmeḍhar lƹaḍama n Arebbi. Wami iy ḏas inna manayenni, inna-as: "Ḏfar-ayi-d."

²⁰Ineqȓeb Buṭrus yufa iḏeffar-iṯen-d umeḥḍar nni iƹizzen x Ƹisa aṭṭas, iƹni wenni tuɣa iqqimen ɣar uɣezḏis n Ƹisa ḏeg umensi nni inna-as: A Siḏi, min iƹna wenni c ɣa izzenzen?

²¹Wami ṯ iẓra Buṭrus inna-as i Ƹisa: "A Siḏi, y win min ḏas ɣa iweqƹen?"

²²Inna-as Ƹisa i Buṭrus: "Nec meȓa xseɣ win aḏ iddar aȓ ɣa d ḏewȓeɣ, war ḏac iruḥ bu ȓḥaȓ. Cek ḏfar-ayi-d!"

²³Ssenni iffeɣ ȓexbar ɣar wawmaṯen qqaren: <Ameḥḍar-a war itmetti ca.> Walakin ḏ ṣṣaḥ Ƹisa war yinni ca belli ameḥḍar-a war itmetti ca. Min inna? Inna-t ammu: <Nec meȓa xseɣ win aḏ iddar aȓ ɣa d ḏewȓeɣ, war ḏac iruḥ bu ȓḥaȓ.>

²⁴Ameḥḍar-a, min iƹna? Ḏ netta ig icehhḏen x ṯmesȓayin-a ṯumma yuri-ṯent. Neccin nessen qa chaḏeṯ nnes n ṣṣaḥ.

²⁵Aṭṭas n ṯmesȓayin nneɣni iy igga Ƹisa. Maƹlik ṯura kuȓ icten zzaysent ict-ict, ḥessbeɣ belli ataf ddunect-a marra war ṯzemmar aḏ teysi lkutub nni iy ɣa yarin.