Read Tarifit Yuḥanna 4 Bible Online

Yuḥanna 4 - Tarifit bible

Yuḥanna 4

¹Issen Ƹisa belli ifarrisiyen arrin-d ȓexbar wami d marnin ɣares imeḥḍaren itṭehhar-iṯen s waman ktar zi Yaḥya.

²Walakin Ƹisa s yixef nnes war itṭehhar ca i yiwḏan, ḏ imeḥḍaren nnes ig iggin manayenni.

³Ssenni iffeɣ zi ṯmurṯ n Yahuḏiya, iruḥ ɣar ṯmurṯ n Ljalil.

⁴Itxeṣṣa-yas i netta aḏ ikk x ṯmurṯ n Samarya.

⁵Ikka x yijjen n ṯendint zi Samarya qqaren-as Suxar, zzaṯ i umarjeƹ nni ig yuca Yaƹqub i mmis Yusef.

⁶Ḏinni anu n Yaƹqub. Wami Ƹisa yuḥeȓ s ubriḏ ag uzyen n nhar, iqqim ɣar wanu nni n Yaƹqub.

⁷Ṯusa-d icten n ṯemɣarṯ zi Samarya aḏ tayem aman. Imeḥḍaren n Ƹisa niṯni tuɣa ruḥen ɣar ṯendint aḏ sɣen min ɣa ccen. Inna-as Ƹisa i ṯemɣarṯ nni: "Uc-ayi aḏ sweɣ."

⁸

⁹Ṯenna-as ṯemɣarṯ nni: "Cek ḏ aʼisraʼili, nec ḏ ṯasamariṯ. Mammec ḏac ṯexȓeq cek ṯettareḏ-ayi aḏ tesweḏ?" (Iwa israʼiliyen qa war temṣurufen ca ak yiwḏan n Samarya.)

¹⁰Inna-as Ƹisa: "Maƹlik cem ṯessneḏ lhadiya n Arebbi ṯessneḏ min ƹniɣ nec iy ḏam iqqaren uc-ayi aḏ sweɣ, ataf ṯettareḏ-ayi cem aman aḏam uceɣ aman n ṯuḏarṯ."

¹¹Ṯenna-as: "A Siḏi, war ɣarek ca minzi ɣa ṯaymeḏ. Anu-ya yuǧeɣ, manis d ɣa ṯawiḏ aman nni n ṯuḏarṯ?

¹²Jeddiṯneɣ Yaƹqub yuca-aneɣ anu-ya, iswa zzayes netta s yixef nnes ḏ ṯarwa nnes ḏ ȓebhayem nnes. Ma ṯḥessbeḏ ixef nnec ktar zzayes?"

¹³Indeq-d Ƹisa inna-as: "Marra wenni ɣa iswen zeg waman-a ataf aḏ iffaḏ ƹaweḏ.

¹⁴Walakin wenni ɣa iswen aman iy ḏas ɣa uceɣ nec ataf war itfiḏi ca ƹemmarṣ. Aman iy ḏas ɣa uceɣ nec aḏ ḏewȓen ḏayes amecnaw ijjen n ȓƹunṣar azzayes ṯesfiy ṯuḏarṯ n ȓebda."

¹⁵Ṯenna-as ṯemɣarṯ nni: "A Siḏi, uc-ayi aman nni ḥima war tfiḏiɣ ca, war d tiseɣ ca war taymeɣ ca aman ssanita."

¹⁶Inna-as Ƹisa: "Ruḥ ȓaɣa-d i uryaz nnem, ḏweȓ-d ḏanita."

¹⁷Ṯenna-as ṯemɣarṯ nni: "War ɣari bu aryaz." Inna-as Ƹisa: "Wah, cem ṯessiwȓeḏ nican wami ṯenniḏ war ɣari bu aryaz,

¹⁸minzi ṯuwiḏ xemsa n iryazen. Aryaz nni mikeḏ tƹiceḏ ȓexxu war iǧi bu ḏ aryaz nnem. Iwa ɣarem ṣṣaḥ ḏi min ṯenniḏ."

¹⁹Ṯenna-as ṯemɣarṯ nni: "A Siḏi, twaȓiɣ cek ḏ nnabi.

²⁰Ȓejḏuḏ nneɣ ƹebbḏen Arebbi ḏeg uḏrar-a, kenniw israʼiliyen ṯeqqarem qa itxeṣṣa a neƹbeḏ ḏeg umcan n Lquds."

²¹Inna-as Ƹisa: "Tiqqa-ayi a ṯamɣarṯ, aḏ d tas ijjen n ȓweqṯ ataf kenniw war ṯƹebbḏem ca Baba uȓa ḏeg uḏrar-a uȓa ḏi Lquds.

²²Kenniw ṯƹebbḏem wenni war ṯessinem ca, neccin nƹebbeḏ wenni iy nessen minzi asenjem ikka-d zeg israʼiliyen.

²³Walakin aḏ d tas ȓweqṯ aqa ȓexxu ṯusa-d, maƹlik yinni iƹebbḏen nican ataf aḏ ƹebbḏen Baba s lḥaqiqa ḏ arruḥ. Ḏ yina iy xef irezzu Baba.

²⁴Arebbi netta ḏ Arruḥ, yinni iy ṯ iƹebbḏen itxeṣṣa-yasen aṯ ƹebḏen s lḥaqiqa ḏ arruḥ."

²⁵Ṯenna-as ṯemɣarṯ nni: "Nec qa ssneɣ aḏ d yas Lmasiya, qqaren-as Lmasiḥ. Xmi d ɣa yas aḏaneɣ yini kuȓci."

²⁶Inna-as Ƹisa: "Qa ḏ nec iy kiḏem issawaȓen."

²⁷Wami d ƹeqben imeḥḍaren nnes, tƹejjben wami ṯ ufin issawaȓ ak yijjen n ṯemɣarṯ. Walakin war ḏas yinni uȓa ḏ ijjen min ɣares ṯrezzuḏ ɣar ṯa? Niɣ, mayemmi iy kiḏes ṯessawaȓeḏ?

²⁸Ṯejja ṯemɣarṯ nni aqḏiḥ[3] nnes ṯruḥ ɣar ṯendint, ṯenna-asen i yiwḏan:

²⁹"Araḥem-d aḏ teẓrem ijjen n uryaz inna-ayi marra min ggiɣ. Imken ḏ Lmasiḥ niɣ?"

³⁰Ffɣen yiwḏan nni zi ṯendint ruḥen ɣares.

³¹Ḏi ȓweqṯ nni qqaren-as imeḥḍaren A Lmuƹallim, ecc!

³²Walakin netta inna-asen: "Ɣari min tetteɣ, kenniw war ṯ ṯessinem ca."

³³Imeḥḍaren nnes sseqsan ayawya Ma yuwi-as-d ḥadd min ɣa icc?

³⁴Inna-asen Ƹisa: "Ȓmakla inu aḏ xeḏmeɣ min ixes wenni ḏayi d issekken aḏ kemmȓeɣ ȓxeḏmeṯ nnes.

³⁵Ɣarwem ijjen n lmiṯal iqqar: Menbaƹd i arbeƹa n churaṯ aḏ d tas ȓweqṯ n umjar. Nec aḏawem iniɣ: Rezmeṯ ṯiṭṭawin nwem xzareṯ imarjeƹiwen, ṯuweḍ-d ȓweqṯ n umjar.

³⁶Wenni imejjaren aḏ iysi texȓiseṯ nnes ijemmeƹ ṯafeǧaḥṯ i ṯuḏarṯ n ȓebda, ḥima aḏ munen ḏi ȓefraḥeṯ nsen yinni izerrƹen ḏ yinni imejjaren.

³⁷Iƹni ḏ ṣṣaḥ min iqqar lmiṯal: Ijjen izerreƹ, ijjen imejjar.

³⁸Nec ssekkeɣ-d kenniw aḏ temjarem mani war ṯzerƹem ca. Inneɣni zerƹen, kenniw ṯestenfaƹem zi ȓxeḏmeṯ nsen."

³⁹Aṭṭas n yiwḏan zi jjiheṯ n Samarya umnen zi Ƹisa wami ṯecheḏ ṯemɣarṯ nni ṯenna-asen qa inna-ayi marra min ggiɣ.

⁴⁰Wami iy ɣares d usin yiwḏan zi Samarya ƹarḍen-ṯ akiḏsen iqqim. Ssenni iqqim akiḏsen yumayen ḏinni.

⁴¹Wami sȓin awaȓ n Ƹisa marnin yiwḏan iy zzayes yumnen.

⁴²Nnan-as i ṯemɣarṯ nni neccin war ntimen ca ȓexxu ɣir ƹlaḥsab min ḏaneɣ ṯenniḏ cem, minzi issiweȓ akiḏneɣ s yixef nneɣ u neccin nessen belli ḏ ṣṣaḥ ḏ wa ig isenjamen ddunect.

⁴³Menbaƹd i yumayen iffeɣ ssenni Ƹisa, iruḥ ɣar ṯmurṯ n Ljalil.

⁴⁴U netta s yixef nnes iqqar uȓa ḏ ijjen n nnabi ma meḥtarem ḏi ṯmurṯ nnes.

⁴⁵Wami yuweḍ ɣar Ljalil reḥḥben zzayes yiwḏan minzi niṯni ẓrin marra ṯimesȓayin ig igga ḏi Ȓƹiḏ ḏi Lquds. Uȓa ḏ niṯni tuɣa ḥḍaren ḏinni ḏi Ȓƹiḏ.

⁴⁶Yusa-d ƹaweḏ ɣar ubilaj n Qana ḏi ṯmurṯ n Ljalil mani tuɣa yarra aman ƹadi ḏ aman n uḍiȓ. U ḏeg ubilaj n Kafernaḥum ḏinni ijjen zeg imxazniyen n uzeǧiḏ ihȓec mmis.

⁴⁷Amxazni nni wami d yarra ȓexbar Ƹisa yusa-d zi ṯmurṯ n Yahuḏiya ɣar ṯmurṯ n Ljalil, iruḥ ɣares inna-as ma kiḏi ṯehwiḏ ḥima aḏ tesgenfiḏ memmi? Qa ƹȓayen aḏ immeṯ.

⁴⁸Inna-as Ƹisa: "Kenniw, ma war timnem ca ḥetta aḏ teẓrem lmuƹjizaṯ ḏ lburhanaṯ?"

⁴⁹Inna-as umxazni: "A Siḏi, yallah akiḏi ṯehwiḏ qbeȓ ma aḏ immeṯ uḥenjir inu."

⁵⁰Inna-as Ƹisa: "Ruḥ, aqa mmic iddar." Aryaz nni yumen zeg wawaȓ nni iy ḏas inna Ƹisa uca iruḥ.

⁵¹Ihewwa-d netta, mseȓqan akiḏes ixeddamen nnes nnan-as qa aḥarmuc nnec iddar.

⁵²Isseqsa-ṯen inna-asen: "Man ṯsaƹƹat nni ig igenfa?" Nnan-as: "Ɣar lwaḥḏa n yiḍennaṭ ag uƹecci ṯruḥ xas ṯmessi iy ḏayes."

⁵³Ȓexddenni yufa babas qa ḏi ȓweqṯ nni iy ḏas inna Ƹisa mmic aḏ iddar. Yumen netta ḏ marra ayṯbab n ṯeddarṯ nnes.

⁵⁴Ḏ ṯanita ḏ lmuƹjiza wis ṯnayen ig igga Ƹisa zeg wami iy d iffeɣ zi ṯmurṯ n Yahuḏiya ɣar ṯmurṯ n Ljalil.