Read Tarifit Yuḥanna 5 Bible Online

Yuḥanna 5 - Tarifit bible

Yuḥanna 5

¹Menbaƹd i manaya igaƹƹeḏ Ƹisa ɣar ṯendint n Lquds ḏeg yijjen n ȓƹiḏ n Ayṯ-Israʼil.

²Ḏi Lquds zzaṯ i Ṯewwarṯ Uḥuȓi ḏinni ṭṭarf nnes ijjen n ṣṣarij qqaren-as s wawaȓ n Ayṯ-Israʼil Bayt Ḥisda, ɣares xemsa n iseqqifen.

³Tɣiman ḏinni aṭṭas n imehȓac ḏ iḍarɣaȓen ḏ izeḥḥafen ḏ inecrufen,[4] {trajan aman n ṣṣarij aḏ nhezzen.

⁴Ṯhewwa-d Ijjen n lmalaʼika n Arebbi ɣar ṣṣarij nni ṯsenhezza aman nnes. Wenni ɣa ihwan ḏ amezwaru ḏeg waman nni xmi tenhezzan ataf aṯ sgenfan zi ȓehȓec nnes mammec ma igga.}

⁵Ḏinni ijjen n umehȓuc ṯmenya u ṯȓaṯin iseggwusa netta ihȓec.

⁶Yufi-ṯ Ƹisa izzeȓ ḏinni, issen qa aṭṭas n ȓweqṯ zeg wami netta ihȓec. Inna-as: "Ma ṯexseḏ aḏ tgenfiḏ?"

⁷Inna-as umehȓuc nni: "A Siḏi, war ɣari wi ḏayi ɣa isersen ḏi ṣṣarij xmi tenhezzan waman. Nec meȓmi ma rezzuɣ aḏ hwiɣ, tizwaren-ayi inneɣni."

⁸Uca inna-as Ƹisa: "Kkar, ysi ṯassuṯ nnec, uyur."

⁹Ȓexddenni igenfa uryaz nni, iysi ṯassuṯ nnes yuyur. Ḏi nhar n ssebṯ n lƹibada ig iwqeƹ manaya.

¹⁰Kkaren israʼiliyen nnan-as i wenni igenfan: "Nhara ḏ nhar n ssebṯ n lƹibada, war ɣarek bu ȓḥaqq aḏ teysiḏ ṯassuṯ nnec."

¹¹Inna-asen: "Wenni ḏayi isgenfan inna-ayi ysi ṯassuṯ nnec, uyur."

¹²Nnan-as: "Wi ḏac innan ysi ṯassuṯ nnec, uyur?"

¹³Aryaz nni war issin ca min iƹna wenni iy ṯ isgenfan minzi Ƹisa iweddar ḏi ȓɣaci nni.

¹⁴Menbaƹd i manayenni Ƹisa yufa wenni igenfan aqaṯ ḏi ṯemziḏa ṯameqqrant n Ayṯ-Israʼil inna-as: "Aqac ṯgenfiḏ, war tegg bu ȓmuƹṣiyaṯ ƹaweḏ ḥima war ḏac itewqiƹ ktar zi min tuɣa ḏayec."

¹⁵Iruḥ uryaz nni inna-asen i israʼiliyen qa ḏ Ƹisa iy ḏayi isgenfan.

¹⁶S manayenni rezzun israʼiliyen aḏ ƹeddben Ƹisa minzi itegg manaya ḏi nhar n ssebṯ n lƹibada.

¹⁷Inna-asen Ƹisa: "Baba ixeddem ȓebda, uȓa ḏ nec xeddmeɣ am netta."

¹⁸S manaya israʼiliyen rezzun ktar aṯ nɣen. War iǧi bu x ssabab n nhar n lƹibada u ṣafi, walakin ƹaweḏ xmi ḏasen iqqar belli Arebbi ḏ Babas itemsawa ixef nnes ak Arebbi.

¹⁹Inna-asen Ƹisa: "Aqa tesȓam ȓḥaqq: Mmis war izemmar aḏ igg can ṯmesȓayṯ s yixef nnes, ɣir min iẓerr zi Babas aqa itegg-iṯ. Min ma itegg Babas aqa itegg-iṯ uȓa ḏ Mmis.

²⁰Babas itexs Mmis, isbeyyan-as marra min itegg. Aḏas isbeyyen ȓexḏayem ṯimeqqranin x ṯmesȓayin-a ḥima aḏ tƹejjbem!

²¹Mammec d isnekkar Babas yinni immuṯen iticc-asen ṯuḏarṯ, uȓa ḏ Mmis iticc-asen ṯuḏarṯ i yinni ixes.

²²Babas war itḥissib ḥadd, yuca-as lḥisab marra i Mmis

²³ḥima marra aḏ karmen Mmis amec tkarramen Babas. Wenni war itkarrimen ca Mmis war itkarrim ca uȓa ḏ Babas iy ṯiḏ issekken.

²⁴Aqa tesȓam ȓḥaqq: Wenni itsȓan i wawaȓ inu itamen zeg wenni ḏayi d issekken, aɣares ṯiȓi ṯuḏarṯ n ȓebda war itiḏef ca ḏi lƹiqab, netta aḏ imutti zi ȓmewṯ ɣar ṯuḏarṯ.

²⁵Aqa tesȓam ȓḥaqq: Aḏ d tas ȓweqṯ aqa ȓexxu ṯusa-d, aḏ sȓen imettinen i ṣṣut n Mmis n Arebbi u yinni ḏas ɣa isȓen aḏ ddaren.

²⁶Am Babas ɣares ṯuḏarṯ ḏeg yixef nnes, ammu iy ḏas yuca i Mmis aɣares ṯiȓi ṯuḏarṯ ḏeg yixef nnes.

²⁷Yuca-as ƹaweḏ jjheḏ ḥima aḏ iḥaseb minzi netta ḏ Mmis n bnaḏem.

²⁸War tƹejjibem ca x manaya, qa aḏ d tas ȓweqṯ ḏayes ɣa sȓen ṣṣut nnes marra yinni iǧan ḏeg imeḍȓan niṯni aḏ d kkaren. Yinni iggin ṯimesȓayin ṯiṣebḥanin aḏ raḥen ɣar ṯuḏarṯ. Yinni iggin ṯimesȓayin ṯiƹeffanin aḏ d kkaren aḏ raḥen ɣar lƹiqab.

²⁹

³⁰Nec war zemmareɣ aḏ ggeɣ walu zeg yixef inu. Mammec tesȓiɣ, ammu tḥasabeɣ. Lḥisab inu n ȓḥaqq minzi nec war rezzuɣ ca min xseɣ; Lla, rezzuɣ min ixes wenni iy ḏayi d issekken."

³¹"Maƹlik cehḏeɣ x yixef inu, iȓi chaḏeṯ inu war ṯeǧi bu nican.

³²Ijjen nneɣni icehheḏ xafi. Nec ssneɣ chaḏeṯ iy xafi icehheḏ nettaṯ nican iy ṯeǧa.

³³Kenniw tuɣa ṯessekkem-d ɣar Yaḥya, netta icheḏ x lḥaqiqa.

³⁴Walakin nec war ḥḏijeɣ ca chaḏeṯ n bnaḏem. Qqareɣ-awem manaya ḥima aḏ tnejmem.

³⁵Yaḥya yusa-d ḏ ȓefnar ireqqan itecriqen, kenniw ṯexsem aḏ tfarḥem can ȓiyyam s nnur nnes.

³⁶Walakin nec ɣari ijjen n chaḏeṯ ḏ ṯameqqrant x ṯenni n Yaḥya. Min ḏayi d yuca Baba aṯid sbaneɣ, ṯimesȓayin-a s yixef nsent cehhḏent xafi belli issekk-ayi-d Baba.

³⁷Baba ḏayi d issekken ḏ netta iy xafi icehḏen. Kenniw ƹemmarṣ war ṯesȓim ca ṣṣut nnes, ƹemmarṣ war ṯeẓrim ca uḏem nnes.

³⁸Awaȓ nnes war ḏaywem itɣimi ca minzi wenni iy ṯid issekken war zzayes timnem ca.

³⁹Ṯrezzum ḏi Lkutub kenniw tɣir-awem ḏaysen ṯuḏarṯ n ȓebda. Iwa uȓa ḏ yina cehhḏen xafi.

⁴⁰Waxxa amenni kenniw war ṯxisem ca aɣari d tasem ḥima aɣarwem ṯiȓi ṯuḏarṯ.

⁴¹War ḥḏijeɣ ca aḏayi semɣaren yiwḏan.

⁴²Ssneɣ-kenniw belli war ḏaywem bu ȓemḥibbeṯ n Arebbi.

⁴³Nec usiɣ-d ḏeg yisem n Baba, kenniw war ḏayi ṯeqbiȓem ca. Walakin, meȓa yusa-d can yijjen nneɣni ɣarwem ḏeg yisem nnes nniṯ waha aṯ ṯqebȓem.

⁴⁴Mammec ɣa ṯeggem aḏ tamnem? Iwa kenniw texsem lƹaḍama n wayawya, war ṯrezzum ca x lƹaḍama n Arebbi aweḥḏani.

⁴⁵War tfekkarem ca azzaywem ceṯciɣ ɣar Baba; Lla, wenni iy zzaywem ɣa iceṯcan netta ḏ Musa wenni ḏi ṯeggim lʼamal nwem.

⁴⁶Maƹlik kenniw ṯumnem ḏi Musa, iȓi ṯumnem ḏayi uȓa ḏ nec minzi netta yura xafi.

⁴⁷Meȓa kenniw war ṯuminem ca zi min yura, mammec ɣa ṯeggem aḏ tamnem ḏeg wawaȓ inu?"