Read Tarifit Yuḥanna 8 Bible Online

Yuḥanna 8 - Tarifit bible

Yuḥanna 8

²Ak ṣbaḥ zic iḏweȓ-d ƹaweḏ ɣar ṯemziḏa ṯameqqrant n Ayṯ-Israʼil. Usin-d ɣares ȓɣaci marra, iqqim iseȓmaḏ-iṯen.

³Menbaƹd imseȓmaḏen n ccariƹa uȓa ḏ ifarrisiyen uwin-as-d ijjen n ṯemɣarṯ ufin-t ṯxeddeƹ aryaz nnes, sbedden-teṯ zzaṯsen.

⁴Nnan-as i Ƹisa: "A Lmuƹallim, ṯamɣarṯ-a ufin-t ṯxeddeƹ aryaz nnes.

⁵Iweṣṣa-aneɣ Musa ḏi ccariƹa inna-aneɣ qa amecnaw ṯanita at nerjem s uzru. Y cek, min ɣa ṯiniḏ?"

⁶Nnan-as niṯni manaya tjarraban-ṯ ḥima aṯ tahmen. Ikkar Ƹisa ihwa ɣar ṯmurṯ ibḏa itari ḏeg ucaȓ s ufus nnes.

⁷Wami niṯni qqimen amenni tseqsan-ṯ, ibedd inna-asen: "Wenni iǧan zzaywem ƹemmarṣ war iƹṣi at yuweṯ s uzru netta ḏ amezwaru."

⁸Ȓexddenni ihwa ƹaweḏ ɣar ṯmurṯ itari ḏeg ucaȓ.

⁹Wami sȓin i wawaȓ-a bḏan ugguren ij-ij, iwessura ḏ imezwura. Iqqim Ƹisa waḥḏes netta ḏ ṯemɣarṯ nni ṯbedd zzaṯes.

¹⁰Ibedd Ƹisa inna-as: "A ṯamɣarṯ, mani ǧan? Ma war xam iḥkim ḥadd?"

¹¹Ṯenna-as nettaṯ: "Wah, a Siḏi." Inna-as Ƹisa: "Uȓa ḏ nec war xam ḥekkmeɣ ca. Ruḥ, zi ssa aȓ ṯsawent war taḏaf ca ḏi ȓmuƹṣiyeṯ."

¹²Issiweȓ ɣarsen ƹaweḏ Ƹisa inna-asen: "Nec ḏ nnur n ddunect. Wenni ḏayi ɣa iḏfaren ƹemmarṣ aḏ yuyur ḏi ṯaǧest, aɣares yiȓi nnur n ṯuḏarṯ."

¹³Nnan-as ifarrisiyen: "Cek ṯcehhḏeḏ x yixef nnec, chaḏeṯ nnec war ṯeǧi ca ḏ ṣṣaḥ."

¹⁴Indeq-d Ƹisa inna-asen: "Lla, waxxa nec cehhḏeɣ x yixef inu, chaḏeṯ inu nican minzi nec ssneɣ manis iy d usiɣ ḏ mani ɣa raḥeɣ. Walakin kenniw war ṯessinem ca manis d usiɣ niɣ mani ɣa raḥeɣ.

¹⁵Kenniw tḥasabem ijjen s ȓaƹqeȓ waha, nec war tḥisibeɣ uȓa ḏ ijjen.

¹⁶U nec meȓa ḥasbeɣ, lḥisab inu nican ȓaḥeqqac war tḥisibeɣ ca waḥḏi, netḥasab nec ḏ Baba iy ḏayi d issekken.

¹⁷Ṯura ḏi ccariƹa nwem s yixef nnes belli chaḏeṯ n ṯnayen n ȓechuḏ nican.

¹⁸Nec cehhḏeɣ x yixef inu, u ƹaweḏ Baba iy ḏayi d issekken icehheḏ xafi."

¹⁹Nnan-as: "Mani iǧa Babac?" Inna-asen Ƹisa: "Kenniw war ḏayi ṯessinem ca, war ṯessinem uȓa ḏ Baba. Maƹlik ḏayi ṯessnem aḏ tiȓi ṯessnem uȓa ḏ Baba."

²⁰Inna awaȓ-a ḏi ṯemziḏa ṯameqqrant nsen mani jemmƹen ṣṣaḏaqa, iseȓmaḏ ḏinni. War ṯ iṭṭif uȓa ḏ ijjen minzi ȓweqṯ nnes ƹaḏ war d tuwiḍ.

²¹Inna-asen ƹaweḏ Ƹisa: "Nec aḏ uyureɣ kenniw axafi ṯerzum, ḏi ȓmuƹṣiyeṯ nwem aḏ temmṯem. Mani ɣa raḥeɣ nec, war ṯzemmarem ca aḏ d tasem ḏinni."

²²Nnan israʼiliyen nni: "Netta inna qa mani ɣa raḥeɣ nec, war ṯzemmarem ca aḏ d tasem ḏinni. Ma aḏ ineɣ ixef nnes niɣ?"

²³Inna-asen Ƹisa: "Kenniw zeg wadday iƹni zi ṯmurṯ, nec zeg ujenna. Kenniw zi ddunect-a, nec war ǧiɣ ca zi ddunect-a.

²⁴Nniɣ-awem aḏ temmṯem ḏi ȓmuƹṣiyaṯ nwem. Aḏ temmṯem ḏi ȓmuƹṣiyaṯ nwem iƹni meȓa kenniw war ṯuminem ca belli ḏ nec ig iǧan."

²⁵Nnan-as: "Min ṯeƹniḏ?" Inna-asen Ƹisa: "Nec ḏ wenni mixef ḏawem ssawaȓeɣ zeg umezwaru.

²⁶Ɣari aṭṭas n wawaȓen zemmareɣ aḏawem ṯen iniɣ, zzaysen iy ɣa ḥekmeɣ xawem. Wenni ḏayi d issekken netta ḏayes lḥaqiqa. Min sȓiɣ zzayes qqareɣ-ṯ i ddunect."

²⁷War fhimen ca belli netta issawaȓ-asen x Babas.

²⁸X manaya inna-asen Ƹisa: "Axmi ɣa ṯesbeddem Mmis n bnaḏem ḏeg ujenna, aḏ tessnem belli ḏ nec ig iǧan. War teggeɣ ca zi ɣari; Lla, nec ssawaȓeɣ x mammec ḏayi iseȓmaḏ Baba.

²⁹Wenni ḏayi d issekken aqaṯ akiḏi war ḏayi ijji bu waḥḏi minzi nec xeddmeɣ ȓebda min ḏas iteƹjiben."

³⁰Wami inna netta manaya, umnen zzayes aṭṭas n yiwḏan.

³¹Inna-asen Ƹisa i israʼiliyen yinni zzayes yumnen: "Meȓa ṯeqqimem ḏeg wawaȓ inu, aḏ tiȓim ḏ ṣṣaḥ ḏ imeḥḍaren inu.

³²Aḏ tessnem lḥaqiqa, u lḥaqiqa aḏawem d teḍȓeq aḏ tiȓim ḥurr."

³³Nnan-as: "Neccin zi ddurriṯ n Brahim, ƹemmarṣ war neǧi ḏ isemɣan i ḥadd. Mayemmi ḏaneɣ ṯenniḏ aḏ twaḍeȓqem aḏ tiȓim ḥurr?"

³⁴Inna-asen Ƹisa: "Aqa tesȓam ȓḥaqq: Marra wenni iteggen ȓmuƹṣiyeṯ netta ḏ ismeɣ, bab nnes ḏ ȓmuƹṣiyeṯ.

³⁵Ismeɣ war ɣares bu umcan ag lƹaʼila n ṯeddarṯ i ȓebda, walakin memmiṯsen wah ɣares amcan nnes i ȓebda.

³⁶Meȓa iḍȓeq-awem Mmis yuca-awem lḥurriya, aɣarwem ṯiȓi ḏ ṣṣaḥ lḥurriya.

³⁷Nec ssneɣ qa kenniw ḏ ddurriṯ n Brahim. Innama, kenniw ṯrezzum aḏayi ṯenɣem minzi awaȓ inu war ṯ ṯeqbiȓem ca.

³⁸Nec ssawaȓeɣ s min ẓriɣ ɣar Baba. Ȓa ḏ kenniw teggem s min ṯesȓim zi babaṯwem."

³⁹Arrin xas nnan-as: "Babaṯneɣ ḏ Brahim." Inna-asen Ƹisa: "Lla, maƹlik kenniw ḏ ddurriṯ n Brahim, iȓi qa ṯxeḏmem ȓexḏayem nnes.

⁴⁰Xzar, nec ḏ ijjen n bnaḏem ssiwȓeɣ akiḏwem s lḥaqiqa zi min sȓiɣ zi Arebbi. Ȓexxu kenniw ṯrezzum aḏayi ṯenɣem, mayemmi? Brahim ƹemmarṣ ma igga ammu.

⁴¹Lla, kenniw ṯxeddmem ȓexḏayem n babaṯwem." Nnan-as: "Neccin war d nexȓiq ca zi lfasad. Ɣarneɣ ijjen n Babaṯneɣ netta ḏ Arebbi."

⁴²Inna-asen Ƹisa: "Lla, maƹlik Babaṯwem ḏ Arebbi, ataf tḥibbim-ayi minzi nec ffɣeɣ-d zi Arebbi usiɣ-d. War d usiɣ ca zeg yixef inu; Lla, ḏ Baba iy ḏayi d issekken.

⁴³Mayemmi war ṯefhimem ca i min ḏawem qqareɣ? Ȓaḥeqqac war ṯzemmarem ca aḏ tqebȓem awaȓ inu.

⁴⁴Babaṯwem ḏ Ibȓis, ṯrezzum aḏ teḏfarem min ixes netta. Zeg umezwaru netta ineqq iwḏan. War ɣares ca lƹalaqa ak lḥaqiqa minzi netta war ḏayes bu lḥaqiqa. Meȓmi ma isxerraq, ataf issawaȓ zi min ḏayes minzi netta ḏ bu-ixerriqen, ḏ babaṯsen n ixerriqen.

⁴⁵Nec qqareɣ ȓḥaqq s manayenni kenniw war ḏayi timnem ca.

⁴⁶Min iƹna wenni izemmaren zzaywem aḏayi iṭṭef ȓmuƹṣiyeṯ? Meȓa qqareɣ ȓḥaqq, mayemmi war ḏayi timnem ca?

⁴⁷Wenni iǧan n Arebbi ataf netta itsȓa i wawaȓen n Arebbi. Kenniw war ṯesȓim ca minzi kenniw war ṯeǧim ca n Arebbi."

⁴⁸Nnan-as israʼiliyen nni: "Ɣarneɣ ȓḥaqq niɣ lla meȓa nenna cek zi Samarya, ḏayek jnun?"

⁴⁹Inna-asen Ƹisa: "Nec war ḏayi bu jnun tweqqareɣ Baba, kenniw tḥeggarem-ayi.

⁵⁰Nec war rezzuɣ ca lƹaḍama i yixef inu. Ḏinni wenni ḏayi t irezzun u netta ḏ wenni iḥekkmen.

⁵¹Aqa tesȓam ȓḥaqq: Wenni iteggen array i wawaȓ inu ataf war itwiȓi ȓmewṯ ƹemmarṣ."

⁵²Nnan-as israʼiliyen: "Ȓexxu nessen belli cek ḏayek jnun. Siḏna Brahim ḏ lʼanbiya marra mmuṯen. Cek ṯeqqareḏ meȓa can yijjen aḏ igg array i wawaȓ inu ƹemmarṣ aḏ iqqas ȓmewṯ.

⁵³Ma cek ktar zi jeddiṯneɣ Brahim ḏ lʼanbiya nni immuṯen? Min ṯḥessbeḏ ixef nnec?"

⁵⁴Inna-asen Ƹisa: "Nec meȓa semɣareɣ ixef inu, ataf lƹaḍama inu war ṯeǧi ḏ walu. Ḏ Baba iy ḏayi isemɣaren, ḏ wenni iy ṯeqqarem qa ḏ Arebbi nneɣ.

⁵⁵Kenniw war ṯ ṯessinem ca, nec ssneɣ-ṯ. Meȓa nniɣ uȓa ḏ nec war ṯ ssineɣ ca, aḏ iȓiɣ am kenniw ḏ bu-ixerriqen. Walakin nec ssneɣ-ṯ, teggeɣ array i wawaȓ nnes.

⁵⁶Jeddiṯwem Brahim ifareḥ aṭṭas ƹlaḥsab xmi ɣa iẓer nhar inu, wami ṯ iẓra ifareḥ."

⁵⁷Nnan-as israʼiliyen nni: "Ƹaḏ war ɣarek bu xemsin iseggwusa, mammec ṯeggiḏ ṯeẓriḏ Brahim nni?"

⁵⁸Indeq-d Ƹisa inna-asen: "Aqa tesȓam ȓḥaqq: Qbeȓ ma aḏ yiȓi Brahim, nec ǧiɣ."

⁵⁹Kkaren israʼiliyen nni ysin izra ḥima aṯ rejmen, walakin Ƹisa inesȓeṯ iffeɣ zi ṯemziḏa ṯameqqrant.